សមាជិករដ្ឋសភាកម្ពុជា ១២០នាក់មកពីគណបក្សប្រជាជនកម្ពុជា សម្រេចអនុម័តជាឯកច្ឆន្ទបោះឆ្នោតគាំទ្រកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ជាឧបនាយករដ្ឋមន្ត្រីនៅថ្ងៃពុធ ទី២១ កុម្ភៈ នេះ ខណៈក្រុមអ្នកឃ្លាំមើលសម្ដែងការព្រួយបារម្ភពីការប្រមូលផ្ដុំអំណាចក្នុងរង្វង់គ្រួសារត្រកូលហ៊ុនកាន់តែខ្លាំង។
រដ្ឋសភាកម្ពុជាបើកកិច្ចប្រជុំវិសាមញ្ញមួយនៅថ្ងៃទី២១ ខែកុម្ភៈ ឆ្នាំ២០២៤ នេះ ដែលមានសមាជិកចូលរួម ១២០នាក់មកពីគណបក្សប្រជាជនកម្ពុជា បានសម្រេចជាឯកច្ឆន្ទបោះឆ្នោតគាំទ្រលោក ហ៊ុន ម៉ានី ជាឧបនាយករដ្ឋមន្ត្រីកម្ពុជា និងបោះឆ្នោតផ្តល់សេចក្តីទុកចិត្តលើការស្នើតែងតាំងបន្ថែមទេសរដ្ឋមន្ត្រីទទួលបន្ទុកបេសកកម្មពិសេស ២រូបថែមទៀតផងដែរ គឺលោក ស្រ៊ី ថាមរុង្គ និងលោក ប៉ែន វិបុល។
ការតែងតាំងលោ ហ៊ុន ម៉ានី ឱ្យឡើងជាឧបនាយករដ្ឋមន្ត្រីនេះ ស្របពេលដែលគេបានរកឃើញថា លោក ហ៊ុន សែន កំពុងតែរៀបចំចងក្រងប្រមូលផ្ដុំអំណាចក្តោបក្តាប់ប្រទេសកម្ពុជាបន្តពូជក្នុងក្រុមគ្រួសាររបស់គាត់តាមបែបដឹកនាំរបស់កុម្មុយនីស្ត។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២១ កុម្ភៈ នេះថា ការស្នើតែងតាំងសាច់ញាតិខ្លួនឯងឱ្យចូលទៅកាន់កាប់តំណែងតួនាទីក្នុងជួរគណបក្ស និងជួររដ្ឋាភិបាល គឺជារបៀបដឹកនាំរបស់របបកុម្មុយនីស្តផ្ដាច់ការប៉ុណ្ណោះ ព្រោះថាការរៀបចំបែបនេះ គឺជាវិធីតែមួយគត់ដែលពួកមេដឹកនាំកុម្មុយនីស្តអនុវត្ត ដើម្បីចងក្រងអំណាចរបស់ពួកគេឱ្យកាន់តែរឹងមាំ ដោយការទាញយកស្ថាប័នជាតិទាំងអស់របស់ប្រទេសដាក់ក្រោមអំណាចក្រុមគ្រួសារខ្លួនឯង។
លោក អ៊ុំ សំអាន លើកឡើងថា គ្មានអ្វីត្រូវសង្ស័យថាក្រុមគ្រួសារលោក ហ៊ុន សែន នឹងដឹកនាំប្រទេសកម្ពុជាឆ្ពោះរករបបប្រជាធិបតេយ្យ ឬរបបកុម្មុយនីស្តផ្ដាច់ការទេ ព្រោះថាតាមប្រព័ន្ធដែលលោក ហ៊ុន សែន បានរៀបចំកន្លងមក និងការរៀបចំកាន់តែខ្លាំងនៅពេលនេះ គឺបញ្ជាក់យ៉ាងច្បាស់ថា ពួកគេកំពុងតែក្តោបយកប្រទេសខ្មែរមកធ្វើជាកម្មសិទ្ធិផ្ដាច់មុខសម្រាប់គ្រប់គ្រងបន្តពូជក្នុងរង្វង់គ្រួសាររបស់គាត់ប៉ុណ្ណោះ។
លោកបន្ថែមថា ប្រទេសកម្ពុជាចៀសមិនផុតពីធ្លាក់ទៅក្នុងការគ្រប់គ្រងបែបផ្ដាច់ការទេ បើពួកគេអាចចងក្រងអំណាចតាមរយៈសែស្រឡាយ និងបក្ខពួករបស់គេបានជោគជ័យនោះ។
ចំណែកអនុប្រធានវេទិកាពលរដ្ឋលោក ម៉ែន ណាត បានលើកឡើងកាលពីពេលថ្មីៗនេះថា កម្ពុជាកំពុងស្ថិតក្នុងមាត់ជ្រោះមរណៈក្រោមកណ្ដាប់ដៃគ្រួសារត្រកូលហ៊ុនយ៉ាងផុយស្រួយ ព្រោះគ្រួសារកាងអំណាចផ្ដាច់មុខមួយនេះ កំពុងរៀបចំប្រព័ន្ធដឹកនាំប្រទេសកម្ពុជាទាំងមូលឱ្យស្ថិតក្រោមការគ្រប់គ្រងតែក្នុងរង្វង់គ្រួសាររបស់ពួកគេប៉ុណ្ណោះ ដែលរូបភាពនេះបង្ហាញឱ្យឃើញពីការដឹកនាំប្រទេសដ៏សែនអាក្រក់ដូចគ្នាទៅនឹងប្រទេសកូរ៉េខាងជើង ដែរ ដែលវាសនាប្រទេសជាតិ និងវាសនាពលរដ្ឋខ្មែរ ត្រូវរស់ក្រោមការគាបសង្កត់ពីអ្នកមានអំណាចមួយគ្រួសារតូចគ្រប់ពេល។
ទាក់ទិននឹងបញ្ហានេះ សមាគមអ្នកសារព័ត៌មានកម្ពុជា ខេមបូចា លាតត្រដាងក្នុងរបាយការណ៍ស៊ើបអង្កេតកាលពីចុងឆ្នាំ២០២៣ កន្លងទៅថា ពួកគេបានរកឃើញសែស្រឡាយបក្ខពួករបស់លោក ហ៊ុន សែន ជាច្រើននាក់តាមរយៈបញ្ជីឈ្មោះបេក្ខជនតំណាងរាស្ត្ររបស់គណបក្សប្រជាជនកម្ពុជា ដែលមានរហូតដល់ទៅជិត ១ភាគ៤ ដែលត្រូវបានដាក់ឱ្យឈរឈ្មោះជាបេក្ខជនតំណាងរាស្ត្រសម្រាប់អាណត្តិដឹកនាំដោយលោក ហ៊ុន ម៉ាណែត នៅពេលនេះ។
ទិន្នន័យសង្គមស៊ីវិល បង្ហាញថា ក្រុមគ្រួសារលោក ហ៊ុន សែន សព្វថ្ងៃនេះ បានបែងចែកគ្នាកាន់តួនាទីធំៗក្នុងជួររដ្ឋាភិបាល និងនៅក្នុងគណបក្សប្រជាជនកម្ពុជាពេញដៃ ក្នុងនោះ លោក ហ៊ុន សែន កាន់តំណែងជាប្រធានគណបក្សផង ជាប្រធានឧត្ដមក្រុមប្រឹក្សាព្រះមហាក្សត្រផង និងគ្រោងធ្វើជាប្រធានព្រឹទ្ធសភាផងដែរ។ ចំណែកលោក ហ៊ុន ម៉ាណែត កាន់តំណែងជាអនុប្រធានគណបក្សប្រជាជនកម្ពុជាផង និងកាន់តំណែងជានាយករដ្ឋមន្ត្រីថែមទៀត។
ជាងនេះទៀត លោក ហ៊ុន ម៉ានិត ត្រូវបានតែងតាំងជាមេបញ្ជាការរងកងទ័ពជើងគោកនៅក្នុងជួររដ្ឋាភិបាល និងជាសមាជិកគណៈកម្មាធិការកណ្តាលក្នុងជួរគណបក្សប្រជាជនកម្ពុជាផងដែរ ដោយឡែកលោក ហ៊ុន ម៉ានី ដែលមានតួនាទីជាសមាជិកគណៈកម្មាធិការកណ្តាលរបស់គណបក្សប្រជាជនកម្ពុជា និងត្រូវបានតែងតាំងជាឧបនាយករដ្ឋមន្ត្រីបន្ថែមពីលើតួនាទីជារដ្ឋមន្ត្រីក្រសួងមុខងារសាធារណៈ នៅពេលនេះថែមទៀត។
ក្រៅពីរៀបចំឱ្យកូនៗបង្កើតខ្លួនឯងកាន់តំណែងគ្រាក់ៗក្នុងគណបក្ស និងក្នុងជួររដ្ឋាភិបាល លោក ហ៊ុន សែន ក៏តែងតាំងសែស្រឡាយ សាច់ញាតិ និងបក្ខពួកខ្លួនឯងឱ្យកាន់តំណែងធំៗក្នុងជួររដ្ឋាភិបាលដែរ ដូចជាតែងតាំងលោក នេត សាវឿន ជាឧបនាយករដ្ឋមន្ត្រី តែងតាំងលោក សៅ សុខា ជាមេបញ្ជាការកងរាជអាវុធហត្ថលើផ្ទៃប្រទេស និងតែងតាំងលោក ហ៊ីង ប៊ុនហៀង មេបញ្ជាការដ្ឋានកងអង្គរក្ស ជាដើម៕