អត្ថបទដោយ៖ តាំង សារ៉ាដា
មនុស្សជំនិតម្នាក់របស់នាយករដ្ឋមន្ត្រីតពូជ លោក ហ៊ុន ម៉ាណែត ត្រូវបានគេរកឃើញថាបានសហការជាមួយភរិយា ស្រីកំណាន់របស់ខ្លួន និងដៃគូវិនិយោគជាច្រើនទៀតបើកបណ្ដាញក្រុមហ៊ុនដែលមានរចនាសម្ព័ន្ធដូចសម្បុកពីងពាង ដើម្បីរកចំណូលពីការនាំពលករទៅធ្វើការនៅក្រៅប្រទេស។
បុរសរូបនេះក៏បានបើកក្រុមហ៊ុនលាយស៊ីម៉ងត៍ ក្រុមហ៊ុនសេវាកម្មទេសចរណ៍ និងសណ្ឋាគារជាច្រើន ដើម្បីរកចំណូលសម្រាប់ផ្គត់ផ្គង់ហិរញ្ញវត្ថុគណបក្សប្រជាជនកម្ពុជាទាំងនៅក្នុងស្រុក និងក្រៅស្រុក។
មនុស្សជំនិតម្នាក់របស់នាយករដ្ឋមន្ត្រីតពូជ លោក ហ៊ុន ម៉ាណែត ដែលហ៊ានធ្វើអ្វីគ្រប់បែបយ៉ាង មិនថាតាមមធ្យោបាយក្តៅ ឬត្រជាក់ ជាប្រធានសមាគមអតីតនិស្សិតខ្មែរពីប្រទេសជប៉ុន ដែលជាប់ឈ្មោះជាមន្ត្រីបែបជើងកាង ហើយតែងមានជំហរផ្អៀងទៅរកក្រុមនាយទុននោះ គឺលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ លោកត្រូវបានរកឃើញថា មានជាប់ពាក់ព័ន្ធជាមួយភរិយា និងស្រីកំណាន់របស់ខ្លួន បង្កើតក្រុមហ៊ុនឯកជនជាច្រើនដើម្បីនាំពលករទៅធ្វើការនៅក្រៅប្រទេស ជាពិសេសទៅប្រទេសជប៉ុន ប្រទេសកូរ៉េខាងត្បូង និងប្រទេសថៃ។
លោក ហេង សួរ គឺជាមន្ត្រីលេចធ្លោមួយរូបទាំងក្នុងជួររដ្ឋាភិបាលរបស់លោក ហ៊ុន ម៉ាណែត និងគណបក្សប្រជាជនកម្ពុជារបស់លោក ហ៊ុន សែន ប៉ុន្តែលោកបានរងនូវការរិះគន់យ៉ាងខ្លាំងពីសហគមន៍អ្នកគោរពសិទ្ធិមនុស្ស និងក្រុមអង្គការក្រៅរដ្ឋាភិបាលដែលធ្វើការការពារ និងលើកកម្ពស់សិទ្ធិពលករ ថាជាមនុស្សកោងកាច និងបំពានច្បាប់។ ភាពកោងកាចនេះបានស្តែងចេញតាមរយៈសារសំឡេងបែកធ្លាយមួយ ហើយដែលគេសន្មតថាជាសំឡេងរបស់លោកនិយាយពីការរៀបគម្រោងវាយធ្វើបាបពលករខ្មែរនៅក្រៅប្រទេស ដែលហ៊ានរិះគន់រដ្ឋាភិបាលលោក ហ៊ុន សែន។
យោងតាមឯកសារចុះបញ្ជីនៅក្រសួងពាណិជ្ជកម្ម បានឲ្យដឹងថា រដ្ឋមន្ត្រីជើងកាងរូបនេះត្រូវបានគេរកឃើញថា បានបើកក្រុមហ៊ុនមួយចំនួនជាមួយដៃគូវិនិយោគរបស់ខ្លួន ដូចជានៅថ្ងៃទី២០ ខែធ្នូ ឆ្នាំ២០១៩ អំឡុងពេលពលរដ្ឋខ្មែរកំពុងជួបវិបត្តិជំងឺកូវីដ-១៩។ ក្រុមហ៊ុននោះមានឈ្មោះថា 4STAR HARMONY DEVELOPMENT CO., LTD ជាក្រុមហ៊ុនឯកជនទទួលខុសត្រូវមានកម្រិត ដែលមានទីតាំងស្ថិតនៅក្នុងផ្ទះលេខ 05B ផ្លូវលេខ 02 ភូមិអង្គ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ក្រុមហ៊ុននេះមានលោកឧកញ៉ា ជាម ឃុនណាត ដែលជាអគ្គនាយកបុរីមេគង្គលែន និងលោក ផាត់ ប៊ុន ជាប្រធានក្រុមប្រឹក្សាភិបាល។ ចំណែកឯលោក ហេង សួរ លោក ឈាង គិច (Chheang KECH) លោក ម៉េង សុភា (Meng Sophea) ឈរឈ្មោះជានាយកក្រុមហ៊ុន។
លោកឧកញ៉ា ជាម ឃុនណាត ជានាយកក្រុមហ៊ុនជាច្រើន មានដូចជា៖
- ក្រុមហ៊ុន HOME MASTER SUPPLY CO., LTD
- ក្រុមហ៊ុន K N N (CAMBODIA)
- ក្រុមហ៊ុន KNCG CO., LTD
- ក្រុមហ៊ុន MEKONG LAND DEVELOPMENT CO., LTD
- ក្រុមហ៊ុន MEKONG RIVER CO., LTD
- ក្រុមហ៊ុន K N N GROUP CO., LTD
- ក្រុមហ៊ុន Cambodia Flag ORKIDE VILLA 2 CO., LTD។
ចំណែកលោក ផាត់ ប៊ុន ដែលជាប្រធានក្រុមប្រឹក្សាភិបាលផងដែរនោះ ក៏មានក្រុមហ៊ុនជាច្រើនដូចជា៖
- ក្រុមហ៊ុន B & BM DEVELOPMENT CO., LTD
- ក្រុមហ៊ុន B S C IMPORT EXPORT CO., LTD
- ក្រុមហ៊ុន B.P.C TRADING CO., LTD
- ក្រុមហ៊ុន ANGKOR DAIRY PRODUCTS CO., LTD
- និងក្រុមហ៊ុន B S C IMPORT EXPORT CO., LTD។
រីឯលោក ម៉េង សុភា (Meng Sophea) មានក្រុមហ៊ុនមួយចំនួនផងដែរ ដូចជា៖
- ក្រុមហ៊ុន GOLDEN B.S.T CONCRETE CO., LTD
- ក្រុមហ៊ុន B & BM DEVELOPMENT CO., LTD
- ក្រុមហ៊ុន B S C IMPORT EXPORT CO., LTD។
រដ្ឋមន្ត្រីជើងកាងនៃក្រសួងការងារ លោក ហេង សួរ ក៏បានបង្កើតក្រុមហ៊ុនមួយទៀតជាមួយដៃគូវិនិយោគរបស់ខ្លួននៅថ្ងៃទី៣០ ខែឧសភា ឆ្នាំ២០១៣ ដែលមានឈ្មោះថា ហ្គោលដេន ប៊ី.អេស.ធី ខនគ្រីត (GOLDEN B.S.T CONCRETE CO., LTD) ដែលជាក្រុមហ៊ុនលាយស៊ីម៉ងត៍មានទីតាំងស្ថិតនៅផ្ទះ ២០៣, ១០១៩ ភូមិរោងចក្រ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ នៅក្នុងក្រុមហ៊ុននេះ លោក ម៉េង សុភា ឈរឈ្មោះជាប្រធានក្រុមប្រឹក្សាភិបាលក្រុមហ៊ុន។
ចំណែកឯលោក ហេង សួរ លោក គង់ ថារី (Kong THARY) លោក ផាត់ បណ្ឌិត (Phat BANDITH) លោក ផាត់ ឈារី (Phat CHHERY) លោក សៀ គីរីរាជ (Sear KIRIREACH) លោក សុខ ធា (Sok THEA) និងលោក ហេង សុខអេង (Heng SOK ENG) ឈរឈ្មោះជាប្រធានក្រុមហ៊ុន។
លោក គង់ ថារី (Kong THARY) ជាប្រធានក្រុមប្រឹក្សាភិបាលក្រុមហ៊ុនមួយទៀតឈ្មោះ Cambodia Flag B.S LUCKY CO., LTD។ ចំណែកឯលោក ផាត់ ឈារី មានក្រុមហ៊ុនមួយទៀតឈ្មោះថា Cambodia Flag P.K LIGHT BLOCK CO., LTD។
រីឯលោក សៀ គីរីរាជ (Sear KIRIREACH) មានក្រុមហ៊ុនជាច្រើនដូចជា៖
- ក្រុមហ៊ុន DRAGON CENTURY RESORT CO., LTD
- ក្រុមហ៊ុន GALAXY POIPET CO., LTD
- ក្រុមហ៊ុន CASH POINT CO., LTD
- និងក្រុមហ៊ុន GALAXY POIPET CO., LTD។
មិនខុសគ្នាពីអ្នកជំនួញខាងលើ លោក ហេង សុខអេង ក៏មានក្រុមហ៊ុនមួយទៀតឈ្មោះថា JPMOTO (CAMBODIA) CO., LTD។
ក្រៅតែពីចូលហ៊ុនវិនិយោគជាមួយវិនិយោគិនជាច្រើនអ្នកនោះ ភរិយារបស់លោក ហេង សួរ ឈ្មោះ សោម រស្មី គឺជាម្ចាស់សណ្ឋាគារ និងរមណីយដ្ឋានSea Breeze នៅខេត្តព្រះសីហនុ ដែលនៅទីនោះ កិច្ចប្រជុំអន្តរក្រសួងនានាតែងត្រូវបានរៀបចំធ្វើនៅសណ្ឋាគារនោះ។
អ្នកស្រីក៏មានតួនាទីនៅក្នុងក្រុមហ៊ុនជាច្រើនទៀតផងដែរ ដូចជា៖
- ប្រធានក្រុមប្រឹក្សាភិបាលនៃក្រុមហ៊ុន Gold Star Premium Water
- ប្រធានក្រុមប្រឹក្សាភិបាលនៃក្រុមហ៊ុន Som Raksmey Co., Ltd
- ប្រធានក្រុមប្រឹក្សាភិបាលនៃក្រុមហ៊ុន SRMY Development Co., Ltd
- ប្រធានក្រុមប្រឹក្សាភិបាលនៃក្រុមហ៊ុន SV Dragon Eco Beach Co., Ltd
- ជាអតីតអភិបាលនៃក្រុមហ៊ុន Woodland Vegas Co., Ltd ដោយសារអ្នកស្រីបានលាឈប់ពីមុខតំណែងនៅថ្ងៃទី៣១ ខែកក្កដា ឆ្នាំ២០២៣។
អ្នកស្រីក៏ជាអតីតប្រធានក្រុមប្រឹក្សាភិបាលនៃក្រុមហ៊ុន Mayura Residence Investment Co., Ltd (លាឈប់ពីតំណែងនេះនៅខែឧសភា ឆ្នាំ២០១៩)។ ក្រុមហ៊ុននេះមានទីតាំងស្ថិតនៅបុរីពិភពថ្មីលេខ២៧១ ក្បាលដីលេខ៤៩៣ ផ្ទះលេខ១៣ ផ្លូវ០២ ភូមិ១១ សង្កាត់ទឹកល្អក់៣ ខណ្ឌទួលគោក ភ្នំពេញ។ ក្រុមហ៊ុននេះមានអ្នកស្រី ចាន់ ធានី លោក ឡាយ សំណាង (Lay SAMNANG) និងលោក វ៉េង ស៊ីគួ (Veng SIKOUR) ជានាយកក្រុមហ៊ុន។
អ្នកស្រី ចាន់ ធានី ត្រូវបានប្រភពស្និទ្ធនឹងលោក ហេង សួរ ប្រាប់សារព័ត៌មាន ឌឹ ខេមបូឌា ដេលី ក្នុងលក្ខខណ្ឌមិនបញ្ចេញឈ្មោះ បានឲ្យដឹងថា លោកស្រីមានទំនាក់ទំនងលើសពីការប្រាស្រ័យការងារបង្កើតក្រុមហ៊ុនរកស៊ីរួមគ្នានាំពលករទៅធ្វើការនៅជប៉ុន ជាមួយលោក ហេង សួរ។ អ្នកស្រីមានក្រុមហ៊ុនជាច្រើន ដូចជាក្រុមហ៊ុននាំពលករទៅធ្វើការនៅប្រទេសជប៉ុន ឈ្មោះក្រុមហ៊ុន អេលីត មេនផៅវ័រ អេជេនស៊ី (ELITE MANPOWER AGENCY CO., LTD) ដែលក្រុមហ៊ុននេះ អ្នកស្រីជាប្រធានក្រុមប្រឹក្សាភិបាល និងជានាយកក្រុមហ៊ុន។
អ្នកស្រី ចាន់ ធានី ក៏ជាប្រធានក្រុមប្រឹក្សាភិបាល និងនាយកក្រុមហ៊ុនមួយចំនួនទៀត ដូចជា៖
- Banjaran ASSET Management Cambodia
- ក្រុមហ៊ុន ELITE GLOBAL INVESTMENT CO., LTD
- ក្រុមហ៊ុន HIGH SOLUTIONS HOLDING
- ក្រុមហ៊ុន MAYURA RESIDENCE INVESTMENT CO., LTD។
ចំណែកឯលោក ឡាយ សំណាង (Lay SAMNANG) គ្រប់គ្រងក្រុមហ៊ុនជាច្រើនដូចជា៖
- ក្រុមហ៊ុន LAY SAMNANG INVESTMENT CO., LTD
- ក្រុមហ៊ុន ECO PRE – FAB FACTORY CO., LTD
- ក្រុមហ៊ុន IOTC C-KMALL GLOBAL CO., LTD។
រីឯលោក វ៉េង ស៊ីគួ (Veng SIKOUR) ជានាយកក្រុមហ៊ុនជាច្រើនផងដែរដូចជា៖
- ក្រុមហ៊ុន 5C GLOBAL CONNECT CO., LTD
- ក្រុមហ៊ុន 5BRIGHT SIBLINGS W.I.H CO., LTD
- ក្រុមហ៊ុន TRADE PLANET CO., LTD
- ក្រុមហ៊ុន TRADE FINANCE WORLDWIDE CO., LTD
- ក្រុមហ៊ុន TRADE FINANCE WORLDWIDE CO., LTD
- និងក្រុមហ៊ុន 3 NATURE LIFE CO., LTD។
ក្រុមហ៊ុន អេលីត មេនផៅវ័រ អេជេនស៊ី (ELITE MANPOWER AGENCY CO., LTD) របស់អ្នកស្រី ចាន់ ធានី គឺជាក្រុមហ៊ុនមួយក្នុងចំណោមក្រុមហ៊ុនចំនួន ៦ ដែលលោក អ៊ិត សំហេង អតីតរដ្ឋមន្ត្រីក្រសួងការងារ បានអនុញ្ញាតឲ្យមានសិទ្ធិស្របច្បាប់ជ្រើសរើស បណ្តុះបណ្តាល បញ្ជូន និងគ្រប់គ្រងពលការិនី ជំនួយការមេផ្ទះ ទៅធ្វើការនៅហុងកុង ក្នុងនោះរួមមាន៖
- ក្រុមហ៊ុន ថប់ មេនផៅវ័រ
- ក្រុមហ៊ុន អានីរីតា បេស មែនផៅវ័រ
- ក្រុមហ៊ុន អ៊ឹង រិទ្ធី គ្រុប
- ក្រុមហ៊ុន អេលីត មេនផៅវ័រ អេជេនស៊ី
- និងក្រុមហ៊ុន វីន វីន មេនផៅវ័រ។
ក្រុមហ៊ុន Elite Manpower Agent (EMA) ដែលត្រូវគេដឹងថាមានលោក ហេង សួរ នៅពីក្រោយនោះ កំពុងរត់ការបើកសាខានៅថៃ និងទាក់ទាញមនុស្សសំខាន់ពីក្រុមហ៊ុនផ្សេងៗ។
គណបក្សប្រជាជនកម្ពុជាបានយកស្ថានទូតធ្វើជាការិយាល័យ សាខាបក្សប្រចាំប្រទេសថៃ និងបើកសាខា ដោយលើកស្លាកគណបក្សនៅខេត្តប្រាជីនបូរី ឆាកជិនសៅ ឈុនបូរី និងបណ្តាខេត្តដទៃទៀតរបស់ថៃ។
ក្រសួងការងារក្រោមការដឹកនាំរបស់លោក ហេង សួរ តម្រូវឱ្យក្រុមហ៊ុននីមួយៗស្រង់ឈ្មោះពលករដែលកំពុងធ្វើការនៅថៃ ហើយចុះឈ្មោះជាសមាជិកបក្សយ៉ាងហោចណាស់ឲ្យបាន ១ពាន់នាក់ក្នុងក្រុមហ៊ុននីមួយៗ។ ក្រៅពីនោះ ក៏មានការបង្កើតសមាគមដើម្បីធ្វើការងារឲ្យបក្សប្រជាជនកម្ពុជាផងដែរ ដូចជាសមាគមគ្រួសារយុវជនសន្តិភាព ឬសមាគមមិត្តយើង ដែលលោក ហេង សួរ ជាអ្នកបង្កើត ហើយដាក់ឈ្មោះ អ៊ុន ខ្លង ជាប្រធានក្រុមហ៊ុនជ្រើសរើសពលករ និងឈរឈ្មោះជាតំណាងសមាគម។
ចំណែកក្រុមហ៊ុន ណា តាណាន់ ដែលជ្រើសរើសពលករធ្វើការនៅប្រទេសថៃ ហើយមានឈ្មោះ ព្រាប សំរិទ្ធ ជាម្ចាស់ក្រុមហ៊ុន និងជាអ្នកទទួលខុសត្រូវជាក្រុមហ៊ុនមួយដែលបង្កើតឡើងសម្រាប់ចេញថ្លៃចំណាយ ការជួបជុំបក្សប្រជាជនកម្ពុជា ឬគេនិយមហៅមួយបែបទៀតក្នុងប្រទេសថៃ គឺបក្សទេវតា។
មន្ត្រីដែលធ្វើការនៅស្ថានទូតខ្មែរក្នុងប្រទេសថៃ មួយរូប បានឲ្យសារព័ត៌មាន ឌឹ ខេមបូឌា ដេលី ដោយស្នើសុំមិនបញ្ចេញឈ្មោះ បានឲ្យដឹងថា ស្ថានទូតហាក់មិនមានថវិកាគ្រប់គ្រាន់សម្រាប់បំពេញការងារទេ ហេតុដូច្នេះហើយទើបមន្ត្រីអនុព័ន្ធការងារត្រូវចំណាយលុយពីក្រុមហ៊ុនជ្រើសរើសពលករសម្រាប់ចំណាយពេលជួបជុំ ឬចុះជួបពលករម្តងៗ។
មន្ត្រីរូបនោះអះអាងថា មន្ត្រីទូតភាគច្រើនមិនសប្បាយចិត្តជាមួយសកម្មភាពរបស់លោក ឈិម វិបុល ដែលធ្វើសកម្មភាពបក្ស។
មន្ត្រីដដែលបានឲ្យដឹងថា ក្រុមហ៊ុនធំៗដែលមានមនុស្សសំខាន់ៗនៅពីក្រោយខ្នង ដូចជា Top Manpower និង Elite Manpower Agent កំពុងប្រមូលផលចំណេញពីវិស័យបញ្ជូនពលករទៅបរទេស និងប្រើប្រាស់ក្រុមហ៊ុនតូចៗជាឈ្នាន់។ ក្រុមហ៊ុនទាំងនេះហាក់ដូចជាប្រភពយ៉ាងសំខាន់សម្រាប់ផ្គត់ផ្គង់ហិរញ្ញវត្ថុដល់បក្សប្រជាជនកម្ពុជាផងដែរ។
ក្រៅពីមានបណ្ដាញក្រុមហ៊ុនប្រទាក់ក្រឡាគ្នាចាក់ស្រេះដូចសម្បុកពីងពាងហើយនោះ លោក ហេង សួរ ក៏បង្កើតបណ្ដាញក្រៅស្រុក ដើម្បីគ្រប់គ្រងពលករនៅក្រៅប្រទេស ដូចជានៅប្រទេសជប៉ុន និងប្រទេសថៃ ដើម្បីឲ្យគាំទ្រគណបក្សប្រជាជនកម្ពុជា។ កាលពីរដូវបោះឆ្នោតកន្លងទៅថ្មីៗនេះ ប្រធានអនុព័ន្ធការងារប្រចាំស្ថានទូតព្រះរាជាណាចក្រកម្ពុជាក្នុងប្រទេសថៃ គឺលោក ឈឹម វិបុល និងឧកញ៉ា ឡេង ប្រុស បងប្រុសរបស់អ្នកឧកញ៉ា ឡេង ណាវ៉ាត្រា បានធ្វើការយ៉ាងសកម្មនៅទីនោះ។
កន្លងទៅ ក្រុមមន្ត្រីស្ថានទូត និងក្រុមការងារក្រសួងការងារដឹកនាំដោយរដ្ឋលេខាធិការក្រសួងការងារ លោក ហេង សួរ បានធ្វើយុទ្ធនាការអូសទាញពលករ និងពលរដ្ឋខ្មែររស់នៅប្រទេសថៃ ឱ្យចូលរួមគាំទ្រគណបក្សប្រជាជនកម្ពុជា ហើយប្រសិនបើអូសទាញមិនបាន គេចោទ ឬចាប់ និងបំភ័យតាមរយៈការប្រើក្រុមជើងកាងតាមប្រមាញ់ មិនឲ្យពួកគេឈរជើងនៅប្រទេសថៃ បានឡើយ។
ប្រភពដែលស្និទ្ធនឹងលោក ឈឹម វិបុល បានឲ្យដឹងថា មន្ត្រីរូបនេះត្រូវបានប្រើឲ្យបំបែកបំបាក់ពលករខ្មែរក្នុងប្រទេសថៃ និងធ្វើឲ្យក្រុមហ៊ុនតូចៗនៅថៃ ចុះទន់ខ្សោយតាមរយៈការបង្ខំឲ្យក្រុមហ៊ុនទាំងនោះកៀងគរពលករឲ្យជួបខ្លួន ដើម្បីឃោសនាបក្ស ហើយមិនមានពេលគ្រប់គ្រាន់សម្រាប់ផ្ដោតលើការងាររកស៊ីរបស់ខ្លួន។ ការចុះបញ្ជីពលករដើម្បីបញ្ជូនចេញដែលក្រុមលោក ហេង សួរ ជាអ្នកចាត់ចែង ក៏ជាវិធីសាស្ត្រមួយសម្រាប់ធ្វើឲ្យក្រុមហ៊ុនតូចៗផ្សេងទៀតមិនអាចប្រកួតស្មើមុខស្មើមាត់ជាមួយក្រុមហ៊ុនរបស់ខ្លួនផងដែរ។
ប្រភពដដែលបានឲ្យដឹងថា កន្លងមក លោក ឈឹម វិបុល តែងតែបង្ខិតបង្ខំឱ្យពួកគេចូលរួមជាមួយគណបក្សប្រជាជនកម្ពុជា។ ប្រសិនបើអូសទាញមិនបាន គេបំភ័យតាមរយៈការប្រើក្រុមជើងកាងតាមប្រមាញ់ មិនឲ្យពួកគេឈរជើងនៅប្រទេសថៃ បានទេ។
ប្រភពដដែលឲ្យដឹងថា ក្រុមបក្ខពួកលោក ហេង សួរ បានបញ្ជ្រាបខ្លួនចូលទៅក្នុងក្រុមពលករ និងប្រើក្រុមជនដៃដល់ដែលពួកគេឱ្យដើរគំរាមកំហែងលើអ្នកដែលមានទស្សនៈផ្ទុយនឹងរដ្ឋាភិបាលកម្ពុជា។
បុរសរូបនោះនិយាយថា លោក ឈឹម វិបុល តែងតែយកតួនាទីជាអនុព័ន្ធការងារបម្រើបក្សកាន់អំណាច ជាងការពារផលប្រយោជន៍ និងដោះស្រាយទុក្ខលំបាករបស់កម្មករ។ ប្រភពដដែលបានឲ្យដឹងថា អនុព័ន្ធការងារប្រចាំស្ថានទូតខ្មែរ លោក ឈឹម វិបុល ដើរតួនាទីសំខាន់ក្នុងការកៀងគរបណ្ដាញគណបក្សប្រជាជនកម្ពុជា ហើយដើរតួនាទីសំខាន់ក្នុងការគំរាមកំហែងមេដឹកនាំ និងសកម្មជននយោបាយរបស់បក្សប្រឆាំងចុះចូលជាមួយបក្សរបស់ខ្លួន។
ប្រភពដដែលអះអាងថា គាត់ចងក្រងយុវជនគណបក្សប្រជាជនកម្ពុជា ដោយកំណត់គោលដៅចំពោះអ្នកបកប្រែ និងមេការនៅតាមក្រុមហ៊ុន និងតាមរោងចក្រនានា។ សកម្មជនមួយចំនួនដែលបានចេញទៅបើកក្រុមហ៊ុន ត្រូវរងសម្ពាធឲ្យចូលជាសមាជិកអចិន្ត្រៃយ៍ និងជាប្រធានសាខាបក្ស ហើយត្រូវចេញលុយរៀបចំការជួបជុំពលករឲ្យខាងមន្ត្រីអនុព័ន្ធការងារជួប និងឃោសនាពីគោលការណ៍របស់បក្ស។
តាមប្រភពដដែលឲ្យដឹងទៀតថា គ្រប់ស្ថាបនិក និងថ្នាក់ដឹកនាំក្រុមហ៊ុន ត្រូវបានគេដាក់ការតាមដានគ្រប់សកម្មភាព ទាំងសកម្មភាពលើបណ្ដាញសង្គម និងក្រៅបណ្ដាញសង្គម។
ចំពោះសកម្មភាពផ្សេងទៀត រួមមានកិច្ចការចែកជំនួយមនុស្សធម៌ ដែលខាងស្ថានទូតខ្មែរបានយកលក្ខខណ្ឌនៃអាជ្ញាប័ណ្ណក្រុមហ៊ុន និងទិដ្ឋាការការងារ ប្រើប្រាស់ដើម្បីគំរាមកំហែងមកលើពលករ ឬសកម្មជននយោបាយរបស់បក្សប្រឆាំងផងដែរ។ បញ្ហានេះហើយដែលជាហេតុធ្វើឲ្យពួកគេមានការលំបាកក្នុងការធ្វើការងារ និងប្រយ័ត្នប្រយែងក្នុងការជួយជនរងគ្រោះ។
ទាក់ទងទៅនឹងការលើកឡើងនេះ កន្លងមកក៏មានសារសំឡេងរយៈពេលជាងមួយនាទីត្រូវបានគេចែកចាយព្រោងព្រាតលើបណ្ដាញសង្គម កាលពីខែតុលា ឆ្នាំ២០១៨។
សារសំឡេងដែលគេជឿថាជារបស់លោក ហេង សួរ នោះ និយាយអំពីគម្រោងជួលក្រុមជើងកាង ដើម្បីវាយធ្វើបាបក្រុមពលករខ្មែរនៅក្រៅប្រទេសដែលគាំទ្រគណបក្សប្រឆាំង។
នៅក្នុងសារជាសំឡេងនោះបាននិយាយថា «ពិនិត្យមើល នៅជប៉ុន មិនដឹងជាមានស្គាល់បណ្ដាញខាងណា។ ត្រូវចាប់ផ្ដើមធ្វើដូចនៅកូរ៉េ អ៊ីចឹង រកពួកជើងកាងមួយចំនួន មើលមុខសញ្ញាណាដែលចាំបាច់ យកជើងកាងទៅវ៉ៃវាទៅ ហើយជើងកាងហ្នឹងត្រឡប់មកវិញ យើងចិញ្ចឹម។ ធ្វើយ៉ាងម៉េចឱ្យអាមួយហ្នឹងវាប្រកាច់ប្រកិននៅទីនោះចុះ។ ហើយបើអាជើងកាងហ្នឹង គេមិនដែលចាប់ដាក់គុកនៅស្រុកគេទេ អាហ្នឹងគេចាប់បន្តិច គេប្រលែងមកហើយ ឱ្យជាប់គុកស្រុកយើង។ ចាំមកដល់ស្រុកយើង ចាំយើងចិញ្ចឹម។ រឿងនេះមិនអាចលេងសើចបានទេ។ ច្រើនដងហើយ លើកមុនយើងមិននេះទេ តែលើកនេះទៅ គឺនៅចំពោះមុខ ហើយវាហ៊ានជាន់បែបនេះ គឺយើងមិនអាចលើកលែងឱ្យវាបានទេ។ ហើយបង ស្រេង ថ្ងៃមុនថាឱ្យមុខសញ្ញាអ្នកដែលជាសកម្មជនពួកវាមកហ្នឹង តែឥឡូវនេះ គឺយើងត្រូវធ្វើការងារហ្នឹងបន្តិច។ អានេះមក ឱ្យវាគ្រោះថ្នាក់ចរាចរណ៍នៅស្រុកខ្មែរចុះ»។
ក្រោយពីបែកធ្លាយសំឡេងនោះ លោក ហេង សួរ បានបដិសេធសារសំឡេងនេះ ដោយលោកចោទថាក្រុមគណបក្សប្រឆាំងជាអ្នកប្រឌិតរឿងនេះ ដើម្បីវាយប្រហារលើរូបលោក។
អ្នកវិភាគនយោបាយលោក គឹម សុខ បានឲ្យដឹងថា ជាទូទៅ អ្នកជំនួញមានគោលដៅចង់បានចំណេញជាអាទិភាព មិនមែនគោរពច្បាប់ជាអាទិភាពទេ គឺចំណេញកាន់តែច្រើន កាន់តែជោគជ័យ។ ដូច្នេះ កាលណាអ្នកជំនួញបើកក្រុមហ៊ុន ជាអ្នកកាន់អំណាចទៀតនោះ ច្បាប់ជាឧបករណ៍ដែលគេកាឡៃ ដើម្បីបានចំណេញកាន់តែច្រើនដូចករណីលោក ហេង សួរ ជាដើម។ ត្រង់ចំណុចនេះហើយដែលវារីកទៅជាវិបត្តិពុករលួយ និងរំលោភអំណាច ដែលរដ្ឋមន្ត្រីដឹកនាំវិស័យណា ពួកគេ និងគ្រួសាររកស៊ីធ្វើសេដ្ឋីក្នុងវិស័យនោះ។
លោកបន្តថា ករណីបែបនេះ បង្កើតទៅជាវិបត្តិធំៗក្នុងផ្ទៃក្នុងជាតិ ដូចជាលុយដែលត្រូវប្រមូលពន្ធជួយពលរដ្ឋ ត្រូវធ្លាក់ក្នុងអំពើពុករលួយយ៉ាងច្រើនលើសលប់ កើតមានការិយាធិបតេយ្យ និងបក្ខពួករំលោភអំណាច ដែលធ្វើឲ្យអ្នកវិនិយោគបរទេសល្អៗ និងមានសក្ដានុពល មិនទុកចិត្ត និងមិនទៅវិនិយោគនៅកម្ពុជា។
លោកបន្តថា កត្តាទាំងនេះបានធ្វើឲ្យបាត់បង់ការងាររបស់ពលរដ្ឋកាន់តែច្រើន ហើយកើនតែចំណាកស្រុកខុសច្បាប់ទៅក្រៅប្រទេស ដើម្បីតែជីវភាពចិញ្ចឹមក្រពះ។
លោក គឹម សុខ បន្តថា រឿងដែលកាន់តែអាក្រក់ទៅទៀតនោះ កាលណារដ្ឋមន្ត្រី នាយករដ្ឋមន្ត្រី និងក្រុមគ្រួសាររបស់ពួកគេជាអ្នករកស៊ីធ្វើជំនួញទៅហើយ នោះពួកគេដោះស្រាយបញ្ហាដោយវិធីគំរាមកំហែងប៉ុណ្ណោះ ពេលណាពលរដ្ឋតវ៉ា ពីព្រោះពួកគេមានអំណាចស្រាប់។
លោក ហេង សួរ បានចាប់ផ្ដើមការងារនៅក្នុងក្រសួងការងារ និងបណ្ដុះបណ្ដាលវិជ្ជាជីវៈនៅឆ្នាំ២០០៨។ ពីដំបូង លោកជាអគ្គនាយករដ្ឋបាល និងហិរញ្ញវត្ថុ ក្រោយមកក្លាយជាអនុរដ្ឋលេខាធិការ និងរដ្ឋលេខាធិការនៃក្រសួងការងារ។ ក្រៅពីនេះ លោកជានាយកខុទ្ទកាល័យរដ្ឋមន្ត្រី និងបានបំពេញតួនាទីជាអ្នកនាំពាក្យនៃក្រសួងនេះចាប់តាំងពីឆ្នាំ២០១៣ មក។
លោកជាសមាជិកដ៏មានឥទ្ធិពលនៃក្រុមប្រឹក្សាជាតិប្រាក់ឈ្នួលអប្បបរមា។ លោកក៏មានតួនាទីនៅក្នុងលេខាធិការដ្ឋាននៃក្រុមប្រឹក្សាជាតិ ដែលបង្កើតឡើងដើម្បីដោះស្រាយបញ្ហាបៀវត្សរ៍នៅក្នុងវិស័យកាត់ដេរសម្លៀកបំពាក់ វាយនភណ្ឌ និងស្បែកជើង។ លោកជាសមាជិកនៃគណៈកម្មាធិការមជ្ឈិមរបស់គណបក្សកាន់អំណាច និងជាប្រធានក្រុមបណ្ដុះបណ្ដាលយុវជនរបស់បក្សកាន់អំណាចនៅស្រុកបាធាយ ខេត្តកំពង់ចាម។ នៅថ្ងៃទី២២ ខែសីហា ឆ្នាំ២០២៣ លោកបានក្លាយជារដ្ឋមន្ត្រីថ្មីនៃក្រសួងការងារ។
លោក ហេង សួរ កើតនៅឆ្នាំ១៩៧៤ នៅរាជធានីភ្នំពេញ និងមានបងប្អូនបង្កើត ៥នាក់។ លោកជាកូនច្បង។ លោកមានកូនចំនួន ៣នាក់ ស្រីម្នាក់ និងប្រុស ២នាក់។
លោក ហេង សួរ បានរៀននៅសាលាបឋមសិក្សាទួលថ្ម ក្នុងខេត្តកំពង់ចាម ចន្លោះពីឆ្នាំ១៩៨១ ដល់ឆ្នាំ១៩៨៧ បន្ទាប់មក លោកបានផ្លាស់មករៀននៅទីក្រុងភ្នំពេញវិញ។ លោកបានបញ្ចប់ការសិក្សាថ្នាក់បរិញ្ញាបត្រនៅសាកលវិទ្យាល័យជាតិគ្រប់គ្រងក្នុងឆ្នាំ១៩៩៨។
លោកបានបញ្ចប់ថ្នាក់អនុបណ្ឌិតពីប្រទេសជប៉ុន និងធ្លាប់ជាប្រធានសមាគមអតីតនិស្សិតខ្មែរពីប្រទេសជប៉ុន ពីឆ្នាំ២០០៨ ដល់ឆ្នាំ២០១៤។
លោក ហេង សួរ ជាមន្ត្រីសំខាន់មួយរូបដែលតែងតែតំណាងឱ្យរដ្ឋមន្ត្រីក្រសួងការងារ លោក អ៊ិត សំហេង ក្នុងដំណើរការចរចាប្រាក់ឈ្នួលគោលសម្រាប់វិស័យកាត់ដេរជារៀងរាល់ឆ្នាំ ក៏ប៉ុន្តែមន្ត្រីជាន់ខ្ពស់ក្រសួងការងាររូបនេះ ច្រើនតែមានជំហរផ្អៀងទៅរកក្រុមថៅកែ។
ថ្នាក់ដឹកនាំសហជីពឯករាជ្យដែលធ្លាប់ចូលតុចរចាជាមួយលោក ហេង សួរ រាល់លើកនោះ បានពណ៌នាថា លោក ហេង សួរ ជាមនុស្សពូកែ ឆ្លាត និងមានសមត្ថភាព ហើយលោកក៏ហ៊ានធ្វើអ្វីគ្រប់បែបយ៉ាងដើម្បីសម្រេចគោលដៅរបស់ខ្លួនដែរ៕
