 ថាការដកខ្លួនចេញពីកិច្ចព្រមព្រៀងគម្រោង CLV-DTA មិនបង្កផលប៉ះពាល់ដល់ទំនាក់ទំនងរវាងប្រទេសទាំងបីនោះទេ ពីព្រោះប្រទេសទាំងបីប្រើយន្តការកិច្ចសហប្រតិបត្តិការកម្រិតប្រទេស។){kind=link}
ប្រធានព្រឹទ្ធសភាប្រទេសកម្ពុជា លោក ហ៊ុន សែន បញ្ជាក់ជាថ្មីទៅរដ្ឋមន្ត្រីក្រសួងការពារប្រទេសវៀតណាម លោក ហ្វាន វ៉ាន់ យ៉ាង (PHAN VAN GIANG) ថាការដកខ្លួនចេញពីកិច្ចព្រមព្រៀងគម្រោង CLV-DTA មិនបង្កផលប៉ះពាល់ដល់ទំនាក់ទំនងរវាងប្រទេសទាំងបីនោះទេ ពីព្រោះប្រទេសទាំងបីប្រើយន្តការកិច្ចសហប្រតិបត្តិការកម្រិតប្រទេស។
ថ្លែងនៅក្នុងពិធីជួបសម្ដែងការគួរសមជាមួយលោក ហ្វាន វ៉ាន់ យ៉ាង រដ្ឋមន្ត្រីក្រសួងការពារប្រទេសនៃសាធារណរដ្ឋសង្គមនិយមវៀតណាម នៅវិមាន ៧មករា រាជធានីភ្នំពេញ នៅថ្ងៃទី២៦ ខែវិច្ឆិកា ឆ្នាំ២០២៤ លោក ហ៊ុន សែន ថាទំនាក់ទំនងរវាងប្រទេសកម្ពុជា និងប្រទេសវៀតណាម ដែលបានកត់ត្រាជាប្រវត្តិសាស្ត្រ និងបង្ហាញនៅវិមានឈ្នះឈ្នះ ចាប់ផ្តើមតាំងពីចលនារំដោះជាតិកម្ពុជារបស់លោក។
លោក ហ៊ុន សែន ថាវិមានឈ្នះឈ្នះ គឺជាផ្នែកមួយដ៏សំខាន់នៃការរក្សាទុកប្រវត្តិទំនាក់ទំនងនេះ។
លោក ហ៊ុន សែន អះអាងថា ចំពោះកិច្ចសហប្រតិបត្តិការ CLV-DTA ទោះបីជាប្រទេសកម្ពុជាបានដកខ្លួនចេញពីយន្តការនេះក្តី ក៏មិនបង្កផលប៉ះពាល់ដល់ទំនាក់ទំនងរវាងប្រទេសទាំងបីនោះដែរ ដោយប្រទេសទាំងបីប្រើយន្តការកិច្ចសហប្រតិបត្តិការកម្រិតប្រទេសមកជំនួសឱ្យកិច្ចសហប្រតិបត្តិការកម្រិតតំបន់នេះវិញ។
លោក ហ្វាន វ៉ាន់ យ៉ាង រដ្ឋមន្ត្រីក្រសួងការពារប្រទេសនៃសាធារណរដ្ឋសង្គមនិយមវៀតណាម បានលើកឡើងថា វៀតណាមនឹងបន្តពង្រឹងកិច្ចសហប្រតិបត្តិការ និងបន្តគាំទ្រកម្ពុជាឥតឈប់ឈរជាមួយប្រទេសកម្ពុជា ក្នុងការបំពេញមុខនាទីនៅលើឆាកអន្តរជាតិនានា។
លោក ហ្វាន វ៉ាន់ យ៉ាង ថ្លែងថា លោកសង្ឃឹមថាការជំរុញកិច្ចសហប្រតិបត្តិការប្រទេសទាំងពីរនឹងធ្វើឱ្យប្រជាជននៃប្រទេសទាំងពីរ ជាពិសេសកងកម្លាំងយោធា បង្កើនភាពជឿជាក់រវាងគ្នា និងលើកកម្ពស់ការទទួលខុសត្រូវ មិនអនុញ្ញាតឱ្យពួកអមិត្តយកប្រទេសមួយប្រឆាំងនឹងប្រទេសមួយទៀតនោះឡើយ។
ប្រភពដដែលបានស្នើឲ្យប្រទេសកម្ពុជាជួយបង្កលក្ខណៈល្អដល់ក្រុមហ៊ុនវិនិយោគវៀតណាមនានានៅកម្ពុជា ដើម្បីជាការរួមចំណែកអភិវឌ្ឍសេដ្ឋកិច្ចរវាងប្រទេសទាំងពីរ និងដូចគ្នានេះ ស្នើអាជ្ញាធរកម្ពុជា ជួយបន្តសម្រួលដល់ការស្វែងរកអដ្ឋិធាតុយុទ្ធជននៃកងទ័ពវៀតណាម ដែលបានពលីជីវិតនៅក្នុងប្រទេសកម្ពុជាផងដែរ។
ព្រះមហាក្សត្រខ្មែរ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី បានចេញព្រះរាជក្រមច្បាប់ ស្ដីពី «និរាករណ៍ច្បាប់ស្ដីពីការអនុម័តយល់ព្រមលើកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម» កាលពីថ្ងៃទី២១ ខែវិច្ឆិកា ឆ្នាំ២០២៤ នេះ។
កាលពីថ្ងៃទី៨ ខែវិច្ឆិកា ឆ្នាំ២០២៤ រដ្ឋសភាកម្ពុជា បានអនុម័តលុបចោលនូវកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍នេះ ខណៈព្រឹទ្ធសភា ក៏បានអនុម័តសេចក្ដីព្រាងច្បាប់ស្ដីពីការអនុម័តលុបចោលកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឬហៅកាត់ថា CLV-DTA នៅថ្ងៃទី១៣ ខែវិច្ឆិកា កន្លងទៅដែរ៕
© 2024, ឌឹ ខេមបូឌា ដេលី. All rights reserved.