 កម្ពុជា ឡាវ និងវៀតណាម ជាបន្ទាន់ បើពុំដូច្នោះទេ ខេត្តទាំង៤ ក្នុងតំបន់ត្រីកោណនេះ នឹងបាត់ចេញពីផែនទីប្រទេសកម្ពុជាដូចកោះត្រល់។){kind=link}
អតីតមេដឹកនាំបក្សប្រឆាំងលោក សម រង្ស៊ី អំពាវនាវឱ្យពលរដ្ឋខ្មែរចូលរួមប្រឆាំងរដ្ឋាភិបាលកម្ពុជា ដើម្បីបញ្ឈប់គម្រោងអភិវឌ្ឍន៍ត្រីកោណ (CLV) កម្ពុជា ឡាវ និងវៀតណាម ជាបន្ទាន់ បើពុំដូច្នោះទេ ខេត្តទាំង៤ ក្នុងតំបន់ត្រីកោណនេះ នឹងបាត់ចេញពីផែនទីប្រទេសកម្ពុជាដូចកោះត្រល់។
លោក សម រង្ស៊ី បញ្ជាក់ថា លោក ហ៊ុន សែន ធ្លាប់កាត់កោះត្រល់ឱ្យប្រទេសវៀតណាមម្តងរួចមកហើយ ដូច្នេះថ្ងៃក្រោយ ខេត្តទាំង៤ ក្នុងតំបន់ត្រីកោណនេះ ក៏នឹងបាត់ចេញពីផែនទីប្រទេសកម្ពុជាដូចជាកោះត្រល់អ៊ីចឹងដែរ។
អតីតប្រធានគណបក្សសង្គ្រោះជាតិ លោក សម រង្ស៊ី សរសេរនៅលើទំព័រហ្វេសប៊ុករបស់ខ្លួននៅថ្ងៃទី១៨ កញ្ញា នេះថា ពលរដ្ឋខ្មែរគ្រប់រូបមានសិទ្ធិ និងកាតព្វកិច្ចការពារប្រទេសជាតិខ្លួនស្របតាមរដ្ឋធម្មនុញ្ញដាច់ខាត ហើយប្រជារាស្ត្រខ្មែរក៏មានសិទ្ធិប្តូររបបដឹកនាំរបស់លោក ហ៊ុន សែន ដែរ ព្រោះមេដឹកនាំដែលវៀតណាមលើកបន្តុបមួយនេះ មិនអាចកែខ្លួនមកការពារផលប្រយោជន៍សម្រាប់ជាតិខ្មែរបានឡើយ។
លោក សម រង្ស៊ី អះអាងថា ទឹកដីខ្មែរជាច្រើនអន្លើត្រូវបានលោក ហ៊ុន សែន កាត់ទៅឱ្យវៀតណាម គ្រប់គ្រងចាប់តាំងពីគាត់ត្រូវបានកងទ័ពវៀតណាមលើកបន្តុបឱ្យដឹកនាំកម្ពុជាអំឡុងទសវត្សរ៍១៩៨០ មក ហើយចុងក្រោយនេះ លោក ហ៊ុន សែន ក៏បានបំពេញបំណងវៀតណាម តាមរយៈគម្រោងអភិវឌ្ឍន៍ត្រីកោណដែលត្រូវដាក់ខេត្តខ្មែរចំនួនបួន ដើម្បីឱ្យវៀតណាមគ្រប់គ្រងនៅថ្ងៃអនាគតបន្ថែមទៀត។
អតីតមេដឹកនាំបក្សប្រឆាំងរូបនេះបញ្ជាក់ថា លោក ហ៊ុន សែន មានវិធីតែម្យ៉ាងគត់ គឺត្រូវតែការពារអំណាចតទៅទៀត ដើម្បីរួចពីទោសទណ្ឌដែលគាត់ធ្លាប់ប្រព្រឹត្ត ព្រោះថានៅពេលដែលគាត់បាត់បង់អំណាច គាត់នឹងត្រូវកាត់ទោសចំពោះមុខតុលាការឯករាជ្យណាមួយ ហើយគាត់ច្បាស់ជាទទួលទោសធ្ងន់ធ្ងរជាទីបំផុតចំពោះបទឧក្រិដ្ឋដែលគាត់ប្រព្រឹត្តលើទឹកដីខ្មែរ និងពលរដ្ឋខ្មែរកន្លងមក។
ចំណែកតំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានសរសេរលើទំព័រហ្វេសប៊ុករបស់ខ្លួននៅថ្ងៃទី១៨ កញ្ញា នេះថា ផ្អែកតាមលិខិតរបស់អគ្គទេសាភិបាលបារាំងប្រចាំឥណ្ឌូចិន លោក ប្រេវីយ៉េ បញ្ជាក់ថា បារាំងមិនបានកាត់កោះត្រល់ទៅឱ្យកូសាំងស៊ីន ឬកម្ពុជាក្រោមនាឆ្នាំ១៩៣៩ ដូចលោក ហ៊ុន សែន បានអះអាងនោះទេ។
លោក អ៊ុំ សំអាន បញ្ជាក់ថា នៅពេលបារាំងកាត់ទឹកដីកូសាំងស៊ីន ឬកម្ពុជាក្រោមនៅឆ្នាំ១៩៤៩ ឱ្យទៅព្រះចៅ បាវដាយ របស់វៀតណាម បារាំងមិនបានកាត់កោះត្រល់ទៅជាមួយនោះទេ។
លោកថា កោះត្រល់ទើបតែបានបាត់បង់នៅពេលដែលលោក ហ៊ុន សែន ចុះហត្ថលេខាលើសន្ធិសញ្ញាតំបន់ទឹកប្រវត្តិសាស្ត្រឆ្នាំ១៩៨២ សម័យវៀតណាមត្រួតត្រាកម្ពុជា និងសន្ធិសញ្ញាបំពេញបន្ថែមឆ្នាំ២០០៥ ប៉ុណ្ណោះ។
ជុំវិញបញ្ហានេះ លោក ហ៊ុន សែន បានបញ្ជាក់កាលពីចុងខែកក្កដា ឆ្នាំ២០២៤ កន្លងទៅថ្មីៗនេះថា លោកនឹងមិនដកខេត្តទាំង៤ ចេញពីតំបន់ត្រីកោណអភិវឌ្ឍន៍ជាមួយវៀតណាម ដាច់ខាត ហើយលោកក៏គ្រោងស្នើរដ្ឋាភិបាលថ្មីរបស់លោក ហ៊ុន ម៉ាណែត ដាក់ខេត្តព្រះវិហារ ចូលក្នុងគម្រោងនេះបន្ថែមទៀតដែរ៕