ព្រះមហាក្សត្រកម្ពុជា ព្រះបាទនរោត្តម សីហមុនី និងមេដឹកនាំកម្ពុជា បានប្រកាសបញ្ជាក់ជំហរថា កម្ពុជាបន្តគាំទ្រនូវគោលនយោបាយចិនតែមួយ ហើយកម្ពុជាប្រឆាំងគ្រប់ទម្រង់នៃឯករាជភាពរបស់តៃវ៉ាន់ និងធានាមិនបង្កើតទំនាក់ទំនងផ្លូវការណាមួយជាមួយតៃវ៉ាន់។
បើតាមទីភ្នាក់ងារសារព័ត៌មានចិន ស៊ីនហ៊ួរ បានឲ្យដឹងថា មហាក្សត្រកម្ពុជាព្រះបាទ នរោត្តម សីហមុនី និងប្រមុខការទូតកម្ពុជា មានបន្ទូល និងបញ្ជាក់ជំហរថា កម្ពុជាបន្តគាំទ្រនូវគោលនយោបាយចិនតែមួយ បន្ទាប់ពីព្រះអង្គបានទទួលជួបសវនាការមួយជាមួយលោក វ៉ាង យី រដ្ឋមន្ត្រីការបរទេសចិន នាព្រឹកថ្ងៃចន្ទ ទី២២ ខែមេសា។
ប្រភពដដែលបានលើកឡើងថា ព្រះមហាក្សត្រកម្ពុជា ព្រះបាទ នរោត្តម សីហមុនី បានមានព្រះបន្ទូលថា កម្ពុជាប្រកាន់យ៉ាងខ្ជាប់ខ្ជួននូវគោលនយោបាយចិនតែមួយ និងគាំទ្រយ៉ាងសកម្មនូវចក្ខុវិស័យក្នុងការកសាងសហគមន៍មួយដែលមានអនាគតរួមគ្នា និងគំនិតផ្ដួចផ្ដើមជាសកលធំៗចំនួន៣ ដែលស្នើឡើងដោយប្រទេសចិន។
ព្រះអង្គមានជំនឿយ៉ាងមុតមាំថា ចំណងមិត្តភាពកម្ពុជា និងចិន នឹងត្រូវបានបន្សល់ទុកពីមួយជំនាន់ទៅមួយជំនាន់ទៀត និងកាន់តែរឹងមាំតរៀងទៅ។
ចំណែកឯសេចក្តីប្រកាសព័ត៌មានរួមស្ដីពីដំណើរទស្សនកិច្ចរបស់លោក វ៉ាង យី រយៈពេល ៣ថ្ងៃនៅកម្ពុជា ដែលត្រូវបានបញ្ចប់នៅថ្ងៃអង្គារ ទី២៣ ខែមេសា បានលើកឡើងថា កម្ពុជាប្រឆាំងរាល់ការប៉ុនប៉ងប្រើប្រាស់បញ្ហានានារបស់តៃវ៉ាន់ ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសចិន ប្រឆាំងគ្រប់ទម្រង់នៃឯករាជភាពរបស់តៃវ៉ាន់ គាំទ្រយ៉ាងមុតមាំការប្រឹងប្រែងបង្រួបបង្រួមជាតិរបស់ចិន និងកម្ពុជាមិនបង្កើតទំនាក់ទំនងផ្លូវការណាមួយជាមួយតៃវ៉ាន់ ឡើយ។
នៅក្នុងសេចក្តីប្រកាសរួម បានលើកឡើងថា កម្ពុជាបង្ហាញនូវការប្ដេជ្ញាចិត្តគាំទ្រគោលនយោបាយចិនតែមួយ និងទទួលស្គាល់រដ្ឋាភិបាលចិន ជារដ្ឋាភិបាលស្របច្បាប់តែមួយគត់តំណាងឲ្យប្រទេសចិនទាំងមូល។ រីឯតៃវ៉ាន់ ត្រូវបានកម្ពុជាចាត់ទុកថាជាផ្នែកមួយដែលមិនអាចកាត់ផ្ដាច់បានពីទឹកដីរបស់ចិន។
ជាការឆ្លើយតប លោក វ៉ាង យី បានលើកឡើងថា ក្រោមការដឹកនាំរបស់ប្រមុខរដ្ឋាភិបាលនៃប្រទេសទាំងពីរ ការកសាងអនាគតរួមគ្នាមួយរវាងសហគមន៍ចិន និងកម្ពុជា បានឈានចូលដំណាក់កាលថ្មីមួយដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់។
លោក វ៉ា យី បានលើកឡើងថា បន្ថែមពីឆន្ទៈរបស់ចិន ក្នុងការធ្វើការជាមួយកម្ពុជា ដើម្បីអនុវត្តនូវការឯកភាពគ្នាជាយុទ្ធសាស្ត្រ ដែលសម្រេចបានដោយមេដឹកនាំនៃប្រទេសទាំងពីរ។ លោកថា ចិន និងកម្ពុជា គួរតែពង្រឹងការដឹកនាំជាយុទ្ធសាស្ត្រកម្រិតខ្ពស់ និងដឹកនាំការកសាងសហគមន៍ចិន-កម្ពុជា ជាមួយនឹងអនាគតរួមគ្នាក្នុងទិសដៅដ៏ត្រឹមត្រូវ។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណារ៉ា បានប្រាប់សារព័ត៌មានក្នុងស្រុកថា បញ្ហាភូមិសាស្ត្រនយោបាយមានការប្រែប្រួលរយៈពេលចុងក្រោយនេះ ដោយសារកំណើននៃការគាំទ្រកោះតៃវ៉ាន់ មានការកើនឡើង ហើយបណ្តាប្រទេសអាស៊ានហាក់មានជំហរនៅកណ្តាល និងមានការពង្រីកពាណិជ្ជកម្មមួយចំនួនជាមួយកោះតៃវ៉ាន់។
ប្រភពដដែលបានលើកឡើងថា គោលនយោបាយការបរទេសរបស់ចិន គឺចង់ពង្រីកឲ្យមានការគាំទ្រជំហរចិនតែមួយ ប្រកបដោយភាពរឹងមាំដូចពីអតីតកាល ខណៈបស្ចិមលោកមានការចាប់អារម្មណ៍ច្រើននឹងតំបន់ឥណ្ឌូ-ប៉ាស៊ីហ្វិក និងសមុទ្រចិនខាងត្បូង។
នៅក្នុងដំណើរទស្សនកិច្ចរយៈពេល ៣ថ្ងៃនៅកម្ពុជា លោក វ៉ាង យី បានចូលគាល់ព្រះមហាក្សត្រខ្មែរ ជំនួបជាមួយប្រធានព្រឹទ្ធសភាលោក ហ៊ុន សែន ជួបជាមួយនាយករដ្ឋមន្ត្រី លោក ហ៊ុន ម៉ាណែត ជួបជាមួយសមភាគីលោក សុខ ចិន្តាសោភា និងមានកិច្ចប្រជុំគណៈកម្មការសម្របសម្រួលអន្តររដ្ឋាភិបាលកម្ពុជា-ចិន លើកទី៧ ជាមួយលោកឧបនាយករដ្ឋមន្ត្រី ស៊ុន ចាន់ថុល៕