27 C
Phnom Penh

នាយករដ្ឋមន្ត្រី​ថ្មី​ស្នង​ពី​ឪពុក​អះអាង​ថា ព្រែកជីក​ហ្វូណន​តេជោ​នឹង​ចាប់ផ្តើម​ជីក​ក្នុង​ខែ​សីហា​ឆ្នាំ​នេះ

ដោយ ឌឹ ខេមបូឌា ដេលី

បទវិភាគ

ព្រែកជីក​ហ្វូណន​តេជោ ដែល​កំពុង​ក្លាយ​ជា​ប្រធានបទ​ជជែក​វែកញែក​យ៉ាង​ក្តៅ​គគុក​នោះ ទីបំផុត​ត្រូវ​បាន​លោក ហ៊ុន ម៉ាណែត នាយករដ្ឋមន្ត្រី​ប្រកាស​ជា​សាធារណៈ​ថា​នឹង​បើក​ការ​សាងសង់​ជា​ផ្លូវការ​នៅ​អំឡុង​ខែ​សីហា ឆ្នាំ​២០២៤ ខាងមុខ​នេះ ដើម្បី​បញ្ចប់​ការ​លើកឡើង​ដែល​ជា​លក្ខណៈ​ស្រមើស្រមៃ​នានា។

នាយករដ្ឋមន្ត្រី ហ៊ុន ម៉ាណែត លើកឡើង​ក្នុង​ពិធី​សម្ពោធ​សមិទ្ធផល​មួយ​នៅ​មជ្ឈមណ្ឌល​វប្បធម៌​ព្រះពុទ្ធ​សាសនា​កម្ពុជា នៅ​ថ្ងៃទី​៣០ ខែ​ឧសភា ឆ្នាំ​២០២៤ នេះ​ថា ការ​ពន្លឿន​ការ​សាងសង់​គម្រោង​ព្រែកជីក​ហ្វូណន​តេជោ គឺ​ដើម្បី​បញ្ចប់​ការ​លើកឡើង​ដែល​ជា​លក្ខណៈ​ស្រមើស្រមៃ​នានា​កន្លង​មក។

លោក ហ៊ុន ម៉ាណែត លើកឡើង​ថា គម្រោង​ព្រែកជីក​ហ្វូណន ជា​គម្រោង​ដ៏​ពិសេស​ជាង​គម្រោង​ផ្សេងៗ ព្រោះ​គម្រោង​នេះ​មាន​ការ​គាំទ្រ​យ៉ាង​ខ្លាំងក្លា​ពី​ប្រជាជន​ខ្មែរ​ទូទាំង​ពិភពលោក និង​ជា​គម្រោង​ដែល​មាន​លក្ខណៈ​ជាតិ​និយម​ផង​ដែរ ដូច្នេះ​នរណា​ចង់​និយាយ​អី​ក៏​និយាយ​ទៅ ប៉ុន្តែ​កម្ពុជា​សាងសង់​ព្រែកជីក​នេះ គឺ​ដើម្បី​ផល​ប្រយោជន៍​ប្រជាជន​កម្ពុជា​ប៉ុណ្ណោះ។

នាយករដ្ឋមន្ត្រី​ខ្មែរ​រូប​នេះ​បញ្ជាក់​ថា នៅ​ពេល​ស្មារតី​ខ្មែរ​រួម​គ្នា​ដាក់​ចិត្ត​នឹង​ធ្វើ គឺ​ខ្មែរ​ធ្វើ​បាន សម្រាប់​គម្រោង​ព្រែកជីក​ហ្វូណន​នេះ ទោះបី​មិន​មាន​ការ​ចូលរួម​ពី​វិនិយោគិន​បរទេស​ក៏ដោយ ព្រោះ​ថា​គម្រោង​សាងសង់​ព្រែកជីក​ហ្វូណន​នេះ​មាន​វិនិយោគទុន​ភាគច្រើន​ជា​របស់​ខ្មែរ និង​ទុន​មួយ​ផ្នែក​ទៀត​ជា​របស់​ក្រុមហ៊ុន​វិនិយោគ​ចិន ដែល​មាន​បច្ចេកទេស​ក្នុង​ការ​សាងសង់។

ការ​អះអាង​នេះ ធ្វើ​ឡើង​ស្រប​ពេល​ដែល​គម្រោង​ព្រែកជីក​ហ្វូណន​កំពុង​រង​នូវ​ការ​ចោទប្រកាន់​ថា ព្រែកជីក​នេះ​មិនមែន​ដើម្បី​ប្រយោជន៍​កម្ពុជា​ទេ គឺ​ដើម្បី​បម្រើ​ឱ្យ​វិស័យ​យោធា​ចិន ប៉ុណ្ណោះ។

គិត​មក​ដល់​ថ្ងៃទី​៣០ ខែ​ឧសភា ឆ្នាំ​២០២៤ នេះ រាជរដ្ឋាភិបាល​កម្ពុជា​បាន​រង់ចាំ​ការ​សម្រេច​របស់​ក្រុមហ៊ុន​ចិន សាជីវកម្ម​ស្ពាន និង​ថ្នល់​ចិន (CRBC) អស់​រយៈពេល​ប្រមាណ​ជាង ៨​ខែ​ហើយ បន្ទាប់ពី​រដ្ឋាភិបាល​សម្រេច​ប្រគល់​គម្រោង​ព្រែកជីក​នេះ​ឱ្យ​ក្រុមហ៊ុន​ចិន សិក្សា​ចាប់តាំងពី​ពាក់កណ្តាល​ខែ​តុលា ឆ្នាំ​២០២៣ មក។

រហូត​ដល់​ថ្ងៃទី​២៨ ខែ​ឧសភា ឆ្នាំ​២០២៤ នេះ អនុប្រធាន​ក្រុមប្រឹក្សា​អភិវឌ្ឍន៍​កម្ពុជា និង​ជា​ប្រធាន​គណៈកម្មការ​អន្តរ​ក្រសួង លោក ស៊ុន ចាន់ថុល បាន​ជួប​ប្រជុំ​ជាមួយ​តំណាង​ក្រុមហ៊ុន​សាជីវកម្ម​ស្ពាន និង​ថ្នល់​របស់​ចិន ម្តង​ទៀត និង​ជំរុញ​ក្រុមហ៊ុន​នេះ​ជួយ​សាងសង់​ព្រែកជីក​នេះ​ឱ្យ​បាន​ឆាប់។ ជា​លទ្ធផល គម្រោង​ព្រែកជីក​នេះ​ក៏​ត្រូវ​បាន​ប្រកាស​ពី​ពេលវេលា​ជាក់លាក់​នៃ​ការ​សាងសង់​នៅ​ថ្ងៃទី​៣០ ឧសភា នេះ​តែម្តង។

កាលពី​ថ្ងៃទី​១៩ ខែ​ឧសភា ឆ្នាំ​២០២៣ អតីត​នាយករដ្ឋមន្ត្រី​លោក ហ៊ុន សែន បាន​អនុម័ត​ឱ្យ​រដ្ឋាភិបាល​សាងសង់​គម្រោង​ព្រែកជីក​ហ្វូណន​តេជោ ដែល​នឹង​ត្រូវ​ចំណាយ​ទុន​វិនិយោគ​ប្រមាណ​ជា ១៧០០​លាន​ដុល្លារ​សហរដ្ឋ​អាមេរិក ក្រោម​ទម្រង់ BOT ជាមួយ​ក្រុមហ៊ុន​ចិន ដែល​នឹង​ត្រូវ​ចំណាយ​ពេល​សង់​ប្រមាណ​ជា ៤​ឆ្នាំ។

គម្រោង​សាងសង់​ព្រែកជីក​ហ្វូណន បាន​ក្លាយ​ជា​ចំណុច​រសើប​លើ​ទីលាន​នៃ​ការ​ប្រកួតប្រជែង​គំនិត​ដ៏​ក្តៅ​គគុក​សព្វថ្ងៃ​នេះ ដែល​មាន​ទាំង​មតិ​រិះគន់ និង​មតិ​គាំទ្រ ទោះ​ជា​មតិ​ខ្លះ​បង្ហាញ​ចេញ​មក​ជា​របៀប​ដើរ​តាម​បក្ស គ្មាន​ការ​ស្រាវជ្រាវ​ក៏ដោយ ប៉ុន្តែ​សម្រាប់​រាជរដ្ឋាភិបាល​នៃ​បក្ស​ប្រជាជន​កម្ពុជា នៅតែ​ចាត់ទុក​ថា​អ្នក​ដែល​ប្រឆាំង​នឹង​គម្រោង​ព្រែកជីក​នេះ គឺជា​ក្រុម​ជ្រុល​និយម​ដែល​កំពុង​ប្រឆាំង​នឹង​ប្រយោជន៍​ជាតិ​ខ្មែរ ទោះ​ជា​ខ្មែរ​ជាច្រើន​ដឹង​ថា អ្នក​ណា​ជា​អ្នក​បាន​បំផ្លាញ និង​កំពុងតែ​បំផ្លាញ​ប្រយោជន៍​ខ្មែរ​យ៉ាងណា​ក្តី។

ក្រុមហ៊ុន​សាជីវកម្ម​ស្ពាន និង​ថ្នល់ (CBRC) គ្រោង​នឹង​ជីក​ព្រែក​នេះ​ដោយ​ភ្ជាប់​ទឹកសាប​ពី​ទន្លេបាសាក់ ខេត្ត​កណ្តាល ទៅ​ទឹកប្រៃ​នៅ​ខេត្ត​កែប ដែល​មាន​ទទឹង​ក្បាល​ព្រែក​ខាងលើ​ប្រវែង​ពី ១០០​ម៉ែត្រ និង​រួម​ស្ដួច​ខាងក្រោម​ទៅ​កាន់​សមុទ្រ​ត្រឹម ៨០​ម៉ែត្រ រួម​ទាំង​មាន​ជម្រៅ​ទឹក​ប្រវែង ៥,៤​ម៉ែត្រ មាន​សន្ទះ​បិទ​បើក​ទឹក​ចំនួន​៣ និង​ស្ពាន​ឆ្លងកាត់​ចំនួន ១១​ស្ពាន​ផង​ដែរ។

ចំណែក​ការ​លើក​ទំនប់​សងខាង ក្រុមហ៊ុន​ចិន​នឹង​សាងសង់​ថ្នល់​ទំនើប​ឲ្យ​រថយន្ត​បើកបរ​ទៅ​មក​សងខាង រួម​ទាំង​សង់​ចិញ្ចើមថ្នល់​សម្រាប់​ធ្វើ​ដំណើរ​ដោយ​ថ្មើរជើង​ចម្ងាយ ២០៨​គីឡូម៉ែត្រ​ថែម​ទៀត​សម្រាប់​ប្រជាពលរដ្ឋ​ខ្មែរ ១​លាន ៥​សែន​នាក់​ដែល​រស់នៅ​តាម​ព្រែកជីក​នេះ។

តាម​កិច្ចព្រមព្រៀង​រវាង​រាជរដ្ឋាភិបាល និង​ក្រុមហ៊ុន​ចិន ព្រែកជីក​ហ្វូណន​នឹង​ត្រូវ​ស្ថាបនា​តាម​បែប​ផែន Build-Operate-Transfer (BOT) ដែល​មាន​ន័យ​ថា សង់​ហើយ ម្ចាស់​ទុន​គ្រប់គ្រង​កាន់កាប់​ចាត់ចែង (ធ្វើ​ប្រតិបត្តិការ) ប្រមូល​ចំណូល​រហូត​ចប់​កិច្ចសន្យា​រយៈពេល ៥០​ឆ្នាំ ទើប​ប្រគល់​ឱ្យ​ម្ចាស់​ប្រទេស​គ្រប់គ្រង​តាម​ក្រោយ។

ក្នុង​សេចក្តី​រាយការណ៍​ពិសេស​របស់​សារព័ត៌មាន The Cambodia Daily បាន​រក​ឃើញ​ថា ក្រុមហ៊ុន​ចិន គ្រោង​នឹង​យក​ពន្ធ​ប្រើប្រាស់​ថ្នល់​ពី​រថយន្ត​ធុន​តូច​តម្លៃ ១២​ដុល្លារ (ឬ ៤​ម៉ឺន ៨​ពាន់​រៀល) រថយន្ត​ធុន​ធំ កុងវ័រ​ដឹក​ទំនិញ​តម្លៃ ៦០​ដុល្លារ (ឬ ២៤​ម៉ឺន​រៀល) ដូច្នេះ​ចំណូល​ពន្ធ​របស់​កម្ពុជា​ដែល​បាន​មកពី​ព្រែក​នេះ គឺ​ចិន​ជា​អ្នក​កាន់កាប់​ទាំងស្រុង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស