នាយករដ្ឋមន្ត្រីតពូជលោក ហ៊ុន ម៉ាណែត អះអាងថា ទិវាសន្តិភាព ២៩ធ្នូ មិនមែនធ្វើឡើងដើម្បីតែត្រកូលហ៊ុននោះទេ គឺដើម្បីពលរដ្ឋខ្មែរគ្រប់រូបដែលស្អប់សង្គ្រាម និងស្រឡាញ់សន្តិភាព។
កូនប្រុសច្បងក្នុងត្រកូលក្រាញអំណាចនៅកម្ពុជាលោក ហ៊ុន ម៉ាណែត លើកឡើងក្នុងពិធីសម្ពោធស្ពានបេតុងក្នុងខេត្តកោះកុង នៅថ្ងៃទី៨ ខែមករា ឆ្នាំ២០២៤ នេះថា ពលរដ្ឋខ្មែរដែលកំពុងរស់នៅក្នុងអធិបតេយ្យភាព និងឯករាជភាពដែលមានទិវាឯករាជ្យជាតិ ៩វិច្ឆិកា ជាស្មារតី និងទិវាជ័យជម្នះ ៧មករា ជាស្មារតី ដែលរដ្ឋាភិបាលបានកំណត់ជាថ្ងៃឈប់សម្រាករួចមកហើយ ដូច្នេះការកំណត់ថ្ងៃប្រារព្ធទិវាសន្តិភាព ២៩ធ្នូ ជាថ្ងៃឈប់សម្រាកក៏គ្មានអ្វីត្រូវខុសដែរ។
លោក ហ៊ុន ម៉ាណែត បញ្ជាក់ថា ទិវាសន្តិភាព ២៩ធ្នូ ប្រារព្ធឡើងដើម្បីពលរដ្ឋខ្មែរគ្រប់រូបដែលស្អប់សង្គ្រាម និងស្រឡាញ់សន្តិភាព ព្រោះថាការធ្វើបែបនេះ គ្មានអ្វីខុសទេ ដែលពលរដ្ឋត្រូវចងចាំសន្តិភាព ថែរក្សាសន្តិភាពឱ្យស្ថិតស្ថេរនោះ។
កាលពីថ្ងៃទី១ ខែមករា ឆ្នាំ២០២៤ លោក ហ៊ុន ម៉ាណែត បានចេញអនុក្រឹត្យមួយដែលបានកំណត់យកថ្ងៃទី២៩ ខែធ្នូ ជារៀងរាល់ឆ្នាំជាទិវាសន្តិភាពនៅកម្ពុជា ដែលជាថ្ងៃបុណ្យជាតិផ្លូវការ ក្រោមហេតុផលថា ដើម្បីបង្ហាញពីការស្រឡាញ់សន្តិភាព និងការស្អប់ខ្ពើមសង្គ្រាមផង ហើយក៏ជាថ្ងៃរំលឹកដល់ការបញ្ចប់សង្គ្រាមនៅថ្ងៃទី២៩ ខែធ្នូ ឆ្នាំ១៩៩៨ ផង និងដើម្បីរំលឹកគុណអ្នកដែលបានពលី និងវីរភាពដ៏ក្លាហានរបស់អ្នកស្នេហាជាតិដែលខិតខំស្វែងរកសន្តិភាពផងដែរ។
ទាក់ទិននឹងបញ្ហានេះ មេដឹកនាំបក្សកាន់អំណាច លោក ហ៊ុន សែន ធ្លាប់បានលើកឡើងកាលពីពេលថ្មីៗនេះថា នយោបាយឈ្នះឈ្នះ ២៩ ធ្នូ ១៩៩៨ របស់លោក គឺជាយុទ្ធសាស្ត្រនាំមកនូវការធានាដល់សន្តិសុខសង្គម ការបង្រួបបង្រួមជាតិ ឯកភាពជាតិ សន្តិភាព ការធានាដល់បូរណភាពដែនដី អធិបតេយ្យជាតិ និងការអភិវឌ្ឍសេដ្ឋកិច្ច នយោបាយសង្គម ប្រកបដោយចីរភាព។
ទោះជាបែបនេះក្តី អ្នកវិភាគឯករាជ្យ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៨ មករា នេះថា នយោបាយឈ្នះឈ្នះដែលលោក ហ៊ុន សែន អះអាងពីការបញ្ចប់សង្គ្រាមរហូតមក មិនមែនដូចអ្វីដែលគាត់បានអះអាងនោះទេ ហើយក៏គ្មានតម្លៃកំណត់ជាថ្ងៃបុណ្យជាតិសម្រាប់ពលរដ្ឋខ្មែរ និងប្រទេសកម្ពុជានោះដែរ ព្រោះថានយោបាយឈ្នះឈ្នះរបស់លោក ហ៊ុន សែន គ្រាន់តែជាល្បិចកលនយោបាយក្នុងការក្តោបក្តាប់អំណាចរបស់គាត់ប៉ុណ្ណោះ។
ជាងនេះទៀត ក្រោមនយោបាយឈ្នះឈ្នះនេះ លោក ហ៊ុន សែន បានដឹកនាំប្រទេសកម្ពុជាឆ្ពោះទៅរកឃាតកម្មនីតិរដ្ឋ និងឃាតកម្មប្រជាធិបតេយ្យ ដែលបានបង្កើតឡើងដោយកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ រហូតដល់សព្វថ្ងៃនេះ។
លោក គឹម សុខ លើកឡើងថា បន្ទាប់ពីលោក ហ៊ុន សែន ឡើងកាន់អំណាចក្រោយពីវៀតណាមលើកបន្តុប គាត់មិនអាចដឹកនាំរកការបង្រួបបង្រួមបានទេ គឺមានតែសម្លាប់អ្នកនយោបាយ និងពលរដ្ឋខ្លួនឯងប៉ុណ្ណោះ នៅមុនពេលដែលមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ប៉ុន្តែនៅពេលដែលកិច្ចសន្យាអន្តរជាតិមួយនេះបានកើតឡើង ទើបកម្ពុជាអាចចាប់ផ្តើមមានការចរចាពីគ្រប់ភាគី និងអាចបញ្ចប់ជម្លោះប្រដាប់អាវុធផ្ទៃក្នុងរបស់ខ្លួនបានរហូតដល់ពេលនេះ។
អ្នកវិភាគឯករាជ្យរូបនេះបញ្ជាក់ថា លោក ហ៊ុន សែន ធ្លាប់អួតថា នយោបាយឈ្នះឈ្នះរបស់គាត់ចាប់ផ្តើមពីអំឡុងឆ្នាំ១៩៩៦ និងបញ្ចប់នៅឆ្នាំ១៩៩៨ គឺមានរយៈពេលតែ ២ឆ្នាំប៉ុណ្ណោះ ដូច្នេះបើគាត់ពិតជាមានសមត្ថភាពបែបនេះមែន ហេតុអ្វីគាត់មិនប្រើនយោបាយឈ្នះឈ្នះពីឆ្នាំ១៩៨៥ ដែលវៀតណាមលើកបន្តុបមក ដើម្បីបញ្ចប់សង្គ្រាមនៅឆ្នាំ១៩៨៧ តែម្តងទៅ ចាំបាច់ទុកឱ្យសង្គ្រាមនៅកម្ពុជាអូសបន្លាយរហូតមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ធ្វើអ្វី។
លោក គឹម សុខ បញ្ជាក់ថា ការអួតពីនយោបាយឈ្នះឈ្នះ គ្រាន់តែជាវិធីធ្វើប្រជាភិថុតិដែលគាត់ប្រើដើម្បីបំភ្លៃការពិត និងមានចេតនាលុបបំបាត់កិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលធានានូវសិទ្ធិមូលដ្ឋានរបស់ពលរដ្ឋ និងការអនុវត្តតាមបែបលទ្ធិប្រជាធិបតេយ្យប៉ុណ្ណោះ ខណៈនយោបាយឈ្នះឈ្នះ អួតតែពីល្បិចគ្រប់គ្រងអំណាចរបស់លោក ហ៊ុន សែន តែមួយមុខគត់។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា សង្គ្រាមរ៉ាំរ៉ៃនៅកម្ពុជាមិនមែនបញ្ចប់ដោយសារនយោបាយឈ្នះឈ្នះរបស់លោក ហ៊ុន សែន ទេ គឺបញ្ចប់ដោយសារកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ប៉ុណ្ណោះ ព្រោះថាមានតែកិច្ចព្រមព្រៀងសន្តិភាពទីក្រុងប៉ារីសតែមួយគត់ដែលនាំឱ្យមានការដោះស្រាយជម្លោះនយោបាយនៅកម្ពុជាពីគ្រប់ភាគីទាំងអស់ ដើម្បីប្រយោជន៍ពលរដ្ឋខ្មែរគ្រប់រូប និងគ្រប់និន្នាការ ខណៈនយោបាយឈ្នះឈ្នះ គឺដើម្បីតែប្រយោជន៍គណបក្សប្រជាជនកម្ពុជាប៉ុណ្ណោះ៕