29 C
Phnom Penh

មន្ត្រី​បក្ស​ប្រឆាំង​រិះគន់​ការ​តែងតាំង​ស្នងការ​រង មេ​ប៉ូលិស​អន្តោប្រវេសន៍​និង​អនុប្រធាន​ច្រើន​លើសលប់

ដោយ ឌឹ ខេមបូឌា ដេលី

បទវិភាគ

តំណាងរាស្ត្រ​អតីត​បក្ស​សង្គ្រោះ​ជាតិ​មួយ​រូប រិះគន់​ចំពោះ​ការ​តែងតាំង​ស្នងការ​រង​ខេត្ត​មួយ​ចំនួន​រហូត​ទៅ​ដល់​ជិត ៥០​នាក់ និង​មេ​ប៉ូលិស​អន្តោប្រវេសន៍ ហើយ​អនុប្រធាន​នៃ​ច្រក​ព្រលាន​យន្តហោះ​អន្តរជាតិ​ភ្នំពេញ មាន​ចំនួន​ច្រើន​លើសលប់​ក្នុង​អាណត្តិ​ដឹកនាំ​ដោយ​លោក ហ៊ុន ម៉ាណែត ថា​ធ្វើ​ឲ្យ​ពលរដ្ឋ​កាន់តែ​រង​នូវ​បន្ទុក​បង់​ពន្ធ​ធ្ងន់ធ្ងរ។

លោក អ៊ុំ សំអាន បាន​សរសេរ​លើ​ហ្វេសប៊ុក​របស់​លោក​កាលពី​ថ្ងៃទី​១៧ កញ្ញា ថា រដ្ឋាភិបាល​របស់​លោក ហ៊ុន ម៉ាណែត មិន​មែន​មាន​តែ​មន្ត្រី​ជាន់ខ្ពស់ ទីប្រឹក្សា និង​ជំនួយការ​រាប់​ពាន់​នាក់​នោះ​ទេ ប៉ុន្តែ​រដ្ឋាភិបាល​លើក​បន្តុប​ថ្មី​នេះ ក៏​បាន​តែងតាំង​ស្នងការ​រង​នគរបាល​ច្រើន​លើសលប់​នៅ​តាម​ខេត្ត​នីមួយៗ ខណៈ​អភិបាល​រង អគ្គនាយករង អនុប្រធាន នាយរង​ក៏​ច្រើន​លើសលប់​ដែរ។ ជាក់ស្ដែង លោក​ថា​គ្រាន់តែ​ស្នងការ​រង​នគរបាល​ខេត្ត​បាត់ដំបង មាន​ចំនួន ៤៧​នាក់ និង​ស្នងការ​រង​នគរបាល​ខេត្ត​កំពត មាន​ចំនួន ៣៤​នាក់ ហើយ​ស្នងការ​រង​នគរបាល​ខេត្ត​ព្រះសីហនុ មាន​ចំនួន ២៧​នាក់។ ចំនួន​នេះ បើ​ប្រៀបធៀប​ទៅ​នឹង​រដ្ឋាភិបាល​នៅ​ឆ្នាំ​១៩៩៣ វិញ លោក​ថា​ស្នងការ​រង​នគរបាល​នៅ​តាម​ខេត្ត​នីមួយៗ​មាន​តែ​ចំនួន ៤​នាក់​ប៉ុណ្ណោះ។

ក្រៅពី​តែងតាំង​ស្នងការ​រង និង​អភិបាលរង រដ្ឋាភិបាល​របស់​លោក ហ៊ុន ម៉ាណែត ក៏​បាន​តែងតាំង​មេ​ប៉ូលិស និង​អនុប្រធាន​អន្តោប្រវេសន៍​នៃ​ច្រក​ព្រលាន​យន្តហោះ​អន្តរជាតិ​ភ្នំពេញ​ចំនួន ៩៩​នាក់ ខណៈ​មេ​ច្រក​ព្រំដែន​មាន​ទាំង​នាយរង​រាប់​សិប​នាក់ ហើយ​អគ្គនាយករង និង​អនុប្រធាន​នាយកដ្ឋាន​នីមួយៗ ព្រមទាំង​អភិបាល​រង​ស្រុក​នីមួយៗ​មាន​រាប់​សិប​នាក់​ដែរ។

លោក​បន្ត​ថា រដ្ឋាភិបាល​អាណត្តិ​ទី​៧ ឆ្នាំ​២០២៣ ដឹកនាំ​ដោយ​លោក ហ៊ុន ម៉ាណែត បើ​ប្រៀបធៀប​ជាមួយ​នឹង​រដ្ឋាភិបាល​ឆ្នាំ​១៩៩៣ វិញ លោក​ថា​អភិបាលរង អគ្គនាយករង អនុប្រធាន នាយរង​តាម​ស្ថាប័ន​នីមួយៗ​មាន​តែ​ពីរ ឬ​បី​នាក់​ប៉ុណ្ណោះ។

លោក​ថា ការ​តែងតាំង​មន្ត្រី​សំពីងសំពោង​បែប​នេះ វា​នឹង​ធ្វើ​ឲ្យ​ពលរដ្ឋ​កាន់តែ​រងគ្រោះ និង​ទទួល​បន្ទុក​កាន់តែ​ធ្ងន់​បន្ថែម​ទៀត​ក្នុង​ការ​បង់​ពន្ធ ដើម្បី​ឲ្យ​រដ្ឋាភិបាល​ដឹកនាំ​ដោយ​លោក ហ៊ុន ម៉ាណែត យក​ថវិកា​ដែល​ពលរដ្ឋ​បង់​ពន្ធ​នោះ ទៅ​បើក​ប្រាក់ខែ ឬ​ចិញ្ចឹម​ពួក​អ្នក​ធំ និង​មន្ត្រី​ទាំងនោះ។

លោក អ៊ុំ សំអាន អះអាង​ថា បច្ចុប្បន្ន​ក្រុម​មន្ត្រី និង​អ្នក​ធំ​ទាំងនោះ​កំពុងតែ​សប្បាយ​នឹង​ចែក​តំណែង ចែក​កូតា និង​ចែក​អំណាច​គ្នា ដោយ​មិន​អាណិត​ពលរដ្ឋ​ដែល​ខំ​បង់​ពន្ធ​ឡើយ។

ចាប់តាំង​ពី​លោក ហ៊ុន ម៉ាណែត ទទួល​បាន​តំណែង​នាយករដ្ឋមន្ត្រី​ដែល​ឪពុក​លើក​បន្តុប​កាលពី​ថ្ងៃទី​២២ ខែ​សីហា ឆ្នាំ​២០២៣ គេ​សង្កេត​ឃើញ​រដ្ឋបាល​របស់​លោក​បាន​បង្កើន​ចំនួន​ទីប្រឹក្សា និង​ជំនួយការ​របស់​រដ្ឋាភិបាល​ចំនួន​រាប់​ពាន់​នាក់។ ចំណែក​រដ្ឋលេខាធិការ និង​អនុ​រដ្ឋលេខាធិការ ព្រមទាំង​អគ្គនាយក​នៅ​តាម​ក្រសួង ក៏​បាន​កើន​ឡើង​ច្រើន​លើសលប់​ផង​ដែរ។

ការ​ដាក់​ចំនួន​សមាជិក​រដ្ឋាភិបាល​មាន​ទំហំ​ច្រើន​លើសលប់​បែប​នេះ ត្រូវ​បាន​អ្នកវិភាគ​ធ្លាប់​លើកឡើង​ថា មិន​មែន​ជា​សញ្ញា​ល្អ​ធ្វើ​ឱ្យ​ប្រទេស​ជាតិ​រីកចម្រើន​នោះ​ទេ ប៉ុន្តែ​វា​គឺជា​សញ្ញា​អាក្រក់​នៃ​ការ​បំផ្លាញ​ជាតិ​ប៉ុណ្ណោះ ហើយ​ការ​បំផ្លាញ​មុន​គេ​បង្អស់ គឺ​បំផ្លាញ​លុយ​របស់​ពលរដ្ឋ​ដែល​បាន​បង់​ពន្ធ​ជូន​រដ្ឋ​ដើម្បី​កសាង​ប្រទេស​តែម្តង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស