ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី អំពាវនាវឱ្យស្ថាប័នរដ្ឋសភា និងស្ថាប័នរដ្ឋាភិបាល ខិតខំបន្តអនុវត្តកម្មវិធីនយោបាយ និងយុទ្ធសាស្ត្រអភិវឌ្ឍប្រទេសជាតិឱ្យកាន់តែសកម្ម ដើម្បីធានាបាននូវសុខសន្តិភាព ស្ថិរភាព ការលើកកម្ពស់ជីវភាពប្រជាជន និងកំណើនសេដ្ឋកិច្ចសង្គមឱ្យកាន់តែល្អប្រសើរបន្ថែមទៀត។
ព្រះមហាក្សត្រខ្មែរបានចេញព្រះរាជសារក្នុងឱកាសបើកបវេសនកាលនៃរដ្ឋសភាកម្ពុជា នៅថ្ងៃទី៣១ ខែតុលា ឆ្នាំ២០២៤ នេះ ដោយស្នើឱ្យជនរួមជាតិខ្មែរទូទាំងប្រទេស បន្តថែរក្សាសាមគ្គីភាព និងឯកភាពជាតិឱ្យកាន់តែរឹងមាំ ដើម្បីជំរុញនាវាកម្ពុជាឆ្ពោះទៅរកការអភិវឌ្ឍ សម្បូរសប្បាយរុងរឿងដូចអារ្យប្រទេសនានានៅលើសកលលោក។
ព្រះមហាក្សត្រខ្មែរមានព្រះរាជបន្ទូលថា ក្នុងរយៈពេលកន្លងទៅនេះ រដ្ឋសភាអាណត្តិទី៧ បានបំពេញការងារតួនាទីភារកិច្ចស្នូលរបស់ខ្លួនប្រកបដោយស្មារតីទទួលខុសត្រូវខ្ពស់ និងបានអនុម័តនូវសេចក្តីព្រាងច្បាប់ជាច្រើន ដើម្បីបម្រើដល់ផលប្រយោជន៍ប្រជាជាតិ ព្រមទាំងសម្រេចបានលទ្ធផលល្អប្រសើរជាឧត្ដមប្រយោជន៍ជាតិមាតុភូមិ និងប្រជាជនគួរជាទីមោទនៈ។
សម្តេចព្រះបរមនាថ នរោត្ដម សីហមុនី មានព្រះបន្ទូលបញ្ជាក់ថា ចំណែករាជរដ្ឋាភិបាលអាណត្តិទី៧ នេះ ក្រោមការដឹកនាំដ៏វាងវៃ និងមោះមុតរបស់នាយករដ្ឋមន្ត្រីកម្ពុជា លោក ហ៊ុន ម៉ាណែត ក្នុងរយៈពេល ១ឆ្នាំមកនេះ ក៏បានធ្វើឱ្យស្ថានភាពសេដ្ឋកិច្ចបន្តកើនឡើងជាលំដាប់ និងបានកសាងហេដ្ឋារចនាសម្ព័ន្ធជាតិសំខាន់ៗជាច្រើនផងដែរ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៣១ តុលា នេះថា ប្រព័ន្ធដឹកនាំនៅកម្ពុជាសព្វថ្ងៃនេះ គឺស្ថិតនៅក្រោមអំណាចផ្ដាច់ការអាជ្ញាទំនើងចិត្តរបស់បុគ្គលតែម្នាក់គត់ គឺលោក ហ៊ុន សែន ដែលមានគោលការណ៍អាត្មានិយមដឹកនាំដើម្បីតែផលប្រយោជន៍អំណាចគ្រួសារហ៊ុនតែមួយមុខប៉ុណ្ណោះ។
អ្នកវិភាគនយោបាយរូបនេះអះអាងថា របៀបដឹកនាំនៅកម្ពុជា គឺជារបបដឹកនាំគ្រួសារកុម្មុយនីស្ត ព្រោះថាលោក ហ៊ុន ម៉ាណែត ជានាយករដ្ឋមន្ត្រី អ្នកស្រី ឃួន សុដារី ជាប្រធានរដ្ឋសភា ចំណែកព្រះមហាក្សត្រជាប្រមុខរដ្ឋ ប៉ុន្តែការដឹកនាំជាក់ស្ដែង គឺលោក ហ៊ុន សែន ដែលជាប្រធានគណបក្សប្រជាជនកម្ពុជា ជាអ្នកបង្គាប់បញ្ជាទាំងអស់ រួមទាំងតុលាការផងដែរ។
ជាក់ស្តែង សព្វថ្ងៃនេះ លោក ហ៊ុន សែន កាន់តំណែងជាប្រធានគណបក្សប្រជាជនកម្ពុជាផង ជាប្រធានឧត្ដមក្រុមប្រឹក្សាព្រះ មហាក្សត្រផង និងកាន់តំណែងជាប្រធានព្រឹទ្ធសភាផងដែរ ហើយតំណែង និងអំណាចរបស់គាត់នៅពេលនេះ បានគ្របដណ្ដប់លើនាយករដ្ឋមន្ត្រីដែលជាកូនរបស់គាត់ផង គ្របដណ្ដប់លើប្រធានតុលាការផង និងគ្របដណ្ដប់លើស្ថាប័នព្រះមហាក្សត្រទាំងស្រុងផងដែរ។
ចំណែកអ្នកស្រី ប៊ុន រ៉ានី កាន់តំណែងជាប្រធានកាកបាទក្រហមកម្ពុជា ប៉ុន្តែមានអំណាចគ្រប់គ្រងលើប្រធានរដ្ឋសភា អ្នកស្រី ឃួន សុដារី ដែលមនុស្សជំនិតរបស់គាត់ពេញទំហឹង ដូច្នេះមានន័យថា អំណាចកំពូលទាំងបីរបស់ប្រទេសកម្ពុជា ដូចជា ស្ថាប័ននីតិប្រតិបត្តិ គឺរដ្ឋាភិបាល ស្ថាប័ននីតិប្បញ្ញត្តិ គឺរដ្ឋសភា និងស្ថាប័នតុលាការ ត្រូវលោក ហ៊ុន សែន និងភរិយារបស់គាត់គ្រប់គ្រងផ្ដាច់មុខទៅហើយ៕
© 2024, ឌឹ ខេមបូឌា ដេលី. All rights reserved.