 ជារដ្ឋមន្ត្រីការបរទេសក្នុងរដ្ឋបាលប្រធានាធិបតីថ្មីរបស់អាមេរិកឆ្នាំក្រោយនេះ គឺជាបណ្តាសាយ៉ាងពិតប្រាកដសម្រាប់ប្រទេសកម្ពុជា និងពលរដ្ឋខ្មែរ បើការរំលោភសិទ្ធិមនុស្ស និងការជាន់ឈ្លីលទ្ធិប្រជាធិបតេយ្យនៅតែបន្ត។){kind=link}
សកម្មជនខ្មែរក្នុងទីក្រុងឡងប៊ិច លើកឡើងថា វត្តមានសមាជិកព្រឹទ្ធសភាមកពីគណបក្សសាធារណរដ្ឋ លោក ម៉ាកូ រ៉ូបីអូ (Marco Rubio) ជារដ្ឋមន្ត្រីការបរទេសក្នុងរដ្ឋបាលប្រធានាធិបតីថ្មីរបស់អាមេរិកឆ្នាំក្រោយនេះ គឺជាបណ្តាសាយ៉ាងពិតប្រាកដសម្រាប់ប្រទេសកម្ពុជា និងពលរដ្ឋខ្មែរ បើការរំលោភសិទ្ធិមនុស្ស និងការជាន់ឈ្លីលទ្ធិប្រជាធិបតេយ្យនៅតែបន្ត។
សកម្មជនក្នុងសហគមន៍ខ្មែរនៅទីក្រុងឡងប៊ិច លោក មួង ណារ៉េត លើកឡើងក្នុងការផ្សាយផ្ទាល់របស់ខ្លួនកាលពីយប់ថ្ងៃទី២៥ ខែធ្នូ នេះថា ប្រជាពលរដ្ឋខ្មែរដែលរស់នៅជុំវិញពិភពលោក នឹងមានឱកាសកាន់តែច្រើនក្នុងការទាមទារឱ្យមានការស្ដារលទ្ធិប្រជាធិបតេយ្យ និងការគោរពសិទ្ធិមនុស្សនៅប្រទេសកម្ពុជា បន្ទាប់ពីលោក ម៉ាកូ រ៉ូបីអូ ត្រូវបានតែងតាំងជារដ្ឋមន្ត្រីការបរទេសសហរដ្ឋអាមេរិកនៅឆ្នាំក្រោយនេះ។
សកម្មជនខ្មែររូបនេះលើកឡើងថា ដើម្បីស្ដារលទ្ធិប្រជាធិបតេយ្យ និងលើកកម្ពស់ការគោរពសិទ្ធិមនុស្សឡើងវិញ សហរដ្ឋអាមេរិកគ្មានជម្រើសផ្សេងក្រៅពីការដាក់ទណ្ឌកម្មលើរដ្ឋាភិបាលប្រទេសកម្ពុជាឡើយ ព្រោះថាមានតែធ្វើបែបនេះទេ ទើបអាចធានានូវសិទ្ធិនានារបស់ពលរដ្ឋក្នុងការអនុវត្តដើម្បីរួចផុតពីការរំលោភបំពាន និងការគាបសង្កត់ពីអ្នកមានអំណាច។
លោក មួង ណារ៉េត អះអាងថា ការជាន់ឈ្លីប្រជាធិបតេយ្យ និងការរំលោភសិទ្ធិមនុស្សនៃរាជរដ្ឋាភិបាលកម្ពុជាកន្លងមក បានបំផ្លាញប្រទេសកម្ពុជា និងពលរដ្ឋខ្មែរជាងការដាក់ទណ្ឌកម្មពីសហរដ្ឋអាមេរិករាប់រយដងទៅទៀត ព្រោះវាបាននាំទៅរកការបំផ្លាញសិទ្ធិសេរីភាពរបស់ពលរដ្ឋដែលមានចែងក្នុងច្បាប់ និងធ្វើឱ្យខូចទំនាក់ទំនងការទូតជាមួយប្រទេសប្រកាន់របបប្រជាធិបតេយ្យផងដែរ។
លោកបន្តថា ក្រៅពីនេះ ក៏បានធ្វើឱ្យបាត់ជំនួយពីបណ្តាប្រទេសដែលទាមទារឱ្យប្រទេសកម្ពុជាគោរពសិទ្ធិមនុស្ស ដូចជា សហភាពអឺរ៉ុប និងសហរដ្ឋអាមេរិក ថែមទៀត។ បន្ថែមលើនេះទៀត ក៏បានបំផ្លាញលុយជាតិរាប់សិបលានដុល្លារផងដែរ ដោយសារតែរដ្ឋាភិបាលខ្មែរបានយកលុយទាំងនោះទៅជួលក្រុមហ៊ុនបញ្ចុះបញ្ចូលឱ្យជួយទប់ស្កាត់កុំឱ្យសហរដ្ឋអាមេរិកដាក់ទណ្ឌកម្មលើមន្ត្រីរបស់ខ្លួន ជាដើម។
លោក មួង ណារ៉េត បញ្ជាក់ថា សហរដ្ឋអាមេរិកគ្មានប្រយោជន៍ពីការដាក់ទណ្ឌកម្មលើរដ្ឋាភិបាលប្រទេសកម្ពុជាដែលរំលោភសិទ្ធិមនុស្សនោះទេ ប៉ុន្តែដោយសារពួកគេបានគិតគូរពីការរស់នៅរបស់ពលរដ្ឋខ្មែរដែលមិនទទួលសិទ្ធិសេរីភាពស្មើគ្នាក្នុងនាមជាមនុស្សចំពោះមុខច្បាប់ជាមួយអ្នកមានអំណាចផ្ដាច់ការប៉ុណ្ណោះ។
លោកគូសបញ្ជាក់ថា រាល់ទណ្ឌកម្មពីសហរដ្ឋអាមេរិក គឺគ្មានអ្វីក្រៅពីការទាមទារឱ្យរាជរដ្ឋាភិបាលស្ដារសិទ្ធិមនុស្ស និងប្រជាធិបតេយ្យឡើងវិញឡើយ ដើម្បីឱ្យពួកគេអាចផ្តល់ជំនួយដល់ពលរដ្ឋខ្មែរបន្តទៅទៀត។
លោក ម៉ាកូ រ៉ូបីអូ (Marco Rubio) ត្រូវគេស្គាល់ថាជាសមាជិកព្រឹទ្ធសភាពីរដ្ឋហ្លរីដា (Florida) ខាងគណបក្សសាធារណរដ្ឋ ដែលធ្លាប់ចុះហត្ថលេខាលើសេចក្តីស្នើច្បាប់ដាក់ទណ្ឌកម្មលើមន្ត្រីរាជរដ្ឋាភិបាលកម្ពុជា ដើម្បីទាមទារឱ្យស្ដារសិទ្ធិមនុស្ស និងប្រជាធិបតេយ្យចំនួន ៣លើករួចមកហើយ ក្នុងនោះ ក៏មានសេចក្តីស្នើច្បាប់ស្ដីពីលទ្ធិប្រជាធិបតេយ្យ និងសិទ្ធិមនុស្សនៅប្រទេសកម្ពុជាឆ្នាំ២០២១ ឬ S.3052 ផងដែរ។
លើសពីនេះទៀត លោក ម៉ាកូ រ៉ូបីអូ (Marco Rubio) ក៏ធ្លាប់បានបញ្ជាក់យ៉ាងច្បាស់ក្នុងសេចក្តីស្នើច្បាប់ស្ដីពីការទទួលខុសត្រូវ និងការវិលត្រឡប់នៃការវិនិយោគពីសហរដ្ឋអាមេរិកទៅប្រទេសកម្ពុជាវិញដែរកាលពីពេលកន្លងទៅថា បើប្រទេសកម្ពុជាមិនស្ដារលទ្ធិប្រជាធិបតេយ្យ និងសិទ្ធិមនុស្សឡើងវិញ និងមិនបង្ហាញតម្លាភាពជុំវិញមូលដ្ឋានទ័ពជើងទឹករាមទេ សហរដ្ឋអាមេរិកក៏នឹងមិនផ្តល់ជំនួយគ្រប់បែបយ៉ាងដល់ប្រទេសកម្ពុជាដែរ។
សូមរំឭកថា៖ រដ្ឋមន្ត្រីកិច្ចការបរទេសសហរដ្ឋអាមេរិក ប្រៀបបានជាសេនាបតីខាងកិច្ចការក្រៅប្រទេស មេកោយខាងកិច្ចការទូតដែលបំពេញភារកិច្ចអនុវត្តតាមគោលការណ៍នយោបាយដាក់ចេញដោយប្រធានាធិបតីកាន់អំណាចខាងកិច្ចការប្រាស្រ័យជាមួយប្រទេសដទៃក្នុងពិភពលោក។
រដ្ឋធានីវ៉ាស៊ីនតុន អ្នកនយោបាយអាមេរិកាំងដែលប្រកាន់ក្បួនច្បាប់ធរមានតាមរដ្ឋធម្មនុញ្ញ មានការព្រួយបារម្ភចំពោះប្រធានាធិបតីថ្មីដែលមិនសូវឈរលើគោលការណ៍ច្បាប់ ចង់រំលាយរដ្ឋធម្មនុញ្ញ រំលាយក្រសួងខ្លះ ដោយសំអាងថាលោកមានស្ថាប័នខាងគណបក្សសាធារណរដ្ឋក្នុងសភាទាំងពីរដែលមានសំឡេងច្រើន និងតុលាការកំពូលចាំគាំទ្រ។ លោកចង់កាត់ផលប្រយោជន៍ជួយសង្គម ធ្វើឯកជនូបនីយកម្ម គឺដាក់ឲ្យក្រុមហ៊ុនឯកជនធ្វើជំនួញពីធនធានសន្តិសុខសង្គម ហៅថា Social Security សម្រាប់ពលរដ្ឋចូលនិវត្តន៍។
ក្រៅតែពីគំនិតប្រកាន់បក្ស ពលរដ្ឋអាមេរិកាំងមើលឃើញថា ប្រធានាធិបតីថ្មីមិនសូវអើពើនឹងបញ្ហាសីលធម៌ យុត្តិធម៌ សមធម៌ សប្បុរសធម៌ មនុស្សធម៌នោះឡើយ ហើយគេចោទថាលោកចង់ក្លាយខ្លួនជាមេដឹកនាំប្រើអំណាចផ្ដាច់ការតាមអំពើចិត្តទៀតផង។
មជ្ឈដ្ឋានខ្មែរខ្លះសួរថា បើមេដឹកនាំសហរដ្ឋអាមេរិកប្រកាន់ចិត្តគំនិត និងជំហរបែបនេះនោះ តើពលរដ្ឋខ្មែរនៅឯប្រទេសកម្ពុជាសង្ឃឹមលើមហាអំណាចសហរដ្ឋអាមេរិកបានប៉ុនណាបួនឆ្នាំទៅមុខ?៕
© 2024, ឌឹ ខេមបូឌា ដេលី. All rights reserved.