28 C
Phnom Penh

លោក ហ៊ុន ម៉ាណែត នឹង​ត្រូវ​បំភ្លឺ​ពី​ជំហរ​របស់​ខ្លួន​ក្នុង​កិច្ចប្រជុំ​ទ្វេភាគី​ចំពោះ​មុខ​មន្ត្រី​ការទូត​ជាន់ខ្ពស់​អាមេរិក

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ត​ពូជ​ថ្មី​របស់​កម្ពុជា​លោក ហ៊ុន ម៉ាណែត នឹង​ត្រូវ​បំភ្លឺ​ចំពោះ​មុខ​មន្ត្រី​ជាន់ខ្ពស់​នៃ​ក្រសួង​ការបរទេស​សហរដ្ឋ​អាមេរិក ក្នុង​ជំនួប​ដាច់ដោយឡែក​មួយ​នៅ​ពេល​ដែល​លោក​មក​ចូលរួម​មហាសន្និបាត​នៃ​អង្គការ​សហប្រជាជាតិ នៅ​ថ្ងៃទី​២២ ខែ​កញ្ញា ខាងមុខ​នេះ។

ជំនួប​ដាច់ដោយឡែក​នេះ ត្រូវ​គេ​ដឹង​ថា ភាគី​សហរដ្ឋ​អាមេរិក​អាច​នឹង​លើកឡើង​អំពី​ការ​ធ្លាក់​ចុះ​នៃ​លទ្ធិប្រជាធិបតេយ្យ ការ​គោរព​សិទ្ធិមនុស្ស និង​ភូមិសាស្ត្រ​នយោបាយ។

មន្ត្រី​ជាន់ខ្ពស់​នៃ​ក្រសួង​ការបរទេស​សហរដ្ឋ​អាមេរិក​មួយ​រូប​បាន​ទម្លាយ​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​១៥ កញ្ញា នេះ​ថា កិច្ចប្រជុំ​ទ្វេភាគី​ដាច់ដោយឡែក​មួយ​ជាមួយ​មន្ត្រី​ជាន់ខ្ពស់​របស់​សហរដ្ឋ​អាមេរិក​ជាមួយ​លោក ហ៊ុន ម៉ាណែត នៅ​ពេលនេះ គឺជា​ជំនួប​លើកដំបូង​បំផុត​មួយ​ចាប់តាំងពី​លោក ហ៊ុន ម៉ាណែត ត្រូវ​បាន​ដាក់​ឲ្យ​ដឹកនាំ​បន្ត​ពី​ឪពុក​របស់​គាត់។

មន្ត្រី​សហរដ្ឋ​អាមេរិក​រូប​នោះ​បញ្ជាក់​ថា សហរដ្ឋ​អាមេរិក​នៅតែ​ព្រួយបារម្ភ​អំពី​បញ្ហា​សិទ្ធិមនុស្ស​នៅ​កម្ពុជា និង​ការ​អនុវត្ត​លទ្ធិប្រជាធិបតេយ្យ ដូចជា​ការ​កាត់ទោស​ប្រធាន​គណបក្ស​សង្គ្រោះ​ជាតិ​លោក កឹម សុខា ការ​ឃុំ​ខ្លួន​សកម្មជន​សិទ្ធិមនុស្ស​កញ្ញា សេង ចន្ទធារី ព្រមទាំង​សកម្មជន​សង្គម និង​សកម្មជន​នយោបាយ​ដទៃ​ទៀត​ដែល​កំពុង​រង​នូវ​ការ​ចោទប្រកាន់ និង​ការ​ចាប់​ឃុំ​ខ្លួន​ទាំង​អយុត្តិធម៌​នា​ពេល​កន្លងមក។

មន្ត្រី​ការទូត​សហរដ្ឋ​អាមេរិក​រូប​នោះ​បញ្ជាក់​ថា អ្វី​ដែល​អាមេរិក​កាន់តែ​ចង់​ដឹង​ពី​ជំហរ​នាយករដ្ឋមន្ត្រី​ត​ពូជ​ថ្មី​របស់​កម្ពុជា​ទៀត​នោះ គឺ​ថា​តើ​កម្ពុជា​នឹង​រក្សា​ជំហរ​ដោយ​ស្មោះត្រង់​របស់​ខ្លួន​ដូចម្តេច​ចំពោះ​បញ្ហា​ដ៏​រសើប​ជុំវិញ​ការ​សង្ស័យ​ពី​វត្តមាន​កងទ័ព​ចិន​នៅ​មូលដ្ឋាន​ជើងទឹក​រាម​របស់​កម្ពុជា ស្រប​ពេល​ដែល​មូលដ្ឋាន​យោធា​ជើងទឹក​រាម កំពុង​ត្រូវ​បាន​ធ្វើ​ទំនើបកម្ម​ជា​បន្តបន្ទាប់​ក្រោម​ជំនួយ​របស់​ចិន។

នៅ​ពេលនេះ លោក ហ៊ុន ម៉ាណែត កំពុង​ធ្វើ​ទស្សនកិច្ច​នៅ​ប្រទេស​ចិន​រយៈពេល ៣​ថ្ងៃ ចាប់ពី​ថ្ងៃទី​១៤ ដល់​ថ្ងៃទី​១៦ ក្នុង​នោះ​នៅ​ថ្ងៃ​សុក្រ​នេះ លោក ហ៊ុន ម៉ាណែត ក៏​បាន​ជួប​ជាមួយ​ប្រធានាធិបតី​ចិន លោក ស៊ី ជីនពីង ផង​ដែរ​នៅ​ឯ​មហា​វិមាន​ប្រជាជន ក្នុង​រដ្ឋធានី​ប៉េកាំង ប៉ុន្តែ​ក្រសួង​ការបរទេស​នៃ​ប្រទេស​ទាំង​ពីរ​មិនទាន់​ចេញ​សេចក្តី​ថ្លែងការណ៍​ណា​មួយ​បង្ហាញ​ពី​ខ្លឹមសារ​នៃ​ជំនួប​នេះ​នៅឡើយ​ទេ។

ក្នុង​ដំណើរ​ទស្សនកិច្ច​នេះ លោក ហ៊ុន ម៉ាណែត ក៏​បាន​ជួប​ជាមួយ​ក្រុមហ៊ុន​ចិន​ធំៗ​ផង​ដែរ ក្នុង​នោះ​លោក ហ៊ុន ម៉ាណែត បញ្ជាក់​ទៅ​កាន់​តំណាង​ក្រុមហ៊ុន​ចិន China Road and Bridge Corporation (CRBC) ដែល​កំពុង​វិនិយោគ​លើ​គម្រោង​សាងសង់​ផ្លូវ ស្ពាន និង​ហេដ្ឋារចនាសម្ព័ន្ធ​នៅ​កម្ពុជា​បច្ចុប្បន្ន​នេះ​ថា រាជរដ្ឋាភិបាល​កម្ពុជា​បាន​ត្រៀម​លក្ខណៈ​រួច​ជា​ស្រេច​ក្នុង​ការ​សហការ និង​សម្របសម្រួល​បន្ត​ទៅ​មុខ​ទៀត​ជាមួយ​ក្រុមហ៊ុន និង​លើក​ទឹកចិត្ត​ឱ្យ​ក្រុមហ៊ុន​នេះ​បន្ត​ការ​វិនិយោគ​បន្ថែម​ទៀត​នៅ​កម្ពុជា។

ក្រុម​អ្នក​សង្កេតការណ៍​លើកឡើង​ថា នយោបាយ​ការទូត​រវាង​កម្ពុជា-អាមេរិក និង​នយោបាយ​ការទូត​រវាង​កម្ពុជា-ចិន សម្រាប់​រដ្ឋាភិបាល​ថ្មី​ដែល​ដឹកនាំ​ដោយ​កូនប្រុស​លោក ហ៊ុន សែន គឺ​លោក ហ៊ុន ម៉ាណែត គ្មាន​អ្វី​ប្លែក​ខុស​ពី​ជំនាន់​លោក ហ៊ុន សែន ដឹកនាំ​នោះ​ទេ គឺ​ពួកគេ​នៅ​បន្ត​លេង​ល្បែង​នយោបាយ​ការទូត​មិន​ស្មោះត្រង់​ជាមួយ​សហរដ្ឋ​អាមេរិក​ដដែល ដោយ​លម្អៀង​ទៅ​រក​ចិន ដើម្បី​ងាយ​ស្រួល​ក្នុង​ការ​ខ្ចី​លុយ​តាម​ទំនើង​ចិត្ត និង​ការ​ការពារ​អំណាច​គ្រួសារ​របស់​ខ្លួន​ទៅ​ថ្ងៃ​មុខ​បន្ត​ទៀត​តែប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស