27 C
Phnom Penh

មន្ត្រី​សង្គម​ស៊ីវិល​ជំរុញ​ឱ្យ​សមត្ថកិច្ច​ប្រើ​វិធានការ​បន្ថែម​ដើម្បី​ជួយ​ជនរងគ្រោះ​ករណី​បទល្មើស​បច្ចេកវិទ្យា

ដោយ ឌឹ ខេមបូឌា ដេលី

បទវិភាគ

មន្ត្រី​សិទ្ធិមនុស្ស​ក្នុង​ស្រុក ជំរុញ​ឱ្យ​សមត្ថកិច្ច​កម្ពុជា​ចាត់​វិធានការ​បន្ថែម​ជួយ​ជនរងគ្រោះ ក្រៅតែ​ពី​ការ​រង់ចាំ​ទទួល​ពាក្យបណ្ដឹង ព្រោះ​ថា​នៅ​ពេល​ដែល​ក្រុម​ឧក្រិដ្ឋជន​ចាប់​ជនរងគ្រោះ​ធ្វើ​ជា​ចំណាប់ខ្មាំង​ហើយ​នោះ ពួកគេ​ច្បាស់​ជា​គ្រប់គ្រង​ប្រព័ន្ធ​ទំនាក់ទំនង​របស់​ជនរងគ្រោះ ធ្វើ​ឲ្យ​ជនរងគ្រោះ​គ្មាន​ឱកាស​ប្តឹង​ទៅ​កាន់​សមត្ថកិច្ច​ទាន់​ពេល។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​១៣ វិច្ឆិកា នេះ​ថា សមត្ថកិច្ច​គួរតែ​ពិចារណា​វិធានការ​ឲ្យ​កាន់​តែ​មាន​ប្រសិទ្ធភាព និង​សុវត្ថិភាព​សម្រាប់​ពលរដ្ឋ​បន្ថែម​ទៀត ទាក់ទិន​នឹង​ការ​ចាញ់​បោក​តាមរយៈ​បទល្មើស​បច្ចេកវិទ្យា ព្រោះ​ថា​បើ​សមត្ថកិច្ច​នៅ​រង់ចាំ​តែ​បណ្តឹង​ទើប​មាន​វិធានការ នោះ​មាន​ន័យ​ថា ការ​ប្រយុទ្ធ​ប្រឆាំង​នឹង​បទល្មើស​បច្ចេកវិទ្យា​របស់​សមត្ថកិច្ច​នៅ​មាន​កម្រិត​នៅឡើយ ដែល​ធ្វើ​ឱ្យ​ក្រុម​ឧក្រិដ្ឋជន​មាន​ឱកាស​ប្រព្រឹត្ត​អំពើ​ឧក្រិដ្ឋ​របស់​ពួកគេ​បាន​មុន​វិធានការ​របស់​សមត្ថកិច្ច​ជានិច្ច។

លោក ស៊ឹង សែនករុណា លើកឡើង​ថា ដើម្បី​ធានា​សុវត្ថិភាព​ជូន​ពលរដ្ឋ មិនមែន​ទាល់​តែ​មាន​ពាក្យ​បណ្តឹង​ទើប​មាន​វិធានការ​នោះ​ទេ គឺ​សមត្ថកិច្ច​ត្រូវ​ស្រាវជ្រាវ និង​មាន​វិធានការ​ទប់ស្កាត់​ជា​មុន​នូវ​ករណី​ណា​ដែល​មាន​ទំនោរ ឬ​សង្ស័យ​ថា​ជា​ការ​បោកប្រាស់ នោះ​ទើប​ជា​វិធានការ​ដែល​អាច​ការពារ​សុវត្ថិភាព​ពលរដ្ឋ​មាន​ប្រសិទ្ធភាព ដើម្បី​ចៀស​នូវ​ករណី​ដែល​ទាល់តែ​ពលរដ្ឋ​បាន​ចាញ់​បោក​រួច​ហើយ ទើប​នាំគ្នា​ជួយ​សង្គ្រោះ​ជា​ក្រោយ​នោះ។

មន្ត្រី​ជាន់ខ្ពស់​សង្គម​ស៊ីវិល​រូប​នេះ​បញ្ជាក់​ថា រដ្ឋាភិបាល​គួរតែ​រៀបចំ​ឱ្យ​មាន​ប្រព័ន្ធ​សុវត្ថិភាព​ការពារ​ពលរដ្ឋ​ពី​ការ​ឆបោក​ឱ្យ​បាន​ខ្ពស់​ជាង​ល្បិច​បោកប្រាស់​របស់​ឧក្រិដ្ឋជន ទោះ​មាន​ការ​ឆបោក​ខ្លះ​ក៏​ស្ថិត​ក្នុង​កម្រិត​តិចតួច ហើយ​ជា​ករណី​ដែល​ក្រុម​ឧក្រិដ្ឋជន​ធ្វើ​បាន​ដោយ​តូច​ចង្អៀត​ថែម​ទៀត មិនមែន​ពួកគេ​ចេះតែ​អាច​ធ្វើ​បាន​ដោយ​អនាធិបតេយ្យ​ងាយៗ​នោះ​ទេ។

ការ​អះអាង​នេះ ធ្វើឡើង​បន្ទាប់ពី​អគ្គស្នងការដ្ឋាន​នគរបាល​ជាតិ ណែនាំ​ឱ្យ​ពលរដ្ឋ​ដាក់​ពាក្យ​បណ្តឹង​នៅ​ពេល​ដែល​ខ្លួន​បាន​រង​នូវ​ការ​ចាញ់​បោក​តាម​ប្រព័ន្ធ​បច្ចេកវិទ្យា កាលពី​ថ្ងៃ​អាទិត្យ​នេះ។

កាលពី​ថ្ងៃទី​១២ ខែ​វិច្ឆិកា ឆ្នាំ​២០២៣ អគ្គស្នងការ​នគរបាល​ជាតិ បាន​ចេញ​វីដេអូ​អំពី​នីតិវិធី​ដាក់​បណ្តឹង​សម្រាប់​ពលរដ្ឋ​ដែល​បាន​ចាញ់​បោក​ជនល្មើស​តាម​បច្ចេកវិទ្យា ដោយ​ណែនាំ​ឱ្យ​ពលរដ្ឋ​ដែល​ចាញ់​បោក​ជន​ខិលខូច​តាម​ប្រព័ន្ធ​បច្ចេកវិទ្យា ដូចជា តាមរយៈ​បណ្ដាញ​សង្គម តាម​ទូរគមនាគមន៍ តាម​ប្រព័ន្ធ​ធនាគារ តាមរយៈ​ប្រាក់កម្ចី​ខុស​ច្បាប់ តាម​សារ​អេឡិចត្រូនិក ឬ​បទល្មើស​បច្ចេកវិទ្យា​ផ្សេង​ទៀត ជាដើម មក​កាន់​ក្រុម​ការងារ​អគ្គស្នងការដ្ឋាន​នគរបាល​ជាតិ Hotline Scam ដែល​ទើប​ត្រូវ​បាន​បង្កើត​ឡើង​នៅ​ពេលនេះ។

អគ្គស្នងការ​នគរបាល​ជាតិ បាន​ណែនាំ​ក្នុង​វីដេអូ​ផ្សព្វផ្សាយ​របស់​ខ្លួន​តាមរយៈ​វិធី​មួយ​ចំនួន ដូចជា ជនរងគ្រោះ​គ្រាន់តែ​ចូល​ទៅ​កាន់​ទំព័រ​ហ្វេសប៊ុក​ផ្លូវការ​ដែល​មាន​ឈ្មោះ​ថា អគ្គស្នងការ​នគរបាល​ជាតិ និង​ចុច​លើ​ពាក្យ​ថា Contact Us និង​បំពេញ​នូវ​ព័ត៌មាន​មួយ​ចំនួន​ដែល​អគ្គស្នងការ​នគរបាល​ជាតិ​បាន​កំណត់។

អគ្គស្នងការ​នគរបាល​ជាតិ បញ្ជាក់​ថា ក្រៅពី​វិធី​ខាងលើ ពលរដ្ឋ​ក៏​អាច​ស្គែន QR Code ដើម្បី​ទាញ​យក​ពាក្យ​បណ្តឹង រួច​ហើយ​បំពេញ​ព័ត៌មាន​ក្នុង​សំណុំ​បែបបទ និង​ផ្ដិត​ស្នាម​មេដៃ ដោយ​ភ្ជាប់​ជាមួយ​ឯកសារ​ពាក់ព័ន្ធ និង​ភស្តុតាង​នានា​ផង​ដែរ មុន​នឹង​ផ្ញើ​ទៅ​កាន់​អគ្គស្នងការ​នគរបាល​ជាតិ​វិញ។

ទាក់ទិន​នឹង​បញ្ហា​នេះ នាយកដ្ឋាន​ព័ត៌មានវិទ្យា​កម្ពុជា បាន​ចេញ​របាយការណ៍​របស់​ខ្លួន​កាលពី​ពេល​ថ្មីៗ​នេះ​ថា បទល្មើស​បច្ចេកវិទ្យា​ធំៗ​មួយ​ចំនួន​ប្រចាំ​ឆ្នាំ​២០២២ ដែល​បាន​លុកលុយ​ប្រទេស​កម្ពុជា ដូចជា ក្រុម​ឧក្រិដ្ឋជន​តែង​ប្រើប្រាស់​កម្មវិធី​បណ្ដាញ​សង្គម ឬ​អ៊ីមែល ដើម្បី​បញ្ឆោត​ជនរងគ្រោះ​ឱ្យ​ចូល​ទៅ​កាន់​គេហទំព័រ​ក្លែងបន្លំ​ក្នុង​បំណង​លួច​យក​ព័ត៌មាន។

ជាង​នេះ​ទៀត ក្រុម​ឧក្រិដ្ឋជន​តែង​ខល​ចូល​ទូរសព្ទ​របស់​ជនរងគ្រោះ និង​បាន​ប្រើប្រាស់​បច្ចេកទេស​វិស្វកម្ម​បណ្ដាញ​សង្គម ដើម្បី​លួច​យក​នូវ​ព័ត៌មាន​ពី​ជនរងគ្រោះ​ផង​ដែរ ក្រៅពី​នេះ ក្រុម​ឧក្រិដ្ឋជន​ក៏​តែង​លួច​យក​នូវ​អត្តសញ្ញាណ​ជនរងគ្រោះ​ពី​កម្មវិធី​បណ្ដាញ​ទំនាក់ទំនង​សង្គម ដោយ​យក​អត្តសញ្ញាណ​ទាំងនោះ​ទៅ​ប្រើប្រាស់ ឬ​លក់ ឬ​ចែកចាយ​លើ​ទីផ្សារ​ងងឹត ជាដើម។

កាលពី​អំឡុង​ខែ​កក្កដា ឆ្នាំ​២០២៣ អង្គការ​សហប្រជាជាតិ បាន​បង្ហាញ​របាយការណ៍​របស់​ខ្លួន​ថា អំពើ​ឆបោក​តាម​អ៊ីនធឺណិត​នៅ​ក្នុង​តំបន់​អាស៊ី​អាគ្នេយ៍​កំពុង​បង្កើត​ប្រាក់ចំណូល​រាប់​ពាន់​លាន​ដុល្លារ​អាមេរិក ដោយ​មាន​ជនរងគ្រោះ​ប្រមាណ ១​សែន​នាក់​ត្រូវ​បាន​ជួញដូរ​ចូល​ទៅ​ក្នុង​ប្រទេស​កម្ពុជា និង​ជាង ១​សែន​នាក់​ផ្សេង​ទៀត (១២០០០០​នាក់) ចូល​ទៅ​កាន់​ប្រទេស​ភូមា ផង​ដែរ ប៉ុន្តែ​តួលេខ​នេះ​ត្រូវ​រដ្ឋាភិបាល​កម្ពុជា​បដិសេធ​ចោល​ទាំងស្រុង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស