 អះអាងថា ចាប់តាំងពីចុងខែកក្កដា មក មនុស្សជាង ១០០នាក់ត្រូវបានចាប់ខ្លួន និងជាង ៦០នាក់កំពុងជាប់ឃុំក្នុងពន្ធនាគារ ដោយសារការរិះគន់កិច្ចព្រមព្រៀងតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម (CLV-DTA)។){kind=link}
អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) អះអាងថា ចាប់តាំងពីចុងខែកក្កដា មក មនុស្សជាង ១០០នាក់ត្រូវបានចាប់ខ្លួន និងជាង ៦០នាក់កំពុងជាប់ឃុំក្នុងពន្ធនាគារ ដោយសារការរិះគន់កិច្ចព្រមព្រៀងតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម (CLV-DTA)។
អង្គការលីកាដូ បានចេញផ្សាយសេចក្តីរាយការណ៍កាលពីថ្ងៃទី១៦ ខែកញ្ញា ឆ្នាំ២០២៤ ថា ចាប់តាំងពីថ្ងៃទី២៣ ខែកក្កដា ឆ្នាំ២០២៤ មក មនុស្សជាង ១០០នាក់ត្រូវបានចាប់ខ្លួន និងជាង ៦០នាក់ត្រូវបានចោទប្រកាន់ និងកំពុងជាប់ឃុំក្នុងពន្ធនាគារ។
សេចក្តីរាយការណ៍ដដែលបញ្ជាក់ថា ការចាប់ខ្លួននេះ គឺដោយសារអ្នកទាំងនោះបង្ហោះសារលើបណ្ដាញសង្គមនានា និងគ្រោងជួបជុំប្រមូលផ្ដុំប្រឆាំងតវ៉ានឹងកិច្ចព្រមព្រៀងតំបន់ត្រីកោណអភិវឌ្ឍន៍ (CLV-DTA) ដែលរដ្ឋាភិបាលកម្ពុជាបានចុះកិច្ចព្រមព្រៀងក្នុងការធ្វើពាណិជ្ជកម្ម និងកិច្ចសហប្រតិបត្តិការរវាងប្រទេសទាំងបីអស់រយៈពេល ២៥ឆ្នាំមកហើយនោះ។
អង្គការលីកាដូ អះអាងថា អ្នកដែលត្រូវបានឃុំខ្លួន និងរងបទចោទប្រកាន់ គឺមានអាយុចន្លោះពី ១៦ឆ្នាំទៅ ៧០ឆ្នាំ ក្នុងចំណោមនោះក៏មានអនីតិជនអាយុក្រោម ១៨ឆ្នាំចំនួន ៤នាក់ផងដែរ។
ប្រភពដដែលថា អ្នកជាប់ឃុំភាគច្រើនដែលរងបទចោទពីបទ រួមគំនិតក្បត់ ថាមានគម្រោងដើម្បីផ្តួលរំលំរដ្ឋាភិបាល ត្រូវប្រឈមនឹងការផ្ដន្ទាទោសឱ្យជាប់ពន្ធនាគារចាប់ពី ៥ឆ្នាំទៅដល់ ១០ឆ្នាំ។
អង្គការលីកាដូ បញ្ជាក់ថា ចំណែកឯអ្នកផ្សេងទៀតដែលរងនូវការចោទប្រកាន់ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” អាចប្រឈមនឹងការជាប់ពន្ធនាគារពី ៦ខែទៅ ២ឆ្នាំ និងអ្នកខ្លះទៀតក៏បានប្រឈមនឹងបទចោទផ្សេងៗទៀតដែរ ហើយអ្នកទាំងនោះកំពុងតែស្ថិតនៅក្នុងពន្ធនាគារ ខណៈដែលពន្ធនាគារភាគច្រើនកំពុងមានបញ្ហាចង្អៀតណែនខ្លាំងសព្វថ្ងៃនេះ។
មនុស្សដែលត្រូវរដ្ឋាភិបាលចាប់ខ្លួនមានទាំងសកម្មជនសង្គម និងសកម្មជននយោបាយ ជាដើម ដូចជា សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន សកម្មជនចលនាមាតាធម្មជាតិ យុវជននៃសមាគមសម្ព័ន្ធនិស្សិតបញ្ញវន្តខ្មែរ រួមទាំងសកម្មជននយោបាយជាច្រើននាក់ផ្សេងទៀតផងដែរ។
ជុំវិញបញ្ហានេះ កាលពីថ្ងៃទី៨ ខែកញ្ញា ឆ្នាំ២០២៤ លោក ហ៊ុន សែន គំរាមថាអ្នកដែលរស់នៅក្រៅស្រុកប្រឆាំងនឹងគម្រោងអភិវឌ្ឍន៍ត្រីកោណអាចរួចខ្លួន ប៉ុន្តែសម្រាប់អ្នករស់នៅក្នុងស្រុក គឺត្រូវតែចាប់ដាក់គុកទាំងអស់ គ្មានវាសនាគេចផុតពីគុកឡើយ។
កាលពីថ្ងៃទី៣០ ខែសីហា ឆ្នាំ២០២៤ សមាជិកសភាអាស៊ានដើម្បីសិទ្ធិមនុស្ស (APHR) បានធ្វើសេចក្តីថ្លែងការណ៍ថា ចាប់តាំងពីខែកក្កដា ឆ្នាំ២០២៤ មក មានមនុស្សយ៉ាងតិច ៩៤នាក់ត្រូវបានចាប់ខ្លួនពីបទរិះគន់ផែនការអភិវឌ្ឍន៍តំបន់ត្រីកោណអភិវឌ្ឍន៍ ក្នុងនោះមនុស្សចំនួន ៥៩នាក់ រួមទាំងកុមារផង នៅតែត្រូវបានឃុំខ្លួនដោយខុសច្បាប់ និងត្រូវបានចោទប្រកាន់ពីបទរៀបចំផែនការផ្តួលរំលំរដ្ឋាភិបាល និងញុះញង់៕