 បានអះអាងថា ជំនួយ ១៨លានដុល្លារដែលសហរដ្ឋអាមេរិកបានផ្អាកក្រោយការបោះឆ្នោតជ្រើសតាំងតំណាងរាស្ត្រនីតិកាលទី៧ កន្លងមក ដែលនឹងផ្តល់ឱ្យកម្ពុជាឡើងវិញនោះ គឺពុំបានផ្តល់ឲ្យរដ្ឋាភិបាលកម្ពុជាអនុវត្តដោយផ្ទាល់នោះទេ។){kind=link}
មន្ត្រីរបស់ភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) បានអះអាងថា ជំនួយ ១៨លានដុល្លារដែលសហរដ្ឋអាមេរិកបានផ្អាកក្រោយការបោះឆ្នោតជ្រើសតាំងតំណាងរាស្ត្រនីតិកាលទី៧ កន្លងមក ដែលនឹងផ្តល់ឱ្យកម្ពុជាឡើងវិញនោះ គឺពុំបានផ្តល់ឲ្យរដ្ឋាភិបាលកម្ពុជាអនុវត្តដោយផ្ទាល់នោះទេ។
មន្ត្រីរបស់ភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) បានប្រាប់សារព័ត៌មាន ឌឹ ខេមបូឌា ដេលី ក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ជំនួយ ១៨លានដុល្លារដែលសហរដ្ឋអាមេរិកផ្តល់ឲ្យនោះ គឺសម្រាប់អង្គការសង្គមស៊ីវិលដែលធ្វើការផ្ដោតលើបញ្ហាប្រជាធិបតេយ្យ និងកម្មវិធីសិទ្ធិមនុស្ស ហើយថវិកានេះគឺភ្នាក់ងារអាមេរិកសម្រាប់ការអភិវឌ្ឍអន្តរជាតិ ឬ USAID ជាអ្នកចាត់ចែង។
ប្រភពដដែលបានឲ្យដឹងថា ថវិកានោះពុំបានផ្តល់ឲ្យរដ្ឋាភិបាលកម្ពុជាតាមរយៈរដ្ឋាភិបាលអាមេរិកនោះទេ គឺអង្គការក្រៅរដ្ឋាភិបាលជាអ្នកអនុវត្ត។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាស្ដីពីលទ្ធផលនៃជំនួបរវាងលោក ហ៊ុន ម៉ាណែត ជាមួយលោកស្រី វ៉ិចតូរីយ៉ា នូលែន អនុរដ្ឋមន្ត្រីការបរទេសស្តីទីអាមេរិក នៅថ្ងៃទី២២កញ្ញា បានឲ្យដឹងថា នៅចំពោះមុខលោក ហ៊ុន ម៉ាណែត លោកស្រី វ៉ិចតូរីយ៉ា នូលែន បានបញ្ជាក់ថា អាមេរិកសម្រេចផ្តល់ជូនឡើងវិញនូវជំនួយក្នុងទំហំទឹកប្រាក់ប្រមាណ ១៨លានដុល្លារដែលបានផ្អាកក្រោយការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣។
ក្រោយការបោះឆ្នោតជ្រើសតាំងតំណាងរាស្ត្រនីតិកាលទី៧ បានមួយថ្ងៃ ពោលគឺនៅថ្ងៃទី២៤ ខែកក្កដា ឆ្នាំ២០២៣ សហរដ្ឋអាមេរិកបានប្រកាសភ្លាមៗពីការកាត់ផ្ដាច់ផ្នែកខ្លះនៃជំនួយបរទេសមកឲ្យកម្ពុជា រួមទាំងការរឹតត្បិតទិដ្ឋាការទៅលើមន្ត្រីរដ្ឋាភិបាលមួយចំនួនថែមទៀត។
ការសម្រេចបែបនេះ គឺដោយសារអាមេរិកមើលឃើញពីការបោះឆ្នោតជ្រើសតាំងតំណាងរាស្ត្រនីតិកាលទី៧ របស់កម្ពុជា ធ្វើឡើងដោយមិនសេរី និងមិនយុត្តិធម៌ ដែលបំផ្លាញលទ្ធិប្រជាធិបតេយ្យនៅកម្ពុជាធ្ងន់ធ្ងរ៕