 ក្រោមអធិបតីភាពដ៏ខ្ពង់ខ្ពស់របស់ព្រះមហាក្សត្រខ្មែរ។){kind=link}
អ្នកឃ្លាំមើលសង្គម ជំរុញឱ្យរដ្ឋាភិបាលកម្ពុជាធ្វើសមាជជាតិដើម្បីដោះស្រាយភាពចម្រូងចម្រាសលើគម្រោងអភិវឌ្ឍន៍ត្រីកោណ (CLV) ក្រោមអធិបតីភាពដ៏ខ្ពង់ខ្ពស់របស់ព្រះមហាក្សត្រខ្មែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ សីហា នេះថា ទំនាស់ផ្ទៃក្នុងជាតិខ្មែរនាពេលនេះ តម្រូវឱ្យរដ្ឋាភិបាលស្វែងរកវិធីស្របមួយដើម្បីដោះស្រាយការកើតទុក្ខមិនសុខចិត្តរបស់ពលរដ្ឋ រួមទាំងបក្សនយោបាយគ្រប់និន្នាការ ដែលមិនពេញចិត្តនឹងការសម្រេចរបស់រដ្ឋាភិបាលចំពោះគម្រោងអភិវឌ្ឍន៍កម្ពុជា ឡាវ និងវៀតណាម នាពេលនេះ។
លោក សេក សុជាតិ លើកឡើងថា សមាជជាតិគឺមានសារសំខាន់ណាស់នៅពេលដែលកម្លាំងការពារជាតិខ្មែរកំពុងស្ថិតក្នុងស្ថានភាពបែកបាក់ ឬខ្វែងគំនិតគ្នា ព្រោះអ្នកនយោបាយគ្រប់និន្នាការទាំងអស់ អាចលើកយកបញ្ហា និងកង្វល់របស់ខ្លួនមកដាក់លើតុដើម្បីជជែកពិភាក្សាគ្នារកដំណោះស្រាយរួមមួយ ជាពិសេសជុំវិញការអនុវត្តផ្សេងៗទាំងរដ្ឋាភិបាល និងបក្សប្រឆាំងដែលប្រាសចាកពីគោលការណ៍ដើមរបស់រដ្ឋធម្មនុញ្ញកន្លងមក។
ប្រភពដដែលអះអាងថា ប្រសិនបើរដ្ឋាភិបាលបើកឱ្យមានសមាជជាតិ នោះរដ្ឋាភិបាលក៏មិនចាំបាច់តម្រូវឱ្យមន្ត្រីរាជការគាំទ្រការសម្រេចចិត្តរបស់ខ្លួនដែរ ចំណែកឯបក្សប្រឆាំងក៏មិនចាំបាច់ប្រកាសកៀរគរពលរដ្ឋឱ្យចូលរួមធ្វើបាតុកម្មជាមួយខ្លួន ប្រឆាំងនឹងការសម្រេចចិត្តរបស់រដ្ឋាភិបាលនោះឡើយ។
លោក សេក សុជាតិ បញ្ជាក់ថា ប្រសិនបើរដ្ឋាភិបាលអនុវត្តតាមរដ្ឋធម្មនុញ្ញប្រើសមាជជាតិដើម្បីដោះស្រាយបញ្ហាជាតិមែន នោះនឹងនាំឱ្យជាតិខ្មែរទាំងមូលឈប់យល់ច្រឡំគ្នា និងអាចនាំឱ្យខ្មែរឈានទៅរកការសាមគ្គីគ្នា ផ្សះផ្សា រួមទាំងអាចបង្កើតនូវវប្បធម៌ជាតិនិយមដ៏រឹងមាំមួយសម្រាប់ប្រជាជាតិខ្មែរទាំងមូលទៅថ្ងៃអនាគតទៀតផង។
ចាប់តាំងពីមេដឹកនាំបក្សកាន់អំណាចលោក ហ៊ុន សែន ប្រកាសពីគម្រោងអភិវឌ្ឍន៍ត្រីកោណ (CLV DTA) ដោយផ្ទាល់កាលពីថ្ងៃទី២៣ ខែកក្កដា ឆ្នាំ២០២៤ មក ទំនាស់ជាតិខ្មែររវាងបក្សកាន់អំណាច និងបក្សប្រឆាំង បានផ្ទុះឡើងលើដំបៅដែលមានស្រាប់កាន់តែខ្លាំង ក្នុងនោះភាគីទាំងសងខាងបានប្រើវិធីសាស្ត្ររកការគាំទ្រក្នុងចំណោមពលរដ្ឋ និងមន្ត្រីរាជការតាមលទ្ធភាពរបស់ខ្លួនរៀងៗខ្លួន។
ជុំវិញបញ្ហានេះ កាលពីថ្ងៃទី១៤ ខែសីហា ឆ្នាំ២០២៤ លិខិតរបស់អគ្គស្នងការនគរបាលជាតិមួយ ត្រូវបានបែកធ្លាយស្ដីពីរបាយការណ៍ទិន្នន័យស្ថិតិមន្ត្រីនគរបាលជាតិដែលចូលរួមគាំទ្រប្តូរទម្រង់រូបថត ឬ Frame Photo បង្ហាញការគាំទ្រលើគម្រោងអភិវឌ្ឍន៍ត្រីកោណដែលកំពុងប្រទាញប្រទង់គ្នានៅពេលនេះ។
ក្នុងលិខិតដដែលនេះ បញ្ជាក់ថា តាមការណែនាំរបស់នាយករដ្ឋមន្ត្រីលោក ហ៊ុន ម៉ាណែត អគ្គស្នងការនគរបាលជាតិ បានណែនាំដល់មន្ត្រីនគរបាលជាតិឱ្យចូលរួមគាំទ្រគម្រោងអភិវឌ្ឍន៍ត្រីកោណ និងបង្ហាញការជឿជាក់លើរដ្ឋាភិបាល តាមរយៈនៃការប្តូរទម្រង់រូបថត ឬ Frame Photo ឱ្យបានគ្រប់ៗគ្នានៅពេលនេះ។
ប្រភពដដែលបញ្ជាក់ថា មន្ត្រីនគរបាលជាតិដែលធ្វើតាមការណែនាំមានចំនួនជិត ៥ពាន់នាក់ហើយ (៤៨៤៣នាក់) ក្នុងនោះ ស្នងការ-ស្នងការរងមានចំនួន ២៨នាក់ មន្ត្រីចំណុះការិយាល័យជំនាញទាំង ៣៣ មានចំនួនជិត ២ពាន់នាក់ (១៨១៤នាក់) មន្ត្រីចំណុះអធិការដ្ឋាននគរបាលខណ្ឌទាំង ១៤ មានចំនួនជាង ២ពាន់នាក់ (២៦៧០នាក់) និងមន្ត្រីកិច្ចសន្យាមានចំនួនជាង ៣០០នាក់ (៣៣១នាក់) ផងដែរ។
របាយការណ៍នេះ ត្រូវបានពលរដ្ឋ និងមជ្ឈដ្ឋាននានា រិះគន់ថា ជាការគាបសង្កត់ និងគំរាមកំហែងមន្ត្រីរាជការសាធារណៈឱ្យគាំទ្រគម្រោងអភិវឌ្ឍន៍ត្រីកោណ (CLV DTA) ប៉ុណ្ណោះ មិនមែនជាការស្ម័គ្រចិត្តរបស់ពួកគេទេ។ ជាងនេះទៅទៀត ការប្រកាសរបស់ក្រសួងយុត្តិធម៌ពីការដាក់ទោសមន្ត្រីរាជការពី ១០ឆ្នាំទៅ ២០ឆ្នាំ បើពួកគេចូលរួមបាតុកម្មប្រឆាំងនឹងគម្រោងនេះ ក៏រឹតតែបង្ហាញថាមន្ត្រីរាជការកំពុងស្ថិតក្នុងការគាបសង្កត់កាន់តែធ្ងន់ធ្ងរថែមទៀតនៅពេលនេះ៕