38 C
Phnom Penh

អ្នក​ឃ្លាំមើល​ជំរុញ​ឱ្យ​ក្រុម​ប្រឆាំង​រក្សា​គោលការណ៍​ដើម​របស់​គណបក្ស​សង្គ្រោះ​ជាតិ

ដោយ ឌឹ ខេមបូឌា ដេលី

បទវិភាគ

អ្នក​ឃ្លាំមើល​ជំរុញ​ឱ្យ​ក្រុម​ប្រឆាំង​គ្រប់​និន្នាការ និង​គ្រប់​មជ្ឈដ្ឋាន បន្ត​ចលនា​ចរន្ត​ប្រឆាំង​នឹង​រដ្ឋាភិបាល​របស់​លោក ហ៊ុន សែន ឱ្យ​រឹងមាំ​បន្ត​ទៀត ប៉ុន្តែ​ត្រូវ​រក្សា​គោលការណ៍​ដើម​របស់​គណបក្ស​សង្គ្រោះ​ជាតិ ខណៈ​ក្រុម​ប្រឆាំង​កំពុង​អនុវត្ត​មាន​សកម្មភាព​នយោបាយ​ស្រប​នឹង​ការ​ចង់​បាន​របស់​លោក ហ៊ុន សែន។

ប្រធាន​វិទ្យុ​ផ្សាយ​សំឡេង​ប្រជាធិបតេយ្យ (VOD) លោក ប៉ា ងួនទៀង លើក​ឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​១៣ ខែ​ឧសភា នេះ​ថា មន្ត្រី​បក្ស​ប្រឆាំង​ទាំងអស់ ជាពិសេស​មេដឹកនាំ​ប្រឆាំង​ដែល​មាន​សេរីភាព​នៅ​ក្រៅ​ប្រទេស ត្រូវ​តែ​រក្សា​គោលជំហរ និង​គោលការណ៍​ដើម​ដែល​ជា​ចរន្ត​ប្រឆាំង​របស់​គណបក្ស​សង្គ្រោះ​ជាតិ ដើម្បី​ជំរុញ​ឱ្យ​មាន​ការ​ចូលរួម​ពី​ចលនា​ប្រឆាំង​នានា​ឱ្យ​បាន​កាន់តែ​ច្រើន ក្នុង​គោលដៅ​ឆ្ពោះ​ទៅ​រក​ការ​ផ្លាស់ប្ដូរ​ជា​វិជ្ជមាន​តាមរយៈ​នៃ​ការ​បោះឆ្នោត​នៅ​ថ្ងៃ​ខាងមុខ។

លោក ប៉ា ងួនទៀង លើកឡើង​ថា សព្វថ្ងៃ​នេះ ក្រុម​ប្រឆាំង​កំពុង​អនុវត្ត​សកម្មភាព​នយោបាយ​ស្រប​នឹង​ការ​ចង់​បាន​របស់​លោក ហ៊ុន សែន ទាំងស្រុង គឺ​ការ​បោះបង់​គោលការណ៍​ដើម​របស់​គណបក្ស​សង្គ្រោះ​ជាតិ។ លោក​បន្ត​ថា ការ​ធ្វើ​បែប​នេះ នឹង​ធ្វើ​ឱ្យ​សកម្មភាព​ចលនា​ប្រឆាំង​កាន់តែ​ធ្លាក់​អន់ថយ​ទៅៗ​ប៉ុណ្ណោះ។

ប្រធាន​វិទ្យុ​ផ្សាយ​សំឡេង​ប្រជាធិបតេយ្យ​រូប​នេះ​បញ្ជាក់​ថា ទោះ​ក្នុង​កាលៈទេសៈ​ណា​ក៏ដោយ ក្រុម​ប្រឆាំង​មិន​ត្រូវ​ផ្ដាច់​ទំនាក់ទំនង​ក្នុង​ចំណោម​អ្នក​ប្រឆាំង​ដូច​គ្នា​ឡើយ ដើម្បី​រក្សា​កម្លាំង​ប្រឆាំង​ដែល​មាន​ស្រាប់ ដែល​នឹង​បង្ក​លក្ខណៈ​ងាយស្រួល​ក្នុង​ការ​ស្វែងរក​ការ​រួបរួម​នៅ​ពេល​ក្រោយ។

លោក ប៉ា ងួនទៀង បញ្ជាក់​ថា ការ​រួបរួម​មិនមែន​ទាល់តែ​ទៅ​ចូលរួម​រស់នៅ​ក្រោម​ដំបូល​នៃ​ការ​ដឹកនាំ​របស់​ក្រុម​ណា​មួយ​នោះ​ទេ ប៉ុន្តែ​ពួកគេ​ត្រូវ​រួបរួម​ក្នុង​គោលដៅ​រួម និង​ចែក​គ្នា​ធ្វើ​សកម្មភាព​ប្រឆាំង​ទៅ​តាម​មុខសញ្ញា​រៀងៗ​ខ្លួន នោះ​ទើប​ធានា​នូវ​ការ​បំបែកបំបាក់​របស់​បក្ស​កាន់​អំណាច​ដែល​លោក ហ៊ុន សែន ធ្លាប់​ធ្វើ​លើ​ក្រុម​ប្រឆាំង​កន្លង​មក។

កាលពី​ជាង ៦​ឆ្នាំ​មុន នៅ​ថ្ងៃទី​១៦ ខែ​វិច្ឆិកា ឆ្នាំ​២០១៧ តុលាការ​កំពូល​បាន​ប្រកាស​រំលាយ​គណបក្ស​សង្គ្រោះ​ជាតិ ក្រោយ​ប្រធាន​បក្ស​នេះ គឺ​លោក កឹម សុខា ត្រូវ​រង​នូវ​ការ​ចោទប្រកាន់​ពី​បទ​ក្បត់​ជាតិ។ ចំណែក​មន្ត្រី​ជាន់ខ្ពស់​បក្ស​នេះ​ចំនួន ១១៨​នាក់ ក៏​ត្រូវ​បាន​ហាមឃាត់​មិន​ឱ្យ​ធ្វើ​នយោបាយ​រយៈពេល ៥​ឆ្នាំ​ដែរ។

បន្ទាប់ពី​លោក កឹម សុខា ត្រូវ​បាន​សមត្ថកិច្ច​ចាប់​ឃុំ​ខ្លួន​ទាំង​យប់​កាលពី​ថ្ងៃទី​៣ ខែ​កញ្ញា ឆ្នាំ​២០១៧ អតីត​មេ​បក្ស​ប្រឆាំង​លោក សម រង្ស៊ី បាន​ដឹកនាំ​អ្នកគាំទ្រ​របស់​ខ្លួន​ចេញ​ក្រៅ​ប្រទេស ក្រោម​ហេតុផល​ថា ដើម្បី​រក​ការ​គាំទ្រ​ពី​អន្តរជាតិ​ឲ្យ​ជួយ​ដាក់​សម្ពាធ​លើ​រដ្ឋាភិបាល​ក្រុង​ភ្នំពេញ និង​ទាមទារ​ឲ្យ​គណបក្ស​សង្គ្រោះ​ជាតិ​រស់​ឡើងវិញ ប៉ុន្តែ​មក​ទល់​នឹង​ពេលនេះ យុទ្ធនាការ​នេះ​បាន​ស្ងប់ស្ងាត់​ស្ទើរតែ​ទាំងស្រុង​អស់​ទៅ​ហើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស