អតីតនាយករដ្ឋមន្ត្រីកម្ពុជា លោក ហ៊ុន សែន បានកាត់ដីជាង ១២០០ហិកតារ ស្ថិតនៅឃុំពងទឹក ស្រុកដំណាក់ចង្អើរ ខេត្តកែប ប្រគល់ឲ្យក្រុមហ៊ុន ធីភី ម៉ូរ៉ាល់ របស់ឧកញ៉ា ឃុន សៀ ដើម្បីធ្វើការអភិវឌ្ឍ។
ក្នុងអនុក្រឹត្យចុះថ្ងៃទី៦ ខែមីនា ឆ្នាំ២០២៣ ដែលទើបត្រូវបានផ្សព្វផ្សាយជាសាធារណៈ ឲ្យដឹងថា លោក ហ៊ុន សែន បានកាត់ដីទំហំ ១៤៦៧ហិកតារនៅចំនួន ២ទីតាំង ក្នុងនោះដីទំហំ ២៨៥ហិកតារនៅសង្កាត់កែប ក្រុងកែប និងនៅឃុំអង្កោល រួមទាំងឃុំពងទឹក ស្រុកដំណាក់ចង្អើរ ខេត្តកែប។
លើសពីនេះទៀត ដីទំហំ ២២០ហិកតារប្រគល់ទៅឲ្យរដ្ឋបាលខេត្តកែប សម្រាប់រៀបចំជាពហុកីឡដ្ឋាន និងហេដ្ឋារចនាសម្ព័ន្ធសាធារណៈ។ ចំណែកដីទំហំចំនួន ១២៤៧ហិកតារស្ថិតនៅឃុំពងទឹក ស្រុកដំណាក់ចង្អើរ ខេត្តកែប ត្រូវបានប្រគល់ទៅឲ្យក្រុមហ៊ុន ធីភី ម៉ូរ៉ាល់ សម្រាប់អភិវឌ្ឍគម្រោងវិនិយោគទីក្រុងរណប និងតំបន់ទេសចរណ៍ពិសិដ្ឋ ចាប់ពីថ្ងៃចុះហត្ថលេខាតទៅ។
ការសម្រេចកាត់ផ្ទៃដីនេះ ធ្វើឡើងយោងតាមសំណើរបស់ក្រសួងរៀបចំដែនដី នគរូបនីយកម្ម និងសំណង់។
ក្រៅពីកាត់ដីជិត ១៣០០ហិកតារប្រគល់ឲ្យឧកញ៉ា ឃុន សៀ គឺលោក ហ៊ុន សែន កាលពីថ្ងៃទី២៧ ខែធ្នូ ឆ្នាំ២០២២ ក៏បានកាត់ឆ្វៀលផ្ទៃដីអាងទឹកស្វាយខម ស្ថិតក្នុងស្រុកបាទី ខេត្តតាកែវ ប្រគល់ឲ្យក្រុមហ៊ុនឧកញ៉ា ឃុន សៀ ដើម្បីធ្វើកម្មសិទ្ធិផងដែរ។
លើសពីនេះ ឆ្នាំ២០២០ លោក ហ៊ុន សែន បានជួលផ្ទៃដីបឹងវាលសំណាបសរុប ៣៥០០ហិកតារប្រគល់ទៅឲ្យក្រុមហ៊ុន ឃុន សៀ សម្រាប់អភិវឌ្ឍរយៈពេល ៥០ឆ្នាំ ខណៈឆ្នាំ២០២០ ដដែល រដ្ឋាភិបាលក៏បានកាត់ដីកោះមាសដែលមានទំហំ ៣៤០ហិកតារ ស្ថិតក្នុងភូមិសាស្ត្រខណ្ឌច្បារអំពៅ រាជធានីភ្នំពេញ និងស្រុកចំនួនពីរក្នុងខេត្តកណ្តាល ទៅឲ្យក្រុមហ៊ុន ឃុន សៀ ដើម្បីអភិវឌ្ឍក្នុងរយៈពេល ៥០ឆ្នាំផងដែរ៕