29 C
Phnom Penh

លោក ហ៊ុន ម៉ាណែត ថា​ព្រលាន​យន្តហោះ​ថ្មី​នៅ​សៀមរាប​នឹង​ក្លាយ​ជា​កម្លាំង​ចលករ​ដ៏​សំខាន់​សម្រាប់​វិស័យ​ទេសចរណ៍

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​បន្ត​ពូជ​ថ្មី​លោក ហ៊ុន ម៉ាណែត សម្ដែង​មោទនភាព​ចំពោះ​វត្តមាន​ព្រលាន​យន្តហោះ​ថ្មី​ក្នុង​ខេត្ត​សៀមរាប ដែល​នឹង​ក្លាយ​ជា​សក្ដានុពល​ស្រូប​ទាញ​ដ៏​ខ្លាំងក្លា និង​ជា​កម្លាំង​ចលករ​ដ៏​សំខាន់​សម្រាប់​វិស័យ​ទេសចរណ៍​របស់​កម្ពុជា​ទៅ​ថ្ងៃ​អនាគត។

កូនប្រុស​មេដឹកនាំ​ក្រាញ​អំណាច​ផ្ដាច់មុខ​នៅ​កម្ពុជា​លោក ហ៊ុន ម៉ាណែត សរសេរ​លើ​បណ្ដាញ​ទំនាក់ទំនង​តេឡេក្រាម​របស់​ខ្លួន​នៅ​ថ្ងៃទី​៣១ តុលា នេះ​ថា អាកាសយានដ្ឋាន​អន្តរជាតិ​សៀមរាប-អង្គរ ដែល​បាន​ដំណើរការ​កាលពី​ពាក់កណ្តាល​ខែ​តុលា ឆ្នាំ​២០២៣ ស្ថិត​នៅ​ក្នុង​ឃុំ​តាយ៉ែក ស្រុក​សូទ្រនិគម ខេត្ត​សៀមរាប គ្របដណ្ដប់​លើ​ផ្ទៃដី​ប្រមាណ ៧០០​ហិកតារ នឹង​ក្លាយ​ជា​សក្ដានុពល​ស្រូប​ទាញ​ដ៏​ខ្លាំងក្លា​សម្រាប់​វិស័យ​ទេសចរណ៍​របស់​កម្ពុជា។

ការ​អះអាង​នេះ ធ្វើឡើង​ផ្ទុយ​ស្រឡះ​ពី​ទិដ្ឋភាព​ជាក់ស្តែង​ដែល​គេ​មើល​ឃើញ​ថា ព្រលាន​យន្តហោះ​ថ្មី​នេះ​នឹង​បម្រើ​ប្រយោជន៍​ធំធេង​ឱ្យ​រដ្ឋាភិបាល​ចិន មិន​មែន​កម្ពុជា​នោះ​ទេ។

ព្រលាន​យន្តហោះ​អន្តរជាតិ​សៀមរាប-អង្គរ ស្ថិត​នៅ​ក្នុង​ឃុំ​ពពេល និង​ឃុំ​តាយ៉ែក ស្រុក​សូទ្រនិគម ខេត្ត​សៀមរាប លើ​ផ្ទៃដី ៧០០​ហិកតារ ត្រូវ​បាន​សាងសង់​ឡើង​ដោយ​ក្រុមហ៊ុន​ចិន YUNAN DEVELOPMENT GROUP ដែល​បាន​បោះទុន​វិនិយោគ​ប្រមាណ​ជាង ១​ពាន់​លាន​ដុល្លារ​អាមេរិក ហើយ​ដែល​ក្រុមហ៊ុន​ចិន​មួយ​នេះ​នឹង​គ្រប់គ្រង​រយៈពេល ៥៥​ឆ្នាំ។

ជុំវិញ​ការ​សាងសង់​ព្រលាន​យន្តហោះ​ថ្មី​នេះ កាលពី​ថ្ងៃទី​៣ ខែ​មេសា ឆ្នាំ​២០២២ លោក ហ៊ុន សែន បាន​អះអាង​ថា សម្រាប់​ការ​វិនិយោគ​ព្រលាន​យន្តហោះ​ថ្មី​នៅ​ខេត្ត​សៀមរាប នេះ គឺជា​ការ​វិនិយោគ​ទាំងស្រុង​ដោយ​ក្រុមហ៊ុន​ចិន ដែល​មាន​ទុន​ជាង ១​ពាន់​លាន​ដុល្លារ​អាមេរិក ប៉ុន្តែ​ចិន​ត្រូវ​គ្រប់គ្រង​រយៈពេល ៥៥​ឆ្នាំ ទើប​កម្ពុជា​ទទួល​ក្លាយ​ជា​ម្ចាស់​កម្មសិទ្ធិ​វិញ​ម្តង។

លោក ហ៊ុន សែន បញ្ជាក់​ថា ការ​វិនិយោគ​នេះ​គឺ​ប្រៀប​ដូចជា​ចិន​មាន​ម្សៅ​ស្ទើរតែ​ទាំងស្រុង​សម្រាប់​ធ្វើ​នំ​ឲ្យ​ខ្មែរ​ហូប ខណៈ​កម្ពុជា​មាន​ត្រឹមតែ​ដី​ប៉ុណ្ណោះ​សម្រាប់​ការ​សាងសង់​ព្រលាន​យន្តហោះ​ថ្មី​នេះ។

ទាក់ទិន​នឹង​បញ្ហា​នេះ នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិមនុស្ស លោក មឿន តុលា ធ្លាប់​បាន​លើកឡើង​កាលពី​ពេល​កន្លង​ទៅ​ថា ប្រសិនបើ​ការ​សាងសង់​ព្រលាន​យន្តហោះ​នេះ​ជា​ប្រាក់កម្ចី​របស់​ចិន ហើយ​ផ្តល់​សិទ្ធិ​ឱ្យ​ចិន​ប្រមូល​ផល​ប្រយោជន៍​ទៅវិញ​នៅ​ពេល​ដាក់​ដំណើរការ​នោះ គឺ​មាន​ន័យ​ថា ចិន​កំពុង​ធ្វើ​ស្រែ​លើ​ខ្នង​ខ្មែរ​យ៉ាង​ពិតប្រាកដ។

ទោះជា​បែប​នេះ​ក្តី មន្ត្រី​ជាន់ខ្ពស់​រដ្ឋាភិបាល​ថ្មី​របស់​លោក ហ៊ុន ម៉ាណែត បាន​ទម្លាយ​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​៣១ តុលា នេះ​ថា ព្រលាន​យន្តហោះ​សៀមរាប-អង្គរ​ថ្មី​នេះ នឹង​ប្រមូល​ផល​ប្រយោជន៍​ពី​កម្ពុជា​ធំធេង​ឱ្យ​ទៅ​រដ្ឋាភិបាល​ចិន​ចាប់ពី​ពេលនេះ​តទៅ ព្រោះ​ថា​ខ្មែរ​មិន​អាច​ទាញ​ផល​ប្រយោជន៍​ដោយ​ពឹង​ផ្អែក​លើ​ព្រលាន​យន្តហោះ​ថ្មី​នេះ​បាន​ទេ។

ប្រភព​ដដែល​លើកឡើង​ថា កម្ពុជា​អាច​នឹង​មាន​ភ្ញៀវ​ទេសចរ​ចិន​កាន់តែ​ច្រើន​មក​កម្ពុជា​តាមរយៈ​ព្រលាន​យន្តហោះ​ថ្មី​នេះ ប៉ុន្តែ​លុយ​ដែល​ពួកគេ​នឹង​ចំណាយ ដូចជា ទិញ​សំបុត្រ​យន្តហោះ ជាដើម គឺ​លុយ​នោះ​នឹង​វិល​ចូល​ទៅ​ក្រុមហ៊ុន​ចិន​វិញ​ប៉ុណ្ណោះ។ ជាង​នេះ​ទៀត លុយ​ដែល​ពួកគេ​ទិញ​អាហារ​ហូបចុក​ក្នុង​ព្រលាន​យន្តហោះ ក៏​នឹង​បាន​ទៅ​ក្រុមហ៊ុន​ចិន​វិញ​ដែរ ចំណែក​លុយ​ក្នុង​ការ​ចំណាយ​លើ​ថ្លៃ​ធ្វើ​ដំណើរ​ទៅ​លេង​ប្រាសាទ​អង្គរវត្ត ក៏​នឹង​ធ្លាក់​ទៅ​ក្នុង​ក្រុមហ៊ុន​តាក់ស៊ី​របស់​ចិន ថែម​ទៀត។

លើស​ពី​នេះ បើ​ភ្ញៀវ​ទេសចរ​ទាំងនោះ​ចង់​លេង​ល្បែង​នៅ​ទីក្រុង​ភ្នំពេញ លុយ​គឺ​បាន​ទៅ​ចិន​ដដែល ត្បិត​ក្រុមហ៊ុន​ណាហ្គា​វើលដ៍ គឺជា​ក្រុមហ៊ុន​បុត្រ​សម្ព័ន្ធ​នៃ​ក្រុមហ៊ុន​ណាហ្គា​ខប​របស់​ចិន​ប៉ុណ្ណោះ ក្នុង​នោះ​លុយ​ដែល​ពួកគេ​ចំណាយ​លើ​ការ​ស្នាក់នៅ​សណ្ឋាគារ និង​ផ្ទះសំណាក់ រួម​ទាំង​ភោជនីយដ្ឋាន ក៏​នឹង​បាន​ទៅ​លើ​ចិន​ដែរ។

ផ្ទុយទៅវិញ បើ​ពួកគេ​ចង់​ទៅ​លេង​ក្រុង​កំពង់សោម ដែល​ពួកគេ​ត្រូវ​ចំណាយ​លើ​អាហារ​ហូបចុក​រួម​ទាំង​ការ​ស្នាក់នៅ គឺ​លុយ​នឹង​ធ្លាក់​ទៅ​លើ​ពួក​ចិន​ទៀត ព្រោះ​ថា​ជនជាតិ​ចិន​មួយ​ចំនួន​បាន​បើក​ដំណើរការ​សណ្ឋាគារ និង​ផ្ទះសំណាក់ រួម​ទាំង​ភោជនីយដ្ឋាន​សម្រាប់​ទទួល​ភ្ញៀវ​ទាំងនោះ​រួច​អស់​ហើយ។

មន្ត្រី​ខាងលើ​អះអាង​ថា ខេត្ត​សៀមរាប​ក៏​នឹង​មាន​សណ្ឋាគារ ផ្ទះសំណាក់ និង​ភោជនីយដ្ឋាន​របស់​ចិន​ដូច​គ្នា​ដែរ ដូច្នេះ ចិន​នឹង​ប្រមូល​លុយ​ពី​កម្ពុជា​ទាំងអស់ ខណៈ​ខ្មែរ​គឺ​មាន​តែ​រូបភាព​ល្អ​មើល​ដែល​មាន​អគារ​ខ្ពស់ៗ ផ្លូវ​ល្បឿន​លឿន និង​ព្រលាន​យន្តហោះ​ថ្មី ជាដើម ប៉ុន្តែ​របស់​ទាំងអស់​នោះ គឺ​សុទ្ធសឹងតែ​ជា​កម្មសិទ្ធិ​របស់​ក្រុមហ៊ុន​ចិន​ទាំងអស់ ប៉ុន្តែ​រូបភាព​ទាំងនេះ​បាន​ត្រឹម​ចំណេញ​ដល់​នយោបាយ​រដ្ឋាភិបាល​របស់​គណបក្ស​ប្រជាជន​កម្ពុជា ក្នុង​ការ​ទាក់ទាញ​សន្លឹកឆ្នោត​ប៉ុណ្ណោះ។

មន្ត្រី​ជាន់ខ្ពស់​រដ្ឋាភិបាល​រូប​នេះ​រៀបរាប់​ថា ក្រៅពី​ផល​ប្រយោជន៍​ដែល​ក្រុមហ៊ុន​ចិន​ទទួល​បាន​ទាំងនេះ គឺ​ក្រុមហ៊ុន​ចិន​មួយ​ចំនួន​កំពុង​សាងសង់​ផ្លូវ​គមនាគមន៍​ខ្វាត់ខ្វែង​ក្នុង​គោលដៅ​ត​ភ្ជាប់​បណ្ដាញ​ទំនាក់ទំនង​ទៅ​កាន់​ខេត្ត​នានា​ក្នុង​ប្រទេស​កម្ពុជា ដូចជា​ខេត្ត​មណ្ឌលគិរី និង​ខេត្ត​រតនគិរី ជាដើម ដើម្បី​ជួយ​សម្រួល​ដល់​ក្រុមហ៊ុន​របស់​ពួកគេ​ដែល​កំពុង​ធ្វើ​ជំនួញ​លើ​វិស័យ​កសិកម្ម ដូចជា​ដំណាំ​ចេក ដំណាំ​ស្វាយចន្ទី និង​ដំណាំ​ដំឡូងមី ជាដើម ក្នុង​ការ​ដឹកជញ្ជូន​មក​កាន់​ព្រលាន​យន្តហោះ​ថ្មី​នេះ ដូច្នេះ​លុយ​ក្នុង​វិស័យ​នេះ​ក៏​នឹង​បាន​ទៅ​ក្រុមហ៊ុន​ចិន​ទៀត។

មន្ត្រី​ជាន់ខ្ពស់​រដ្ឋាភិបាល​ខាងលើ​បញ្ជាក់​ថា រយៈពេល ៥៥​ឆ្នាំ​ក្រោយ កម្ពុជា​នឹង​ទទួល​បាន​ព្រលាន​យន្តហោះ​ដ៏​ចាស់​ទ្រុឌទ្រោម​មួយ និង​ផ្លូវ​ល្បឿន​លឿន​ដ៏​រខេករខាក​ពី​មិត្ត​ដែកថែប​របស់​ខ្លួន។ ជាង​នេះ​ទៀត កម្ពុជា​ក៏​ទំនង​ជា​អាច​ទទួល​បាន​ក្រុម​ម៉ាហ្វា​ជនជាតិ​ចិន មក​រស់នៅ​លើ​ទឹកដី​របស់​ខ្លួន ដោយ​ការ​បង្កើត​ជំនួញ​ខុស​ច្បាប់​ផង​ដែរ ដោយសារតែ​កម្ពុជា​មិន​បាន​អនុវត្ត​ច្បាប់​សម្រាប់​គ្រប់គ្រង​ជនបរទេស ឬ​ប្រទេស​របស់​ខ្លួន​ឱ្យ​បាន​ត្រឹមត្រូវ​ច្បាស់លាស់​នៅឡើយ ដោយសារតែ​ខ្លួន​ចង់​បាន​លុយ​កម្ចី​របស់​ចិន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស