38 C
Phnom Penh

អ្នកវិភាគ​ចាត់ទុក​លទ្ធផល​ទស្សនកិច្ច​របស់​លោក ហ៊ុន ម៉ាណែត ទៅ​បារាំង​ថា​ទទួល​បរាជ័យ​ដ៏​អាម៉ាស់

ដោយ ឌឹ ខេមបូឌា ដេលី

បទវិភាគ

ក្រុម​អ្នកវិភាគ​ចាត់ទុក​លទ្ធផល​នៃ​ដំណើរ​ទស្សនកិច្ច​របស់​នាយករដ្ឋមន្ត្រី​ថ្មី​របស់​កម្ពុជា​លោក ហ៊ុន ម៉ាណែត ទៅ​កាន់​ប្រទេស​បារាំង ថា​ជា​ដំណើរ​ទស្សនកិច្ច​ដែល​ទទួល​នូវ​ការ​បរាជ័យ​ដ៏​អាម៉ាស់ ដោយសារតែ​ប្រធានាធិបតី​បារាំង បាន​បង្ហាញ​ពី​ការ​មិន​ទទួលស្គាល់​រដ្ឋាភិបាល​ថ្មី​របស់​លោក ហ៊ុន ម៉ាណែត ថា​ជា​រដ្ឋាភិបាល​ស្រប​ច្បាប់។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ​លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​២២ មករា ថា ការ​ដែល​លោក ហ៊ុន ម៉ាណែត មិន​អាច​អញ្ជើញ​ប្រធានាធិបតី​បារាំង លោក អេម៉ានុយអែល ម៉ាក្រុង ឲ្យ​ទៅ​បំពេញ​ទស្សនកិច្ច​ជា​លក្ខណៈ​ទ្វេភាគី​នៅ​កម្ពុជា​វិញ​បាន គឺជា​បរាជ័យ​ដ៏​ធំ​ក្នុង​ដំណើរ​ទស្សនកិច្ច​នេះ ប៉ុន្តែ​ដើម្បី​កុំ​ឱ្យ​បាក់​មុខ​ការទូត គាត់​បែរ​ជា​អញ្ជើញ​ប្រមុខ​សភា​បារាំង ឱ្យ​ទៅ​បំពេញ​ទស្សនកិច្ច​ជា​លក្ខណៈ​ទ្វេភាគី​នៅ​កម្ពុជា​ជំនួស​វិញ។

លោក​បន្ត​ថា បរាជ័យ​ទី​ពីរ គឺ​ការ​ផ្ដល់​ហិរញ្ញប្បទាន​សហប្រតិបត្តិការ​ចំនួន ២១៥​លាន​អឺរ៉ូ​ដល់​កម្ពុជា មិន​មែន​បង្ហាញ​ថា បារាំង​ទទួលស្គាល់​រដ្ឋាភិបាល​ថ្មី​របស់​លោក ហ៊ុន ម៉ាណែត ជា​រដ្ឋាភិបាល​ស្រប​ច្បាប់​ទេ ព្រោះ​ថា​ហិរញ្ញប្បទាន​នេះ​ត្រូវ​ផ្ដល់​ជា​ប្រយោជន៍​ដល់​ប្រជាពលរដ្ឋ​ខ្មែរ តាមរយៈ​ទីភ្នាក់ងារ​អភិវឌ្ឍន៍​របស់​ប្រទេស​បារាំង (AFD) ប៉ុណ្ណោះ ដែល​មាន​ន័យ​ថា បារាំង​ជា​អ្នក​ចាត់ចែង​ហិរញ្ញប្បទាន​នេះ​ដដែល​ក្នុង​ការ​កសាង​សមិទ្ធផល​ជូន​ប្រជាជាតិ​ខ្មែរ មិន​មែន​បារាំង​ប្រគល់​ឱ្យ​រដ្ឋាភិបាល​កម្ពុជា​ចាត់ចែង​ទេ។

លោក គឹម សុខ អះអាង​ថា ចំណែក​បរាជ័យ​ទី​៣ គឺ​មុន​នឹង​មាន​ជំនួប​ជាមួយ​ប្រធានាធិបតី​បារាំង លោក អេម៉ានុយអែល ម៉ាក្រុង ស្រាប់តែ​បណ្ដាញ​ព័ត៌មាន​អន្តរជាតិ​ដ៏​ល្បី​ឈ្មោះ Politico ដែល​មាន​មូលដ្ឋាន​នៅ​បារាំង អឺរ៉ុប អង់គ្លេស និង​អាមេរិក បាន​ចាត់ទុក​លោក ហ៊ុន ម៉ាណែត ជា​មេដឹកនាំ​ផ្ដាច់ការ​ក្នុង​ពិភពលោក​រួច​ទៅ​ហើយ ដូច្នេះ​ដំណើរ​ទស្សនកិច្ច​ការទូត​លើក​ទី​១ ក្នុង​នាម​ជា​នាយករដ្ឋមន្ត្រី​ខ្មែរ​នេះ លោក ហ៊ុន ម៉ាណែត គ្រាន់តែ​ធ្វើ​ដំណើរ​ទៅ​ទទួល​ងារ​ជា​ជន​ផ្ដាច់ការ​ទាំង​វ័យក្មេង រួច​ហើយ​ស្ពាយ​ឈ្មោះ​ដ៏​រលួយ​នេះ​ទៅ​ប្រគល់​ឱ្យ​រដ្ឋាភិបាល​កម្ពុជា​ថ្មី​នេះ​ប៉ុណ្ណោះ។

អ្នកវិភាគ​នយោបាយ​រូប​នេះ​បញ្ជាក់​ថា ការ​អញ្ជើញ​លោក ហ៊ុន ម៉ាណែត ឱ្យ​ទៅ​ទស្សនកិច្ច​នៅ​ប្រទេស​បារាំង គ្រាន់តែ​ធ្វើ​ឡើង​ក្នុង​វប្បធម៌​ការទូត​បែប​ប្រពៃណី ដែល​បារាំង​ជា​អតីត​ម្ចាស់​អាណានិគម​លើ​កម្ពុជា​ប៉ុណ្ណោះ ព្រោះ​ប្រទេស​បារាំង​តែងតែ​ធ្វើ​បែប​នេះ​ដូចៗ​គ្នា​ចំពោះ​ក្រុម​ប្រទេស​ដែល​ធ្លាប់​នៅ​ក្រោម​អាណានិគម​បារាំង​ពី​មុន ទោះបី​ប្រទេស​ទាំងនោះ​សេរី​ប្រជាធិបតេយ្យ ឬ​ក៏​កុម្មុយនីស្ត​ក៏ដោយ ដើម្បី​រក្សា​ទំនាក់ទំនង​វប្បធម៌​អាណានិគម ដូចជា ភាសា​បារាំង ក្នុង​ក្របខ័ណ្ឌ​ហ្វ្រង់កូហ្វូន និង​ទំនាក់ទំនង​កងទ័ព ជាដើម។

កាលពី​ថ្ងៃទី​២០ ខែ​មករា ឆ្នាំ​២០២៤ ក្រសួង​ការបរទេស និង​កិច្ច​សហប្រតិបត្តិការ​អន្តរជាតិ​របស់​កម្ពុជា បាន​ចេញ​សេចក្តី​ប្រកាស​ព័ត៌មាន​មួយ​ក្រោយពី​ដំណើរ​ទស្សនកិច្ច​របស់​លោក ហ៊ុន ម៉ាណែត ទៅ​ប្រទេស​បារាំង ថា ក្នុង​ដំណើរ​ទស្សនកិច្ច​របស់​លោក ហ៊ុន ម៉ាណែត គឺ​ទទួល​បាន​ជោគជ័យ​យ៉ាង​ខ្លាំង​ក្នុង​ការ​ឯកភាព​គ្នា​លើ​គោលការណ៍​រួម​ធំ​ជាមួយ​ប្រទេស​បារាំង ដូចជា ឯកភាព​គ្នា​លើ​គោលនយោបាយ​សម្រាប់​ពិភពលោក និង​តំបន់ ឯកភាព​លើ​កិច្ច​សហប្រតិបត្តិការ​លើ​វិស័យ​វប្បធម៌ ឯកភាព​គ្នា​លើ​ការ​ជំរុញ​ថាមពល​ស្អាត និង​ការ​ឯកភាព​គ្នា​ក្នុង​កិច្ចសហការ​លើ​វិស័យ​សេដ្ឋកិច្ច ជាដើម។

ក្រសួង​ការបរទេស​បញ្ជាក់​ថា បារាំង​ជា​ប្រទេស​ដំបូង​គេ​ក្នុង​ចំណោម​បណ្តា​ប្រទេស​អឺរ៉ុប ដែល​លោក ហ៊ុន ម៉ាណែត បាន​ទៅ​បំពេញ​ទស្សនកិច្ច​ជា​ផ្លូវការ ហើយ​ក៏​ជា​ឥស្សរជន​ទី​១ ដែល​ប្រធានាធិបតី​បារាំង ទទួល​ស្វាគមន៍​យ៉ាង​កក់ក្តៅ​ដែរ ដែល​នេះ​គឺជា​សក្ខីភាព​មួយ​បង្ហាញ​ពី​ទំនាក់ទំនង​ស្និទ្ធស្នាល​រវាង​កម្ពុជា និង​បារាំង។

កាលពី​ថ្ងៃទី​១៣ ខែ​មករា ឆ្នាំ​២០២៤ នាយករដ្ឋមន្ត្រី​ថ្មី​របស់​កម្ពុជា លោក ហ៊ុន ម៉ាណែត បាន​ធ្វើ​ដំណើរ​ទៅ​ចូលរួម​កិច្ចប្រជុំ​ប្រចាំ​ឆ្នាំ​លើក​ទី​៥៤ នៃ​វេទិកា​សេដ្ឋកិច្ច​ពិភពលោក​នៅ​ទីក្រុង​ដាវ៉ូស ប្រទេស​ស្វីស និង​ដើម្បី​ធ្វើ​ដំណើរ​ទៅ​បំពេញ​ទស្សនកិច្ច​នៅ​ប្រទេស​បារាំង នៅ​ថ្ងៃទី​១៨ និង​ទី​១៩ ខែ​មករា ឆ្នាំ​២០២៤ នេះ​ផង​ដែរ។

យ៉ាងណាក៏ដោយ អំឡុង​ពេល​ចូលរួម​ប្រជុំ​នៃ​វេទិកា​សេដ្ឋកិច្ច​ពិភពលោក​នៅ​ទីក្រុង​ដាវ៉ូស ប្រទេស​ស្វីស សារព័ត៌មាន​អន្តរជាតិ​មួយ​ឈ្មោះ ប៉ូលិទិកូ (POLITOCO) បាន​ចេញ​ផ្សាយ​អត្ថបទ​មួយ​ដែល​មាន​ចំណងជើង​ថា The “dirty dozen” of Davos ឬ មេដឹកនាំ និង​អ្នកជំនួញ​កខ្វក់​ចំនួន ១២​រូប ដែល​មាន​វត្តមាន​ក្នុង​ទីក្រុង​ដាវ៉ូស ក្នុង​នោះ​លោក ហ៊ុន ម៉ាណែត ក៏​ត្រូវ​គេ​រាប់​បញ្ចូល​ទៅ​ក្នុង​ចំណោម​មេដឹកនាំ និង​អ្នកជំនួញ​កខ្វក់​ចំនួន ១២​នាក់​នោះ​ផង​ដែរ ឬ Hun Manet is one of the 12 bad boys of the world leaders។

មេដឹកនាំ និង​អ្នកជំនួញ​កខ្វក់​ចំនួន ១២​រូប​ដែល​មាន​វត្តមាន​ក្នុង​វេទិកា​សេដ្ឋកិច្ច​ពិភពលោក​នៅ​ទីក្រុង​ដាវ៉ូស ទាំងនោះ រួម​មាន នាយករដ្ឋមន្ត្រី​ខ្មែរ​លោក ហ៊ុន ម៉ាណែត ប្រធានាធិបតី​អាហ្សង់ទីន រាជទាយាទ​អារ៉ាប៊ីសាអ៊ូឌីត ប្រធានាធិបតី​អាហ្សេបៃហ្សង់ ប្រធានាធិបតី​រវ៉ាន់ដា នាយករដ្ឋមន្ត្រី​ចិន លោក លី ឈាង (Li Qiang) ប្រធានាធិបតី​ហុងគ្រី នាយករដ្ឋមន្ត្រី​ស្លូវ៉ាគី ប្រធានាធិបតី​ប៉ូឡូញ និង​នាយករដ្ឋមន្ត្រី​កាតា (Qatar) ព្រមទាំង​អ្នកជំនួញ​ដ៏​ធំ​ពីរ​រូប​ផ្សេង​ទៀត​ផង​ដែរ។

សារព័ត៌មាន​អន្តរជាតិ​ខាងលើ​បាន​ចាត់ទុក​ថា បុគ្គល​ទាំងនេះ​គឺជា​ប្រភេទ​អ្នកជំនួញ​ទុច្ចរិត ជា​មេដឹកនាំ​ផ្ដាច់ការ​បែប​អត្តាធិបតេយ្យ​ដែល​ល្មោភ​អំណាច និង​ផល​ប្រយោជន៍​ផ្ទាល់ខ្លួន មិន​គោរព​ច្បាប់ ដោយ​ជាប់​ពាក់ព័ន្ធ​ក្នុង​អំពើ​ឃាតកម្ម​លើ​អ្នកកាសែត និង​បង្ក្រាប​បង្ហូរ​ឈាម​លើ​ពលរដ្ឋ​ស្លូតត្រង់ ជាដើម ក្នុង​នោះ​មាន​ចំណុច​សំខាន់ៗ​ជាច្រើន​នៃ​ការ​ដឹកនាំ​បែប​ផ្ដាច់ការ​របស់​លោក ហ៊ុន ម៉ាណែត រួម​មាន​ការ​បង្ក្រាប​ឥត​ឈប់​ឈរ​លើ​គណបក្ស​ប្រឆាំង និង​អ្នក​រិះគន់ ការ​បោះឆ្នោត​មិន​ត្រឹមត្រូវ ការ​ប្រព្រឹត្ត​អំពើពុករលួយ និង​ទំនាក់ទំនង​បក្ខពួក​និយម​រវាង​ក្រុម​អ្នក​នយោបាយ​បក្ស​កាន់​អំណាច និង​អ្នកជំនួញ​ក្នុង​រដ្ឋាភិបាល​របស់​គណបក្ស​ប្រជាជន​កម្ពុជា​ដែល​កំពុង​គ្រប់គ្រង​ដោយ​លោក ហ៊ុន សែន សព្វថ្ងៃ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស