31 C
Phnom Penh

លោក សម រង្ស៊ី ចោទ​រដ្ឋាភិបាល​លោក ហ៊ុន ម៉ាណែត ថា​ពូកែ​តែ​ខាង​បោកប្រាស់​ពលរដ្ឋ​ដូច​រដ្ឋាភិបាល​ចាស់

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី ចោទ​រដ្ឋាភិបាល​ក្រោម​ការ​ដឹកនាំ​របស់​លោក ហ៊ុន ម៉ាណែត ដែល​បន្ត​ពី​លោក ហ៊ុន សែន ថា​ជា​មេដឹកនាំ​ពូកែ​ខាង​បង្កើត​រូបភាព​ក្លែងក្លាយ​តាមរយៈ​នយោបាយ​ប្រជាភិថុតិ ដើម្បី​បោកប្រាស់​ប្រជាពលរដ្ឋ​ខ្មែរ។

អតីត​មេដឹកនាំ​អតីត​គណបក្ស​សង្គ្រោះ​ជាតិ​លោក សម រង្ស៊ី សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​២៨ វិច្ឆិកា ថា រដ្ឋាភិបាល​ក្រុង​ភ្នំពេញ​ដែល​បន្ត​ក្តោប​ក្តាប់​អំណាច​ពី​ឪពុក​ទៅ​កូន​សព្វថ្ងៃ​នេះ មាន​ជំនាញ​តែ​ម្យ៉ាង​គត់ គឺ​ពូកែ​ខាង​បង្កើត​រូបភាព​ក្លែងក្លាយ​តាមរយៈ​នយោបាយ​ប្រជាភិថុតិ ដើម្បី​បោកប្រាស់​ប្រជាពលរដ្ឋ​ខ្មែរ ខណៈ​ការ​ដឹកនាំ​របស់​ពួកគេ​ទាំង​លោក ហ៊ុន សែន និង​កូន​របស់​គាត់ គឺ​លោក ហ៊ុន ម៉ាណែត ពោរពេញ​ដោយ​ភាព​សាហាវ​ព្រៃផ្សៃ​ដូច​គ្នា។

អតីត​មេដឹកនាំ​បក្ស​ប្រឆាំង​រូប​នេះ​បញ្ជាក់​ថា ការ​ដឹកនាំ​ដែល​លោក ហ៊ុន សែន និង​លោក ហ៊ុន ម៉ាណែត យក​មក​បង្អួត​ប្រជាពលរដ្ឋ​សព្វថ្ងៃ​នេះ គឺ​សុទ្ធតែ​ជា​រូបភាព​ក្លែងក្លាយ​ទាំងអស់ ដូចជា សន្តិភាព​ដែល​ពួកគេ​តែង​អួត​សព្វថ្ងៃ​នេះ ក៏​ជា​សន្តិភាព​ក្លែងក្លាយ ប្រជាធិបតេយ្យ​ដែល​ពួកគេ​ប្ដេជ្ញា​ការពារ ក៏​ជា​ប្រជាធិបតេយ្យ​ក្លែងក្លាយ ចំណែកឯ​ការ​បោះឆ្នោត​ដែល​ធ្វើ​ឱ្យ​គណបក្ស​ប្រជាជន​កម្ពុជា​ឈ្នះ​រហូត​តែងតាំង​កូន​ខ្លួនឯង​ជា​នាយករដ្ឋមន្ត្រី ក៏​ជា​ការ​បោះឆ្នោត​ក្លែងក្លាយ ដោយឡែក​ការ​អភិវឌ្ឍ​ដែល​មាន​អគារ​ធំៗ​សព្វថ្ងៃ​នេះ ក៏​ជា​ការ​អភិវឌ្ឍ​ក្លែងក្លាយ​ដែរ ព្រោះ​ជា​ការ​អភិវឌ្ឍ​ក្រោម​បំណុល​វ័ណ្ឌក​ប៉ុណ្ណោះ។

ការ​អះអាង​នេះ ធ្វើឡើង​ស្រប​ពេល​ដែល​រដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា​សព្វថ្ងៃ​នេះ ត្រូវ​រង​នូវ​ការ​រិះគន់​ជុំ​ទិស​ពី​ការ​ធ្វើ​ឱ្យ​ធ្លាក់​ចុះ​លទ្ធិប្រជាធិបតេយ្យ ការ​គោរព​សិទ្ធិមនុស្ស និង​ការ​អភិវឌ្ឍ​ក្រោម​បំណុល​ដែល​គ្មាន​តម្លាភាព​រាប់​ពាន់​លាន​ដុល្លារ​នៅ​ពេលនេះ។

រដ្ឋាភិបាល​ដុះ​ស្លែ​ដែល​ដឹកនាំ​ដោយ​គណបក្ស​ប្រជាជន​កម្ពុជា​របស់​លោក ហ៊ុន សែន បាន​គ្រប់គ្រង​ប្រទេស​កម្ពុជា​អស់​រយៈពេល​ជាង ៤​ទសវត្ស​ហើយ ប៉ុន្តែ​កម្ពុជា​ស្ថិត​ក្រោម​ការ​ក្តោប​ក្តាប់​របស់​មេដឹកនាំ​ក្រាញ​អំណាច​បន្ត​ពូជ​ដែល​វៀតណាម​លើក​បន្តុប​នេះ ត្រូវ​គេ​មើល​ឃើញ​ថា បាន​ធ្វើ​ឱ្យ​ទឹកដី​សុវណ្ណភូមិ​មួយ​នេះ​ធ្លាក់​ទៅ​ជា​ប្រទេស​ដែល​ប្រកាន់​របប​ផ្ដាច់ការ ដែល​ដឹកនាំ​ដោយ​ក្រុម​គ្រួសារ​និយម​របស់​លោក ហ៊ុន សែន ជា​ហេតុ​ធ្វើ​ឱ្យ​បាត់បង់​នូវ​ប្រជាធិបតេយ្យ ធ្លាក់​ចុះ​នូវ​ការ​គោរព​សិទ្ធិមនុស្ស វិនាស​ហិនហោច​ទ្រព្យសម្បត្តិ​ជាតិ និង​ក្លាយ​ជា​កូនបំណុល​វ័ណ្ឌក​របស់​បរទេស​ថែម​ទៀត។

បែប​នេះ​ក្តី មេដឹកនាំ​ខ្មែរ​ដែល​ល្បីល្បាញ​ខាង​បំផ្លាញ​ទ្រព្យសម្បត្តិ​ជាតិ​លោក ហ៊ុន សែន ធ្លាប់​បាន​អះអាង​កាលពី​ពេល​កន្លង​ទៅ​ថា លោក​គឺជា​នាយករដ្ឋមន្ត្រី​ដែល​មាន​វ័យ​ក្មេង​ជាងគេ​បំផុត​នៅ​ក្នុង​ពិភពលោក ហើយ​ក៏​ជា​នាយករដ្ឋមន្ត្រី​ដែល​ពលរដ្ឋ​ខ្មែរ​គោរព​ស្រឡាញ់ និង​គាំទ្រ​ខ្លាំង​បំផុត ព្រមទាំង​អាច​រក្សា​តំណែង​ជា​នាយករដ្ឋមន្ត្រី​បាន​យូរ​ជាងគេ​បំផុត​នៅ​ក្នុង​ពិភពលោក​ផង​ដែរ។

មេដឹកនាំ​ដែល​ក្រាញ​អំណាច​បន្ត​ពូជ​លោក ហ៊ុន សែន លើកឡើង​ថា រយៈពេល​ជាង ៣០​ឆ្នាំ​កន្លង​ទៅ កម្ពុជា​បាន​ឆ្លងកាត់​មហា​ឧបសគ្គ​ធំៗ​រាប់​មិន​អស់ ប៉ុន្តែ​ក្រោម​ការ​ដឹកនាំ​ដ៏​វៃឆ្លាត និង​មាន​បទពិសោធន៍​បំផុត​របស់​លោក កម្ពុជា​បាន​កសាង​អភិវឌ្ឍ​ឲ្យ​មាន​ការ​រីកចម្រើន​លើ​គ្រប់​វិស័យ និង​មាន​មុខមាត់​លើ​ឆាក​អន្តរជាតិ​មក​ទល់​នឹង​សព្វថ្ងៃ​នេះ។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៨ វិច្ឆិកា ថា ដើម្បី​ឱ្យ​ផល​ប្រយោជន៍​របស់​ជាតិ​ខ្មែរ​ទាំងមូល​ត្រូវ​បាន​ការពារ​ជូន​ប្រជាពលរដ្ឋ គឺ​ត្រូវតែ​ធ្វើ​កំណែ​ទម្រង់​លើ​ប្រព័ន្ធ​ដឹកនាំ​របស់​រដ្ឋាភិបាល​ជា​ចាំបាច់ ជាពិសេស​គឺ​ផ្តើម​ចេញពី​ឆន្ទៈ​នយោបាយ​របស់​មេដឹកនាំ​ដែល​ចង់​ជួយ​ប្រទេស​ជាតិ និង​ប្រជាពលរដ្ឋ​របស់​ខ្លួន​ដោយ​ពិតប្រាកដ។

លោក មាជ សុវណ្ណារ៉ា លើកឡើង​ថា ប្រសិនបើ​កម្ពុជា​ជ្រើសរើស​បាន​តែ​មេដឹកនាំ​ដែល​ចេះ​តែ​ធ្វើ​នយោបាយ​ប្រជាភិថុតិ​ដើម្បី​បោក​បញ្ឆោត​ប្រជាពលរដ្ឋ​ខ្លួនឯង ដូចជា ការ​ប្រើ​រូបភាព​អភិវឌ្ឍ​ក្រោម​ល្បិច​នៃ​ការ​បំផ្លាញ ដែល​មាន​ន័យ​ថា ប្រើ​រូបភាព​សាងសង់​អគារ​ខ្ពស់ៗ ប៉ុន្តែ​ត្រូវ​លុប​បឹងបួ និង​លក់​ដី​រដ្ឋ ប្រើ​រូបភាព​ជា​ប្រទេស​មាន​ចំណូល​ខ្ពស់​ក្រោម​បំណុល​បរទេស​វ័ណ្ឌក និង​ការ​ប្រើ​រូបភាព​នៃ​ការ​ការពារ​សន្តិភាព ក្រោម​ល្បិច​គំរាមកំហែង​លើ​អ្នក​អនុវត្ត​សិទ្ធិ​សេរីភាព នោះ​ប្រជាពលរដ្ឋ​ខ្មែរ​ច្បាស់​ជា​មិន​បាន​សុខ​ឡើយ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​រិះគន់​ថា ការ​ដឹកនាំ​របស់​លោក ហ៊ុន សែន ជាង ៤០​ឆ្នាំ​មក​នេះ​មាន​តែ​ការ​ជាន់ឈ្លី​ប្រជាធិបតេយ្យ រំលោភ​សិទ្ធិមនុស្ស រំលោភ​រដ្ឋធម្មនុញ្ញ រំលោភ​ព្រះមហាក្សត្រ រំលោភ​កិច្ចព្រមព្រៀង​អន្តរជាតិ​ឆ្នាំ​១៩៩១ និង​ធ្វើ​រដ្ឋប្រហារ​ដណ្តើម​អំណាច ជាដើម ដើម្បី​ខ្លួនឯង​អាច​កាន់កាប់​អំណាច​ផ្ដាច់មុខ​ដូច​សព្វថ្ងៃ​នេះ ប៉ុន្តែ​ដើម្បី​បោកប្រាស់​ពលរដ្ឋ​ខ្មែរ​មេដឹកនាំ​ខ្មែរ​រូប​នេះ​បង្ខំ​ឱ្យ​មន្ត្រី​ក្រោម​បង្គាប់​ផ្សព្វផ្សាយ​ថា មាន​តែ​ខ្លួន​ម្នាក់​គត់​ដែល​ជា​បិតា​ស្ថាបនិក​សន្តិភាព​សម្រាប់​ប្រទេស​កម្ពុជា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស