អ្នកវិភាគនយោបាយ ព្រមានថា ឱ្យតែត្រកូលហ៊ុននៅតែបន្តដឹកនាំប្រទេសជាតិ កោះគុតនៅតែក្លាយជាឧបករណ៍នយោបាយរបស់ពួកគេក្នុងការដោះដូរឱ្យត្រកូលស៊ីណាវ៉ាត់ ជួយបោសសម្អាតក្រុមប្រឆាំងរស់នៅលើទឹកដីថៃ។
អ្នកវិភាគនយោបាយ លោក គឹម សុខ លើកឡើងក្នុងកម្មវិធីសមាជពលរដ្ឋខ្មែរ-អាមេរិកាំង ស្ដីពីបញ្ហាកោះគុត នៅរដ្ឋម៉ាហ្សាឈូសិត កាលពីថ្ងៃទី១៩ មករា ថា រដ្ឋាភិបាលខ្មែរដែលដឹកនាំដោយត្រកូលហ៊ុន កំពុងប្រើកោះគុតធ្វើជាឧបករណ៍នយោបាយដើម្បីឱ្យត្រកូលស៊ីណាវ៉ាត់ របស់លោក ថាក់ស៊ីន ជួយបោសសម្អាតបក្សប្រឆាំងដែលកំពុងរស់នៅលើទឹកដីថៃ សព្វថ្ងៃនេះ។
ក្រៅពីនេះទៀត គេក៏កំពុងគប់គិតគ្នាទាញយកផលប្រយោជន៍ពីដែនសមុទ្រត្រួតគ្នារវាងប្រទេសកម្ពុជា-ថៃ ទំហំ ២៦០០គីឡូម៉ែត្រក្រឡា ដែលមានទំហំទឹកប្រាក់ប្រមាណជា ៥០០ពាន់លានដុល្លារសហរដ្ឋអាមេរិក ដើម្បីចិញ្ចឹមអំណាចរបស់ត្រកូលទាំងពីរនេះ ក្នុងការជួយគ្នារក្សាអំណាចទៅវិញទៅមកដែរ ព្រោះលុយដែលបានមកពីការបូមប្រេង និងឧស្ម័នទាំងនោះ ត្រូវរក្សាទុកសម្រាប់ប្រើប្រាស់ក្នុងគ្រួសារពួកគេតែប៉ុណ្ណោះ។
លោកបន្តថា ឱ្យតែត្រកូលស៊ីណាវ៉ាត់ នៅតែមានអំណាច ក្រុមប្រឆាំងនៅតែត្រូវបានបង្ក្រាបដើម្បីជួយកម្ចាត់ឱ្យរដ្ឋាភិបាលត្រកូលហ៊ុនដដែល ចំណែកឯរដ្ឋាភិបាលត្រកូលស៊ីណាវ៉ាត់ នឹងខំរកមធ្យោបាយគ្រប់បែបយ៉ាងក្នុងបំណងកុំឱ្យប្រទេសកម្ពុជា ប្តឹងអំពីបញ្ហាកោះគុតទៅតុលាការអន្តរជាតិ ដើម្បីលួងចិត្តពលរដ្ឋថៃ កុំឱ្យទម្លាក់វង្សត្រកូលខ្លួនពីអំណាច។
លោក គឹម សុខ លើកឡើងថា មូលហេតុដែលលោក ហ៊ុន សែន ពឹងពាក់អំណាចត្រកូលស៊ីណាវ៉ាត់ របស់លោក ថាក់ស៊ីន នោះគឺដោយសារតែគាត់ដឹងយ៉ាងច្បាស់ថា បើអ្នកប្រជាធិបតេយ្យអាចប្រមូលផ្ដុំកម្លាំងបានពេញនៅលើទឹកដីថៃ នឹងអាចបង្កគ្រោះថ្នាក់យ៉ាងខ្លាំងដល់រដ្ឋាភិបាលក្មេងខ្ចីរបស់លោក ហ៊ុន ម៉ាណែត សព្វថ្ងៃនេះ។
ក្រៅពីសមាជ ពលរដ្ឋខ្មែរ-អាមេរិកាំង ស្ដីពីបញ្ហាកោះគុត នៅទីក្រុងឡូវែល រដ្ឋម៉ាហ្សាឈូសិត ក៏មានការដឹកនាំធ្វើបាតុកម្មដើម្បីទាមទារឱ្យរដ្ឋាភិបាលកម្ពុជា ប្តឹងថៃ ទៅកាន់តុលាការអន្តរជាតិនៅទីក្រុងឡងប៊ិច រដ្ឋកាលីហ្វ័រញ៉ា ផងដែរ។
ប្រជាពលរដ្ឋខ្មែរ-អាមេរិកាំងជាង ២០០នាក់ បានចូលរួមធ្វើបាតុកម្មកាលពីថ្ងៃទី១៩ ខែមករា ឆ្នាំ២០២៥ នៅក្នុងទីក្រុងឡងប៊ិច រដ្ឋកាលីហ្វ័រញ៉ា ទឹកដីសហរដ្ឋអាមេរិក ដើម្បីទាមទារឱ្យនាយករដ្ឋមន្ត្រីខ្មែរ លោក ហ៊ុន ម៉ាណែត ថាត្រូវតែបញ្ជាក់ថាមួយផ្នែកនៃកោះគុតជារបស់កម្ពុជា។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលបានដឹកនាំបាតុកម្មនេះ លើកឡើងថា ការធ្វើបាតុកម្មនេះ គឺដើម្បីជំរុញឱ្យរាជរដ្ឋាភិបាលត្រូវតែប្តឹងថៃ លើករណីកោះគុតទៅតុលាការអន្តរជាតិ និងទាមទារឱ្យលោក ហ៊ុន ម៉ាណែត លុបចោលអនុស្សរណៈយោគយល់ឆ្នាំ២០០១ (MOU 2001 ឬ MOU44) រវាងរដ្ឋាភិបាលខ្មែរ និងរដ្ឋាភិបាលថៃ ថែមទៀតផងដែរ៕
© 2025, ឌឹ ខេមបូឌា ដេលី. All rights reserved.