អតីតអនុប្រធានគណបក្សសង្គ្រោះជាតិ ប្រកាសជួបជុំអ្នកប្រជាធិបតេយ្យទូទាំងពិភពលោកនៅទីក្រុងឡងប៊ិច លើទឹកដីសហរដ្ឋអាមេរិក នៅចុងខែមីនា ឆ្នាំ២០២៤ ដើម្បីប្រកាសទទួលស្គាល់ចលនាខ្មែរដើម្បីប្រជាធិបតេយ្យជាផ្លូវការ ក្នុងគោលបំណងរួបរួមចលនាខ្មែរគ្រប់និន្នាការនៅលើពិភពលោក ឆ្ពោះទៅរកការសង្គ្រោះប្រជាធិបតេយ្យនៅកម្ពុជា ឱ្យចេញផុតពីការគ្រប់គ្រងតាមបែបគ្រួសារនិយម។
អតីតអនុប្រធានគណបក្សសង្គ្រោះជាតិ អ្នកស្រី មូរ សុខហួរ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៦ ខែកុម្ភៈ ឆ្នាំ២០២៤ នេះថា ពលរដ្ឋខ្មែរគ្រប់មជ្ឈដ្ឋាន និងគ្រប់និន្នាការទាំងអស់ ត្រូវតែងើបចូលរួមសហការគ្នាដើម្បីសង្គ្រោះកម្ពុជាពីរបបដឹកនាំតាមបែបគ្រួសារនិយមរបស់លោក ហ៊ុន សែន នៅពេលនេះ ព្រោះថាកម្ពុជាមិនមែនជាកម្មសិទ្ធិរបស់បុគ្គលណា គ្រួសារណា ឬក្រុមណាមួយនោះទេ គឺជារបស់ពលរដ្ឋខ្មែរគ្រប់រូបទាំងអស់។
អ្នកស្រីបន្ថែមថា ពលរដ្ឋខ្មែរទាំងអស់ក៏មិនត្រូវដេករង់ចាំការជួយពីបរទេស ដោយមិនខំប្រឹងពីកម្លាំងខ្លួនឯងនោះដែរ ត្បិតប្រទេសដែលជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ក៏មិនបានបង្ហាញជំហរណាមួយក្នុងការជួយដល់កម្ពុជា ក្នុងការជំរុញឱ្យមានការស្ដារប្រជាធិបតេយ្យ និងការគោរពសិទ្ធិមនុស្សឡើងវិញដែរក្នុងរយៈពេលចុងក្រោយនេះ។ ជាក់ស្តែង ដូចជាករណីនៃការកាត់ទោសទាំងអយុត្តិធម៌លើប្រធានគណបក្សសង្គ្រោះជាតិលោក កឹម សុខា ការចាប់ឃុំខ្លួនសកម្មជនសិទ្ធិមនុស្ស កញ្ញា សេង ចាន់ធារី និងចាប់ខ្លួនដាក់ពន្ធនាគារលើប្រធានសហជីពកញ្ញា ឈឹម ស៊ីថរ ជាដើម បើទោះបីជាមានការអំពាវនាវពីពលរដ្ឋខ្មែរយ៉ាងណាក៏ដោយ។
អ្នកស្រី មូរ សុខហួរ លើកឡើងថា ចលនាខ្មែរដើម្បីប្រជាធិបតេយ្យ មិនមែនជាចលនានយោបាយទេ ប៉ុន្តែជាចលនាអង្គការក្រៅរដ្ឋាភិបាលដែលមានគោលដៅស្វែងរកការសហការជាមួយបុគ្គល និងស្ថាប័នផ្សេងៗ ដើម្បីរួបរួមកម្លាំងគ្នាជួយប្រទេសកម្ពុជាឱ្យងាកទៅរកការអនុវត្តតាមគន្លងប្រជាធិបតេយ្យ និងការគោរពសិទ្ធិមនុស្ស បើកលំហសេរីភាពពលរដ្ឋឱ្យរស់នៅក្នុងភាពថ្លៃថ្នូរក្នុងនាមជាម្ចាស់ប្រទេស ដែលទទួលស្គាល់ដោយរដ្ឋធម្មនុញ្ញ ប៉ុន្តែចលនានេះមិនមែនដើម្បីផ្តួលរំលំរដ្ឋាភិបាលកម្ពុជានោះឡើយ។
អតីតអនុប្រធានគណបក្សសង្គ្រោះជាតិរូបនេះប្ដេជ្ញាថា ក្នុងនាមអ្នកស្រីជាប្រធានចលនាខ្មែរដើម្បីប្រជាធិបតេយ្យ នឹងស្វែងរកការសហការពីមជ្ឈដ្ឋាននានានៅលើពិភពលោក និងពីគ្រប់ជាតិសាសន៍ទាំងអស់ ដើម្បីតស៊ូមតិក្នុងការជំរុញឱ្យប្រទេសដែលជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ជួយដាក់សម្ពាធលើរដ្ឋាភិបាលកម្ពុជាឱ្យវិលត្រឡប់ទៅរកការស្ដារលទ្ធិប្រជាធិបតេយ្យ និងការគោរពសិទ្ធិមនុស្ស ដែលមានចែងក្នុងរដ្ឋធម្មនុញ្ញរបស់កម្ពុជាឡើងវិញឱ្យខាងតែបាន។
ការអះអាងនេះ ធ្វើឡើងបន្ទាប់ពីអ្នកស្រី មូរ សុខហួរ បានប្រកាសលាលែងតំណែងពីអនុប្រធានគណបក្សសង្គ្រោះជាតិ ដើម្បីមកដឹកនាំជាប្រធានចលនាខ្មែរដើម្បីប្រជាធិបតេយ្យនៅពេលនេះ។
ចលនាខ្មែរដើម្បីប្រជាធិបតេយ្យ ត្រូវបានផ្ដួចផ្ដើមបង្កើតឡើងដោយអ្នកស្នេហាប្រជាធិបតេយ្យ ក្រោយការពិភាក្សាគ្នាអស់រយៈពេលជាង ២ឆ្នាំ ហើយក៏ត្រូវចុះបញ្ជីជាអង្គការក្រៅរដ្ឋាភិបាលក្នុងរដ្ឋម៉ាសាជូសេត (Massachusetts) ក្នុងទឹកដីសហរដ្ឋអាមេរិក ដែលមានអ្នកស្រី មូរ សុខហួរ ជាប្រធានដឹកនាំដែរ បន្ទាប់ពីអ្នកស្រីបានដាក់ពាក្យលាលែងតំណែងពីអនុប្រធានគណបក្សសង្គ្រោះជាតិ តាំងពីចុងខែមករា ឆ្នាំ២០២៤ មក។
ចលនាខ្មែរដើម្បីប្រជាធិបតេយ្យ មានគោលដៅបង្រួមពលរដ្ឋខ្មែរគ្រប់និន្នាការទាំងក្នុងស្រុក និងក្រៅស្រុក ក្នុងបំណងបង្កើនចលនាអ្នកស្នេហាជាតិឆ្ពោះទៅបង្កើតគុណធម៌ប្រជាធិបតេយ្យមួយដែលអ្នកចូលរួមទាំងអស់ ធ្វើការដោយតម្កល់ផលប្រយោជន៍ជាតិជាធំ និងលុបបំបាត់នូវការរើសអើងនយោបាយ ឬជម្លោះក្នុងទីលាននយោបាយខ្មែរ ដែលនាំទៅរកការបែកបាក់ជាតិ។
ចលនាខ្មែរដើម្បីប្រជាធិបតេយ្យ គ្រោងប្រកាសពិធីដំណើរការជាផ្លូវការរបស់ខ្លួននៅទីក្រុងឡងប៊ិច នាថ្ងៃទី២៣ ខែមីនា ឆ្នាំ២០២៤ ខាងមុខនេះ ដើម្បីផ្សព្វផ្សាយដល់អ្នកស្នេហាប្រជាធិបតេយ្យនៅទូទាំងពិភពលោក ឱ្យពួកគេចូលរួមក្នុងចលនានេះ ក្នុងនោះ ចលនាខ្មែរដើម្បីប្រជាធិបតេយ្យ ក៏បានបង្ហាញពីការសហការគ្នាជាមួយចលនាអង្គការសង្គមស៊ីវិលនៅក្រៅស្រុកផ្សេងទៀតដែរ ដូចជាក្រុមតស៊ូមតិកម្ពុជា ដែលមានមូលដ្ឋាននៅប្រទេសអូស្ត្រាលី ជាដើម ដើម្បីសម្រេចគោលដៅរួមរបស់ពួកគេក្នុងការលើកកម្ពស់ប្រជាធិបតេយ្យនៅកម្ពុជានោះ។
ទាក់ទិននឹងការបង្កើតចលនាដើម្បីលើកស្ទួយប្រជាធិបតេយ្យនៅកម្ពុជា ក្រុមតស៊ូមតិកម្ពុជាដែលហៅកាត់ថា CAT (Cambodian Advocacy Team) ក៏ត្រូវបានបង្កើតឡើងកាលពីថ្ងៃទី១០ ខែធ្នូ ឆ្នាំ២០២៣ ដែរ ក្នុងគោលបំណងជំរុញឱ្យមានការស្ដារ និងពង្រឹងលទ្ធិប្រជាធិបតេយ្យក្នុងប្រទេសកម្ពុជាឡើងវិញ។
ទាក់ទិននឹងបញ្ហានេះ កាលពីថ្ងៃទី១៦ ខែកុម្ភៈ ឆ្នាំ២០២៤ អង្គការ Freedom House បានចាត់ទុកកម្ពុជាជាប្រទេសផ្ដាច់ការមួយក្នុងចំណោមប្រទេសផ្ដាច់ការធំៗ ៥ ផ្សេងទៀត រួមមានភូមា ចិន និងរុស្សី ជាដើម ក្រោយគេរកឃើញថារដ្ឋាភិបាលកម្ពុជា បានប្រើវិធានការគាបសង្កត់សិទ្ធិសេរីភាពរបស់ពលរដ្ឋធ្ងន់ធ្ងរ និងការគាបសង្កត់ឆ្លងដែនក្នុងរយៈពេលចុងក្រោយនេះ៕