នាយករដ្ឋមន្ត្រីតពូជថ្មីលោក ហ៊ុន ម៉ាណែត ព្រមានថា ជនបរទេសទាំងឡាយណាដែលយកប្រទេសកម្ពុជាជាកន្លែងថតសម្ដែងរឿងចាប់ជំរិត ដើម្បីទទួលបានអ្នកទស្សនាច្រើនលើបណ្ដាញសង្គម គឺត្រូវអនុវត្តទោសឲ្យជាប់ពន្ធនាគារ និងបណ្ដេញចេញពីកម្ពុជា ហើយលែងឱ្យចូលកម្ពុជាអស់មួយជីវិត។
ថ្លែងនៅក្នុងពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) នៅថ្ងៃទី១៩ ខែកុម្ភៈ នេះ លោក ហ៊ុន ម៉ាណែត លើកឡើងថា ជនជាតិចិនតៃវ៉ាន់ ២នាក់ដែលបានថតវីដេអូសម្ដែងអំពីការចាប់ជំរិត បង្ហោះលើបណ្ដាញសង្គមនោះ បានសារភាពថា ពួកគេបានផ្ញើវីដេអូអំពីការថត Live នោះឱ្យទៅប្រពន្ធរបស់ពួកគេនៅតៃវ៉ាន់ បង្ហោះដើម្បីទទួលបានការចូលទស្សនាច្រើន និងឱ្យគេស្គាល់គណនី TikTok របស់ខ្លួន ហើយថានៅពេលដែលគណនី TikTok គេស្គាល់ច្រើនហើយ នោះពួកគេនឹងឆ្លៀតឱកាសលក់ផលិតផលតាមអនឡាញតែម្តង។
ប្រភពដដែលបានលើកឡើងថា នេះជាទង្វើបំផ្លាញមុខមាត់កម្ពុជាដើម្បីផលប្រយោជន៍ខ្លួនឯង។ លោកសូមព្រមានអ្នកដទៃផ្សេងទៀតដែលយកប្រទេសកម្ពុជាជាកន្លែងថតសម្ដែងចាប់ជំរិត ដើម្បីទទួលបានអ្នកទស្សនាច្រើន គឺត្រូវអនុវត្តទោសជាប់គុក ២ឆ្នាំ ហើយបណ្ដេញចេញពីប្រទេសកម្ពុជា និងលែងឱ្យចូលកម្ពុជាមួយជីវិត។
លោក ហ៊ុន ម៉ាណែត បញ្ជាឱ្យអាជ្ញាធរអនុវត្តច្បាប់តឹងរ៉ឹងលើជនបរទេសណាដែលយកប្រទេសកម្ពុជា ថតសម្ដែងវីដេអូចាប់ជំរិត និងបទឧក្រិដ្ឋផ្សេងៗដែលគ្មានការអនុញ្ញាត។
កាលពីថ្ងៃទី១២ ខែកុម្ភៈ ជនជាតិចិនតៃវ៉ាន់ទាំងពីរនាក់បានចូលទៅអគារមួយកន្លែងក្នុងក្រុងព្រះសីហនុ ហើយពួកគេថតសម្ដែងដោយផ្សាយលើគណនីហ្វេសប៊ុកឈ្មោះ WA AN XIAO JI ថាត្រូវបានសន្តិសុខចាប់ខ្លួន និងវាយដំពួកគេ។ លុះដល់ថ្ងៃទី១៣ ខែកុម្ភៈ ពួកគេបានផ្សាយផ្ទាល់ជាថ្មីម្ដងទៀតនៅម្ដុំឆៃណាថោន ក្នុងក្រុងព្រះសីហនុ ពីសកម្មភាពរត់គេចខ្លួន ហើយសម្ដែងធ្វើជាភ័យខ្លាច និងស្រែកឱ្យគេជួយ។
ក្នុងសំណុំរឿងនេះ តុលាការខេត្តព្រះសីហនុ សម្រេចផ្ដន្ទាទោសជនជាតិចិនតៃវ៉ាន់ទាំង ២នាក់ដែលផលិតវីដេអូបំផ្លើសការពិតពាក់ព័ន្ធនឹងការជួញដូរមនុស្សនៅកម្ពុជា ឱ្យជាប់ពន្ធនាគារពីរឆ្នាំ និងពិន័យជាប្រាក់ ៤លានរៀល ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម»។
ទាក់ទិននឹងបញ្ហាចាប់ជំរិត និងជួញដូរមនុស្សនេះ ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយសព្វថ្ងៃនេះ៕