សាលាដំបូងខេត្តព្រះសីហនុ នាថ្ងៃទី៨ ខែមករា បានសម្រេចផ្ដន្ទាទោសជនជាតិចិនតៃវ៉ាន់ ១០នាក់ ដាក់ពន្ធនាគារអស់មួយជីវិត និងពិន័យជាប្រាក់ម្នាក់ៗចំនួន ១០០លានរៀល ពាក់ព័ន្ធករណីផលិត និងរក្សាទុកសារធាតុញៀនទម្ងន់ ១៤តោន។
តាមសេចក្ដីប្រកាសរបស់សាលាដំបូងខេត្តព្រះសីហនុ បានឲ្យដឹងថា ករណីនេះជាបទប៉ុនប៉ងផលិតដោយខុសច្បាប់នូវសារធាតុញៀន ផលិត រក្សាទុក និងជួញដូរដោយខុសច្បាប់នូវសារធាតុគីមីផ្សំ ដែលជាបទល្មើសព្រហ្មទណ្ឌ តាមបញ្ញត្តិមាត្រា២៩ មាត្រា៤៧ និងមាត្រា៥៤ នៃច្បាប់ស្ដីពីការត្រួតពិនិត្យគ្រឿងញៀន និងពីបទសម្អាតប្រាក់ តាមបញ្ញត្តិមាត្រា៣៨ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
ប្រភពដដែលអះអាងថា ការផ្ដន្ទាទោសឱ្យជាប់ពន្ធនាគារអស់មួយជីវិត ដោយយោងលើបទល្មើសព្រហ្មទណ្ឌដែលមានចែងឱ្យផ្ដន្ទាទោសតាមបញ្ញត្តិមាត្រា២៩ មាត្រា៤៧ និងមាត្រា៥៤ នៃច្បាប់ស្ដីពីការត្រួតពិនិត្យគ្រឿងញៀន និងពីបទសម្អាតសាច់ប្រាក់ ដែលជាបទល្មើសព្រហ្មទណ្ឌដែលត្រូវផ្ដន្ទាទោសតាមបញ្ញត្តិមាត្រា៣៨ នៃច្បាប់ស្ដីពីការប្រឆាំងការសម្អាតសាច់ប្រាក់ និងហិរញ្ញប្បទានភេរវកម្ម។
សេចក្ដីប្រកាសរបស់សាលាដំបូងខេត្តព្រះសីហនុ ចុះថ្ងៃទី០៩ ខែមករា ឆ្នាំ២០២៥ បានឲ្យដឹងថា ការសម្រេចផ្ដន្ទាទោសនេះ បន្ទាប់ពីសាលាដំបូងខេត្តព្រះសីហនុ បានបើកសវនាការជាសាធារណៈជាច្រើនលើកដើម្បីជំនុំជម្រះលើសំណុំរឿងព្រហ្មទណ្ឌ ចុះថ្ងៃទី០៥ ខែកក្កដា ឆ្នាំ២០២២ ពាក់ព័ន្ធនឹងបទល្មើសប៉ុនប៉ងផលិតដោយខុសច្បាប់នូវសារធាតុញៀន ផលិត រក្សាទុក និងជួញដូរដោយខុសច្បាប់នូវសារធាតុគីមីផ្សំ និងសម្អាតសាច់ប្រាក់។
ប្រភពដដែលអះអាងថា ជនល្មើសបានប្រព្រឹត្តនៅភូមិស្ទឹងឆាយខាងត្បូង ឃុំស្ទឹងឆាយ ស្រុកកំពង់សីលា និងនៅភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ កាលពីអំឡុងឆ្នាំ២០២២ ហើយគ្រឿងញៀនទាំងអស់ត្រូវបានរឹបអូស និងបំផ្លាញចោល។
កាលពីខែកក្កដា ឆ្នាំ២០២២ ជនជាតិចិនតៃវ៉ាន់ចំនួន ០៧នាក់ ត្រូវបានសមត្ថកិច្ចជំនាញនៃមន្ទីរប្រឆាំងគ្រឿងញៀន ធ្វើការឃាត់ខ្លួនពាក់ព័ន្ធរក្សាទុកសារធាតុញៀន និងគីមីផ្សំជាង ១៤តោននៅខេត្តព្រះសីហនុ។
ប្រតិបត្តិការបង្ក្រាបនេះ សមត្ថកិច្ចក៏បានដកហូតវត្ថុតាងរួមមាន សារធាតុគីមី និងគីមីផ្សំចំនួន ១៤តោន និង ១៦០គីឡូក្រាម ឧបករណ៍សម្ភារៈកែច្នៃផលិត រួមមានឆ្នាំងប្រតិកម្មចំនួន ៥០គ្រឿង កែវប្រតិកម្មចំនួន ០៧គ្រឿង ម៉ាស៊ីនភ្លើងចំនួន ០៣គ្រឿង និងសម្ភារៈកែច្នៃជាច្រើនទៀត៕
© 2025, ឌឹ ខេមបូឌា ដេលី. All rights reserved.