លោក សម រង្ស៊ី ចាត់ទុកការបង្ខំកុមារតូចៗឱ្យប្រកាសគាំទ្រគម្រោងអភិវឌ្ឍន៍ត្រីកោណជាអំពើរំលោភសិទ្ធិមនុស្សធ្ងន់ធ្ងរ

អតីតមេដឹកនាំបក្សប្រឆាំងលោក សម រង្ស៊ី ចាត់ទុកការបង្ខំកុមារតូចៗនៅតាមគ្រឹះស្ថានអប់រំ ឱ្យប្រកាសគាំទ្រគម្រោងអភិវឌ្ឍន៍ត្រីកោណ (CLV) គឺជាអំពើរំលោភសិទ្ធិមនុស្ស និងកេងប្រវ័ញ្ចលើកុមារធ្ងន់ធ្ងរ។

លោក សម រង្ស៊ី បានសរសេរលើទំព័រហ្វេសប៊ុករបស់លោកនៅថ្ងៃទី២០ សីហា នេះថា របាយការណ៍ថ្មីមួយពីប្រទេសកម្ពុជា បានបង្ហាញពីកុមារតូចៗនៅតាមគ្រឹះស្ថានអប់រំត្រូវបានគេបង្ខំឱ្យចូលរួមក្នុងកិច្ចខិតខំប្រឹងប្រែងឃោសនារបស់លោក ហ៊ុន សែន ដើម្បីគាំទ្រគម្រោងអភិវឌ្ឍន៍ត្រីកោណ កម្ពុជា ឡាវ និងវៀតណាម (CLV)។

លោកថា ការធ្វើបែបនេះបានបង្កើនឱ្យមានការព្រួយបារម្ភខាងសីលធម៌យ៉ាងខ្លាំង និងជាការរំលោភសិទ្ធិរបស់កុមារផងដែរ ព្រោះកុមារតូចៗដែលចូលរួមក្នុងយុទ្ធនាការទាំងនេះ គឺស្ថិតក្នុងដំណាក់កាលនៃការអភិវឌ្ឍការយល់ដឹង និងសីលធម៌របស់ពួកគេ។

លោក សម រង្ស៊ី អះអាងថា ការបង្ខំឱ្យកុមារតូចៗទាំងនោះគាំទ្រនូវគោលនយោបាយរបស់រដ្ឋ ឬការនិទានរឿងនយោបាយ ធ្វើឱ្យពួកគេបាត់បង់សិទ្ធិសេរីភាពក្នុងការគិត និងការបញ្ចេញមតិដូចដែលបានធានាដោយអនុសញ្ញានៃអង្គការសហប្រជាជាតិស្ដីពីសិទ្ធិកុមារ (CRC) ជាដើម។

លោកបន្តថា ការប្រើកុមារជាឧបករណ៍សម្រាប់ផ្ញើសារនយោបាយ រដ្ឋាភិបាលមិនត្រឹមតែកេងប្រវ័ញ្ចសិទ្ធិ និងសេរីភាពរបស់ពួកគេប៉ុណ្ណោះទេ ថែមទាំងរារាំងពួកគេក្នុងការបង្កើតមតិឯករាជ្យដែលជាកត្តាដ៏សំខាន់សម្រាប់ការអភិវឌ្ឍរបស់កុមារទៅជាពលរដ្ឋដែលមានការទទួលខុសត្រូវខ្ពស់ថែមទៀតផង។

លោកបន្តទៀតថា ការធ្វើដូច្នេះមិនត្រឹមតែធ្វើឱ្យខូចខាតដល់គោលបំណងពិតនៃការអប់រំប៉ុណ្ណោះទេ ប៉ុន្តែថែមទាំងធ្វើឱ្យធ្លាក់ចុះនូវសីលធម៌ធ្ងន់ធ្ងរអំពីទំនួលខុសត្រូវរបស់អ្នកកាន់អំណាចថែមទៀត ត្បិតទង្វើនេះបានធ្វើឱ្យប៉ះពាល់ដល់ផ្លូវចិត្តរបស់កុមារ និងលើអនាគតរបស់ពួកគេយ៉ាងធ្ងន់ធ្ងរ។

លោក សម រង្ស៊ី បញ្ជាក់ថា វាមានសារសំខាន់ណាស់សម្រាប់រដ្ឋាភិបាលក្នុងការបញ្ឈប់ការអនុវត្តអំពើបែបនេះ និងសម្រាប់សហគមន៍អន្តរជាតិក្នុងការតស៊ូមតិដើម្បីការពារសិទ្ធិរបស់កុមារ ដោយធានាថា ការអប់រំគឺដាច់ខាតមិនឱ្យមានការបង្ខិតបង្ខំបែបនេះឡើយ។

សកម្មជនខ្មែរក្នុងទីក្រុងឡងប៊ិច លោក មួង ណារ៉េត បានសរសេរនៅលើគណនីហ្វេសប៊ុករបស់លោកកាលពីថ្ងៃទី១៨ សីហា ថា បើការប្រកាសរបស់កុមារតូចៗទាំងនោះនៅប្រទេសកូរ៉េខាងជើង ឬក្នុងរបបសម័យប្រល័យពូជសាសន៍ ប៉ុល ពត នោះពុំមានអ្វីដែលត្រូវឆ្ងល់នោះទេ ពីព្រោះប្រទេសកុម្មុយនីស្តផ្ដាច់ការគឺគេតែងតែធ្វើបែបនេះ ដើម្បីធ្វើប្រជាភិថុតិលើពលរដ្ឋខ្លួនឯង។

លោក មួង ណារ៉េត ចាត់ទុកអំពើបែបនេះជាការធ្លាក់ចុះនៃសីលធម៌សង្គមធ្ងន់ធ្ងរ និងជាអំពើបន្ទាបបន្ថោកតម្លៃអនីតិជន ដោយការរំលោភសិទ្ធិជាមូលដ្ឋានរបស់កុមារតូចៗទាំងនោះ។

សកម្មជនខ្មែររូបនេះបញ្ជាក់ថា កុមារតូចៗទាំងនោះគួរត្រូវទទួលបាននូវសិទ្ធិការពារពីរដ្ឋាភិបាលមិនមែនជាការកេងប្រវ័ញ្ចបែបនេះទេ។

ក្នុងវីដេអូមួយដែលត្រូវបានគេផ្សព្វផ្សាយពេញបណ្ដាញទំនាក់ទំនងសង្គម មានប្រភពចេញពីសាលាបឋមសិក្សាបល្ល័ង្ក ឃុំតាគង់ ស្រុកម៉ាឡៃ ខេត្តបន្ទាយមានជ័យ ដែលបង្ហាញថាកុមារតូចរាប់រយនាក់ត្រូវបានគេបង្ខំឱ្យស្រែកប្រកាសគាំទ្រគម្រោងអភិវឌ្ឍន៍ត្រីកោណ CLV។ កុមារតូចទាំងនោះ ក៏ត្រូវបានគេបង្ខំឱ្យស្រែកគាំទ្រ និងជឿជាក់លើលោក ហ៊ុន សែន និងលោក ហ៊ុន ម៉ាណែត ផងដែរ ខណៈគ្រឹះស្ថានអប់រំផ្សេងទៀត ក៏ត្រូវបានគេបង្ខំឱ្យកុមារតូចៗស្រែកប្រកាសគាំទ្រក្នុងខ្លឹមសារដូចគ្នានេះដែរ៕

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

មន្រ្តីបក្សកាន់អំណាចថា ការងារស្វែងរកការដោះលែង លោក កឹម សុខា បានចំណាយពេលអស់ជិត៣ឆ្នាំ

ប្រមុខរដ្ឋស្តីទី លោក ហ៊ុន សែន លើកលែងទោស អតីតមេបក្សប្រឆាំង លោក កឹម សុខា ប៉ុន្តែចាក់សោនយោបាយ

ព្រឹទ្ធសភាកម្ពុជា អនុម័តទាំងស្រុងសេចក្តីព្រាងច្បាប់ស្តីពី «កាតព្វកិច្ចយោធា»

លោក ហ៊ុន សែន ឆ្ងល់ថាតើថៃកំពុងធ្វើអន្តរជាតូបនីយកម្មលើតំបន់សមុទ្រត្រួតស៊ីគ្នាជាមួយកម្ពុជាឬយ៉ាងណា?

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន