អាជ្ញាធរនៃតំបន់ហ្កាហ្សា ដែលគ្រប់គ្រងដោយក្រុមហាម៉ាស-ប៉ាឡេស្ទីន បានឱ្យដឹងថា ចំនួនមនុស្សស្លាប់ក្នុងសង្គ្រាមសងសឹករបស់អ៊ីស្រាអែល ចូលដល់ថ្ងៃទី៤៦ នេះ បានបន្តកើនឡើងដល់ ១៤១២៨នាក់។
ទីភ្នាក់ងារព័ត៌មាន AFP បានចុះផ្សាយនៅថ្ងៃពុធ ទី២២ ខែវិច្ឆិកា នេះដោយបានស្រង់សម្ដីមន្ត្រីសុខាភិបាលប៉ាឡេស្ទីន ដែលអះអាងថា ក្នុងចំណោមអ្នកបាត់បង់ជីវិតទាំងនោះ គឺមានកុមាររហូតដល់ទៅជិត ៦ពាន់នាក់ ស្ត្រី ៣៩២០នាក់ និងអ្នករងរបួស ៣៣០០០នាក់ផ្សេងទៀត។ ចំណែកអ្នកបាត់ខ្លួនបានកើនលើស ៦៨០០នាក់ ហើយ ២ភាគ៣ នៃប្រជាជនប៉ាឡេស្ទីន នៅលើដែនដីហ្កាហ្សា ជាង ២លាន ៣សែននាក់បាត់បង់ផ្ទះសម្បែងក្លាយជាជនភៀសសឹក។
អ៊ីស្រាអែល បានចាប់ផ្តើមបើកការវាយប្រហារតាមផ្លូវអាកាសយ៉ាងខ្លាំងក្លាមិនធ្លាប់មានជាមួយនឹងប្រតិបត្តិការយោធាតាមផ្លូវគោក និងទ័ពជើងទឹក ក៏ចាប់ផ្ដើមវាយប្រហារលើតំបន់ហ្កាហ្សា តាំងពីថ្ងៃទី៧ ខែតុលា ជាសង្គ្រាមវាយសងសឹកលើក្រុមសកម្មប្រយុទ្ធហាម៉ាស-ប៉ាឡេស្ទីន ដែលបានឆ្មក់វាយលុកទ្រង់ទ្រាយធំលើភាគលើខាងត្បូងនៃទឹកដីអ៊ីស្រាអែល ដោយសម្លាប់ប្រជាជនអ៊ីស្រាអែលជាង ១៤០០នាក់ និងចាប់ខ្លួនជនបរទេស រួមទាំងជនជាតិអ៊ីស្រាអែល ជាចំណាប់ខ្មាំងប្រមាណ ២៤០នាក់។
ក្នុងស្ថានភាពដែលជនស៊ីវិលស្លាប់យ៉ាងរង្គាលនៅលើដែនដីហ្កាហ្សា ដោយសារការវាយសន្ធប់យ៉ាងខ្លាំងដោយកងទ័ពអ៊ីស្រាអែល បានរុញសហគមន៍អន្តរជាតិប្រញាប់ប្រញាល់រួមគ្នាចេញសេចក្ដីថ្លែងថ្កោលទោសអ៊ីស្រាអែល ហើយស្នើផ្អាកសង្គ្រាម ឬបិទបញ្ចប់សង្គ្រាម។
មេដឹកនាំក្រុមប្រទេសអារ៉ាប់ ដែលមានឥទ្ធិពល បានជួបប្រជុំគ្នាញឹកញាប់ ហើយសូម្បីតែក្រុមប្រឹក្សាសន្តិសុខអង្គការសហប្រជាជាតិ ក៏បានទាមទារឱ្យមានយុទ្ធសន្តិភាព ឬបទឈប់បាញ់គ្នាជាបណ្ដោះអាសន្ន ដើម្បីទុកឱកាសឱ្យប្រជាជនប៉ាឡេស្ទីន រត់ចេញពីសមរភូមិ និងចំណាប់ខ្មាំងបរទេសបានដោះលែង។
ការចរចាបានធ្វើជាច្រើនសប្ដាហ៍ ដែលប្រទេសកាតា ជាអ្នកសម្របសម្រួល ដែលនៅថ្ងៃពុធនេះ ទាំងអ៊ីស្រាអែល និងក្រុមហាម៉ាស បានប្រកាសរៀងៗខ្លួនពីការទទួលយកកិច្ចព្រមព្រៀងលើបទឈប់បាញ់ បើទោះមានរយៈពេល ៤ថ្ងៃក៏ដោយ។
គណៈរដ្ឋមន្ត្រីរបស់លោកនាយករដ្ឋមន្ត្រីអ៊ីស្រាអែល Benjamin Netanyahu បានអនុម័តលើកិច្ចព្រមព្រៀងស្ដីពីបទឈប់បាញ់នេះ បន្ទាប់ពីកិច្ចប្រជុំមួយដែលចំណាយពេលពេញមួយយប់។ លោក Netanyahu បានប្រាប់ក្រុមរដ្ឋមន្ត្រីរបស់លោកថា នេះគឺជាការសម្រេចចិត្តដ៏លំបាក ប៉ុន្តែវាក៏ជាការសម្រេចចិត្តមួយដ៏ត្រឹមត្រូវដែរ។
អ្នកនាំពាក្យរដ្ឋាភិបាលអ៊ីស្រាអែលម្នាក់ប្រាប់ទីភ្នាក់ងារសារព័ត៌មាន AFP ថា នៅក្រោមកិច្ចព្រមព្រៀងនេះ ចំណាប់ខ្មាំងជាជនជាតិអ៊ីស្រាអែល និងជនបរទេសអាចជាង ៥០នាក់ នឹងត្រូវបានដោះលែងឱ្យមានសេរីភាព តែនេះគឺជាការដោះដូរនឹងបទឈប់បាញ់រយៈពេល ៤ថ្ងៃប៉ុណ្ណោះ។
បើតាមអ្នកនាំពាក្យរូបនោះ នឹងមានការដោះលែងចំណាប់ខ្មាំង ១០នាក់បន្ថែមទៀត តែនៅក្នុងក្របខ័ណ្ឌនៃបទឈប់បាញ់ថ្ងៃផ្សេងបន្ថែមទៀត។ ចំណែកក្រុមហាម៉ាស វិញ ក៏បានចេញសេចក្ដីថ្លែងការណ៍ស្វាគមន៍បទឈប់បាញ់នេះដែរ ដោយអះអាងថា នឹងនាំទៅរកការដោះលែងជនជាតិប៉ាឡេស្ទីន ១៥០នាក់ពីពន្ធនាគារ ដែលពួកគេជាប់នៅក្នុងប្រទេសអ៊ីស្រាអែល។
មុនមួយថ្ងៃដែលបទឈប់បាញ់គ្នារយៈពេល ៤ថ្ងៃ ដែលអ្នកប្រយុទ្ធគ្នាទាំងពីរក្រុមនេះសម្រេចទទួលយកមកអនុវត្ត អគ្គលេខាធិការនៃអង្គការសហប្រជាជាតិ Antonio Guterres បានផ្ដល់អនុសាសន៍ឱ្យមានពេលវេលាអន្តរកាលមួយ ដែលមានការចូលរួមពាក់ព័ន្ធពីក្រុមប្រទេសអារ៉ាប់ និងសហរដ្ឋអាមេរិក គួរមានវត្តមាននៅលើដែនដីហ្កាហ្សា ហើយឆ្ពោះទៅរកដំណោះស្រាយរដ្ឋពីរ គឺបទឈប់បាញ់ និងសន្តិភាពយូរអង្វែងលើដែនដីហ្កាហ្សា។
លោក Guterres ពន្យល់អំពីការប្រែក្លាយមហាសោកនាដកម្មនេះ ឱ្យក្លាយទៅជាឱកាសមួយដែលដើរនៅលើផ្លូវមួយឆ្ពោះទៅរកដំណោះស្រាយរដ្ឋពីរមានសន្តិភាពដូចគ្នា។
លោកអគ្គលេខាធិការនៃអង្គការសហប្រជាជាតិ បន្តបញ្ជាក់ទៀតថា ក្រោយពេលបិទបញ្ចប់សង្គ្រាមរវាងអ៊ីស្រាអែល និងក្រុមហាម៉ាស នៅតំបន់ Gaza ជាស្ថាពរ អាជ្ញាធរប៉ាឡេស្ទីន ត្រូវពង្រឹងឱ្យរឹងមាំដែនដីរបស់ខ្លួនជាមួយនឹងសន្តិភាពតាមព្រំដែនរួមជាមួយនឹងអ៊ីស្រាអែល។
លោក Guterres អះអាងថា អាជ្ញាធរប៉ាឡេស្ទីន ពុំអាចចូលទៅតំបន់ Gaza ដោយមានរថក្រោះអ៊ីស្រាអែល បន្តស្ថិតនៅលើតំបន់នោះទេ ដែលលោកថា សហគមន៍អន្តរជាតិត្រូវតែពិចារណាទៅលើពេលវេលាអន្តរកាលមួយ ដែលចូលរួមពាក់ព័ន្ធដោយសហរដ្ឋអាមេរិក ដើរតួនាទីចម្បងដើម្បីធានាសន្តិសុខសម្រាប់អ៊ីស្រាអែល ហើយក្រុមប្រទេសអារ៉ាប់ ក៏ជាអ្នកជួយគាំទ្រសន្តិសុខឱ្យប៉ាឡេស្ទីន ដែរ។
លោក Guterres ទទូចថា ត្រូវតែរួមសហការគ្នាដើម្បីបង្កើតលក្ខខណ្ឌសម្រាប់ពេលវេលាអន្តរកាលមួយ ដែលអនុញ្ញាតឱ្យអាជ្ញាធរប៉ាឡេស្ទីន រឹងមាំមួយ អាចក្លាយជាអ្នកទទួលខុសត្រូវនៅតំបន់ Gaza ហើយបន្តឆ្ពោះទៅរកដំណោះស្រាយរដ្ឋពីរមានស្ថិរភាពដូចគ្នា គឺពុំមានហិង្សាឡើយ។
យ៉ាងណា បទឈប់បាញ់គ្នានេះ ដែលគេហៅថាជាយុទ្ធសន្តិភាពបណ្ដោះអាសន្ននេះ មានរយៈពេល ៤ថ្ងៃ គេសង្កេតឃើញក្រុមអ្នកនយោបាយអ៊ីស្រាអែល មួយភាគធំសម្ដែងការខកចិត្តការដែលគណៈរដ្ឋមន្ត្រីរបស់នាយករដ្ឋមន្ត្រី Netanyahu យល់ព្រមក្រោមសម្ពាធរបស់ក្រុមមេដឹកនាំអារ៉ាប់។
ក្រុមអ្នកនយោបាយស្ដាំនិយមទាំងនោះវាយប្រហារលោក Netanyahu ថាការទុកឱកាសសម្រាប់ពួកហាម៉ាស បង្កើនការពង្រឹងកម្លាំងវាយបកលើកងទ័ពអ៊ីស្រាអែល ដែលកំពុងវាយរុលចូលកាន់តែជ្រៅលើដែនដីហ្កាហ្សា។ ក្រុមស្ដាំនិយមនេះបានទទូចឱ្យលោក Netanyahu បង្កើនកម្លាំងទ័ព និងសព្វាវុធកាន់តែច្រើនថែមទៀត ដើម្បីវាយកាន់កាប់ឱ្យបានទាំងស្រុងដែនដីហ្កាហ្សា ក្នុងគោលដៅបោសសម្អាតឱ្យអស់ពួកហាម៉ាស ដែលក្រុមអ្នកនយោបាយស្ដាំនិយមនេះចាត់ទុកពួកហាម៉ាស គឺជាក្រុមភេរវករជ្រកកោនលើដែនដីហ្កាហ្សា។
តែយ៉ាងណា មេបក្សប្រឆាំងដ៏ធំនៅអ៊ីស្រាអែល លោក Yair Lapid បានចេញសេចក្ដីថ្លែងការណ៍គាំទ្រគណៈរដ្ឋមន្ត្រីរបស់លោក Netanyahu ដែលយល់ព្រមទទួលយកបទឈប់បាញ់រយៈពេលខ្លីនេះ។
ជាមួយគ្នានេះ មានមេដឹកនាំជាច្រើននៃក្រុមប្រទេសអារ៉ាប់ ក៏បានថ្លែងស្វាគមន៍ ហើយលោក ចូ បៃដិន ប្រធានាធិបតីសហរដ្ឋអាមេរិក រួមទាំងមេដឹកនាំប្រទេសធំៗជាច្រើនទៀត ក៏បានសាទរប្រទេសកាតា ដែលខិតខំឱ្យមានយុទ្ធសន្តិភាពទោះជារយៈពេល ៤ថ្ងៃក៏ដោយ៕