ចលនាមាតាធម្មជាតិ អះអាងថា រោងចក្រកែច្នៃផ្លែស្វាយរបស់ចិន ឈ្មោះ ខេមបូឌាន ហ្គូម ហ្វាម ឯ.ក (Cambodian Gome Farm Food Co., Ltd) បានបង្ហូរសារធាតុគីមីចូលក្នុងស្ទឹងក្រាំងអាត់ យ៉ាងអនាធិបតេយ្យ ដែលបង្កឲ្យគ្រោះថ្នាក់ដល់ប្រជាពលរដ្ឋក្នុងខេត្តព្រះសីហនុ ប្រឈមនឹងជំងឺមហារីក និងជំងឺផ្សេងៗធ្ងន់ធ្ងរ រួមទាំងបំផ្លាញបរិស្ថានផងដែរ។
ចលនាមាតាធម្មជាតិ (Mother Nature Cambodia) ចេញផ្សាយវីដេអូមួយប្រវែងជាង ២នាទីនៅថ្ងៃទី២១ ឧសភា នេះថា រោងចក្រកែច្នៃផ្លែស្វាយនៃក្រុមហ៊ុនចិនមួយកន្លែង ស្ថិតក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ បានបង្ហូរសារធាតុគីមីពុលចូលស្ទឹងក្រាំងអាត់ អស់រយៈពេល ៣ខែមកហើយ ដែលបង្កជាជំងឺផ្សេងៗចំពោះប្រជាជន និងសត្វដែលរស់នៅតំបន់នោះ។
ប្រភពដដែលរៀបរាប់ថា សារធាតុគីមីទាំងនោះបានបង្កជាជំងឺដល់ប្រជាពលរដ្ឋ និងសត្វដែលប្រើប្រាស់ទឹកស្ទឹងនេះជាហូរហែ ដូចជា បណ្តាលឱ្យត្រីងាប់ជារៀងរាល់ថ្ងៃដែលមានចំនួនរាប់តោន ធ្វើឱ្យផលដំណាំក្រៀមស្លាប់ បង្កជាជំងឺសើស្បែកដល់ប្រជាជន និងបង្កទៅជាជំងឺមហារីកថែមទៀត។
ចលនាមាតាធម្មជាតិ អះអាងថា ខ្លួនបានយកទឹកស្ទឹងនេះទៅពិនិត្យនៅវិទ្យាស្ថានប៉ាស្ទ័រ រួចហើយ និងបានរកឃើញថា កម្រិត PH ទឹករបស់ស្ទឹងនេះមានត្រឹមតែ ៤,៨ប៉ុណ្ណោះ។ ជាងនេះទៀត ក៏បានរកឃើញសារធាតុគីមីពុលអាសេនិក (Arsernic) កម្រិត ០,១០មិល្លីក្រាមក្នុងចំណុះទឹក ១លីត្រផងដែរ ដែលកម្រិតសារធាតុគីមីពុលនេះគឺមានចំនួនលើសរហូតដល់ទៅ ១០ដងនៃកម្រិតគ្រោះថ្នាក់។
ប្រភពដដែលបញ្ជាក់ថា សារធាតុគីមីពុលអាសេនិក (Arsernic) គឺជាសារធាតុដែលបង្កគ្រោះថ្នាក់ជាច្រើន ដូចជា បង្កទៅជាជំងឺមហារីកតម្រងនោម មហារីកថ្លើម មហារីកក្រលៀន មហារីកសួត និងជំងឺធ្វើឱ្យខូចគ្រឿងក្នុងផ្សេងៗទៀត ហើយទឹកដែលប្រជាជនបានប្រើប្រាស់កន្លងមក កំពុងបង្កទៅជាក្លិនស្អុយដែលមិនអាចឱ្យពួកគេប្រើប្រាស់បានដូចមុនទៀតឡើយ។
ការអះអាងនេះ ធ្វើឡើងដើម្បីជំរុញឱ្យអាជ្ញាធរកម្ពុជា និងស្ថាប័នពាក់ព័ន្ធ ចាត់វិធានការស្រាវជ្រាវពីការបង្ហូរសារធាតុគីមីពុលចូលក្នុងស្ទឹងក្រាំងអាត់ ដោយក្រុមហ៊ុនចិនសព្វថ្ងៃនេះ។
មាត្រា២២ នៃច្បាប់ស្ដីពីកិច្ចការពារបរិស្ថាន និងការគ្រប់គ្រងធនធានធម្មជាតិ ចែងថា បើការប្រព្រឹត្តល្មើសបង្កឱ្យមានគ្រោះថ្នាក់ដល់រាងកាយ ឬជីវិតមនុស្ស ដល់ទ្រព្យសម្បត្តិឯកជន ដល់ទ្រព្យសម្បត្តិសាធារណៈ ដល់បរិស្ថាន ដល់ធនធានធម្មជាតិ ត្រូវផ្ដន្ទាទោសពិន័យជាប្រាក់ពី ១០លានរៀលដល់ ៥០លានរៀល ឬផ្ដន្ទាទោសដាក់ពន្ធនាគារពី ១ឆ្នាំដល់ ៥ឆ្នាំ ឬត្រូវផ្ដន្ទាទោសទាំងពីរតែម្តង។ ចំណែកបុគ្គលដែលប្រព្រឹត្តល្មើស ត្រូវជួសជុលសងការខូចខាត និងសងជំងឺចិត្តថែមទៀត។
កាលពីថ្ងៃទី១៧ ខែមីនា ឆ្នាំ២០២៤ អាជ្ញាធរមានសមត្ថកិច្ចជាង ១០នាក់ (១២នាក់) រួមមានប្រធាននាយកដ្ឋានក្រសួងបរិស្ថាន លោក សារុន សំបូរ អនុប្រធាននាយកដ្ឋានក្រសួងបរិស្ថាន លោក ចាប សុធី អនុប្រធានការិយាល័យកសិកម្ម បរិស្ថានស្រុក លោក ខៀវ ពៅ និងមន្ត្រីពាក់ព័ន្ធផ្សេងទៀតផងដែរ បានចុះទៅត្រួតពិនិត្យការបង្ហូរសារធាតុគីមីពុលរបស់ក្រុមហ៊ុននេះ ប៉ុន្តែគេមិនទាន់ឃើញមានចំណាត់ការនៅឡើយទេ ខណៈក្រុមហ៊ុននៅតែបង្ហូរសារធាតុគីមីពុលចូលក្នុងស្ទឹងដូចមុនដដែលសព្វថ្ងៃនេះ។
ក្រុមអ្នកឃ្លាំមើលសង្គមដាក់ការសង្ស័យលើមន្ត្រីពាក់ព័ន្ធដែលចុះទៅត្រួតពិនិត្យការបង្ហូរសារធាតុគីមីពុលរបស់ក្រុមហ៊ុននេះថា ពួកគេទំនងជាប់ពាក់ព័ន្ធនឹងអំពើពុករលួយក្នុងរឿងនេះ ព្រោះថារយៈពេល ៣ខែមកហើយបន្ទាប់ពីការត្រួតពិនិត្យ ក្រុមហ៊ុននៅតែអាចបង្ហូរសារធាតុគីមីពុលចូលក្នុងស្ទឹងដូចមុនដដែល ខណៈអាជ្ញាធរមិនបានអើពើឡើយ។
ក្រុមហ៊ុន CAMBODIAN GOME FARM FOOD CO., LTD ជាក្រុមហ៊ុនធំមួយដែលកែច្នៃផ្លែស្វាយនៅប្រទេសកម្ពុជា ហើយបច្ចុប្បន្ន ក្រុមហ៊ុននេះមានសាខាចំនួន៤ ក្នុងប្រទេសកម្ពុជា ដូចជានៅខេត្តកំពង់ស្ពឺ មានរោងចក្រ២ នៅខេត្តព្រះសីហនុ មានរោងចក្រ១ និងខេត្តបាត់ដំបង មានរោងចក្រ១ ផងដែរ។
ទាក់ទិននឹងបញ្ហានេះ កាលពីដើមខែឧសភា ឆ្នាំ២០២៤ អាជ្ញាធរខេត្តបាត់ដំបង បានចេញលិខិតបន្ទាន់មួយព្រមានដល់ជនជាតិចិន ដែលជាថៅកែរោងចក្រកែច្នៃស្វាយ Cambodian Gome Farm Food ខេត្តបាត់ដំបង ដែលបានបង្ហូរសារធាតុគីមីពុលចូលក្នុងអូរត្រែង ស្ថិតក្នុងភូមិស្វាយស ឃុំត្រែង ស្រុករតនៈមណ្ឌល ខេត្តបាត់ដំបង ដែលបណ្តាលឱ្យត្រីងាប់ និងបង្កជាក្លិនស្អុយក្នុងអូរនោះ។
ក្រុមហ៊ុន Cambodian Gome Farm Food ចុះបញ្ជីនៅឆ្នាំ២០២១ ដាក់អាសយដ្ឋាននៅភូមិត្បែរ ឃុំវស្សា ស្រុកសំរោងទង ខេត្តកំពង់ស្ពឺ ដោយមានឈ្មោះ ហ្ស៊េ ហ្ស៊ីវ៉ី (Xie Zhiwei) ជាប្រធានក្រុមហ៊ុន និងជានាយកគ្រប់គ្រង។
សារធាតុគីមីដែលបង្ហូរចូលក្នុងអូរត្រែង ខេត្តបាត់ដំបង នោះ គឺមានលក្ខណៈដូចគ្នានឹងសារធាតុគីមីដែលក្រុមហ៊ុន Cambodian Gome Farm Food ខេត្តព្រះសីហនុ បានបង្ហូរចូលក្នុងស្ទឹងក្រាំងអាត់ នៅពេលនេះដែរ ដែលបានបង្កជាផលប៉ះពាល់ឱ្យមានត្រីងាប់ ក្លិនស្អុយ និងធ្វើឱ្យងាប់ដំណាំដូចគ្នា។
ទាក់ទិននឹងបញ្ហានេះ សារព័ត៌មាន The Cambodia Daily មិនទាន់អាចទាក់ទងអភិបាលខេត្តព្រះសីហនុ លោក គួច ចំរើន សុំការបំភ្លឺជុំវិញរឿងនេះបាននៅឡើយទេរហូតដល់ពេលនេះ៕