មន្ទីរក្រសួងបរិស្ថានខេត្តក្រចេះ ទទួលស្គាល់ថាពិតជាមានការរុករករ៉ែមាសនៅខេត្តក្រចេះ ដោយគ្មានច្បាប់អនុញ្ញាតប្រាកដមែន ប៉ុន្តែមិនមែនចំនួន ១០០កន្លែងដូចសារព័ត៌មានក្នុងស្រុកមួយចុះផ្សាយឡើយ។
សេចក្ដីប្រកាសព័ត៌មានរបស់មន្ទីរបរិស្ថានខេត្តក្រចេះ កាលពីថ្ងៃទី១១ ខែតុលា ឆ្នាំ២០២៣ ដោយចាត់ទុកការចុះផ្សាយរបស់សារព័ត៌មានដើមរាំង កាលពីថ្ងៃទី១០ ខែតុលា ឆ្នាំ២០២៣ ដែលចោទលើមន្ត្រីបរិស្ថានឃុបឃិតជាមួយអាជ្ញាធរភូមិ ដើរយកប្រាក់ពីអ្នកជីកបូមមាសដោយម៉ាស៊ីន ០១គ្រឿងស្មើនឹង ៦០ម៉ឺនរៀល និងមានទីតាំងរុករករ៉ែមាសនេះចំនួន ១០០កន្លែង និងប្រើប្រាស់ដោយម៉ាស៊ីនខួងដើម្បីរុករករ៉ែមាសថាគ្មានមូលដ្ឋានច្បាស់លាស់។
លើសពីនេះ មន្ទីរបរិស្ថានដដែលថា ការចុះផ្សាយរបស់សារព័ត៌មានដើមរាំង នេះ មិនបានស្វែងរកមូលហេតុ ឬអង្គហេតុគ្រប់ជ្រុងជ្រោយដែលមានចរិតលក្ខណៈបង្កាច់បង្ខូចញុះញង់ ធ្វើឲ្យប៉ះពាល់ដល់កិត្តិយសមន្ត្រីនៃមន្ទីរបរិស្ថានខេត្តក្រចេះ។ ចំពោះការចុះផ្សាយថា មន្ត្រីប្រមូលប្រាក់ប្រើប្រាស់ម៉ាស៊ីនខួងរុករករ៉ែមាស និងមានទីតាំងរុករករ៉ែមាសចំនួន ១០០កន្លែង គឺមិនមែនជាការពិតនោះទេ។
ប្រភពដដែលថា កន្លងមក មន្ទីរបរិស្ថានបានធ្វើការចុះទប់ស្កាត់បង្ក្រាបករណីរុករកបូមរ៉ែមាសនៅចំណុចសោមដីប៉ូ ក្នុងនោះមន្ត្រីបានចុះដល់ទីតាំងប្រទះឃើញករណីបូមរុករករ៉ែមាសជាលក្ខណៈគ្រួសារចំនួន ០៨ទីតាំង ជនសង្ស័យបានរត់គេចខ្លួនបាត់អស់ និងបន្សល់ទុករោងស្នាក់នៅចំនួន ០៨រោង ទុយោបូមទឹកចំនួន ០១ដុំប្រវែង ៨០ម៉ែត្រ និងក្បាលបូមទឹកចំនួន ០១គ្រឿង និងមិនបានប្រទះឃើញអ្វីទៀតឡើយ ហើយមន្ត្រីកំពុងបន្តស្រាវជ្រាវបន្ថែមទៀត។
ដូច្នេះ មន្ទីរបរិស្ថានខេត្តក្រចេះ ទទួលស្គាល់ថាពិតជាមានការរុករករ៉ែមាសដោយគ្មានច្បាប់អនុញ្ញាតមែន តែមិនមែនចំនួន ១០០កន្លែងដូចព័ត៌មានចុះផ្សាយឡើយ។
មន្ទីរបរិស្ថានខេត្តក្រចេះ បានទាមទារឲ្យសារព័ត៌មានដើមរាំង កែសម្រួលនូវខ្លឹមសារចុះផ្សាយសាជាថ្មីក្រោមហេតុផលថា ដើម្បីឲ្យសាធារណជនឈប់យល់ច្រឡំ។
ជុំវិញរឿងនេះ មន្ត្រីសម្របសម្រួលគម្រោង CYN លោក អូត ឡាទីន ចាត់ទុកការបំភ្លឺរបស់មន្ទីរបរិស្ថានខេត្តក្រចេះ ថាជាការទទួលស្គាល់ពិតជាមានការរុករករ៉ែដោយគ្មានច្បាប់អនុញ្ញាតមែន។
លោកថា មន្ទីរបរិស្ថានខេត្តក្រចេះ ស្រាយបំភ្លឺការពារថាមិនមានទីតាំងរុករករ៉ែមាស ១០០កន្លែងក្នុងដែនជម្រកសត្វព្រៃព្រៃឡង់នោះទេ ហើយមន្ត្រីបរិស្ថានក៏មិនពុករលួយដែរ ប៉ុន្តែជាក់ស្ដែង ពិតជាមានការរុករករ៉ែមាសមែន គ្រាន់តែមិនមែន ១០០កន្លែង ហើយចំពោះថវិកាវិញ ទំនងជាប្រជាពលរដ្ឋបង់មែន ប៉ុន្តែគ្រាន់តែមិនដឹងបង់ជូនខាងណាតែប៉ុណ្ណោះ។
សារព័ត៌មាន The Cambodia Daily មិនទាន់អាចសុំការអត្ថាធិប្បាយពីចាងហ្វាងសារព័ត៌មានដើមរាំង លោក បូរ ប៊ុនថន បាននៅឡើយទេ៕