29 C
Phnom Penh

លោក ហ៊ុន ម៉ាណែត ជំរុញ​ឱ្យ​ពលរដ្ឋ​យក​កូន​ឱ្យ​បាន​ច្រើន ខណៈ​លោក​ខ្លួន​ឯង​ក៏​មាន​បំណង​យក​កូន​ឱ្យ​បាន​៤​នាក់​ដែរ

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​ត​ពូជ​ថ្មី​លោក ហ៊ុន ម៉ាណែត មាន​ផែនការ​ចង់​ឱ្យ​ពលរដ្ឋ​ខ្មែរ​ពង្រីក​លទ្ធភាព​យក​កូន​ឱ្យ​បាន​ច្រើន ដោយសារតែ​នៅ​ពេលនេះ​ប្រជាជន​កម្ពុជា​មាន​ចំនួន​ត្រឹមតែ ១៧​លាន​នាក់​ប៉ុណ្ណោះ ហើយ​ខ្លួន​លោក​ផ្ទាល់​ក៏​មាន​បំណង​យក​កូន​ឱ្យ​បាន ៤​នាក់​ដែរ។

លោក ហ៊ុន ម៉ាណែត បាន​លើកឡើង​នៅ​ក្នុង​ពិធី​សម្ពោធ​មន្ទីរពេទ្យ​ជាតិ​នៅ​ថ្ងៃទី​២៤ ខែ​តុលា នេះ​ថា រាល់​ពេល​ដែល​លោក​បាន​ជួប​ជាមួយ​មេដឹកនាំ​បរទេស ពួកគេ​ចេះ​តែ​សួរ​ថា តើ​ប្រទេស​អ្នក​ឯង​មាន​ប្រជាជន​ប៉ុន្មាន​ហើយ​សព្វថ្ងៃ​នេះ?

លោក ហ៊ុន ម៉ាណែត លើកឡើង​ថា លោក​ធ្លាប់​បាន​ចូលរួម​ក្នុង​កម្មវិធី​ជាមួយ​នាយករដ្ឋមន្ត្រី​ប្រទេស​កេនយ៉ា ស្រាប់​តែ​នាយករដ្ឋមន្ត្រី​ប្រទេស​នោះ​បាន​សួរ​លោក​អំពី​ចំនួន​ប្រជាជន​របស់​ប្រទេស​កម្ពុជា ស្រប​ពេល​ដែល​ប្រទេស​កេនយ៉ា មាន​ចំនួន​ប្រជាជន​រហូត​ដល់ ៥០​លាន​នាក់​ឯណោះ ដូច្នេះ​កម្ពុជា​ក៏​ចង់​មាន​ផែនការ​តាម​ឱ្យ​ទាន់​ប្រទេស​កេនយ៉ា ដែរ គឺ​រដ្ឋាភិបាល​ចង់​ឱ្យ​កម្ពុជា​មាន​ចំនួន​ប្រជាជន​កើន​ឡើង​ឱ្យ​ដល់​ទៅ ៥០​លាន​នាក់​ដែរ​នៅ​ពេល​អនាគត។

លោក ហ៊ុន ម៉ាណែត បញ្ជាក់​ថា ប្រទេស​កម្ពុជា​អំឡុង​ពេល​ចេញ​ពី​របប ប៉ុល ពត មាន​ប្រជាជន​តែ​ជាង ៦​លាន​នាក់​ប៉ុណ្ណោះ ប៉ុន្តែ​ឥឡូវ​នេះ​មាន​ប្រជាជន​ប្រមាណ​ជាង ១៧​លាន​នាក់​ហើយ ស្រប​ពេល​ដែល​រដ្ឋាភិបាល​បាន​យកចិត្ត​ទុកដាក់​យ៉ាង​ខ្លាំង​ចំពោះ​ស្ត្រី​មាន​ផ្ទៃពោះ រហូត​ដល់​កុមារ​ដែល​មាន​អាយុ ២​ឆ្នាំ ដែល​ពួកគេ​នឹង​ក្លាយ​ជា​ធនធាន​មនុស្ស​របស់​ប្រទេស​ជាតិ​ទៅ​ថ្ងៃ​ក្រោយ។

ការ​អះអាង​នេះ ធ្វើ​ឡើង​ស្រប​ពេល​ដែល​គេ​មើល​ឃើញ​ថា ការ​អំពាវនាវ​ឱ្យ​ពលរដ្ឋ​យក​កូន​ឱ្យ​បាន​ច្រើន​នៅ​ពេល​ដែល​រដ្ឋាភិបាល​មិន​បាន​យកចិត្ត​ទុកដាក់​ទៅ​លើ​ជីវភាព​របស់​ពលរដ្ឋ គឺជា​រឿង​ដែល​បញ្ច្រាស​ទិស​គ្នា​ទាំងស្រុង។

អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់គំនិត និង​ការ​ស្រាវជ្រាវ​លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៤ តុលា នេះ​ថា លោក​គាំទ្រ​ឱ្យ​ប្រទេស​កម្ពុជា​បង្កើន​នូវ​ចំនួន​ពលរដ្ឋ​ទៅ​ថ្ងៃ​មុខ ហើយ​ក៏​អបអរ​សាទរ​ផែនការ​របស់​រដ្ឋាភិបាល​កម្ពុជា​ផង​ដែរ ប៉ុន្តែ​លោក​មិន​ទាន់​ឃើញ​រដ្ឋាភិបាល​មាន​គោលនយោបាយ​ជាក់លាក់​គាំពារ​ពលរដ្ឋ​ដែល​មាន​កូន​ច្រើន​នៅឡើយ​ទេ ស្រប​ពេល​ដែល​ពលរដ្ឋ​កំពុង​ខ្លាចរអា​ពី​ការ​មាន​កូន​ច្រើន​នៅ​ពេល​ដែល​គាត់​កំពុង​ជួប​បញ្ហា​ជីវភាព​ខ្សត់​ខ្សោយ​បច្ចុប្បន្ន​នេះ។

លោក សេក សុជាតិ លើកឡើង​ថា ប្រសិនបើ​នាយករដ្ឋមន្ត្រី​កម្ពុជា​លោក ហ៊ុន ម៉ាណែត ចង់​ឱ្យ​កម្ពុជា​មាន​ធនធាន​មនុស្ស​កាន់តែ​ច្រើន​ដើម្បី​អភិវឌ្ឍ​ប្រទេស​ជាតិ រដ្ឋាភិបាល​ត្រូវតែ​ដាក់​ចេញ​នូវ​គោលនយោបាយ​ដែល​អាច​ជួយ​ឱ្យ​ពលរដ្ឋ​មាន​ជីវភាព​ធូរធារ នៅ​ពេល​នោះ​ទោះ​រដ្ឋាភិបាល​មិន​ប្រកាស​ឱ្យ​ពួកគាត់​យក​កូន​ច្រើន ក៏​ពួកគាត់​នឹង​យក​កូន​ឱ្យ​បាន​ច្រើន​ដោយ​ខ្លួនឯង​ដែរ។

លោក​អះអាង​ថា ប្រសិនបើ​លោក ហ៊ុន ម៉ាណែត គ្រាន់តែ​ប្រកាស​ពី​ការ​អភិវឌ្ឍ​ប្រទេស​ដោយ​ការ​បង្កើន​ធនធាន​មនុស្ស​សម្រាប់​ថ្ងៃ​អនាគត​តាមរយៈ​នៃ​ការ​ជំរុញ​ឱ្យ​ពលរដ្ឋ​យក​កូន​ឱ្យ​បាន​ច្រើន ប៉ុន្តែ​គ្មាន​ផែនការ​ជួយ​ធានា​ភាព​រីកចម្រើន​នៃ​ជីវភាព​របស់​ពួកគេ​ទេ នោះ​ជា​ការ​ប្រកាស​បែប​ប្រជាភិថុតិ​តែប៉ុណ្ណោះ។

លោក​បន្ត​ថា រាល់​ការ​ប្រកាស​ផែនការ​អភិវឌ្ឍន៍​របស់​រដ្ឋាភិបាល សំខាន់​បំផុត​គឺ​ត្រូវ​មាន​គោលនយោបាយ និង​យន្តការ​សម្រាប់​អនុវត្ត​ផែនការ​នោះ ដើម្បី​ឱ្យ​ដល់​គោលដៅ​ដែល​ខ្លួន​បាន​កំណត់។

ទាក់ទិន​នឹង​បញ្ហា​នេះ ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ (IDEA) លោក វន់ ពៅ ធ្លាប់​បាន​លើកឡើង​ថា ការ​ជំរុញ​ឱ្យ​ពលរដ្ឋ​យក​កូន​ឲ្យ​បាន​ច្រើន អាច​ធ្វើ​ទៅ​បាន​ត្រឹមតែ​ក្នុង​លក្ខខណ្ឌ​ដែល​ពលរដ្ឋ​មាន​សេដ្ឋកិច្ច​គ្រប់គ្រាន់​សម្រាប់​ផ្គត់ផ្គង់​កូនៗ​របស់​ពួកគេ​តែប៉ុណ្ណោះ។

លោក វន់ ពៅ អះអាង​ថា ការ​ជំរុញ​ឱ្យ​ពលរដ្ឋ​យក​កូន​ឲ្យ​បាន​ច្រើន​ជា​រឿង​ត្រឹមត្រូវ ប្រសិនបើ​ពលរដ្ឋ​ទាំងអស់​មាន​លទ្ធភាព​ចិញ្ចឹម​កូន​គ្រប់គ្រាន់​លើ​ការ​សិក្សា​រៀនសូត្រ និង​ការ​ផ្គត់ផ្គង់​អាហារូបត្ថម្ភ​បរិបូរណ៍​ដូច​ប្រទេស​ជិតខាង ជាពិសេស​ប្រទេស​សិង្ហបុរី ម៉ាឡេស៊ី និង​ថៃ ជាដើម។

លោក​លើក​ជា​សំណួរ​ថា ក្នុង​ស្ថានភាព​ពលរដ្ឋ​ខ្មែរ​ដែល​មាន​កូន​ច្រើន ហើយ​គ្មាន​ជីវភាព​ធូរធារ​សម្រាប់​ចិញ្ចឹម​កូន ដូច្នេះ​នៅ​ពេល​ដែល​ពួកគាត់​មាន​កូន​ច្រើន ពួកគាត់​ត្រូវ​រង​នូវ​ទុក្ខ​លំបាក​ក្នុង​ការ​ចិញ្ចឹម​កូន​ដោយ​គ្មាន​ការ​គាំពារ​ពី​រដ្ឋាភិបាល​នោះ តើ​ឱ្យ​ពួកគាត់​មាន​កូន​ច្រើន​ម្តេច​នឹង​កើត?

រដ្ឋាភិបាល​កម្ពុជា បាន​បង្ហាញ​របាយការណ៍​របស់​ខ្លួន​កាលពី​ចុង​ឆ្នាំ​២០២២ កន្លង​ទៅ​ថា ចំនួន​ប្រជាជន​កម្ពុជា​នៅ​ឆ្នាំ​២០២៣ នេះ បាន​កើន​ឡើង​ដល់ ១៧​លាន​នាក់​ហើយ ខណៈ​ឆ្នាំ​២០២២ កម្ពុជា​មាន​ចំនួន​ប្រជាជន​សរុប​ជាង ១៦​លាន​នាក់​ប៉ុណ្ណោះ (១៦,៨​លាន​នាក់) ក្នុង​នោះ​ស្ត្រី​មាន​ចំនួន ៨,៦​លាន​នាក់​ផង​ដែរ ប៉ុន្តែ​រដ្ឋាភិបាល​កម្ពុជា​រំពឹង​ថា ចំនួន​ពលរដ្ឋ​ខ្មែរ​អាច​នឹង​កើន​ឡើង​ដល់ ២០​លាន​នាក់​នៅ​ឆ្នាំ​២០៣០ ខាង​មុខ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស