អតីតសង្ឃ ហោ សុខុន ត្រូវបានសមត្ថកិច្ចក្រុងភ្នំពេញចាប់ខ្លួនកាលពីយប់ថ្ងៃអង្គារ បន្ទាប់ពីរិះគន់រដ្ឋាភិបាលជុំវិញគម្រោងត្រីកោណអភិវឌ្ឍន៍កាលពីពេលថ្មីៗនេះ។
មនុស្សដែលស្និទ្ធនឹងលោក ហោ សុខុន បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៨ កញ្ញា ថា អំឡុងម៉ោង ១១ កាលពីយប់ថ្ងៃទី១៧ ខែកញ្ញា ឆ្នាំ២០២៤ ស្រាប់តែមានសំឡេងគោះទ្វារផ្ទះរបស់លោក ហោ សុខុន ដែលស្ថិតនៅម្តុំផ្សារក្រមួន ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
នៅពេលដែលលោក ហោ សុខុន បើកទ្វារបន្ទប់ ស្រាប់តែកម្លាំងសមត្ថកិច្ចស្ទុះចូលទៅចាប់ក្រៀកលោកដោយមិនបង្ហាញដីកាចាប់ខ្លួនអ្វីទាំងអស់ ខណៈមនុស្ស ៣នាក់ផ្សេងទៀតដែលរស់នៅជាមួយលោកក្នុងផ្ទះនោះ ក៏ត្រូវបានចាប់ខ្លួនដែរ រួមមានឈ្មោះ ឈឿន ចំរ៉ុង ឈ្មោះ ងួន និងម្នាក់ទៀតមិនស្គាល់ឈ្មោះ ត្រូវបានដឹកតាមឡានប៉ូលិសចេញទៅភ្លាមៗតែម្តង។
ប្រភពដដែលបញ្ជាក់ថា បន្ទាប់ពីចាប់ខ្លួន សមត្ថកិច្ចបានធ្វើសកម្មភាពរុះរើអីវ៉ាន់ពេញផ្ទះរបស់គាត់ ខណៈទ្រព្យសម្បត្តិមានតម្លៃក្នុងផ្ទះ ក៏ត្រូវបានសមត្ថកិច្ចប្រមូលយកទៅទាំងអស់ដែរ ហើយរហូតដល់ពេលនេះ សាច់ញាតិ និងមិត្រភក្ដិរបស់លោក ហោ សុខុន ក៏មិនទាន់ទទួលបានដំណឹងថាលោកកំពុងនៅទីណាដែរ។
ការចាប់ខ្លួនអតីតសង្ឃរូបនេះ ធ្វើឡើងបន្ទាប់ពីលោក ហោ សុខុន ចេញមុខរិះគន់រដ្ឋាភិបាលជុំវិញគម្រោងអភិវឌ្ឍន៍ត្រីកោណកាលពីពេលថ្មីៗនេះ។
ក្នុងវីដេអូផ្សាយផ្ទាល់ចុងក្រោយរបស់លោក ហោ សុខុន កាលពីថ្ងៃទី៣១ ខែសីហា ឆ្នាំ២០២៤ លោកបានលើកឡើងថា នាយករដ្ឋមន្ត្រីខ្មែរបានដឹកនាំសង្គមឱ្យពលរដ្ឋភ័យខ្លាច និងសង្ស័យគ្នាឯង សូម្បីបងប្អូនបង្កើតក៏ដោយ ប៉ុន្តែសម្រាប់បរទេសវិញ រដ្ឋាភិបាលទុកចិត្តគេណាស់ ទាំងដែលពលរដ្ឋកំពុងព្រួយបារម្ភពីទំនាក់ទំនងជាមួយបរទេសឈ្លានពានដែលខ្លួនកំពុងសហការជាមួយក៏ដោយ។
លោក ហោ សុខុន លើកឡើងថា ហេតុអ្វីបានជារដ្ឋាភិបាលចង់ជាប់ឈ្មោះរួមរស់ជាមួយវៀតណាម ក្នុងគម្រោងអភិវឌ្ឍន៍ត្រីកោណម្ល៉េះ ទាំងដែលពលរដ្ឋទាមទារឱ្យដកខ្លួនចេញពីគម្រោងនេះទៅហើយនោះ។
លោកថា ទង្វើរបស់មេដឹកនាំខ្មែរបែបនេះ ទំនងមានអាថ៌កំបាំងអ្វីនៅពីក្រោយជាមិនខាន បានជាមិនព្រមដកខ្លួនចេញពីគម្រោងនេះតាមការចង់បានរបស់ពលរដ្ឋ។
អ្នកឃ្លាំមើលសង្គម លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៨ កញ្ញា នេះថា បើយោងតាមខ្លឹមសាររដ្ឋធម្មនុញ្ញ រាល់ការបញ្ចេញមតិរបស់ពលរដ្ឋគឺជាសិទ្ធិស្របច្បាប់ ប៉ុន្តែជាញឹកញាប់ រដ្ឋាភិបាលក៏តែងតែចាប់ខ្លួនពលរដ្ឋដែលបញ្ចេញមតិស្របតាមច្បាប់ដែរ ដែលទង្វើបែបនេះគឺជាការរំលោភលើរដ្ឋធម្មនុញ្ញយ៉ាងធ្ងន់ធ្ងរ។
លោក ស៊ឹង សែនករុណា បញ្ជាក់ថា លោកមិនសង្ឃឹមថារដ្ឋាភិបាលដែលដឹកនាំបន្តតាំងពីឪពុកមកកូនមួយនេះ នឹងអាចកែប្រែពីការដឹកនាំដោយការគាបសង្កត់សិទ្ធិពលរដ្ឋ មកជាការដឹកនាំតាមបែបប្រជាធិបតេយ្យដើម្បីបើកលំហសេរីភាពសម្រាប់ពលរដ្ឋបានឡើយ។
លោក ហ៊ុន សែន ធ្លាប់គំរាមកាលពីពេលថ្មីៗនេះថា អ្នកដែលរស់នៅក្រៅស្រុកប្រឆាំងនឹងគម្រោងអភិវឌ្ឍន៍ត្រីកោណ អាចរួចខ្លួន ប៉ុន្តែសម្រាប់អ្នករស់នៅក្នុងស្រុក គឺត្រូវតែចាប់ដាក់គុកទាំងអស់ គ្មានវាសនាគេចផុតពីគុកឡើយ៕
© 2024, ឌឹ ខេមបូឌា ដេលី. All rights reserved.