មេដឹកនាំកូរ៉េខាងជើង លោក គីម ជុងអ៊ុន ប្រកាសឱ្យគណបក្សពលកររបស់លោកពន្លឿនការត្រៀមលក្ខណៈសម្រាប់សង្គ្រាម ក្នុងនោះរួមមាន ទាំងកម្មវិធីនុយក្លេអ៊ែររបស់ទីក្រុងព្យុងយ៉ាង ផងដែរ។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង KCNA ដែលដកស្រង់ចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២៨ ខែធ្នូ។
ការប្រកាសរបស់លោក គីម ជុងអ៊ុន ធ្វើឡើងនៅឯកិច្ចប្រជុំចុងឆ្នាំរបស់គណបក្សពលករកូរ៉េ និងជាទីដែលលោកត្រូវបានគេរំពឹងថា អាចនឹងប្រកាសដាក់ចេញគោលនយោបាយគន្លឹះសម្រាប់ឆ្នាំ២០២៤។
តាមប្រព័ន្ធផ្សព្វផ្សាយ KCNA នៅអំឡុងកិច្ចប្រជុំនោះ លោក គីម ជុងអ៊ុន បានស្នើឱ្យគណបក្សកាន់អំណាចតែមួយគត់របស់កូរ៉េខាងជើងនេះ ពន្លឿនការត្រៀមលក្ខណៈសម្រាប់សង្គ្រាមលើគ្រប់វិស័យទាំងអស់ ក្នុងនោះរួមមានអាវុធនុយក្លេអ៊ែរ និងការការពារប្រជាជន។
ជាមួយគ្នានេះ លោក គីម ក៏បានបញ្ជាក់ថា ស្ថានការណ៍យោធានៅលើឧបទ្វីបកូរ៉េ កំពុងស្ថិតក្នុងសភាពកាន់តែយ៉ាប់យ៉ឺន ដោយសារតែសកម្មភាពអរិភាពមិនធ្លាប់មានរបស់សហរដ្ឋអាមេរិកចំពោះកូរ៉េខាងជើង និងលើឧបទ្វីប។
កាលពីសប្ដាហ៍មុន លោក គីម ជុងអ៊ុន បានព្រមានថា ទីក្រុងព្យុងយ៉ាង នឹងមិនស្ទាក់ស្ទើរឡើយក្នុងការប្រើអាវុធនុយក្លេអ៊ែរ ប្រសិនបើសត្រូវរករឿងកូរ៉េខាងជើងដែលមានអាវុធនុយក្លេអ៊ែរ។
ការព្រមាននេះ កើតមានឡើងក្រោយសហរដ្ឋអាមេរិកបញ្ជូននាវាមុជទឹកដើរដោយថាមពលនុយក្លេអ៊ែរ និងបំពាក់ដោយមីស៊ីសបាលីស្ទិចមួយគ្រឿង ទៅកាន់មូលដ្ឋានទ័ពជើងទឹកក្នុងទីក្រុងប៊ូសាន នៃប្រទេសកូរ៉េខាងត្បូង ព្រមទាំងការដាក់ពង្រាយយន្តហោះទម្លាក់គ្រាប់បែក B-1B របស់ទីក្រុងវ៉ាស៊ីនតោន ចូលរួមក្នុងសមយុទ្ធជាមួយកូរ៉េខាងត្បូង និងជប៉ុន។
ប៉ុន្តែការដែលលោក គីម ជុងអ៊ុន ប្រកាសឱ្យមេទ័ពត្រៀមធ្វើសង្គ្រាមនៅពេលនេះ កើតឡើងបន្ទាប់ពីប្រទេសកុម្មុយនីស្តផ្ដាច់ការមួយនេះ បានបាញ់មីស៊ីលផ្លោងអន្តរទ្វីបបាលីស្ទិច ICBM ដល់ទៅ ២គ្រាប់ ដែលហោះធ្លាក់ចូលក្នុងសមុទ្រជប៉ុន បាននាំឱ្យសហរដ្ឋអាមេរិក កូរ៉េខាងត្បូង និងជប៉ុន រួមគ្នាធ្វើសមយុទ្ធទ័ពអាកាសគំរាមក្រុងព្យុងយ៉ាង។
កាលពីមួយខែមុននេះ មេដឹកនាំផ្ដាច់ការកូរ៉េខាងជើងរូបនេះបានបញ្ជាឱ្យផលិតអាវុធនុយក្លេអ៊ែរថែមទៀត ក្រោយពីអាវុធនេះបានដាក់ចូលក្នុងរដ្ឋធម្មនុញ្ញ។
យោងតាមទីភ្នាក់ងារសារព័ត៌មានមជ្ឈិមបក្សកូរ៉េ KCNA លោក គីម ជុងអ៊ុន ដែលបានចេញបទបញ្ជាដូចនេះ ក្រោយពីសភារបស់ប្រទេសផ្ដាច់ការមួយនេះបានអនុម័តបញ្ចូលឋានៈប្រទេសជាមហាអំណាចអាវុធនុយក្លេអ៊ែរទៅក្នុងរដ្ឋធម្មនុញ្ញជាផ្លូវការ។
លោក ជុងអ៊ុន បានហៅអាវុធនុយក្លេអ៊ែររបស់កូរ៉េខាងជើង គឺជាឧបករណ៍មួយដើរតួនាទីយ៉ាងសំខាន់ប្រឈមមុខនឹងមហាអំណាចសហរដ្ឋអាមេរិក ដែលជាប្រទេសនុយក្លេអ៊ែរធំបំផុតមួយដែរនៅលើពិភពលោក។
យោងតាមប្រភពរបស់ KCNA លោក ជុងអ៊ុន បាននិយាយថា គោលនយោបាយកសាងកងកម្លាំងនុយក្លេអ៊ែររបស់កូរ៉េខាងជើង ត្រូវបានបញ្ចូលជាអចិន្ត្រៃយ៍ជាមូលដ្ឋានច្បាប់របស់រដ្ឋ ដែលគ្មាននរណាម្នាក់អាចល្មើស ឬបំពានបានឡើយ។
ជាមួយគ្នានេះ លោក គីម ក៏បានបរិហារសហរដ្ឋអាមេរិក កូរ៉េខាងត្បូង និងជប៉ុន ដែលលោកថាបានបង្កើតសម្ព័ន្ធភាពយោធាត្រីភាគី ហើយជាលទ្ធផលចុងក្រោយ អ្វីដែលបានលេចចេញជារូបរាងនោះ គឺអង្គការ NATO ក្នុងតំបន់អាស៊ីដ៏គ្រោះថ្នាក់បំផុត។
ទាំងសហរដ្ឋអាមេរិក កូរ៉េខាងត្បូង និងជប៉ុន បានថ្កោលទោសរបបនៅក្រុងព្យុងយ៉ាង ដែលដាក់អាវុធនុយក្លេអ៊ែរនៅក្នុងរដ្ឋធម្មនុញ្ញរបស់ខ្លួន។ ថ្លែងទៅកាន់អង្គមហាសន្និបាតអង្គការសហប្រជាជាតិលើកទី៧៨ កាលពីខែកញ្ញា លោក អង់តូនីញូ ហ្គូតារ៉េ អគ្គលេខាធិការរបស់អង្គការពិភពលោកនេះ បានដាក់ការព្រួយបារម្ភជាខ្លាំងថា ពិភពលោកអាចអស់លទ្ធភាពក្នុងការកាត់បន្ថយការសាយភាយ និងការផលិតអាវុធនុយក្លេអ៊ែរហើយ ពីព្រោះប្រទេសដែលមានសមត្ថភាពផលិតអាវុធប្រល័យលោកនេះកាន់តែបន្ថែមការផលិតអាវុធនេះច្រើនថែមទៀត។ មិនតែប៉ុណ្ណោះ លោកព្រមានថា ការគំរាមបង្កសង្គ្រាមដោយប្រើអាវុធនេះ កាន់តែខ្លាំងក្លាឡើង។
កូរ៉េខាងជើងបានធ្វើតេស្ដអាវុធនុយក្លេអ៊ែរចំនួន ៦លើករួចមកហើយ ចាប់តាំងពីឆ្នាំ២០០៦ ហើយកាលពីឆ្នាំ២០២២ កន្លងទៅ សភាកូរ៉េខាងជើង បានអនុម័តនូវច្បាប់មួយដោយប្រកាសទទួលស្គាល់ដោយខ្លួនឯងថា កូរ៉េខាងជើងជារដ្ឋមានអាវុធនុយក្លេអ៊ែរដែលលោក គីម និយាយថាប្រទេសរបស់លោកពិតជាមានអាវុធប្រភេទនេះ។
តែបើយោងតាមការធ្វើវិសោធនកម្មរដ្ឋធម្មនុញ្ញ គឺច្បាប់កំពូលរបស់ប្រទេសនេះបានអនុញ្ញាតទៀតផងឱ្យកងទ័ពរបស់ខ្លួនបើកការវាយប្រហារដោយប្រើអាវុធនុយក្លេអ៊ែរ នៅក្នុងករណីចាំបាច់។ អាវុធនុយក្លេអ៊ែរ គឺជាឧបករណ៍បំផ្ទុះដ៏ធំបំផុត ហើយពិភពលោកក៏ចាត់ទុកថាជាអាវុធដ៏សាហាវបំផុត ឬអាចហៅថាជាអាវុធប្រល័យលោក។
ក្រុងព្យុងយ៉ាង បានព្រមានថា មីស៊ីលអន្តរទ្វីបបាលីស្ទិច ICBM ដែលបំពាក់ក្បាលគ្រាប់នុយក្លេអ៊ែរ គឺវាអាចបាញ់ដល់គ្រប់រដ្ឋរបស់សហរដ្ឋអាមេរិកទាំងអស់៕