អ្នកតស៊ូមតិដើម្បីយុត្តិធម៌សង្គមកម្ពុជាដែលកំពុងរស់នៅក្រៅប្រទេស បានលើកឡើងថា ការប្តឹងមន្ត្រីសង្គមស៊ីវិលលោក ស៊ឹង សែនករុណា ពីសំណាក់មេដឹកនាំបក្សកាន់អំណាចលោក ហ៊ុន សែន ទាក់ទងការបញ្ចេញមតិដែលពាក់ព័ន្ធនឹងគណបក្សប្រជាជនកម្ពុជា គឺជាយុទ្ធសាស្ត្ររបស់លោក ហ៊ុន សែន ដើម្បីកម្ចាត់ក្រុមអង្គការក្រៅរដ្ឋាភិបាលប៉ុណ្ណោះ បន្ទាប់ពីគាត់បានកម្ចាត់ក្រុមអ្នកនយោបាយប្រឆាំងឱ្យបែកបាក់កម្លាំងតវ៉ានៅពេលនេះ។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៧ កុម្ភៈ នេះថា ទង្វើរបស់លោក ហ៊ុន សែន នៅពេលនេះគឺបានបង្ហាញយ៉ាងច្បាស់ថា លោកកំពុងប្រើអំណាចរំលោភច្បាប់ជាប្រព័ន្ធនៅកម្ពុជាយ៉ាងធ្ងន់ធ្ងរ ព្រោះថាក្នុងរដ្ឋធម្មនុញ្ញជំពូក៣ ស្ដីពី «សិទ្ធិ និងករណីយកិច្ចរបស់ពលរដ្ឋ» ចាប់ពីមាត្រា៣១ ដល់មាត្រា៥០ បានចែងយ៉ាងច្រើនពីសិទ្ធិបញ្ចេញមតិរបស់ពលរដ្ឋ ប៉ុន្តែលោក ហ៊ុន សែន បែរជាប្រើអំណាចរំលោភលើជំពូកនេះ ដើម្បីតែបំពេញបំណងរបស់ខ្លួនទៅវិញ ហើយការរំលោភច្បាប់នេះ មិនមែនត្រឹមតែរំលោភតែបុគ្គលផ្ទាល់ខ្លួនគាត់ទេ ថែមទាំងគំរាមឱ្យស្ថាប័នតុលាការរំលោភច្បាប់តាមការចង់បានរបស់គាត់ទៀត។
លោក ម៉ែន ណាត លើកឡើងថា ទោះបណ្តឹងនេះឈានដល់ការចោទប្រកាន់រហូតលោក ហ៊ុន សែន ឈ្នះក្តីក៏ដោយ ក៏ពលរដ្ឋខ្មែរនៅតែមើលឃើញជាភាពអយុត្តិធម៌ដែរ ព្រោះថាអ្នកប្តឹងគឺលោក ហ៊ុន សែន ចំណែកអ្នកដែលទទួលបណ្តឹងយកទៅកាត់សេចក្តី គឺជាសមាជិករបស់គណបក្សប្រជាជនកម្ពុជា ដែលមានលោក ហ៊ុន សែន ជាប្រធាន ដូច្នេះតើសមាជិកបក្សកាន់អំណាចទាំងនោះនឹងកាត់សេចក្តីឱ្យលោក ហ៊ុន សែន ចាញ់ក្តីកើតនោះទេ? ចម្លើយគឺថា មិនអាចទេ។
ប្រភពដដែលបន្ថែមថា ទង្វើរបស់លោក ហ៊ុន សែន នៅពេលនេះ គ្រាន់តែធ្វើឱ្យពលរដ្ឋខ្លាចគាត់ប៉ុណ្ណោះ ប៉ុន្តែទន្ទឹមនឹងការខ្លាចរបស់ពលរដ្ឋរហូតដល់ការរក្សាភាពស្ងៀមស្ងាត់ ពួកគេក៏ស្អប់គាត់កាន់តែខ្លាំងដែរ។ ផ្ទុយទៅវិញ អ្នកដែលគាត់បានបង្ក្រាប និងសុខចិត្តចុះចូលកន្លងមកនោះ គ្រាន់តែជារូបភាពដែលពួកគេធ្វើឱ្យគាត់មើលប៉ុណ្ណោះ។
លោកបន្តថា បើចង់ដឹងថាពួកគេស្រឡាញ់គាត់ពិតប្រាកដដោយស្មោះអស់ពីបេះដូង ឬអត់ គេអាចសម្គាល់បាននៅពេលដែលក្រុមគ្រួសារគាត់អស់អំណាច ដូច្នេះលោក ហ៊ុន សែន មិនគួរបន្តការដឹកនាំតាមបែបឃោរឃៅដូច្នេះទៀតឡើយ។
អនុប្រធានវេទិកាពលរដ្ឋរូបនេះត្អូញត្អែរថា រយៈពេលជិត ៤០ឆ្នាំរបស់លោកក្នុងតំណែងជានាយករដ្ឋមន្ត្រី លោក ហ៊ុន សែន អាចធ្វើបានត្រឹមតែកម្ចាត់ដៃគូប្រជែងនយោបាយដើម្បីក្តោបក្តាប់អំណាចប៉ុណ្ណោះ ប៉ុន្តែគុណធម៌សម្រាប់ខ្លួនគាត់ក្នុងនាមជាមេដឹកនាំដែលធ្វើឱ្យពលរដ្ឋគោរពស្រឡាញ់ដោយចិត្តស្មោះ គាត់មិនអាចធ្វើបានទេ។ ជាងនេះទៀត ដោយសារតែការដឹកនាំដ៏អាក្រក់របស់គាត់ ក៏ក្លាយជាបណ្តាសាដាក់លើកូនប្រុសរបស់គាត់ គឺលោក ហ៊ុន ម៉ាណែត ឱ្យជាប់ឈ្មោះជាមេដឹកនាំកខ្វក់នៅលើពិភពលោកនៅពេលនេះដែរ។
ការអះអាងនេះ ធ្វើឡើងបន្ទាប់ពីមេដឹកនាំបក្សកាន់អំណាចលោក ហ៊ុន សែន បញ្ជាឱ្យមេធាវីរបស់គណបក្សប្រជាជនកម្ពុជា ប្តឹងមន្ត្រីជាន់ខ្ពស់សង្គមស៊ីវិលដែលបានបញ្ចេញមតិពាក់ព័ន្ធនឹងគណបក្សកាន់អំណាចកាលពីពេលថ្មីៗនេះ។
កាលពីថ្ងៃទី៥ ខែកុម្ភៈ ឆ្នាំ២០២៤ គណបក្សប្រជាជនកម្ពុជា បានដាក់ពាក្យបណ្ដឹងប្តឹងលោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) ទៅកាន់អយ្យការអមសាលាដំបូងរាជធានីភ្នំពេញ ដោយសុំឱ្យធ្វើការពិនិត្យសម្រេចចោទប្រកាន់ និងផ្ដន្ទាទោសតាមនីតិវិធីជាធរមាន និងទាមទារឱ្យសងសំណងជំងឺចិត្តជូនគណបក្សប្រជាជនកម្ពុជាចំនួន ២ពាន់លានរៀល (២ ០០០ ០០០ ០០០រៀល)។
ការប្តឹងផ្តល់នេះ ធ្វើឡើងបន្ទាប់ពីមានការបកស្រាយជុំវិញការប្តឹងផ្តល់រវាងគណបក្សប្រជាជនកម្ពុជា និងអនុប្រធានគណបក្សភ្លើងទៀន លោក សុន ឆ័យ ពីបទ «បរិហារកេរ្តិ៍» ដែលតុលាការតម្រូវឱ្យសងជំងឺចិត្តដល់គណបក្សកាន់អំណាចចំនួន ១លានដុល្លារអាមេរិក ក្រោយពីសាលាឧទ្ធរណ៍សម្រេចឱ្យលោក សុន ឆ័យ ចាញ់ក្តីបក្សកាន់អំណាចកាលពីពេលកន្លងទៅនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានអះអាងកាលពីពេលថ្មីៗនេះថា បេសកកម្ម សកម្មភាព និងការផ្តល់បទសម្ភាសន៍របស់លោក គឺក្នុងបំណងពង្រឹងការគោរពសិទ្ធិមនុស្ស ការគោរពច្បាប់ យុត្តិធម៌សង្គម និងប្រជាធិបតេយ្យ ដោយមិនបម្រើបក្សនយោបាយណាមួយនោះទេ ហើយក៏គ្មានចេតនាណាមួយវាយប្រហារបក្សនយោបាយណាមួយឡើយ។
ជុំវិញបញ្ហានេះ នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ដែលហៅកាត់ថា សង់ត្រាល់ លោក មឿន តុលា សរសេរលើទំព័រហ្វេសប៊ុករបស់លោកដែលទំនងជាមានបំណងប្រៀបធៀបករណីលោក ស៊ឹង សែនករុណា ដែលត្រូវគណបក្សប្រជាជនកម្ពុជាប្តឹងនៅថ្ងៃនេះថា ករណីអតីតអភិបាលក្រុងបាវិត លោក ឈូក បណ្ឌិត បាញ់កម្មការិនីរោងចក្រ ៣នាក់ឲ្យរងរបួសស្ទើរស្លាប់ តុលាការសម្រេចឱ្យលោក ឈូក បណ្ឌិត សងសំណងដល់ជនរងគ្រោះទាំង ៣នាក់នូវទឹកប្រាក់សរុបចំនួន ៣៨លានរៀលប៉ុណ្ណោះ ប៉ុន្តែសម្រាប់បក្សនយោបាយវិញ បាននាំឲ្យអ្នកខ្លះទារជំងឺចិត្តទាមទារសំណងរហូតដល់រាប់ពាន់លានរៀលទៅវិញ។
លោក មឿន តុលា លើកឡើងថា អ្វីដែលលោក ស៊ឹង សែនករុណា បានធ្វើ គឺបានជួយសង្គមជាតិច្រើនណាស់ ទោះមានអ្នកនិយាយចេញមកខាងក្រៅ ឬមិននិយាយចេញក៏ដោយ ក៏ពលរដ្ឋខ្មែរសុទ្ធតែបានដឹងច្បាស់ដែរ។
អង្គការ Freedom House បានចេញរបាយការណ៍របស់ខ្លួនកាលពីអំឡុងឆ្នាំ២០២២ ថា ប្រព័ន្ធនយោបាយរបស់ប្រទេសកម្ពុជា ត្រូវបានលោក ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព និងប្រជាពលរដ្ឋខ្មែររស់នៅក្នុងការគំរាមកំហែង ដែលធ្វើឱ្យពួកគេមានភាពភ័យខ្លាចគ្រប់ៗគ្នា៕