មេធាវីការពារសិទ្ធិឱ្យប្រធានគណបក្សភ្លើងទៀន ដាក់ពាក្យជូនសាលាដំបូងរាជធានីភ្នំពេញ សុំពន្យារពេលឱ្យលោក ទាវ វណ្ណុល ចូលឆ្លើយបំភ្លឺក្នុងតុលាការនៅថ្ងៃពុធនេះ ក្រោមហេតុផលលោកកំពុងមានភារកិច្ចចាំបាច់ជាប់ខ្លួននៅក្រៅប្រទេស។
លោក ជូង ជូងី ជាមេធាវីការពារសិទ្ធិឱ្យលោក ទាវ វណ្ណុល ប្រធានគណបក្សភ្លើងទៀន បានចេញលិខិតសុំពន្យារពេលមួយទៅកាន់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ កាលពីថ្ងៃទី៩ ខែមេសា ឆ្នាំ២០២៤ នេះថា នៅថ្ងៃទី១០ ខែមេសា ឆ្នាំ២០២៤ លោក ទាវ វណ្ណុល ប្រធានគណបក្សភ្លើងទៀន មិនអាចចូលបង្ហាញខ្លួនទៅអយ្យការអមសាលាដំបូងរាជធានីភ្នំពេញ ដើម្បីផ្តល់ការឆ្លើយបំភ្លឺបានទេ ដោយសារជាប់ភារកិច្ចនៅក្រៅប្រទេស មិនអាចវិលត្រឡប់ទៅប្រទេសកម្ពុជាវិញទាន់ពេលវេលាតាមដីកាតុលាការឡើយ។
លោក ជូង ជូងី បញ្ជាក់ថា ប្រធានគណបក្សភ្លើងទៀន លោក ទាវ វណ្ណុល នឹងចូលឆ្លើយបំភ្លឺទៅកាលបរិច្ឆេទក្រោយ ប៉ុន្តែលោក ជូង ជូងី មិនបានបញ្ជាក់ថា កូនក្តីរបស់លោកនឹងចូលខ្លួនឆ្លើយបំភ្លឺនៅពេលវេលាជាក់លាក់ណាមួយនោះទេ ខណៈអយ្យការអមសាលាដំបូងរាជធានីភ្នំពេញ ក៏បានទទួលលិខិតសុំពន្យារពេលរបស់លោក ជូង ជូងី ហើយដែរ កាលពីថ្ងៃអង្គារនេះ។
កាលពីថ្ងៃទី៩ ខែមេសា គណបក្សភ្លើងទៀន បានចេញសេចក្តីប្រកាសព័ត៌មានថា ប្រធានគណបក្សភ្លើងទៀន លោក ទាវ វណ្ណុល នឹងចូលឆ្លើយបំភ្លឺទៅតាមកាលបរិច្ឆេទក្រោយ ដោយសារតែលោក ទាវ វណ្ណុល កំពុងមានភារកិច្ចជាប់ខ្លួនចាំបាច់នៅក្រៅប្រទេស មិនអាចវិលត្រឡប់ទៅប្រទេសកម្ពុជាវិញទាន់ពេលចំពោះការចូលខ្លួនទៅឆ្លើយបំភ្លឺនៅតុលាការសម្រាប់ថ្ងៃពុធនេះ។
ប្រធានគណបក្សភ្លើងទៀន លោក ទាវ វណ្ណុល ត្រូវបានមេធាវីតំណាងរាជរដ្ឋាភិបាលកម្ពុជា ប្តឹងពីបទធ្វើឲ្យប៉ះពាល់ដល់កិត្តិយសប្រមុខរាជរដ្ឋាភិបាល និងរាជរដ្ឋាភិបាលកម្ពុជា កាលពីថ្ងៃទី១៤ ខែកុម្ភៈ ឆ្នាំ២០២៤ បន្ទាប់ពីលោកបានផ្តល់បទសម្ភាសន៍ជាមួយសារព័ត៌មានជប៉ុន Nikkei Asia អំឡុងពេលដែលលោកទៅបំពេញទស្សនកិច្ចនៅប្រទេសជប៉ុន កាលពីដើមខែកុម្ភៈ កន្លងទៅនោះ។
ក្រោយការដាក់ពាក្យបណ្ដឹងពីមេធាវីតំណាងរាជរដ្ឋាភិបាលកម្ពុជា សាលាដំបូងរាជធានីភ្នំពេញបានចេញដីកាកោះមួយច្បាប់កាលពីថ្ងៃទី២១ ខែមីនា ឆ្នាំ២០២៤ ឱ្យប្រធានគណបក្សភ្លើងទៀន លោក ទាវ វណ្ណុល ចូលខ្លួនទៅឆ្លើយបំភ្លឺនៅថ្ងៃទី១០ ខែមេសា ឆ្នាំ២០២៤ នេះ ខណៈដីកាកោះនោះសរសេរប៊ិកក្រហមដោយដៃបញ្ជាក់ថាលើកទី២។
កាលពីថ្ងៃទី៥ ខែកុម្ភៈ ឆ្នាំ២០២៤ សារព័ត៌មានជប៉ុន ឈ្មោះ Nikkei Asia បានចុះផ្សាយសម្ដីប្រធានគណបក្សភ្លើងទៀន លោក ទាវ វណ្ណុល ថា លទ្ធិប្រជាធិបតេយ្យនៅកម្ពុជាកំពុងដើរថយក្រោយចាប់តាំងពីលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីបន្តពីឪពុករបស់គាត់ គឺលោក ហ៊ុន សែន កាលពីថ្ងៃទី២២ ខែសីហា ឆ្នាំ២០២៣ មក ដែលជាហេតុធ្វើឱ្យរដ្ឋាភិបាលមួយនេះកាន់តែអាក្រក់ទៅៗ។
លោក ទាវ វណ្ណុល លើកឡើងថា លោកមានការព្រួយបារម្ភអំពីសុវត្ថិភាពរបស់លោក និងសមាជិកគណបក្សភ្លើងទៀនផ្សេងទៀតយ៉ាងខ្លាំង បន្ទាប់ពីរូបលោក និងមន្ត្រីជាន់ខ្ពស់គណបក្សនេះផ្សេងទៀតត្រូវបានត្រួតពិនិត្យដោយកាមេរ៉ា ២៤ម៉ោង ដែលគេប្រើដើម្បីតាមដានសកម្មភាពរបស់លោក និងមន្ត្រីបក្សភ្លើងទៀនទាំងនោះជាប្រចាំ។
ប្រធានគណបក្សភ្លើងទៀនរូបនេះបញ្ជាក់ថា លោកមិនដឹងថាតើប្រទេសកម្ពុជានឹងត្រូវចំណាយពេលប៉ុន្មានឆ្នាំទៅមុខទៀត ដើម្បីសម្រេចបាននូវលទ្ធិប្រជាធិបតេយ្យពិតប្រាកដនោះទេ ស្របពេលដែលអ្នកមានអំណាចធ្វើអ្វីៗតាមអំពើចិត្ត ដែលជាហេតុធ្វើឱ្យប្រជាធិបតេយ្យនៅកម្ពុជាកាន់តែខ្សោយទៅៗក្រោមការដឹកនាំរបស់លោក ហ៊ុន ម៉ាណែត បន្តពីលោក ហ៊ុន សែន នៅពេលនេះ។
យ៉ាងណាក៏ដោយ អង្គភាពអ្នកនាំពាក្យរដ្ឋាភិបាលកម្ពុជា ចេញសេចក្តីថ្លែងការណ៍កាលពីថ្ងៃទី៧ ខែកុម្ភៈ ឆ្នាំ២០២៤ កន្លងទៅថា ការចោទប្រកាន់របស់លោក ទាវ វណ្ណុល ទៅលើរដ្ឋាភិបាលកម្ពុជាថាបានដាក់កាមេរ៉ានៅមុខផ្ទះ ដើម្បីឃ្លាំមើលសកម្មភាពរបស់គាត់ ២៤ម៉ោង គឺជារឿងមិនពិតទាំងអស់។
ប្រភពដដែលបញ្ជាក់ថា កាមេរ៉ានានាដែលបានដាក់នៅតាមទីសាធារណៈទូទាំងប្រទេស ក៏ដូចជានៅក្នុងភូមិសាស្ត្ររាជធានីភ្នំពេញ គឺក្រោមមូលហេតុរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ និងចរាចរណ៍ជូនប្រជាពលរដ្ឋទូទៅតែប៉ុណ្ណោះ ហើយក៏គ្មានគោលការណ៍ដាក់កាមេរ៉ាដោយឡែកដើម្បីឃ្លាំមើលសកម្មភាពរបស់បុគ្គលណាមួយនោះដែរ។
អង្គភាពអ្នកនាំពាក្យរដ្ឋាភិបាលកម្ពុជា បញ្ជាក់ថា ការលើកឡើងរបស់លោក ទាវ វណ្ណុល គឺមានចេតនាអាក្រក់ដើម្បីបង្ខូចកេរ្តិ៍ឈ្មោះរបស់រាជរដ្ឋាភិបាលប៉ុណ្ណោះ ព្រោះថារាជរដ្ឋាភិបាលថ្មីដែលកំពុងដឹកនាំដោយលោក ហ៊ុន ម៉ាណែត កំពុងធ្វើកំណែទម្រង់ច្បាប់ និងប្រព័ន្ធយុត្តិធម៌ ក៏ដូចជាការដាក់ចេញគោលនយោបាយ និងយុទ្ធសាស្ត្រនានា ដើម្បីពង្រឹងនីតិរដ្ឋ និងប្រជាធិបតេយ្យនៅកម្ពុជាយ៉ាងម៉ឺងម៉ាត់នៅពេលនេះ។
ទាក់ទិននឹងបញ្ហានេះ គេសង្កេតឃើញថា មន្ត្រីជាន់ខ្ពស់មួយចំនួនពីគណបក្សភ្លើងទៀន បានរងនូវការប្តឹងផ្តល់នៅតុលាការតាមបណ្តឹងពីមេធាវីរាជរដ្ឋាភិបាល ដែលភាគច្រើនពាក់ព័ន្ធនឹងការចោទប្រកាន់ពីការបង្ខូចកេរ្តិ៍ឈ្មោះបក្សកាន់អំណាច ដូចជាលោក ថាច់ សេដ្ឋា លោក សុន ឆ័យ និងលោក គង់ គាំ ជាដើម ក្នុងនោះ អគ្គលេខាធិការគណបក្សភ្លើងទៀន លោក លី សុធារ៉ាយុទ្ធ បានឱ្យដឹងថា ចាប់ពីដើមឆ្នាំ២០២៣ រហូតដល់ខែមេសា ឆ្នាំ២០២៤ នេះ មន្ត្រីគណបក្សភ្លើងទៀន ចំនួន ១៧នាក់ហើយដែលត្រូវបានចាប់ខ្លួន និងឃុំខ្លួននៅក្នុងពន្ធនាគារ៕