28 C
Phnom Penh

ក្រុមហ៊ុន Times Square នៅ​ញូវយ៉ក​បញ្ជាក់​ថា​គ្មាន​គោលការណ៍​ផ្សាយ​ពាណិជ្ជកម្ម​មិន​គិត​លុយ​នោះ​ទេ

ដោយ ឌឹ ខេមបូឌា ដេលី

បទវិភាគ

សកម្មជន​បរិស្ថាន​មួយ​រូប​បាន​ទម្លាយ​ថា ក្រុមហ៊ុន​ផ្សព្វផ្សាយ​ពាណិជ្ជកម្ម Time Square Billboard គ្មាន​គោលការណ៍​ផ្សព្វផ្សាយ​ពាណិជ្ជកម្ម​ដោយ​មិន​បង់​លុយ​នោះ​ទេ ដូច្នេះ​ការ​ផ្សព្វផ្សាយ​របស់​មន្ត្រី​រដ្ឋាភិបាល​កម្ពុជា គឺជា​ល្បិច​ភូតភរ​កុហក​ពលរដ្ឋ​ខ្មែរ​ដើម្បី​កេង​ចំណេញ​នយោបាយ​ប៉ុណ្ណោះ។

សកម្មជន​បរិស្ថាន កញ្ញា លឹម គឹមសួរ បាន​សរសេរ​នៅ​លើ​គណនី​ហ្វេសប៊ុក​របស់​កញ្ញា​នៅ​ថ្ងៃទី​២៧ កញ្ញា នេះ​ថា ខ្លួន​បាន​ផ្ញើ​សារ​ទៅ​កាន់​ក្រុមហ៊ុន​ផ្សាយ​ពាណិជ្ជកម្ម Time Square Billboard តាមរយៈ​អីមែល​កាលពី​ពេល​ថ្មីៗ​នេះ​ទាក់ទិន​នឹង​ការ​ផ្សាយ​រូបថត​របស់​លោក ហ៊ុន ម៉ាណែត លើ​ផ្ទាំង​ប៉ាណូ​ផ្សព្វផ្សាយ​ពាណិជ្ជកម្ម Billboard នៅ Time Square ក្នុង​ទីក្រុង​ញ៉ូវយ៉ក លើ​ទឹកដី​សហរដ្ឋ​អាមេរិក អំឡុង​ពេល​គាត់​ទៅ​ចូលរួម​កិច្ចប្រជុំ​នៅ​អង្គការ​សហប្រជាជាតិ​កាលពី​ថ្ងៃទី​២២ កញ្ញា កន្លងទៅ​នេះ។ កញ្ញា​បន្ត​ថា ជា​ការ​ឆ្លើយតប​របស់​ក្រុមហ៊ុន គឺ​មិន​ដូច​ការ​អះអាង​របស់​ខុទ្ទកាល័យ​នាយករដ្ឋមន្ត្រី​កម្ពុជា​នោះ​ទេ។

កញ្ញា លឹម គឹមសួរ អះអាង​ថា ក្រុមហ៊ុន​ផ្សាយ​ពាណិជ្ជកម្ម​បាន​ឆ្លើយតប​នឹង​សារ​តាម​អ៊ីមែល​របស់​កញ្ញា​ថា Time Square Billboard មិន​មាន​គោលការណ៍​ផ្សព្វផ្សាយ​ដោយ​មិន​បង់​លុយ​ថ្លៃ​សេវា​នោះ​ឡើយ ហើយ​ជាង​នេះ​ទៅ​ទៀត ការ​ផ្សព្វផ្សាយ​នៅ​លើ​ផ្ទាំង​ប៉ាណូ​ផ្សព្វផ្សាយ​ពាណិជ្ជកម្ម Billboard នេះ ត្រូវ​បាន​ហាម​ដាច់ខាត​មិន​ឱ្យ​ពាក់ព័ន្ធ​នឹង​រឿង​នយោបាយ​នោះ​ទេ។

ប្រភព​ដដែល​បញ្ជាក់​ថា ក្រុមហ៊ុន​ផ្សព្វផ្សាយ​ពាណិជ្ជកម្ម​នេះ​បាន​បញ្ជាក់​ច្បាស់ៗ​ថា ពួកគេ​មិន​ស្គាល់​ឈ្មោះ Devid Soth ដែល​មន្ត្រី​រដ្ឋាភិបាល​កម្ពុជា​បាន​អះអាង​ថា​ជា​យុវជន​ដែល​កំពុង​បម្រើ​ការ​ក្នុង​ក្រុមហ៊ុន​របស់​ខ្លួន​នោះ​ទេ ដូច្នេះ​មាន​ន័យ​ថា ការ​អះអាង​របស់​មន្ត្រី​រដ្ឋាភិបាល​កម្ពុជា​ដែល​ថា​បុគ្គល​ឈ្មោះ Devid Soth គឺជា​បុគ្គលិក​សំខាន់​របស់​ក្រុមហ៊ុន​រហូត​អាច​ធ្វើ​ឱ្យ​ថៅកែ​ក្រុមហ៊ុន​យល់ព្រម​ផ្សព្វផ្សាយ​រូប​លោក ហ៊ុន ម៉ាណែត ដោយ​គ្មាន​បង់​លុយ​នោះ គឺ​រឹតតែ​បញ្ជាក់​ថា​មិនមែន​ជា​ការពិត​ថែម​ទៀត។

មន្ត្រី​រដ្ឋាភិបាល​កម្ពុជា​កន្លងមក​អះអាង​ថា រូបថត​លោក ហ៊ុន ម៉ាណែត ដែល​ត្រូវ​បាន​ប្រធាន​ក្រុមហ៊ុន​ផ្សព្វផ្សាយ​ពាណិជ្ជកម្ម​នៅ​អាមេរិក​អនុញ្ញាត​ឱ្យ​ផ្សព្វផ្សាយ​លើ​ប៉ាណូ​ពាណិជ្ជកម្ម​របស់​ពួកគេ គឺ​ធ្វើឡើង​ដោយ​មិន​បង់​លុយ​នោះ​ទេ ដោយសារ​អាមេរិក​ស្វាគមន៍​ដំណើរ​របស់​នាយករដ្ឋមន្ត្រី​កម្ពុជា​ទៅ​កាន់​សហរដ្ឋ​អាមេរិក​ប៉ុណ្ណោះ។

កាលពី​ថ្ងៃទី​២៣ ខែ​កញ្ញា ឆ្នាំ​២០២៣ លោក ហ៊ុន សែន ដែល​ជា​ឪពុក​លោក ហ៊ុន ម៉ាណែត បាន​សរសេរ​លើ​ទំព័រ​ហ្វេសប៊ុក​របស់​ខ្លួន​ថា ផ្ទាំង​ប៉ាណូ​នៅ​ចំ​កណ្តាល​ទីក្រុង​ញូវយ៉ក តំបន់ Times Square ស្វាគមន៍​វត្តមាន​លោក ហ៊ុន ម៉ាណែត ដែល​ជា​នាយករដ្ឋមន្ត្រី​ថ្មី​របស់​កម្ពុជា​លើ​ទឹកដី​សហរដ្ឋ​អាមេរិក។

យ៉ាងណា​ក៏ដោយ លោក ហ៊ុន សែន មិន​បាន​បញ្ជាក់​ថា ការ​ផ្សព្វផ្សាយ​នោះ​ធ្វើឡើង​ដោយ​បង់​ប្រាក់ ឬ​មិន​បាន​បង់​ប្រាក់​នោះ​ទេ។

ផ្ទុយទៅវិញ ខុទ្ទកាល័យ​នាយករដ្ឋមន្ត្រី​កម្ពុជា បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃទី​២៥ ខែ​កញ្ញា ឆ្នាំ​២០២៣ នេះ​ថា ការ​ផ្សាយ​រូបថត​លោក ហ៊ុន ម៉ាណែត លើ​ផ្ទាំង​ប៉ាណូ​ផ្សព្វផ្សាយ​ពាណិជ្ជកម្ម Billboard នៅ Time Square មិនមែន​ជា​ការ​រៀបចំ​របស់​រដ្ឋាភិបាល​កម្ពុជា​ឡើយ ហើយ​រដ្ឋាភិបាល​ក៏​មិន​បាន​ចំណាយ​លុយ​លើ​ការ​ផ្សព្វផ្សាយ​នេះ​ដែរ។

ខុទ្ទកាល័យ​នាយករដ្ឋមន្ត្រី​កម្ពុជា បញ្ជាក់​ថា ការ​ផ្សព្វផ្សាយ​នេះ គឺ​ផ្តើម​ចេញពី​មនោសញ្ចេតនា​របស់​យុវជន​ម្នាក់​ឈ្មោះ Devid Soth ដែល​កំពុង​បម្រើ​ការ​ក្នុង​ក្រុមហ៊ុន​ផ្សព្វផ្សាយ​ពាណិជ្ជកម្ម​នោះ​ប៉ុណ្ណោះ ដែល​រូបគេ​គឺជា​បុគ្គល​សំខាន់​រហូត​ធ្វើ​ឱ្យ​ថៅកែ​ក្រុមហ៊ុន​ផ្តល់​នូវ​ការ​គាំទ្រ ហើយ​សម្រេច​ឱ្យ​ផ្សព្វផ្សាយ​រូប​របស់​លោក ហ៊ុន ម៉ាណែត ដោយ​មិន​គិត​ថ្លៃ​តែម្តង។

យ៉ាងណាក៏ដោយ ក្រុមហ៊ុន​ផ្សព្វផ្សាយ​ពាណិជ្ជកម្ម Time Square Billboard បាន​ឆ្លើយ​ទៅ​កាន់​សំណួរ​នានា​ពាក់ព័ន្ធ​នឹង​ការ​ផ្សព្វផ្សាយ​រូបថត​របស់​លោក ហ៊ុន ម៉ាណែត ថា ខ្លួន​មិន​អនុញ្ញាត​ឱ្យ​មាន​ការ​ផ្សព្វផ្សាយ​ដែល​ពាក់ព័ន្ធ​នឹង​នយោបាយ​ឡើយ។

ក្រុមហ៊ុន​ផ្សព្វផ្សាយ​ពាណិជ្ជកម្ម​ខាង​លើ​បញ្ជាក់​ថា តម្លៃ​ផ្សព្វផ្សាយ​ក្នុង​ឱកាស​ពិសេស​នៃ​ការ​អបអរ​សាទរ​ខួប​របស់​ក្រុមហ៊ុន​នៅ​ពេលនេះ គឺ​មាន​តម្លៃ​ពិសេស​ត្រឹមតែ ៥០០​ដុល្លារ​អាមេរិក​ប៉ុណ្ណោះ​ក្នុង ១​ថ្ងៃ។

ទាក់ទិន​នឹង​បញ្ហា​នេះ តំណាងរាស្ត្រ​អតីត​គណបក្ស​សង្គ្រោះ​ជាតិ លោក អ៊ុំ សំអាន បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​ថ្ងៃទី​២៥ កញ្ញា ថា ការ​អះអាង​ថា​រូប​លោក ហ៊ុន ម៉ាណែត ដែល​ត្រូវ​បាន​ផ្សព្វផ្សាយ​លើ​ផ្ទាំង​ប៉ាណូ​ផ្សព្វផ្សាយ​ពាណិជ្ជកម្ម Billboard នៅ Time Square ក្នុង​ទីក្រុង​ញូវយ៉ក រយៈពេល ១០​ថ្ងៃ​ដោយ​មិន​បង់​លុយ គឺជា​ការ​និយាយ​បោកប្រាស់​សុទ្ធសាធ ព្រោះ​ថា​សូម្បី​ប្រធានាធិបតី​អាមេរិក​លោក ចូ បៃដិន ចង់​ដាក់​តាំង​រូប​របស់​គាត់​លើ​ផ្ទាំង​ប៉ាណូ​ផ្សព្វផ្សាយ​ពាណិជ្ជកម្ម Billboard នេះ ក៏​ត្រូវតែ​បង់​លុយ​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស