29 C
Phnom Penh

រាជាណាចក្រ​ថៃ​អាច​ជួប​ចលាចល​ជា​ថ្មី បន្ទាប់ពី​លោក ថាក់ស៊ីន ត្រូវ​ជាប់​ចោទ​រឿង​ប្រមាថ​ព្រះមហាក្សត្រ

ដោយ ឌឹ ខេមបូឌា ដេលី

បទវិភាគ

អតីត​នាយករដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត្រា (Thaksin Shinawatra) នឹង​ត្រូវ​បង្ហាញ​ខ្លួន​ចំពោះ​មុខ​សវនាការ​ជុំវិញ​ការ​ចោទប្រកាន់​ពី​បទ​ប្រមាថ​ព្រះមហាក្សត្រ នៅ​ក្នុង​ការ​អត្ថាធិប្បាយ​មួយ​ដែល​លោក​បាន​ធ្វើឡើង​កាលពី​ជិត ១០​ឆ្នាំ​មុន។

អ្នក​នាំពាក្យ​អគ្គ​រដ្ឋអាជ្ញា​ថៃ លោក Prayuth Pecharakun បាន​និយាយ​កាលពី​ថ្ងៃ​ពុធ ទី​២៩ ខែ​ឧសភា នេះ​ថា លោក ថាក់ស៊ីន នឹង​ត្រូវ​បាន​កោះហៅ​ឱ្យ​បង្ហាញ​ខ្លួន​ចំពោះ​មុខ​តុលាការ​នៅ​ថ្ងៃទី​១៨ ខែ​មិថុនា ខាងមុខ ដើម្បី​ឆ្លើយតប​ទៅ​នឹង​ការ​ចោទប្រកាន់​ពី​បទ​ប្រមាថ​ព្រះមហាក្សត្រ។

អ្នក​នាំពាក្យ​អគ្គ​រដ្ឋអាជ្ញា​បាន​ប្រាប់​អ្នក​សារព័ត៌មាន​ថា អគ្គ​រដ្ឋអាជ្ញា​បាន​ធ្វើ​សេចក្ដី​សម្រេច​រួច​ហើយ​ក្នុង​ការ​កសាង​សំណុំរឿង​ចោទប្រកាន់​លោក ថាក់ស៊ីន ពី​បទ​ប្រមាថ​ព្រះមហាក្សត្រ។

មេធាវី​របស់​លោក ថាក់ស៊ីន គឺ​លោក Winyat Chatmontree បាន​និយាយ​ថា លោក ថាក់ស៊ីន សម្រេច​មិន​ចាកចេញ​ពី​ប្រទេស​ទេ ដោយ​តាំងចិត្ត​តតាំង​ក្ដី​ចំពោះ​ការ​ចោទប្រកាន់ និង​ត្រៀម​ខ្លួន​ជាស្រេច​ដើម្បី​បញ្ជាក់​ថា រូបលោក​មិន​មាន​ទោសពៃរ៍​អ្វី​ទាំងអស់។

ការ​ចោទប្រកាន់​លោក ថាក់ស៊ីន ពី​បទ​ប្រមាថ​ព្រះមហាក្សត្រ គឺ​មាន​ជាប់​ពាក់ព័ន្ធ​នឹង​ការ​អត្ថាធិប្បាយ​មួយ​ដែល​លោក​បាន​ធ្វើឡើង​កាលពី​ឆ្នាំ​២០១៥ ក្នុង​បទសម្ភាសន៍​ជាមួយ​ប្រព័ន្ធ​ផ្សព្វផ្សាយ​កូរ៉េខាងត្បូង។

លោក ថាក់ស៊ីន មាន​អាយុ ៧៤​ឆ្នាំ បាន​វិលត្រឡប់​ចូល​ស្រុក​ថៃ វិញ​កាលពី​ខែ​សីហា ឆ្នាំ​២០២៣ និង​ត្រូវ​បាន​ឃុំ​ខ្លួន​ពី​បទ​រំលោភ​អំណាច និង​ពុករលួយ ដែល​ត្រូវ​បាន​ចោទប្រកាន់​ថា​បាន​ប្រព្រឹត្ត​ក្នុង​ពេល​កាន់​អំណាច។ តែ​ព្រះមហាក្សត្រ​ថៃ បាន​បន្ធូរ​បន្ថយ​ទោស​ជាប់​ពន្ធនាគារ​របស់​លោក ថាក់ស៊ីន ពី ៨​ឆ្នាំ​មក​នៅ​សល់​មួយ​ឆ្នាំ​វិញ ហើយ​រូបលោក​ត្រូវ​បាន​ដោះលែង​មុន​កាលកំណត់​កាលពី​ដើម​ឆ្នាំ​២០២៤ នេះ។

តើ​ការ​កោះហៅ​លោក ថាក់ស៊ីន ឡើង​តុលាការ​នៅ​ថ្ងៃទី​១៨ មិថុនា អាច​រុញ​ប្រទេស​ថៃ ទៅ​រក​ចលាចល​នយោបាយ​ឬ​ទេ?

បណ្ដាញ​ផ្សាយ​ព័ត៌មាន BNN, Bloomberg បាន​ចុះផ្សាយ​ថា រាជាណាចក្រ​ថៃ អាច​នឹង​ធ្លាក់​ក្នុង​ចលាចល​នយោបាយ​ម្ដង​ទៀត ដែល​ជា​ការ​ធ្វើ​ឱ្យ​មុខមាត់​របស់​ប្រទេស​ដើរ​លើ​ដាន​ចាស់​វិញ​នៅ​ក្នុង​កណ្ដាប់ដៃ​របស់​ពួក​យោធា បើ​លោក ថាក់ស៊ីន អ្នក​នយោបាយ​ដ៏​មាន​ប្រជាប្រិយភាព​នេះ​ត្រូវ​កាត់ទោស ហើយ​ជាប់​ពន្ធនាគារ។

នៅ​ប៉ុន្មាន​សប្ដាហ៍​ខាងមុខ​នេះ​ដែរ តុលាការ​ធម្មនុញ្ញ​ប្រទេស​ថៃ នឹង​ធ្វើ​សេចក្ដី​វិនិច្ឆ័យ​មួយ​ដ៏​រសើប​ប៉ះពាល់​ដល់​ជោគវាសនា​របស់​នាយករដ្ឋមន្ត្រី ស្រេតថា ថាវីស៊ីន (Srettha Thavisin) មក​ពី​បក្ស​ភឿថៃ ដែល​ក្រុម​ព្រឹទ្ធសភា​របស់​ពួក​យោធា ផ្ដើម​ចោទ​ពី​បទ​ធ្វេសប្រហែស ដោយសារ​បាន​តែងតាំង​មនុស្ស​ស្និទ្ធ​ម្នាក់​នឹង​លោក ថាក់ស៊ីន ជា​រដ្ឋមន្ត្រី​ដែល​បុរស​នេះ​ត្រូវ​គេ​រក​ឃើញ​មាន​កំហុស​ករណី​សូកប៉ាន់​ពួក​ចៅក្រម។

សមាជិក​ព្រឹទ្ធសភា​ថៃ មួយ​ក្រុម ដែល​បាន​ដាក់​ញត្តិ​តវ៉ា​ទៅ​កាន់​តុលាការ​ធម្មនុញ្ញ​ថៃ ដើម្បី​ឱ្យ​តុលាការ​ពិចារណា​ដកហូត​តំណែង​លោក ស្រេតថា (Srettha) ហើយ​ទន្ទឹម​គ្នា​នោះ ឱ្យ​ព្យួរ​តំណែង​របស់​លោក ស្រេតថា (Srettha) ជា​បណ្ដោះអាសន្ន​សិន ដោយ​ពួកគេ​បាន​ចោទប្រកាន់​ថា ការ​តែងតាំង​លោក Pichit Chuenban កាលពី​ខែ​មេសា កន្លង​ទៅ ឱ្យ​ក្លាយ​ជា​សមាជិក​នៃ​គណៈរដ្ឋមន្ត្រី​របស់​លោក គឺជា​ទង្វើ​រំលោភ​រដ្ឋធម្មនុញ្ញ។

ទោះបីជា​តុលាការ​ធម្មនុញ្ញ បាន​ទទួល​យក​សំណើ​នោះ​ក៏ដោយ ក៏​លោក ស្រេតថា (Srettha) មិន​ត្រូវ​បាន​ព្យួរ​មុខនាទី​ជា​នាយករដ្ឋមន្ត្រី​ឡើយ ដោយ​នៅ​រង់ចាំ​ការ​សម្រេច​ចិត្ត​នា​ពេល​ក្រោយ​ទៀត។

លោក Pichit Chuenban បាន​លាលែង​ពី​តួនាទី​ជា​រដ្ឋមន្ត្រី​នៃ​គណៈរដ្ឋមន្ត្រី​ថៃ កាលពី​ថ្ងៃ​អង្គារ​សប្តាហ៍​នេះ ក្នុង​គោលបំណង​ដើម្បី​ចង់​ជួយ​ឱ្យ​លោក ស្រេតថា បាន​រួច​ផុត​ពី​សំណុំរឿង​នេះ។

ក្នុង​រយៈពេល​ប៉ុន្មាន​សប្តាហ៍​ចុងក្រោយ​នេះ រដ្ឋមន្ត្រី ៣​រូប​ហើយ​ចាកចេញ​ពី​តំណែង​នៅ​ក្នុង​គណៈរដ្ឋមន្ត្រី​របស់​លោក ស្រេតថា។

ចំពោះ​លោក Pichit ត្រូវ​គេ​ស្គាល់​ថា​ជា​មនុស្ស​ជិតស្និទ្ធ​នឹង​គ្រួសារ​ត្រកូល ស៊ីណាវ៉ាត់។ កាលពី​ឆ្នាំ​២០០៨ លោក Pichit ធ្លាប់​ត្រូវ​បាន​ផ្ដន្ទាទោស​ឱ្យ​ជាប់​ពន្ធនាគារ ៦​ខែ ក្រោម​ការ​ចោទប្រកាន់​ពី​បទ​ប៉ុនប៉ង​សូកប៉ាន់​ពួក​ចៅក្រម​ជាមួយ​ប្រាក់ ២​លាន​បាត។

សមាជិក​ព្រឹទ្ធសភា​ថៃ ៤០​រូប បាន​ចោទប្រកាន់​លោក ស្រេតថា ករណី​រំលោភ​រដ្ឋធម្មនុញ្ញ​តាមរយៈ​ការ​តែងតាំង​លោក Pichit ដែល​ខ្វះ​ភាព​សុចរិត​ទៀងត្រង់។

កាលពី​ថ្ងៃ​ចន្ទ​ដើម​សប្ដាហ៍​នេះ តុលាការ​ក្នុង​ប្រទេស​ថៃ ក៏​បាន​សម្រេច​ផ្ដន្ទាទោស​សមាជិក​សភា​បក្ស​ប្រឆាំង​ម្នាក់​ឈ្មោះ Chonthicha Jangrew ឱ្យ​ជាប់​ពន្ធនាគារ​រយៈពេល ២​ឆ្នាំ ពី​បទ​ប្រមាថ​ស្ថាប័ន​ព្រះមហាក្សត្រ ជុំវិញ​សុន្ទរកថា​មួយ​ដែល​អ្នក​នយោបាយ​ស្ត្រី​រូប​នេះ​បាន​ធ្វើឡើង​កាលពី ៣​ឆ្នាំ​មុន អំឡុង​បាតុកម្ម​ប្រឆាំង​រដ្ឋាភិបាល។

អ្នកស្រី Chonthicha អាយុ ៣១​ឆ្នាំ បច្ចុប្បន្ន​គឺជា​សមាជិក​នៃ​បក្ស​ប្រឆាំង Move Forward ដែល​ជា​បក្ស​មាន​អាសនៈ​ច្រើន​ជាងគេ​នៅ​ក្នុង​សភា។ គណបក្ស Move Forward ផ្ទាល់​ក៏​កំពុង​ប្រឈម​រឿង​ក្តី​ផង​ដែរ ដោយសារតែ​ផែនការ​របស់​ខ្លួន​មាន​គោលដៅ​ចង់​ធ្វើ​វិសោធនកម្ម​ច្បាប់​ប្រឆាំង​ការ​ប្រមាថ​ស្ថាប័ន​ព្រះមហាក្សត្រ។ ក្នុង​សំណុំ​រឿង​នេះ គណៈកម្មការ​បោះឆ្នោត​ថៃ បាន​ស្នើ​ឱ្យ​តុលាការ​ធម្មនុញ្ញ​ពិចារណា​រំលាយ​គណបក្ស Move Forward ចោល។

យោង​តាម​សមាគម​គណៈមេធាវី​ថៃ ផ្នែក​សិទ្ធិមនុស្ស គិត​ចាប់តាំងពី​ឆ្នាំ​២០២០ មក មនុស្ស ២៧០​នាក់​ហើយ​ត្រូវ​បាន​ចោទប្រកាន់​ពី​បទ​ប្រមាថ​ស្ថាប័ន​ព្រះមហាក្សត្រ ហើយ​ក្នុង​នោះ ១៧​នាក់​កំពុង​ស្ថិត​ក្រោម​ការ​ឃុំឃាំង។

ព្រឹត្តិការណ៍​ទាំងនេះ​ដែល​បណ្ដាញ​ផ្សាយ​ព័ត៌មាន BNN, Bloomberg ចុះផ្សាយ​ថា​ជា​ដើម​ហេតុ​ដែល​អាច​រុញ​រាជាណាចក្រ​នេះ​ទៅ​រក​អំពើ​ចលាចល​នយោបាយ​ជា​ថ្មី​ទៀត ហើយ​ចង់​មិន​ចង់ ពួក​យោធា​នៅ​ក្នុង​ព្រឹទ្ធសភា ២៥០​រូប អាច​នឹង​ប្រមូល​កម្លាំង​នយោបាយ​យោធា​និយម​ឆក់​យក​អំណាច​ម្ដង​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស