សង្គ្រាមអ៊ីស្រាអែល និងក្រុមហាម៉ាស-ប៉ាឡេស្ទីន បានឈានចូលដល់ថ្ងៃទី៤៥ ហើយ គិតត្រឹមថ្ងៃអង្គារ ទី២១ ខែវិច្ឆិកា នេះ។ សង្គ្រាមវាយសងសឹកតាមកម្ទេចក្រុមហាម៉ាស បានសម្លាប់ប្រជាជនប៉ាឡេស្ទីន ប្រមាណ ១៣៣០០នាក់ ក្នុងនោះរួមមានកុមារជាង ៥៥០០នាក់ក្នុងតំបន់ Gaza Strip។
កងកម្លាំងអ៊ីស្រាអែល អះអាងថា ពួកគេបានបន្តរកឃើញទីតាំងក្រោមដីរបស់ក្រុមហាម៉ាស មួយចំនួនថែមទៀតក្នុងតំបន់ភាគខាងជើងហ្កាហ្សា និងបានរកឃើញផ្លូវរូងក្រោមដីមួយនៅក្រោមមន្ទីរពេទ្យ al-Shifa ក្រោយពីអ៊ីស្រាអែលលើកទ័ពចូលទៅកាន់កាប់មន្ទីរពេទ្យនេះ។
កងទ័ពអ៊ីស្រាអែល បញ្ជាក់ថា ផ្លូវសម្ងាត់ដែលរកឃើញនោះ គឺរូងក្រោមដីប្រវែង ៥៥ម៉ែត្រ និងជម្រៅ ១០ម៉ែត្រ ដែលស្ថិតនៅពីខាងក្រោមមន្ទីរពេទ្យដ៏ធំនេះក្នុងតំបន់ហ្កាហ្សាភាគខាងត្បូង។
ជាមួយស្ថានការណ៍សង្គ្រាមដ៏អាក្រក់ ហើយកាន់តែផ្ដាច់ផ្ដិលជីវិតជនស៊ីវិលនៅតំបន់សង្គ្រាម អ្នកនាំពាក្យសេតវិមាន លោក John Kirby បាននិយាយថា សហរដ្ឋអាមេរិកជឿជាក់ថា អ៊ីស្រាអែល និងក្រុមហាម៉ាស កំពុងខិតកាន់តែកៀកទៅរកកិច្ចព្រមព្រៀងមួយដែលនឹងធានាឱ្យមានការដោះលែងចំណាប់ខ្មាំងបរទេសដែលកំពុងជាប់ក្នុងតំបន់ហ្កាហ្សា បើទោះជាអ៊ីស្រាអែលនៅតែបន្តវាយលុកលើទីក្រុងហ្កាហ្សា ក៏ដោយនោះ។
អ្នកនាំពាក្យសេតវិមាន លោក John Kirby បានបញ្ជាក់ថា កិច្ចចរចាខិតខំកាន់តែកៀកជាងមុនទៅរកកិច្ចព្រមព្រៀងមួយស្ដីពីចំណាប់ខ្មាំង។
ចំណែកប្រធានាធិបតីអាមេរិក លោក ចូ បៃដិន កាលពីថ្ងៃចន្ទ ក៏បាននិយាយដែរថា លោកផ្ទាល់ជឿជាក់ថា កិច្ចព្រមព្រៀងឈប់បាញ់រយៈពេលខ្លីកំពុងខិតកាន់តែកៀកហើយ។ លោក បៃដិន ចង់ឃើញចំណាប់ខ្មាំងបរទេសទាំងអស់ត្រូវបានដោះលែង។
ចំណាប់ខ្មាំងបរទេសមានពីរវាង ៧០នាក់ទៅ ១០០នាក់ ក្នុងចំណោមចំណាប់ខ្មាំង ២៤០ ដែលពួកហាម៉ាសចាប់ពង្រត់ពីអ៊ីស្រាអែល កាលពីថ្ងៃទី៧ ខែតុលា ខណៈពួកហាម៉ាសបាញ់រ៉ុក្កែតជាង ៥ពាន់គ្រាប់ចូលដែនដីអ៊ីស្រាអែល។
ទីភ្នាក់ងារសារព័ត៌មាន Reuters បានរាយការណ៍ដែរថា ប្រទេសកាតា ដែលតំណាងឱ្យប្រទេសអារ៉ាប់ កំពុងសម្របសម្រួលឱ្យមានកិច្ចព្រមព្រៀងមួយរវាងអ៊ីស្រាអែល និងក្រុមហាម៉ាស ដោយការដោះដូរចំណាប់ខ្មាំងជាង ៥០នាក់ជាលើកដំបូងជាមួយបទឈប់បាញ់មួយមានរយៈពេល ៥ថ្ងៃ ដែលនឹងជួយសម្រួលដល់ការផ្ដល់ជំនួយមនុស្សធម៌សម្រាប់ជនស៊ីវិលផងដែរ។
ប៉ុន្តែក្នុងពេលដែលកងទ័ពអ៊ីស្រាអែលកាន់តែរុលខ្លាំងចូលទៅកាន់ទីតាំងជាច្រើននៅភាគខាងត្បូងហ្កាហ្សា ហើយមើលទៅពួកហាម៉ាស ពុំអាចរកឱកាសក្នុងការវាយបក នៅថ្ងៃនេះមេដឹកនាំក្រុមហាម៉ាស លោក Ismail Haniyeh បានបន្ទន់ជំហរដោយចង់ឱ្យមានយុទ្ធសន្តិភាពជាមួយនឹងអ៊ីស្រាអែល។
លោក Ismail Haniyeh និយាយថា ក្រុមប្រដាប់អាវុធរបស់លោកកំពុងខិតកាន់តែកៀកទៅរកកិច្ចព្រមព្រៀងមួយស្ដីពីបទឈប់បាញ់ជាមួយអ៊ីស្រាអែល។
លោក Ismail Haniyeh បញ្ជាក់ដូចនេះនៅក្នុងសេចក្ដីថ្លែងការណ៍មួយបង្ហោះលើបណ្ដាញ Telegram។ មេដឹកនាំហាម៉ាសរូបនេះ បានសង្កត់ធ្ងន់ថា កម្លាំងរបស់លោកកំពុងខិតកាន់តែកៀកទៅរកកិច្ចព្រមព្រៀងមួយស្ដីពីបទឈប់បាញ់។ ប៉ុន្តែលោកមិនបានបញ្ជាក់អ្វីលម្អិតនោះទេអំពីលក្ខខណ្ឌនៅក្នុងខ្លឹមសារនៃកិច្ចព្រមព្រៀងនេះ។
ស្របពេលនេះដែរ អគ្គលេខាធិការនៃអង្គការសហប្រជាជាតិ Antonio Guterres បានលើកឡើងថា ការដាក់ឱ្យអង្គការសហប្រជាជាតិក្លាយជាអាណាព្យាបាលលើតំបន់ Gaza Strip នឹងមិនអាចដោះស្រាយបញ្ហាជម្លោះនៅទីនោះឡើយ។ ផ្ទុយទៅវិញ លោកបានអំពាវនាវឱ្យមានពេលវេលាអន្តរកាលមួយដែលមានការចូលរួមពាក់ព័ន្ធពីក្រុមប្រទេសអារ៉ាប់ និងសហរដ្ឋអាមេរិក ហើយឆ្ពោះទៅរកដំណោះស្រាយរដ្ឋពីរ គឺបទឈប់បាញ់ និងសន្តិភាពយូរអង្វែងលើដែនដីហ្កាហ្សា។
លោក Guterres ពន្យល់អំពីការប្រែក្លាយមហាសោកនាដកម្មនេះ ឱ្យក្លាយទៅជាឱកាសមួយដែលដើរនៅលើផ្លូវមួយឆ្ពោះទៅរកដំណោះស្រាយរដ្ឋពីរមានសន្តិភាពដូចគ្នា។
លោកអគ្គលេខាធិការនៃអង្គការសហប្រជាជាតិ បន្តបញ្ជាក់ទៀតថា ក្រោយពេលបិទបញ្ចប់សង្គ្រាមរវាងអ៊ីស្រាអែល និងក្រុមហាម៉ាស នៅតំបន់ Gaza គឺអាជ្ញាធរប៉ាឡេស្ទីន ត្រូវពង្រឹងឱ្យរឹងមាំដែនដីរបស់ខ្លួនជាមួយនឹងសន្តិភាពតាមព្រំដែនរួមជាមួយនឹងអ៊ីស្រាអែល។
លោក Guterres អះអាងថា អាជ្ញាធរប៉ាឡេស្ទីន ពុំអាចចូលទៅតំបន់ Gaza ដោយមានរថក្រោះអ៊ីស្រាអែលបន្តស្ថិតនៅលើតំបន់នោះទេ ដែលលោកថា សហគមន៍អន្តរជាតិត្រូវតែពិចារណាទៅលើពេលវេលាអន្តរកាលមួយ ដែលចូលរួមពាក់ព័ន្ធដោយសហរដ្ឋអាមេរិក ដើរតួនាទីចម្បងដើម្បីធានាសន្តិសុខសម្រាប់អ៊ីស្រាអែល ហើយក្រុមប្រទេសអារ៉ាប់ ក៏ជាអ្នកជួយគាំទ្រសន្តិសុខឱ្យប៉ាឡេស្ទីន ដែរ។
លោក Guterres ទទូចថាត្រូវតែរួមសហការគ្នា ដើម្បីបង្កើតលក្ខខណ្ឌសម្រាប់ពេលវេលាអន្តរកាលមួយដែលអនុញ្ញាតឱ្យអាជ្ញាធរប៉ាឡេស្ទីន រឹងមាំមួយ អាចក្លាយជាអ្នកទទួលខុសត្រូវនៅតំបន់ Gaza ហើយបន្តឆ្ពោះទៅរកដំណោះស្រាយរដ្ឋពីរមានស្ថិរភាពដូចគ្នា គឺពុំមានហិង្សាឡើយ៕