មេដឹកនាំខ្មែរដែលកំពុងក្តាប់អំណាចជានាយករដ្ឋមន្ត្រីពិតប្រាកដនៅកម្ពុជាលោក ហ៊ុន សែន សម្រេចកាត់ឆ្វៀលដីឧទ្យានជាតិសមុទ្រព្រះសីហនុរាម ក្នុងខេត្តព្រះសីហនុ ជាង ២០ហិកតារ (២៦ ហិកតារ ៥៤អា និង ២៤សង់ទីអា) ជួលអចិន្ត្រៃយ៍ឲ្យទៅក្រុមហ៊ុនឯកជនធំៗចំនួន ៤ នៅដើមឆ្នាំ២០២៣ នេះ។
មេដឹកនាំបក្សកាន់អំណាចដែលមានអំណាចបញ្ជានាយករដ្ឋមន្ត្រីខ្មែរពីក្រោយខ្នងលោក ហ៊ុន សែន បានចេញអនុក្រឹត្យកាលពីថ្ងៃទី៣០ ខែឧសភា ឆ្នាំ២០២៣ ដែលត្រូវបានផ្សព្វផ្សាយនៅថ្ងៃទី១៧ តុលា នេះថា លោកសម្រេចជួលដីទំហំជាង ២០ម៉ឺនម៉ែត្រក្រឡា (២៦៥៤២៤ម៉ែត្រក្រឡា) ស្ថិតក្នុងតំបន់ប្រើប្រាស់ដោយចីរភាពនៃឧទ្យានជាតិសមុទ្រព្រះសីហនុរាម ក្នុងភូមិសាស្ត្រឃុំរាម ស្រុកព្រៃនប់ ខេត្តព្រះសីហនុ ទៅឱ្យក្រុមហ៊ុនឯកជនចំនួន ៤ សម្រាប់វិនិយោគលើគម្រោងអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិ។
បុរសខ្លាំងដែលល្បីល្បាញខាងបំផ្លាញធនធានធម្មជាតិកម្ពុជាលោក ហ៊ុន សែន បញ្ជាក់ថា ក្រុមហ៊ុនដែលទទួលបានសិទ្ធិជួលអចិន្ត្រៃយ៍នេះ រួមមាន៖
- ក្រុមហ៊ុន Shuiku Land Co., Ltd. ទទួលបានផ្ទៃដីជាង ៦ហិកតារ (៦ហិកតារ ១៤អា ៥៣សង់ទីអា)
- ក្រុមហ៊ុន Sinoream Land Co., Ltd. ទទួលបានផ្ទៃដីជាង ៦ហិកតារ (៦ហិកតារ ៧៥អា ៥២សង់ទីអា)
- ក្រុមហ៊ុន Yijianzhidi Co., Ltd. ទទួលបានផ្ទៃដីជាង ៧ហិកតារ (៧ហិកតារ ៧អា ២៥សង់ទីអា)
- និងក្រុមហ៊ុន Kofuf Land Co., Ltd. ទទួលបានផ្ទៃដីជាង ៦ហិកតារ (៦ហិកតារ ៥៦អា ៩៤សង់ទីអា)។
លោក ហ៊ុន សែន ដែលកំពុងក្តាប់អំណាចជាឪពុកនាយករដ្ឋមន្ត្រីខ្មែរសព្វថ្ងៃនេះ បញ្ជាឱ្យរដ្ឋមន្ត្រីក្រសួងពាក់ព័ន្ធនានា ប្រធានស្ថាប័នគ្រប់ជាន់ថ្នាក់ និងអភិបាលខេត្តព្រះសីហនុ អនុវត្តតាមខ្លឹមសារអនុក្រឹត្យនេះឱ្យបានហ្មត់ចត់ដាច់ខាត បើទោះបីជាគាត់ត្រូវលាលែងតំណែងជានាយករដ្ឋមន្ត្រីក៏ដោយ។
ការចេញអនុក្រឹត្យកាត់ដីក្នុងតំបន់ការពារនេះ ធ្វើឡើងស្របពេលដែលគេមើលឃើញថា ដីក្នុងតំបន់ការពារនានាត្រូវបានលោក ហ៊ុន សែន កាត់ឆ្វៀលប្រគល់ទៅឱ្យក្រុមហ៊ុនឯកជនជាបន្តបន្ទាប់មុននឹងគាត់លាឈប់ពីតំណែងជានាយករដ្ឋមន្ត្រីនៅពេលនេះ។
កាលពីថ្ងៃទី១០ ខែមករា ឆ្នាំ២០២២ មេដឹកនាំខ្មែរដែលចូលចិត្តរំលោភយកដីរដ្ឋលោក ហ៊ុន សែន បានចេញអនុក្រឹត្យកែប្រែតំបន់ការពារធម្មជាតិពីឧទ្យានជាតិព្រះសីហនុរាម ទៅជាឧទ្យានជាតិសមុទ្រព្រះសីហនុរាម វិញ ដែលមានផ្ទៃដីជិត ៤ម៉ឺនហិកតារ (៣៩៦៣៤ហិកតារ) ស្ថិតក្នុងភូមិសាស្ត្រខេត្តព្រះសីហនុ និងខេត្តកំពត ដែលក្នុងនោះទំហំផ្ទៃដីជិត ២ម៉ឺនហិកតារ (១៩៣៤០ហិកតារ) ជាដីគោក និងទំហំផ្ទៃដីជាង ២ម៉ឺនហិកតារទៀត (២០២៩៤ហិកតារ) ជាផ្ទៃទឹក។
ការកាត់ឆ្វៀលដីក្នុងតំបន់ការពារក្នុងខេត្តព្រះសីហនុនេះ មិនមែនជាលើកទី១ ទេ ហើយក៏មិនមែនជាលើកចុងក្រោយដែរសម្រាប់រដ្ឋាភិបាលដែលដឹកនាំដោយក្រុមគ្រួសារត្រកូលហ៊ុន។ ជាក់ស្តែង កាលពីថ្ងៃទី៦ ខែមីនា ឆ្នាំ២០២៣ លោក ហ៊ុន សែន ក៏បានកាត់ឆ្វៀលដីចេញពីដែនគម្របព្រៃឈើឆ្នាំ២០០២ ជាង ១ម៉ឺនម៉ែត្រក្រឡា (១ហិកតារ ២១អា ៦១សង់ទីអា) ក្នុងខេត្តព្រះសីហនុ ប្រគល់ជាកម្មសិទ្ធិឯកជនឱ្យទៅលោក ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រីនៃរដ្ឋាភិបាលថ្មីរបស់លោក ហ៊ុន ម៉ាណែត ផងដែរ។
ជាងនេះទៀត កាលពីថ្ងៃទី៣១ ខែមីនា ឆ្នាំ២០២៣ លោក ហ៊ុន សែន បានសម្រេចផ្ដល់ដីឧទ្យានជាតិសមុទ្រកោះរ៉ុងជាង ២០០ហិកតារ (២៤២ហិកតារ) ឱ្យទៅក្រុមហ៊ុនកូនប្រុសពៅរបស់លោក យឹម ឆៃលី ដែលជាដន្លងរបស់ខ្លួន ធ្វើជាកម្មសិទ្ធិ ព្រមទាំងទទួលបានសិទ្ធិជួលដីឧទ្យានជាតិមួយនេះទំហំជាង ៤០០ហិកតារ (៤៨៩ហិកតារ) ថែមទៀត។
ជុំវិញការផ្តល់ដីនៅតំបន់ការពារឱ្យទៅជាកម្មសិទ្ធិរបស់ក្រុមហ៊ុនឯកជន និងអ្នកមានទ្រព្យធន ត្រូវគេមើលឃើញថា មន្ត្រីជាន់ខ្ពស់ និងឧកញ៉ាជាច្រើនដែលជិតស្និទ្ធនឹងលោក ហ៊ុន សែន រួមទាំងសាច់ញាតិ និងកូនៗបង្កើតរបស់គាត់ សុទ្ធតែបានទទួលដីទាំងនេះជាច្រើនរយហិកតារធ្វើជាកម្មសិទ្ធិ ខណៈព្រៃឈើនៅតំបន់ដែលលោក ហ៊ុន សែន សម្បទានទាំងនោះត្រូវរងនូវការកាប់បំផ្លាញ និងគ្រប់គ្រងគ្មានតម្លាភាពទាំងអស់។
ក្រៅពីកាត់ដីសាធារណៈរបស់រដ្ឋឱ្យទៅបក្ខពួក និងសែស្រឡាយខ្លួនឯង និងក្រុមហ៊ុនឯកជនដែលជាបក្ខពួករបស់ខ្លួន លោក ហ៊ុន សែន ក៏បានផ្តល់ដីក្នុងតំបន់ការពារនានាឱ្យទៅក្រុមហ៊ុនបរទេសផងដែរ ដូចជា ក្រុមហ៊ុន Union Development Group (UDG) របស់ចិន ក៏ទទួលបានដីសម្បទានជាង ៣ម៉ឺនហិកតារ (៣៦០០០ហិកតារ) ផងដែរសម្រាប់ជួលរយៈពេល ៩៩ឆ្នាំក្នុងតំបន់ឧទ្យានជាតិបុទុមសាគរ ខេត្តកោះកុង កាលពីឆ្នាំ២០០៨ កន្លងទៅ។
ទាក់ទិននឹងការកាត់ឆ្វៀលដីក្នុងតំបន់ការពារនេះ កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន បានចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន ១៥ ដើម្បីត្រៀមធ្វើអនុបយោគ និងបែងចែកជាកម្មសិទ្ធិឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ ខណៈខេត្តដែលមិនជាប់ក្នុងអនុក្រឹត្យនេះ ក៏ត្រូវរងនូវការបែងចែកឱ្យទៅក្រុមហ៊ុនឯកជនកាន់កាប់ធ្វើជាកម្មសិទ្ធិជាបន្តបន្ទាប់ផងដែរ។
ជុំវិញការផ្តល់ដីរដ្ឋឱ្យក្រុមហ៊ុនឯកជននេះ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ធ្លាប់បានលើកឡើងកាលពីពេលកន្លងទៅថា អាជ្ញាធរត្រូវតែពន្យល់ និងផ្សព្វផ្សាយឱ្យបានច្បាស់លាស់ពីការកាត់ដីក្នុងតំបន់ការពារ និងការធ្វើអនុបយោគនៅតាមតំបន់ផ្សេងៗដែលខ្លួនបានប្រគល់ឱ្យក្រុមហ៊ុនឯកជនកន្លងមក ដើម្បីឱ្យមានតម្លាភាពក្នុងការទទួលខុសត្រូវលើការងាររបស់ខ្លួន៕