គណបក្សកម្លាំងជាតិ ប្រកាសលើកពេលប្រារព្ធពិធីសមាជវិសាមញ្ញរបស់ខ្លួនទៅពេលក្រោយ តាមការស្នើរបស់រដ្ឋបាលរាជធានីភ្នំពេញ ក្រោមហេតុផលទប់ស្កាត់ផែនការប្រមូលផ្ដុំដើម្បីផ្តួលរំលំរដ្ឋាភិបាលកម្ពុជានៅពេលនេះ។
គណបក្សកម្លាំងជាតិ ចេញសេចក្តីប្រកាសព័ត៌មាននៅថ្ងៃទី២២ ខែសីហា ឆ្នាំ២០២៤ នេះថា គណបក្សសូមប្រកាសលើកពេលរៀបចំពិធីសមាជវិសាមញ្ញរបស់ខ្លួនទៅពេលក្រោយវិញ ហើយគណបក្សនឹងជូនដំណឹងសាជាថ្មីអំពីពេលវេលា និងទីតាំងជាក់លាក់តាមក្រោយ។
ប្រភពដដែលបញ្ជាក់ថា គណបក្សគ្រោងនឹងរៀបចំពិធីសមាជវិសាមញ្ញរបស់ខ្លួននៅថ្ងៃទី២៥ ខែសីហា ខាងមុខនេះ ប៉ុន្តែក្រោយប្រជុំពិភាក្សាជាមួយតំណាងសាលារាជធានីភ្នំពេញ ខាងសាលាក្រុងភ្នំពេញបានសម្រេចមិនអនុញ្ញាតឱ្យគណបក្សរៀបចំពិធីសមាជវិសាមញ្ញនេះទេ ដោយស្នើឱ្យលើកពេលទៅថ្ងៃក្រោយវិញ។
កាលពីថ្ងៃទី២០ ខែសីហា ឆ្នាំ២០២៤ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយទៅកាន់គណបក្សកម្លាំងជាតិ ដោយស្នើឱ្យគណបក្សកម្លាំងជាតិ លើកពេលប្រារព្ធពិធីសមាជដែលគ្រោងធ្វើនៅថ្ងៃទី២៥ សីហា ខាងមុខនេះ ទៅពេលក្រោយ។
រដ្ឋបាលសាលារាជធានីភ្នំពេញ បញ្ជាក់ថា ក្នុងករណីប្រធានស្តីទីគណបក្សនេះនៅតែមានះរៀបចំសមាជវិសាមញ្ញនេះ ហើយធ្វើឱ្យប៉ះពាល់ដល់សន្តិសុខ សុវត្ថិភាព និងសណ្ដាប់ធ្នាប់របៀបរៀបរយសាធារណៈ និងមិនគោរពតាមស្មារតីអង្គប្រជុំកាលពីថ្ងៃទី២០ ខែសីហា នោះគណបក្សនេះនឹងត្រូវទទួលខុសត្រូវទាំងស្រុងចំពោះមុខច្បាប់ដោយខ្លួនឯង។
ការរៀបចំពិធីសមាជវិសាមញ្ញរបស់គណបក្សកម្លាំងជាតិ នៅពេលនេះ គឺដើម្បីជ្រើសរើសថ្នាក់ដឹកនាំថ្មីដើម្បីដឹកនាំគណបក្សបន្តទៀត ព្រោះលោក ស៊ុន ចន្ធី ដែលជាប្រធានគណបក្សសព្វថ្ងៃមិនមានសម្បទាស្របច្បាប់សម្រាប់ដឹកនាំគណបក្សនេះឡើយ បន្ទាប់ពីលោកត្រូវបានសមត្ថកិច្ចចាប់ខ្លួនកាលពីដើមខែឧសភា កន្លងទៅនោះ។
បន្ទាប់ពីលោក ស៊ុន ចន្ធី ត្រូវចាប់ខ្លួន លោក ជា មុន្នី ត្រូវបានជ្រើសរើសជាប្រធានស្តីទីរបស់គណបក្សសព្វថ្ងៃនេះ ខណៈលោក ស៊ុន ចន្ធី ក៏មិនដឹងពេលណានឹងអាចមានសេរីភាពឡើងវិញដើម្បីមកដឹកនាំគណបក្សនេះដែរ៕
© 2024, ឌឹ ខេមបូឌា ដេលី. All rights reserved.