លោក ហ៊ុន ម៉ាណែត ដែលជានាយករដ្ឋមន្ត្រីនៃប្រទេសដែលល្បីល្បាញខាងប្រព្រឹត្តអំពើពុករលួយ សម្ដែងមោទនភាពថា អស់រយៈពេល ៣០ឆ្នាំមកនេះ រដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់លោក ហ៊ុន សែន មានស្នាដៃជាប្រវត្តិសាស្ត្រក្នុងការទប់ស្កាត់អំពើពុករលួយយ៉ាងធំធេង ដែលបានបង្កើតនូវក្រុមប្រឹក្សាជាតិប្រឆាំងអំពើពុករលួយ និងអង្គភាពប្រឆាំងអំពើពុករលួយ។
កូនប្រុសមេដឹកនាំពុករលួយក្រាញអំណាចផ្ដាច់មុខនៅកម្ពុជា លោក ហ៊ុន ម៉ាណែត ចេញលិខិតអបអរសាទរទិវាជាតិ និងអន្តរជាតិប្រឆាំងអំពើពុករលួយ ៩ធ្នូ នៅថ្ងៃទី៦ ខែធ្នូ ឆ្នាំ២០២៣ នេះថា កម្ពុជាមិនមែនមានតែស្ថាប័នប្រឆាំងអំពើពុករលួយតែឯងទេដែលបំពេញបេសកកម្មប្រយុទ្ធប្រឆាំងអំពើពុករលួយ ប៉ុន្តែក៏មានការចូលរួមពីរាជរដ្ឋាភិបាល គ្រប់ស្ថាប័ន ថ្នាក់ជាតិ ថ្នាក់ក្រោមជាតិ វិស័យឯកជន សង្គមស៊ីវិល អ្នកសារព័ត៌មាន និងប្រជាជនផងដែរ តាមវិធីសាស្ត្រជាច្រើន ដូចជា ការអប់រំ ដើម្បីឱ្យមនុស្សម្នាក់ៗមិនចង់ពុករលួយ ការបង្ការទប់ស្កាត់ ដើម្បីឱ្យមនុស្សម្នាក់ៗមិនអាចពុករលួយ និងការអនុវត្តច្បាប់ដើម្បីឱ្យម្នាក់ៗមិនហ៊ានពុករលួយ ជាដើម។
លោក ហ៊ុន ម៉ាណែត ដែលទទួលយកការដឹកនាំតាមបែបពុករលួយពីឪពុក អះអាងថា រាជរដ្ឋាភិបាលដែលដឹកនាំដោយលោក ហ៊ុន សែន បានអនុវត្តជាបន្តបន្ទាប់នូវកំណែទម្រង់ស៊ីជម្រៅជាច្រើន ដែលនាំឱ្យកម្ពុជាក្លាយជាប្រទេសមានកំណើនសេដ្ឋកិច្ចខ្ពស់ក្នុងប៉ុន្មានទសវត្សរ៍ចុងក្រោយនេះ ក្រោមបាវចនា «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» ដែលនឹងធ្វើឱ្យសង្គមខ្មែរ និងបុគ្គលម្នាក់ៗបន្តទទួលបានភាពស្អាតស្អំ ក្នុងការអភិវឌ្ឍសង្គម និងសេដ្ឋកិច្ច ព្រមទាំងក្នុងការពង្រឹងសន្តិសុខ សណ្ដាប់ធ្នាប់ និងសន្តិភាព។
នាយករដ្ឋមន្ត្រីថ្មីក្រោមទម្រង់ដឹកនាំពុករលួយរបស់ឪពុក លោក ហ៊ុន ម៉ាណែត បញ្ជាក់ថា រដ្ឋាភិបាលអាណត្តិថ្មីរបស់លោក នឹងបន្តវីរភាពគំរូរបស់លោក ហ៊ុន សែន ជំរុញការកែទម្រង់ ការពង្រឹងអភិបាលកិច្ច ដោយផ្ដោតលើការលើកកម្ពស់ និងការពង្រឹងភាពស្អាតស្អំក្នុងរដ្ឋបាលសាធារណៈ តាមរយៈវិធានការមួយចំនួន ដូចជា រៀបចំឱ្យអនុវត្តក្រមសីលធម៌វិជ្ជាជីវៈ និងក្រមប្រតិបត្តិក្នុងមុខងារសាធារណៈ ជាដើម។
ជាងនេះទៀត ត្រូវពង្រឹងប្រសិទ្ធភាពនៃការធ្វើអធិការកិច្ច និងសវនកម្ម ពង្រឹងយន្តការគ្រប់គ្រង និងផ្តល់សេវាសាធារណៈ ដើម្បីបង្កើនជំនឿទុកចិត្ត និងប្រសិទ្ធភាពជូនប្រជាពលរដ្ឋ បន្តពង្រឹងការអនុវត្តច្បាប់យ៉ាងម៉ឺងម៉ាត់ ដើម្បីបង្ក្រាបបទល្មើសអំពើពុករលួយ និងពង្រឹងកិច្ចសហប្រតិបត្តិការរវាងអង្គភាពប្រឆាំងអំពើពុករលួយ ដើម្បីតាមដាន និងលើកកម្ពស់ភាពស្អាតស្អំនៅតាមស្ថាប័នសាធារណៈបន្ថែមទៀត។
អតីតនាយទាហានជាន់ខ្ពស់នៃភាគីរណសិរ្សជាតិរំដោះប្រជាពលរដ្ឋខ្មែរលោក ជុំ ឈាង បានលើកឡើងកាលពីពេលថ្មីៗនេះថា ប្រទេសដែលប្រកាន់អំណាចផ្ដាច់ការ ឬកុម្មុយនីស្តនិយម តែងកើតមានអំពើពុករលួយតាំងពីថ្នាក់ជាតិរហូតដល់ថ្នាក់មូលដ្ឋាន ហើយមូលហេតុគឺនៅត្រង់ថា ច្បាប់នៃប្រទេសនោះពិតមែនតែស្ថិតនៅក្បាលរបស់ប្រជាពលរដ្ឋ ប៉ុន្តែច្បាប់ដដែលនោះគឺស្ថិតនៅក្រោមបាតជើងអ្នកមានអំណាចទៅវិញ។
លោក ជុំ ឈាង អះអាងថា ប្រសិនបើអ្នកកាន់អំណាចកំពូលរបស់ប្រទេសមួយក្លាយជាជនពុករលួយទៅហើយនោះ វានឹងនាំឱ្យស្ថាប័នកំពូលៗរបស់ជាតិ ដូចជា ស្ថាប័ននីតិប្បញ្ញត្តិ ស្ថាប័នតុលាការ និងស្ថាប័ននីតិប្រតិបត្តិ ក្លាយជាស្ថាប័នដែលប្រព្រឹត្តអំពើពុករលួយដោយស្វ័យប្រវត្តិ ខណៈប្រជាពលរដ្ឋក៏នឹងក្លាយខ្លួនជាអ្នកប្រព្រឹត្តអំពើពុករលួយដោយមិនដឹងខ្លួនដោយស្វ័យប្រវត្តិដែរ ហើយចុងក្រោយ ប្រទេសជាតិទាំងមូលនឹងក្លាយទៅជាសង្គមពុករលួយ រហូតក្លាយជាប្រទេសដែលប្រព្រឹត្តអំពើពុករលួយកម្រិតអន្តរជាតិតែម្តង។
ចំណែកនាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ធ្លាប់បានអះអាងកាលពីពេលកន្លងទៅដែរថា យុទ្ធសាស្ត្រប្រឆាំងអំពើពុករលួយរបស់រដ្ឋាភិបាលកម្ពុជា មានចំណុចមួយចំនួនដំណើរការទៅដោយមានភាពប្រសើរ ប៉ុន្តែលោកបន្ថែមថា សម្រាប់ការអនុវត្តច្បាប់នៅខ្សោយ និងមិនមានតម្លាភាព ចំណែកការបង្កើតច្បាប់សំខាន់ៗមួយចំនួនដែលចាំបាច់ក្នុងការប្រយុទ្ធប្រឆាំងអំពើពុករលួយនៅមានភាពយឺតយ៉ាវនៅឡើយ។
លោក ប៉ិច ពិសី បញ្ជាក់ថា នៅកម្ពុជា ការប្រព្រឹត្តអំពើពុករលួយខ្នាតតូចទាក់ទងនឹងការផ្តល់សេវាសាធារណៈតាមមូលដ្ឋាន មានតិចជាងមុន ប៉ុន្តែសម្រាប់អំពើពុករលួយធំៗដែលពាក់ព័ន្ធនឹងបក្ខពួក សែស្រឡាយ ការឃុបឃិតគ្នារវាងអ្នកមានអំណាច និងអ្នកមានលុយ ស្ថិតក្នុងស្ថានភាពធ្ងន់ធ្ងរសព្វថ្ងៃនេះ។
អង្គការតម្លាភាពអន្តរជាតិកម្ពុជា បានចេញរបាយការណ៍ស្ដីពីសន្ទស្សន៍អំពើពុករលួយឆ្នាំ២០២២ កាលពីថ្ងៃទី៣១ ខែមករា ឆ្នាំ២០២៣ ថា កម្ពុជាទទួលចំណាត់ថ្នាក់លេខរៀងទី១៥០ ក្នុងចំណោមប្រទេស ១៨០ លើពិភពលោក ដែលជាចំណាត់ថ្នាក់ល្អជាងឆ្នាំ២០២១ ចំនួន ៧កម្រិត ប៉ុន្តែបើទោះបីជាមានលេខរៀងល្អជាងមុនក៏ដោយ ក៏នៅតែស្ថិតក្នុងលេខរៀងដែលមានអំពើពុករលួយអាក្រក់ជាងគេបំផុតក្នុងចំណោមប្រទេសទាំង ១០ នៃសមាគមអាស៊ានដដែល។
កម្ពុជាត្រូវបានគេចាត់ថ្នាក់ចូលទៅក្នុងប្រទេសដែលប្រព្រឹត្តអំពើពុករលួយធ្ងន់ធ្ងរតាំងពីឆ្នាំ២០១២ មក ក្នុងនោះ ឆ្នាំ២០១៦ កម្ពុជាបានជាប់ចំណាត់ថ្នាក់លេខ១៥៦ ឆ្នាំ២០១៧ និងឆ្នាំ២០១៨ ជាប់ចំណាត់ថ្នាក់លេខ១៦១ ខណៈឆ្នាំ២០១៩ ជាប់លេខ១៦២ ឆ្នាំ២០២០ ជាប់លេខ១៦០ និងឆ្នាំ២០២១ ជាប់ចំណាត់ថ្នាក់លេខ១៥៧ ខណៈឆ្នាំ២០២២ គឺជាប់លេខ១៥០ ដែលស្ថិតក្នុងចំណាត់ថ្នាក់អាក្រក់ និងធ្ងន់ធ្ងរដដែលជុំវិញការប្រព្រឹត្តអំពើពុករលួយនេះ៕