29 C
Phnom Penh

ប្រមុខ​ការពារ​ជាតិ​អង់គ្លេស​ចោទ​ចិន​ជា​ចំហ​ចំពោះ​ការ​បញ្ជូន​អាវុធ​ទៅ​ឱ្យ​រុស្ស៊ី​ធ្វើ​សង្គ្រាម​នៅ​អ៊ុយក្រែន

ដោយ ឌឹ ខេមបូឌា ដេលី

បទវិភាគ

នេះ​ជា​លើកដំបូង​ហើយ​ដែល​រដ្ឋមន្ត្រី​ការពារ​ជាតិ​មួយ​រូប​នៃ​ប្រទេស​អឺរ៉ុប ចោទ​ប្រទេស​ចិន ជា​សាធារណៈ ដែល​ពាក់ព័ន្ធ​កិច្ចសហការ​ដឹក​សម្ភារៈ​សឹក​ទៅ​ឱ្យ​មហាអំណាច​យោធា​រុស្ស៊ី ដែល​កំពុង​ធ្វើ​សង្គ្រាម​ឈ្លានពាន​ប្រទេស​អ៊ុយក្រែន។

លោក Grant Shapps ជា​រដ្ឋមន្ត្រី​ការពារ​ជាតិ​នៃ​ចក្រភព​អង់គ្លេស បាន​ថ្លែង​នៅ​ក្នុង​សន្និសីទ​កាសែត​មួយ​ក្នុង​ទីក្រុង​ឡុងដ៍ (London) ប្រទេស​អង់គ្លេស កាលពី​ថ្ងៃ​ពុធ ទី​២២ ខែ​ឧសភា ដែល​ទីភ្នាក់ងារ​សារព័ត៌មាន Reuters ចុះផ្សាយ​ថា ប្រទេស​ពីរ​នេះ​មាន​គោលការណ៍​ជួយ​គ្នា​ទៅវិញ​ទៅមក គាំទ្រ​គ្នា​ទៅវិញ​ទៅមក សំដៅ​ពង្រឹង​សហប្រតិបត្តិការ​ស៊ីជម្រៅ។

ប្រភព​ដដែល​ឲ្យ​ដឹង​ថា លោក​ប្រមុខ​ការពារ​ជាតិ​អង់គ្លេស​រូប​នេះ បាន​និយាយ​ថា កិច្ច​គាំទ្រ​សម្ភារៈ​សឹក​របស់​ចិន ទៅ​ឱ្យ​រុស្ស៊ី ត្រូវ​បាន​ទ័ព​របស់​រុស្ស៊ី ប្រើ​រយៈពេល ២​ឆ្នាំ​ហើយ​ក្នុង​សង្គ្រាម​នៅ​អ៊ុយក្រែន។

លោក Grant Shapps ថា​អង់គ្លេស​មាន​ភស្តុតាង​ដែល​ថា​ចិន កំពុង​ផ្គត់ផ្គង់​សម្ភារៈ​សឹក និង​អាវុធ​ទៅ​ឱ្យ​រុស្ស៊ី តែ​លោក Shapps មិន​បាន​លម្អិត​រឿង​នេះ​ទេ។

ការ​លើកឡើង​របស់​លោក​រដ្ឋមន្ត្រី​ការពារ​ជាតិ​អង់គ្លេស​ប៉ុន្មាន​ថ្ងៃ​ប៉ុណ្ណោះ ក្រោយពី​ប្រធានាធិបតី​រុស្ស៊ី លោក វ៉្លាឌីមៀ ពូទីន (Vladimir Putin) បាន​ត្រឡប់​ពី​ទីក្រុង​ប៉េកាំង វិញ។

ក្រុង​ប៉េកាំង និង​ក្រុង​មូស្គូ បាន​ក្លាយ​ជា​សម្ពន្ធភាព​គ្មាន​ព្រំដែន គឺ​ប៉ុន្មាន​ថ្ងៃ​ប៉ុណ្ណោះ​ក្រោយពី​រុស្ស៊ី ឈ្លានពាន​ពេញ​ទំហឹង​ដោយ​លើក​ទ័ព​រាប់​សែន​នាក់ និង​សព្វាវុធ​ធុន​ធ្ងន់ មាន​រថក្រោះ រថពាសដែក កាំភ្លើងធំ រាប់​ពាន់​គ្រឿង វាយ​ចូល​ប្រទេស​អ៊ុយក្រែន កាលពី​ថ្ងៃទី​២៤ ខែ​កុម្ភៈ ឆ្នាំ​២០២២។

ករណី​មាន​ការ​ចោទ​ចិន ពាក់ព័ន្ធ​ការ​បញ្ជូន​អាវុធ​ទៅ​រុស្ស៊ី ស្ថានទូត​ចិន នៅ​ក្រុង​វ៉ាស៊ីនតោន បាន​និយាយ​កាលពី​ខែ​កន្លង​មក​នេះ​ថា ក្រុង​ប៉េកាំង មិនមែន​ជា​អ្នក​ផលិត​អាវុធ ឬ​ជា​ភាគី​ពាក់ព័ន្ធ​ក្នុង​សង្គ្រាម​នៅ​អ៊ុយក្រែន នោះ​ទេ។ ស្ថានទូត​ចិន បាន​ច្រានចោល​ចំពោះ​ការ​ចោទ​មក​លើ​ប្រទេស​ចិន ដែល​ថា​ចិន បាន​ជួយ​អាវុធ​ទៅ​ឱ្យ​រុស្ស៊ី ដើម្បី​ធ្វើ​សង្គ្រាម​នៅ​អ៊ុយក្រែន។

លោក Grant Shapps រដ្ឋមន្ត្រី​ការពារ​ជាតិ​នៃ​ចក្រភព​អង់គ្លេស បាន​បន្ត​លើកឡើង​ថា ចាប់តាំងពី​សង្គ្រាម​ផ្ទុះ​ឡើង​នៅ​អ៊ុយក្រែន ជា​សង្គ្រាម​រុស្ស៊ី ឈ្លានពាន​ប្រទេស​ជិតខាង ឃើញ​ថា​កំណើន​ពាណិជ្ជកម្ម​រវាង​ចិន និង​រុស្ស៊ី បាន​ហក់​ឡើង​រហូត​ដល់ ៦៤%។

ការ​ចោទ​របស់​លោក Grant Shapps ទើប​ជា​លើកដំបូង​ដែល​រដ្ឋមន្ត្រី​ការពារ​ជាតិ​នៃ​ប្រទេស​សមាជិក​ណាតូ បើក​កកាយ​ជា​សាធារណៈ​ចំពោះ​ក្រុង​ប៉េកាំង ជុំវិញ​សំណុំរឿង​សង្គ្រាម​រុស្ស៊ី-អ៊ុយក្រែន។

ក្នុង​សំណុំរឿង​នេះ​ដែរ ពួក​មន្ត្រី​សហរដ្ឋ​អាមេរិក កាលពី​ខែ​មុន​បាន​និយាយ​ថា ជំនួយ​យោធា​របស់​ចិន ទៅ​ឱ្យ​ក្រុង​មូស្គូ គឺជា​វត្ថុធាតុ​ដើម​ក្នុង​ការ​ផលិត​គ្រាប់​មីស៊ីល រថក្រោះ និង​អាវុធ​ផ្សេងៗ​ទៀត។

លោក Grant Shapps បាន​បញ្ជាក់​ទៀត​ថា អង់គ្លេស​បង្កើន​ការ​គាំទ្រ​ផ្នែក​យោធា​ដល់​ប្រទេស​អ៊ុយក្រែន មាន​ទំហំ ៣៨០០​លាន​ដុល្លារ​សម្រាប់​ឆ្នាំ​២០២៤ នេះ ស្រប​ពេល​បស្ចិម​ប្រទេស​ជាច្រើន​កំពុង​បង្កើន​ការ​ចំណាយ​មាន​ការ​កើន​ឡើង​រាប់​ពាន់​លាន​ដុល្លារ។

លោក​រដ្ឋមន្ត្រី​ការពារ​ជាតិ​នៃ​ចក្រភព​អង់គ្លេស បាន​ទទូច​ដល់​ប្រទេស​សមាជិក​ណាតូ​ទាំងអស់ គួរ​បង្កើន​ការ​ចំណាយ​ទៅ​លើ​សន្តិសុខ​សម្រាប់​អង្គការ​ណាតូ ឱ្យ​មាន​ការ​កើន​ឡើង។ លោក​ថា សម្រាប់​ប្រទេស​អង់គ្លេស បាន​បង្កើន​ទំហំ​ចំណាយ​លើ​វិស័យ​ការពារ​ជាតិ​សន្តិសុខ ២,៥% នៃ​ផលិតផល​សរុប​ក្នុង​ស្រុក​នៃ​ប្រទេស​អង់គ្លេស រហូត​ដល់​ឆ្នាំ​២០៣០។

លោក ពូទីន និង​មិត្តភក្ដិ​របស់​គាត់ មាន​ទាំង​លោក ស៊ី ជីនពីង ប្រធានាធិបតី​ចិន ផង​ដែរ បាន​ចង​សម្ព័ន្ធ​នឹង​គ្នា​ដើម្បី​ប្រជែង​នឹង​ពួក​លោក​ខាងលិច ដែល​ដឹក​មុខ​ដោយ​សហរដ្ឋ​អាមេរិក។

លោក Grant Shapps លើកឡើង​ថា ប្រព័ន្ធ​ដឹកនាំ​នៅ​ក្រោម​មេដឹកនាំ​សម្ពន្ធភាព​ជាមួយ​លោក ពូទីន សុទ្ធតែ​ជា​ការ​ដឹកនាំ​រំលោភ​សិទ្ធិមនុស្ស ធ្វើ​ឱ្យ​មាន​ការ​គាបសង្កត់​សិទ្ធិ​សេរីភាព​ទៅ​លើ​ប្រជាជន​ខ្លួនឯង។

នៅ​ក្នុង​សេចក្ដី​ថ្លែងការណ៍​រួម​ចេញពី​ជំនួប​កំពូល​កាលពី​ថ្ងៃទី​១៧ ខែ​ឧសភា ជា​ពេល​ដែល​លោក ពូទីន ទៅ​ជួប​លោក ស៊ី នៅ​ក្រុង​ប៉េកាំង។ នោះ​គឺជា​ដំណើរ​ទស្សនកិច្ច​លើក​ទី​២ របស់​មេដឹកនាំ​វិមាន​ក្រឹមឡាំង ហើយ​ដែល​ពួក​បស្ចិម​ប្រទេស​ចាត់ទុក​ថា​ជន​ផ្ដាច់ការ​ទាំង​ពីរ​នេះ បាន​សច្ចា​រួម​គ្នា​ទប់ទល់​ឥទ្ធិពល​សហរដ្ឋ​អាមេរិក ក្រោម​ពាក្យ​ថា សករាជ​ថ្មី​នៃ​សង្គ្រាម​ត្រជាក់។

មេដឹកនាំ​ប្រទេស​មហាអំណាច​ពីរ​នេះ​នៅតែ​ចោទ​សហរដ្ឋ​អាមេរិក និង​ក្រុម​បស្ចិម​ប្រទេស ថា​ជា​អ្នក​រុញ​ឱ្យ​មាន​សង្គ្រាម​នៅ​លើ​ទឹកដី​អ៊ុយក្រែន ដោយសារតែ​អាវុធ​យ៉ាង​សន្ធឹក​របស់​ក្រុម​ប្រទេស​លោក​ខាងលិច និង​សហរដ្ឋ​អាមេរិក បញ្ជូន​ទៅ​ឱ្យ​អ៊ុយក្រែន ហើយ​ដែល​ធ្វើ​ឱ្យ​អ៊ុយក្រែន បន្ត​ធ្លាក់​ក្នុង​សង្គ្រាម​មិន​អាច​រក​ទី​បញ្ចប់​ឃើញ​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស