តំណាងរាស្ត្រអូស្ត្រាលីដើមកំណើតខ្មែរ លើកឡើងថា របបនយោបាយផ្ដាច់ការរបស់គណបក្សប្រជាជនកម្ពុជាដែលមានលោក ហ៊ុន សែន ជាមេដឹកនាំ កំពុងតែគាបសង្កត់សិទ្ធិសេរីភាពជាមូលដ្ឋានរបស់ប្រជាពលរដ្ឋខ្មែរ។
តំណាងរាស្ត្រអូស្ត្រាលីដើមកំណើតខ្មែរប្រចាំរដ្ឋវិចតូរីយ៉ា លោក តាក់ ម៉េងហ៊ាង ត្រូវបានសារព័ត៌មានបរទេស The Diplomat ស្រង់សម្ដីកាលពីពេលថ្មីៗនេះថា រដ្ឋាភិបាលខ្មែរស្ថិតក្រោមការគ្រប់គ្រងរបស់គណបក្សប្រជាជនកម្ពុជាសព្វថ្ងៃនេះ បានរឹតត្បិតសិទ្ធិនយោបាយ និងចាប់ខ្លួនក្រុមប្រឆាំងយ៉ាងអនាធិបតេយ្យ ដូចជា ការដកហូតសិទ្ធិចូលរួមការបោះឆ្នោតរបស់គណបក្សភ្លើងទៀន កាលពីខែកក្កដា ឆ្នាំ២០២៣ កន្លងទៅ និងការចាប់ខ្លួនសកម្មជននយោបាយប្រមាណជាង ១០០នាក់ដែលប្រឆាំងនឹងការបោះឆ្នោតនេះ ក្រោមបទចោទថាមានផែនការប្រឆាំងនឹងរដ្ឋាភិបាល ជាដើម។
លោក តាក់ ម៉េងហ៊ាង លើកឡើងថា គណបក្សប្រជាជនកម្ពុជារបស់លោក ហ៊ុន សែន មិនត្រឹមតែរឹតត្បិតសិទ្ធិសេរីភាពរបស់ពលរដ្ឋក្នុងស្រុកទេ ថែមទាំងបង្កើតឱ្យមានបណ្ដាញរបស់ពួកគេនៅក្នុងប្រទេសអូស្ត្រាលីសព្វថ្ងៃនេះថែមទៀត ដើម្បីតាមដានពលរដ្ឋខ្មែរដែលមានសញ្ជាតិអូស្ត្រាលីណាដែលប្រឆាំងនឹងការដឹកនាំមិនត្រឹមត្រូវរបស់ខ្លួន រហូតឈានដល់ការគំរាមកំហែងអ្នកទាំងនោះដល់អាយុជីវិតថែមទៀត ដើម្បីបំបិទសិទ្ធិបញ្ចេញមតិរបស់ពួកគេ។
តំណាងរាស្ត្រអូស្ត្រាលីដើមកំណើតខ្មែររូបនេះ បញ្ជាក់ថា ពលរដ្ឋខ្មែរនៅប្រទេសអូស្ត្រាលីមិនអាចបំភ្លេចបានទេ ថាពួកគេបានឃ្លាតឆ្ងាយពីទឹកដីកំណើតដោយសារតែការធ្វើទុក្ខបុកម្នេញរបស់រដ្ឋាភិបាលក្រោមការគ្រប់គ្រងរបស់គណបក្សប្រជាជនកម្ពុជា ដូច្នេះពួកគេគ្រប់គ្នា រួមទាំងលោកខ្លួនឯងផង មានកាតព្វកិច្ចប្រឆាំងនឹងការដឹកនាំនៃរដ្ឋាភិបាលខ្មែរដែលកំពុងគាបសង្កត់សិទ្ធិមូលដ្ឋានរបស់ពលរដ្ឋកម្ពុជាសព្វថ្ងៃនេះជាចាំបាច់ បើទោះបីជាពួកគេត្រូវរងនូវការគំរាមកំហែងពីការប៉ុនប៉ងផ្តាច់អាយុជីវិតពីបណ្ដាញគណបក្សប្រជាជនកម្ពុជានៅក្រៅស្រុកសព្វថ្ងៃនេះក៏ដោយ។
កាលពីអំឡុងខែកញ្ញា ឆ្នាំ២០២៣ កន្លងទៅ រដ្ឋាភិបាលអូស្ត្រាលី បានរំលឹកនាយករដ្ឋមន្ត្រីថ្មីរបស់កម្ពុជា លោក ហ៊ុន ម៉ាណែត ថា អូស្ត្រាលីធ្លាប់បានជួយកម្ពុជាស្វែងរកសន្តិភាព ការអភិវឌ្ឍ ប្រជាធិបតេយ្យ និងសិទ្ធិមនុស្ស ដូច្នេះនៅពេលនេះ រដ្ឋាភិបាលអូស្ត្រាលី ក៏នឹងទន្ទឹងរង់ចាំជួយកម្ពុជាលើកិច្ចសហប្រតិបត្តិការនេះបន្តទៀតដែរ។
ជាងនេះទៀត កាលពីចុងខែកក្កដា ឆ្នាំ២០២៣ ប្រទេសអូស្ត្រាលី បានចេញសេចក្តីថ្លែងការណ៍មួយថា ប្រទេសអូស្ត្រាលីមានការព្រួយបារម្ភយ៉ាងខ្លាំងអំពីការរឹតត្បិតនានាមិនអាចឱ្យប្រជាពលរដ្ឋកម្ពុជាទទួលបានព័ត៌មាន បញ្ចេញមតិរបស់ពួកគេដោយសេរី។
រដ្ឋាភិបាលអូស្ត្រាលី បញ្ជាក់ថា ក្នុងនាមប្រទេសអូស្ត្រាលីជាដៃគូអស់រយៈពេលជាច្រើនទសវត្សរ៍ក្នុងការគាំទ្រប្រទេសកម្ពុជា ដើម្បីទទួលបាននូវសន្តិភាព ការអភិវឌ្ឍ លទ្ធិប្រជាធិបតេយ្យ និងសិទ្ធិមនុស្ស មានក្តីបារម្ភយ៉ាងខ្លាំងក្នុងនាមជាមិត្តយូរអង្វែង ដើម្បីបន្តនូវបំណងប្រាថ្នាក្នុងការធ្វើការជាមួយប្រទេសកម្ពុជា ឆ្ពោះទៅរកលទ្ធិប្រជាធិបតេយ្យ និងសិទ្ធិមនុស្សនាពេលអនាគត។
ចំណែកប្រធានសហព័ន្ធខ្មែរអូស្ត្រាលីសាជីវកម្មលោក ហុង លីម បានចេញសេចក្តីប្រកាសព័ត៌មាននៅដើមខែសីហា ឆ្នាំ២០២៣ ថា ប្រទេសកម្ពុជានឹងក្លាយជារបបផ្ដាច់ការ បន្ទាប់ពីលោក ហ៊ុន សែន ត្រួតត្រាដោយប្រើកណ្ដាប់ដៃដែកអស់រយៈពេល ៣៨ឆ្នាំ និងផ្ទេរអំណាចឱ្យកូនប្រុសរបស់គាត់លោក ហ៊ុន ម៉ាណែត នៅពេលនេះ បើទោះបីជាលោក ហ៊ុន ម៉ាណែត ធ្លាប់ទទួលបានការបណ្តុះបណ្តាលពីប្រទេសលោកសេរីក៏ដោយ។
ដោយឡែកអតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិលោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៣០ វិច្ឆិកា នេះថា ក្រោយពីការបង្កើតរដ្ឋាភិបាលថ្មីជាង ៣ខែកន្លងមកនេះ គេនៅមិនទាន់ឃើញមានការបើកលំហសិទ្ធិសេរីភាពរបស់ប្រជាពលរដ្ឋឱ្យមានភាពល្អប្រសើរជាងរដ្ឋាភិបាលចាស់នៅឡើយទេ ប៉ុន្តែបែរជាកំពុងអនុវត្តការគាបសង្កត់សិទ្ធិសេរីភាពរបស់ពលរដ្ឋដូចរដ្ឋាភិបាលចាស់ទៅវិញ។
លោក មាជ សុវណ្ណារ៉ា បញ្ជាក់ថា នៅពេលនេះ នាយករដ្ឋមន្ត្រីថ្មីរបស់កម្ពុជាគួរតែបង្ហាញពីគោលជំហររបស់ខ្លួនឱ្យច្បាស់លាស់ អំពីការអនុវត្តនូវលទ្ធិប្រជាធិបតេយ្យ និងការគោរពសិទ្ធិមនុស្ស ដើម្បីឱ្យប្រទេសដែលជាដៃគូក្នុងតំបន់ឃើញច្បាស់នូវជំហររបស់ខ្លួន ព្រោះថាសព្វថ្ងៃនេះ អ្នកទោសមនសិការ អ្នកទោសនយោបាយ រួមទាំងមេដឹកនាំបក្សប្រឆាំងលោក កឹម សុខា ជាដើម នៅតែបន្តរងនូវការគាបសង្កត់សិទ្ធិសេរីភាពទាំងអយុត្តិធម៌ដដែល ដែលជាមូលហេតុធ្វើឱ្យប្រទេសប្រកាន់លទ្ធិប្រជាធិបតេយ្យកាន់តែព្រួយបារម្ភពីការធ្លាក់ចុះនូវការគោរពសិទ្ធិមនុស្ស និងលទ្ធិប្រជាធិបតេយ្យរបស់កម្ពុជានៅពេលនេះ។
ទាក់ទិននឹងបញ្ហានេះ ប្រទេសបារាំង និងប្រទេសអាល្លឺម៉ង់ ក៏ធ្លាប់បានជំរុញឲ្យរដ្ឋាភិបាលកម្ពុជា គោរពសិទ្ធិជាមូលដ្ឋានចាំបាច់របស់ពលរដ្ឋ ដើម្បីស្ដារលទ្ធិប្រជាធិបតេយ្យឡើងវិញជាមួយនឹងបទប្បញ្ញត្តិនៃកិច្ចព្រមព្រៀងទីក្រុងប៉ារីសឆ្នាំ១៩៩១ និងរដ្ឋធម្មនុញ្ញរបស់ប្រទេសកម្ពុជាផងដែរ។
ជាងនេះទៀត នាយករដ្ឋមន្ត្រីជប៉ុន លោក លោក ហ្វូមីអូ គីស៊ីដា ក៏ធ្លាប់បានបញ្ជាក់ដែរថា លោកមានបំណងសហការជាមួយនាយករដ្ឋមន្ត្រីថ្មីរបស់កម្ពុជា ដើម្បីជំរុញនូវ «ភាពជាដៃគូយុទ្ធសាស្ត្រគ្រប់ជ្រុងជ្រោយ» ខណៈលទ្ធិប្រជាធិបតេយ្យ ប្រទេសជប៉ុននឹងបន្តពិភាក្សាដោយស្មោះត្រង់ និងសហការជាមួយភាគីពាក់ព័ន្ធជាច្រើនទៀតនៅកម្ពុជា ដូចជា អង្គការក្រៅរដ្ឋាភិបាល ជាដើម ដើម្បីរួមចំណែកដល់ការអភិវឌ្ឍតាមបែបប្រជាធិបតេយ្យរបស់កម្ពុជាបន្តទៀត៕