 ហើយក៏ដោយ។){kind=link}
នាយករដ្ឋមន្ត្រីកម្ពុជា លោក ហ៊ុន ម៉ាណែត ប្ដេជ្ញាជំរុញការអភិវឌ្ឍខេត្តភូមិភាគឦសានដូចមុនដដែល បើទោះបីរដ្ឋាភិបាលប្រកាសដកខ្លួនចេញពីកិច្ចសហប្រតិបត្តិការតំបន់អភិវឌ្ឍន៍ត្រីកោណ កម្ពុជា ឡាវ វៀតណាម (CLV-DTA) ហើយក៏ដោយ។
លោក ហ៊ុន ម៉ាណែត ដែលកំពុងកាន់តំណែងនាយករដ្ឋមន្ត្រីតពីឪពុក ចេញសារសំឡេងពិសេសប្រវែងជាង ៤នាទីលើទំព័រហ្វេសប៊ុករបស់ខ្លួននៅថ្ងៃទី២៣ ខែកញ្ញា ឆ្នាំ២០២៤ នេះថា ពលរដ្ឋមួយចំនួនបារម្ភខ្លាចរាជរដ្ឋាភិបាលឈប់អភិវឌ្ឍខេត្តភូមិភាគឦសាន បន្ទាប់ពីប្រកាសដកខ្លួនចេញពីតំបន់អភិវឌ្ឍន៍ត្រីកោណ។
លោក ហ៊ុន ម៉ាណែត លើកឡើងថា រាជរដ្ឋាភិបាលកម្ពុជានៅតែបន្តអភិវឌ្ឍតំបន់ភូមិភាគឦសានដដែល ដើម្បីធានាការពារទឹកដី អធិបតេយ្យភាពរបស់កម្ពុជាឱ្យរឹងមាំ ព្រោះនេះគឺជាការចង់បានរបស់ពលរដ្ឋខ្មែរដ៏ច្រើនលើសលប់ ជាពិសេសពលរដ្ឋដែលរស់នៅផ្ទាល់នៅខេត្តភូមិភាគឦសានតែម្តង។
លោកអះអាងថា រដ្ឋាភិបាលនឹងបន្តគោលនយោបាយជំរុញអភិវឌ្ឍខេត្តភូមិភាគឦសានបន្តទៀត រួមមាន ការបោះបង្គោលព្រំដែនជាមួយប្រទេសជិតខាង ការកសាងហេដ្ឋារចនាសម្ព័ន្ធ ជាពិសេសផ្លូវក្រវាត់ព្រំដែន និងការដាក់ចេញនូវកញ្ចប់លើកទឹកចិត្ត និងជំរុញការវិនិយោគខេត្តភូមិភាគឦសាននៅឆ្នាំ២០២៥ ជាដើម។
លោក ហ៊ុន ម៉ាណែត បញ្ជាក់ថា មកទល់នឹងពេលនេះ ពលរដ្ឋទាំងក្នុង និងក្រៅប្រទេសបានចូលរួមបរិច្ចាគថវិកាដោយស្ម័គ្រចិត្តចូលរួមកសាងហេដ្ឋារចនាសម្ព័ន្ធតាមព្រំដែន កសាងផ្លូវខ្សែក្រវាត់ព្រំដែនប្រមាណជា ៧០ម៉ឺននាក់ហើយ ដែលគិតជាថវិកាប្រមាណ ២១លានដុល្លារអាមេរិក។
អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ប្រាប់សារព័ត៌មាន The Cambodia Daily នៅថ្ងៃទី២៣ កញ្ញា នេះថា ការប្រកាសប្ដេជ្ញាចិត្តរបស់រាជរដ្ឋាភិបាលក្នុងការជំរុញការអភិវឌ្ឍខេត្តនៅភូមិឦសានក្រោយដកខ្លួនចេញពីកិច្ចសហប្រតិបត្តិការជាមួយឡាវ និងវៀតណាម គឺជារឿងល្អ ហើយនេះក៏ជាបំណងរបស់ពលរដ្ឋចង់បានដែលស្របគ្នាជាមួយនឹងរាជរដ្ឋាភិបាលដែរ។
លោក សេង វណ្ណលី លើកឡើងថា ការកសាងខ្សែក្រវាត់ព្រំដែនរបស់កម្ពុជា គឺមានកម្រិតអន់ថយនៅឡើយ បើប្រៀបធៀបជាមួយប្រទេសឡាវ និងវៀតណាម ព្រោះថាថ្វីត្បិតតែកម្ពុជាបានកសាងផ្លូវតាមខ្សែក្រវាត់ព្រំដែនបានខ្លះមែន ប៉ុន្តែមិនទាន់មានភាពល្អប្រសើរក្នុងការធានាការពារព្រំដែនរបស់កម្ពុជាដូចការអះអាងរបស់រដ្ឋាភិបាលនៅឡើយទេ។
អ្នកជំនាញនយោបាយការទូតអន្តរជាតិរូបនេះបញ្ជាក់ថា អ្វីដែលរដ្ឋាភិបាលត្រូវតែធ្វើជាបន្ទាន់ ហើយក៏ជាអ្វីដែលពលរដ្ឋចង់បានដែរនោះ គឺការអនុវត្តច្បាប់អន្តោប្រវេសន៍ឱ្យបានហ្មត់ចត់ និងតឹងរ៉ឹងជាទីបំផុតសម្រាប់បរទេសជិតខាងដែលធ្លាប់តែឆ្លងដែនចូលកម្ពុជាដោយគ្មានច្បាប់ទម្លាប់ត្រឹមត្រូវកន្លងមក។
អតីតនាយករដ្ឋមន្ត្រីកម្ពុជា លោក ហ៊ុន សែន កាលពីថ្ងៃទី២០ ខែកញ្ញា ឆ្នាំ២០២៤ បានប្រកាសដកខេត្តទាំង៤ របស់កម្ពុជា ចេញពីតំបន់ត្រីកោណអភិវឌ្ឍន៍ (CLV-DTA) បន្ទាប់ពីធ្វើកិច្ចសហប្រតិបត្តិការជាមួយឡាវ និងវៀតណាម អស់រយៈពេល ២៥ឆ្នាំកន្លងមក៕