អ្នកវិភាគនយោបាយសង្គម លើកឡើងថា ដើម្បីចៀសវាងការរាលដាលបញ្ហាដល់សន្តិសុខក្នុងតំបន់ និងការកសាងខ្សែបន្ទាត់ព្រំដែនសន្តិភាពរវាងប្រទេសកម្ពុជា និងប្រទេសថៃ ព្រមទាំងបញ្ចៀសនូវសម្អប់កាន់តែជ្រៅរវាងជាតិសាសន៍ទាំងពីរ រដ្ឋាភិបាលខ្មែរគ្មានជម្រើសផ្សេងក្រៅពីប្តឹងទៅតុលាការអន្តរជាតិឡើយ ជុំវិញការទាមទារសិទ្ធិគ្រប់គ្រងកោះគុតត្រឡប់មកវិញ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ សរសេរលើគណនីហ្វេសប៊ុករបស់ខ្លួននៅថ្ងៃទី២៦ វិច្ឆិកា នេះថា កោះគុតគឺជាកម្មសិទ្ធិរបស់ប្រទេសកម្ពុជា ហើយពលរដ្ឋខ្មែរត្រូវតែតវ៉ាដាច់ខាតឱ្យរដ្ឋាភិបាលត្រកូលហ៊ុន ប្តឹងទៅតុលាការអន្តរជាតិ ដើម្បីទាមទារយកចំណែកទឹកដីរបស់ខ្លួនមកគ្រប់គ្រងវិញដោយស្របច្បាប់។
លោក គឹម សុខ ជំរុញឱ្យពលរដ្ឋខ្មែរត្រូវតែនាំគ្នាប្រឆាំងដាច់ខាតចំពោះការចរចាទ្វេភាគីរវាងប្រទេសកម្ពុជា និងប្រទេសថៃ ជុំវិញបញ្ហាកោះគុតនេះ ព្រោះថៃ កំពុងប្រើកម្លាំងត្រួតត្រាលើកោះនេះទាំងបំពានច្បាប់អន្តរជាតិរួចទៅហើយ ដូច្នេះប្រទេសកម្ពុជាមានតែប្តឹងទៅតុលាការអន្តរជាតិ ដើម្បីបិទផ្លូវតវ៉ាពីសំណាក់រដ្ឋាភិបាលថៃ ដូចករណីក្ដីក្ដាំប្រាសាទព្រះវិហារដូច្នោះដែរ។
លោក គឹម សុខ បានបង្ហោះក្នុងហ្វេសប៊ុកនូវផែនទីអន្តរជាតិចំនួន ៤ តាមលំដាប់ ដែលលោកថាជាផែនទីពិភពលោកទទួលស្គាល់ជាគោលការណ៍ខ្សែព្រំដែនឥតកែប្រែរាប់រយឆ្នាំមកហើយជុំវិញរឿងកោះគុតនោះ គឺ៖
- ផែនទីព្រំដែនកំណត់ក្នុងសន្ធិសញ្ញាក្រោយសង្គ្រាមរវាងប្រទេសព័រទុយហ្គាល់ និងអេស្ប៉ាញ ឆ្នាំ១៤៩៤ ហៅថាបន្ទាត់ Tordesillas
- ច្បាប់បារាំង តាមអនុសញ្ញា Kellog-Briand ឆ្នាំ១៩២៨
- ច្បាប់អ.ស.ប ឬធម្មនុញ្ញសហប្រជាជាតិ ឆ្នាំ១៩៤៥
- ច្បាប់ជប៉ុន ឆ្នាំ១៩៤៦ បន្ទាប់សាលាវិនិច្ឆ័យកាត់ក្តីឧក្រិដ្ឋជនសង្គ្រាមនៅប្រទេសជប៉ុន។
ចលនាខ្មែរដើម្បីប្រជាធិបតេយ្យ (KMD) ចេញសេចក្តីថ្លែងការណ៍កាលពីថ្ងៃទី២៥ វិច្ឆិកា ដោយប្រកាសគាំទ្រយ៉ាងពេញទំហឹងចំពោះការទាមទាររបស់ពលរដ្ឋដែលបានជំរុញឲ្យរដ្ឋាភិបាលក្រុងភ្នំពេញ ត្រូវនាំយកករណីកោះគុត និងដែនសមុទ្រត្រួតស៊ីគ្នារវាងកម្ពុជា និងថៃ ប្តឹងទៅកាន់តុលាការអន្តរជាតិ។
KMD លើកឡើងថា ការធ្វើបែបនេះ គឺជាមធ្យោបាយតែមួយគត់ដែលបង្ហាញពីភាពចាស់ទុំក្នុងការដោះស្រាយបញ្ហារបស់កម្ពុជាផង និងអាចបញ្ចៀសបាននូវការប្រឈមមុខដាក់គ្នាតាមរយៈការប្រើប្រាស់កម្លាំងប្រដាប់អាវុធរវាងប្រជាជាតិទាំងពីរដែលជាប្រទេសជិតខាងនឹងគ្នាផងដែរ។
ចលនាខ្មែរដើម្បីប្រជាធិបតេយ្យ ជំរុញឲ្យរាជរដ្ឋាភិបាលក្រុងភ្នំពេញត្រូវបញ្ឈប់ជាបន្ទាន់នូវការគំរាមកំហែងតាមគ្រប់រូបភាពលើប្រជាពលរដ្ឋខ្លួនឯង ដែលគ្រាន់តែសម្ដែងមតិ និងបង្ហាញក្តីបារម្ភទាក់ទងនឹងបូរណភាពទឹកដី ព្រោះថាសកម្មភាពរបស់ពលរដ្ឋ និងយុវជនគ្រប់រូប គឺជាការបំពេញតួនាទី សិទ្ធិ និងកាតព្វកិច្ចដែលត្រូវបានធានាដោយកិច្ចព្រមព្រៀងសន្តិភាពក្រុងប៉ារីស និងរដ្ឋធម្មនុញ្ញប្រទេសកម្ពុជា។
ទោះជាយ៉ាងណាក៏ដោយ កាលពីថ្ងៃទី២១ វិច្ឆិកា កន្លងទៅ ទាំងលោក ហ៊ុន សែន និងលោក ហ៊ុន ម៉ាណែត មិនបានបញ្ជាក់ថា ប្រទេសកម្ពុជាមានចំណែកក្នុងការគ្រប់គ្រងកោះគុត ឬក៏អត់នោះទេ ប៉ុន្តែអ្វីដែលលោក ហ៊ុន សែន បញ្ជាក់ច្បាស់នោះ គឺគាត់មានគម្រោងបង្កើតច្បាប់ដាក់អ្នកដែលទាមទារឱ្យប្តឹងថៃ រឿងកោះគុតទៅតុលាការអន្តរជាតិ ជាក្រុមភេរវករទៅវិញ៕
© 2024, ឌឹ ខេមបូឌា ដេលី. All rights reserved.