អតីតមេដឹកនាំបក្សប្រឆាំង លោក សម រង្ស៊ី ចោទថាអភិបាលរងក្រុងភ្នំពេញ លោក ឃ្លាំង ហួត គឺជាអ្នករៀបចំផែនការសម្លាប់តំណាងរាស្ត្រគណបក្សសង្គ្រោះជាតិ លោក លិម គិមយ៉ា ដោយផ្ទាល់ ក្រោមបញ្ជារបស់មេដឹកនាំបក្សកាន់អំណាច លោក ហ៊ុន សែន។
លោក សម រង្ស៊ី សរសេរលើទំព័រហ្វេសប៊ុករបស់ខ្លួននៅថ្ងៃទី២៧ មករា ថាលោកបានប្រមូលភស្តុតាងគ្រប់ជ្រុងអស់ហើយដែលបង្ហាញថា អភិបាលរងរាជធានីភ្នំពេញលោក ឃ្លាំង ហួត គឺជាអ្នករៀបចំផែនការសម្លាប់លោក លិម គិមយ៉ា ដោយផ្ទាល់ តាមការបង្គាប់បញ្ជារបស់លោក ហ៊ុន សែន។
លោក សម រង្សី បានបង្ហោះរូបថតលោក ឃ្លាំង ហួត ដែលធ្លាប់បានថតជាមួយលោក ហ៊ុន សែន និងលោក ថាក់ស៊ីន ស៊ីណាវ៉ាត់ ជាលក្ខណៈឯកជន និងរូបថតអ្នកស្រី យ៉ីងឡាក់ ស៊ីណាវ៉ាត់ ដែលបានថតជុំគ្នាជាមួយលោក ហ៊ុន សែន អ្នកស្រី ប៊ុន រ៉ានី និងលោក ឃ្លាំង ហួត រួមទាំងរូបថតលោក ឃ្លាំង ហួត ថតជាមួយលោក ថាក់ស៊ីន ស៊ីណាវ៉ាត់ តែពីរនាក់ផងដែរ។
កាលពីថ្ងៃទី២០ ខែមករា ឆ្នាំ២០២៥ នេះ លោក ហ៊ុន ម៉ាណែត បានចេញមុខបដិសេធថា ឪពុករបស់លោក គឺលោក ហ៊ុន សែន និងរដ្ឋាភិបាលដឹកនាំដោយគណបក្សប្រជាជនកម្ពុជា មិនជាប់ពាក់ព័ន្ធក្នុងអំពើឃាតកម្មលើលោក លិម គិមយ៉ា ឡើយ។
ទោះជាយ៉ាងណាក៏ដោយ សំណុំរឿងឃាតកម្មនេះក៏មិនទាន់អាចកាត់ផ្ដាច់ការសង្ស័យលើក្រុមគ្រួសារត្រកូលហ៊ុនដែរ ព្រោះជនសង្ស័យពីរនាក់ដែលត្រូវបានរកឃើញថាបានចូលរួមក្នុងអំពើឃាតកម្មនេះ នៅតែអាចលាក់ខ្លួននៅក្នុងប្រទេសកម្ពុជាដោយគ្មានការចាប់បញ្ជូនខ្លួនពីរាជរដ្ឋាភិបាលខ្មែរទៅឱ្យអាជ្ញាធរថៃ នៅឡើយទេ រហូតដល់ពេលនេះ ខណៈដែលអ្នកទាំងពីរនាក់នេះត្រូវគេដឹងថាសុទ្ធសឹងតែជាមនុស្សដែលជាប់ពាក់ព័ន្ធនឹងលោក ហ៊ុន សែន។
ឧទាហរណ៍ជាក់ស្តែង ជនសង្ស័យឈ្មោះ លី រតនៈរស្មី ត្រូវបានតែងតាំងជាទីប្រឹក្សារបស់លោក ហ៊ុន សែន កាលពីដើមឆ្នាំ២០២៤ ចំណែកឯជនសង្ស័យម្នាក់ទៀតដែលមានមុខនាទីជាអនុប្រធានផ្សារកណ្ដាល ក្នុងទីក្រុងភ្នំពេញ ឈ្មោះ ពេជ្រ គឹមស្រ៊ិន ត្រូវគេដឹងថាជាមនុស្សក្រោមបង្គាប់ដែលជិតស្និទ្ធនឹងអភិបាលក្រុងភ្នំពេញ លោក ឃួង ស្រេង និងអភិបាលរងរាជធានីភ្នំពេញ លោក ឃ្លាំង ហួត ផងដែរ។ លើសពីនេះ មន្ត្រីរដ្ឋាភិបាលអ្នកទាំងពីរនាក់នេះ ក៏ត្រូវគេដឹងថាជាមនុស្សជំនិតនឹងលោក ហ៊ុន សែន ថែមទៀត។ តាមឯកសារខ្លះ លោក ពេជ្រ គឹមស្រ៊ិន ធ្លាប់ធ្វើការងារក្រោមឱវាទអភិបាលរងខណ្ឌមានជ័យ ឈ្មោះ គៀង ចក់ ដែលមានរឿងជាប់ទាក់ទងនឹងសមាជិកបក្សប្រឆាំង លោក ផន ផាន់ណា ដែរ។
ទាក់ទិននឹងបញ្ហានេះ គេដឹងថាលោក ឃ្លាំង ហួត គឺជាមនុស្សម្នាក់ដែលតែងទទួលបញ្ជាពីលោក ហ៊ុន សែន ឱ្យតាមចាប់ខ្លួនក្រុមប្រឆាំងក្នុងប្រទេសថៃ កន្លងមក។ ភស្តុតាងជាក់ស្តែងកាលពីចុងខែកញ្ញា ឆ្នាំ២០២៤ ប្រធានព្រឹទ្ធសភាកម្ពុជា លោក ហ៊ុន សែន បានបញ្ជាឱ្យលោក ឃ្លាំង ហួត តាមចាប់ខ្លួនសកម្មជនបក្សប្រឆាំង លោក ផន ផាន់ណា ដែលកំពុងរស់នៅដោយភៀសខ្លួនក្នុងប្រទេសថៃ យកទៅកម្ពុជាវិញជាដាច់ខាត ទោះជាត្រូវស្លាប់ ឬរស់ក៏ដោយ។
ទាក់ទងនឹងរឿងបែបហ្នឹង លោក ហ៊ុន សែន ក៏បានបញ្ជាលោក ឃ្លាំង ហួត ឱ្យភ្ជាប់ទំនាក់ទំនងកម្លាំងសមត្ថកិច្ចកម្ពុជាជាមួយអាជ្ញាធរថៃ តាមបំបាត់ចោលក្រុមប្រឆាំងដែលកំពុងជ្រកកោនក្នុងប្រទេសថៃ ទាំងអស់ផងដែរ៕
© 2025, ឌឹ ខេមបូឌា ដេលី. All rights reserved.