អតីតនាយករដ្ឋមន្ត្រី ប្រធានព្រឹទ្ធសភា ប្រធានគណបក្សប្រជាជនកម្ពុជា លោក ហ៊ុន សែន ដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ ចាប់ពីថ្ងៃទី០៦ ដល់ថ្ងៃទី០៧ ខែកុម្ភៈ ឆ្នាំ២០២៥ តបតាមការអញ្ជើញពីប្រធានរដ្ឋសភាឡាវ។
សេចក្ដីប្រកាសព័ត៌មានពីព្រឹទ្ធសភា ដែលចេញផ្សាយនៅថ្ងៃទី៥ កុម្ភៈ នេះ បានឱ្យដឹងថា ទស្សនកិច្ចរបស់លោក ហ៊ុន សែន ទៅកាន់សាធារណរដ្ឋប្រជាធិបតេយ្យប្រជាមានិតឡាវ នឹងផ្តល់សន្ទុះថ្មីក្នុងការពង្រឹង និងលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ឱ្យកាន់តែរឹងមាំស៊ីជម្រៅនិងប្រកបដោយផ្លែផ្កាបន្ថែមទៀត។
សេចក្តីប្រកាសព័ត៌មានដដែលបានឲ្យដឹងថា សមាសភាពគណៈប្រតិភូអមដំណើរក្នុងទស្សនកិច្ចនេះរួមមាន លោក ស ខេង ឧត្ដមទីប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា លោក ទៀ បាញ់ ឧត្ដមទីប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា អ្នកស្រី ម៉ែន សំអន ឧត្ដមទីប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាប្រធានគណៈទាក់ទងបរទេសនៃគណបក្សប្រជាជនកម្ពុជា ព្រមទាំងសមាជិកព្រឹទ្ធសភា រដ្ឋសភា និងថ្នាក់ដឹកនាំសំខាន់ៗនៃស្ថាប័ននីតិប្បញ្ញត្តិ និងគណបក្សប្រជាជនកម្ពុជា។
នៅក្នុងឱកាសទស្សនកិច្ចនេះ លោក ហ៊ុន សែន នឹងមានជំនួបទ្វេភាគីជាមួយបណ្ឌិត សៃសំផន ភូមវិហាន ប្រធានរដ្ឋសភាឡាវ ជួបពិភាក្សាការងារជាមួយបណ្ឌិត សនសៃ ស៊ីផាន់ដន នាយករដ្ឋមន្ត្រីឡាវ និងធ្វើជាសហប្រធានជាមួយលោក ថងលូន ស៊ីស៊ីលីត ប្រធានគណៈប្រធានរដ្ឋឡាវ និងជាអគ្គលេខាធិការគណបក្សប្រជាជនបដិវត្តន៍ឡាវ ដឹកនាំកិច្ចប្រជុំកំពូលលើកទី១៥ រវាងគណបក្សប្រជាជនកម្ពុជា ឈ្មោះដើម បក្សប្រជាជនបដិវត្តន៍កម្ពុជា និងបក្សប្រជាជនបដិវត្តន៍ឡាវ។
ក្រុមអ្នកឃ្លាំមើលសង្គមលើកឡើងថា ដំណើរទស្សនកិច្ចរបស់លោក ហ៊ុន សែន នៃប្រទេសកម្ពុជាគួរតែពិភាក្សាបញ្ហាណាដែលអាចនាំប្រយោជន៍មកជូនជាតិ ក៏ដូចជាប្រជាពលរដ្ឋខ្មែរ ដូចជា បញ្ហាព្រំដែនរវាងប្រទេសទាំងពីរដែលមិនទាន់បញ្ចប់ការបោះបង្គោលព្រំដែននៅឡើយ និងបញ្ហាគ្រឿងញៀនដែលជួញដូរនាំពីប្រទេសឡាវ ចូលមកប្រទេសកម្ពុជា។
បើតាមលទ្ធផលនៃដំណើរទស្សនកិច្ចរបស់លោក ហ៊ុន សែន កាលពីឆ្នាំ២០២៣ គណៈកម្មការចម្រុះព្រំដែនកម្ពុជា និងឡាវ បានសម្រេចក្នុងការកំណត់ខ្សែព្រំដែនរួមនៃប្រទេសទាំងពីរបានប្រមាណ ៨៦% មានការបោះបង្គោលព្រំដែនលើដីជាក់ស្តែងបានចំនួន ១២១បង្គោល។ ភាគីទាំងពីរក៏បានឯកភាពបន្តគាំទ្រគ្នាទៅវិញទៅមកក្នុងវេទិកាតំបន់ និងអន្តរជាតិ ជាពិសេសក្នុងក្របខ័ណ្ឌអាស៊ាន និងអង្គការសហប្រជាជាតិ។ កាលនោះ លោក ហ៊ុន សែន បានប្រកាសគាំទ្រឡាវ ជាប្រធានអាស៊ានប្តូរវេនក្នុងឆ្នាំ២០២៤។
អ្នកសង្កេតការណ៍មួយចំនួនទៀតយល់ថា បើទៅពិភាក្សាជាមួយភាគីឡាវ លើបញ្ហាព្រំដែន ជំនួញ និងគ្រឿងញៀន នាយករដ្ឋមន្ត្រី ហ៊ុន ម៉ាណែត ប្រមុខរាជរដ្ឋាភិបាលគួរតែដឹកនាំកិច្ចការនេះផ្ទាល់តាមមុខនាទីរបស់ខ្លួន។ មួយវិញទៀត ទស្សនកិច្ចលើកនេះទំនងជាទៅពន្យល់ និងធានាអះអាងនូវការរក្សាទំនាក់ទំនងប្រពៃណីយុទ្ធសាស្ត្រសាមគ្គីភាពរវាងប្រទេស និងប្រជាជនទាំងពីរជាអតីតយុទ្ធមិត្ត ដែលតស៊ូក្នុងក្របខ័ណ្ឌបក្សកុម្មុយនីស្តឥណ្ឌូចិន ជាពិសេសបកស្រាយពន្យល់អំពីការប្រកាសដកខ្លួនពីតំបន់អភិវឌ្ឍន៍ត្រីកោណ (CLV-DTA)។ ថ្មីៗនេះ ទេសចរបរទេសដែលមានបំណងទៅលេងនៅតំបន់នោះ អាជ្ញាធរមូលដ្ឋានហាមមិនឲ្យចូល ដែលផ្ទុយពីអ្វីលោក ហ៊ុន ម៉ាណែត បានប្រកាសថាអ្នកណាក៏ទៅលេងបាននោះ។
គួរបញ្ជាក់ផងដែរថា៖ តាមឯកសារនិយាយអំពីបដិវត្តន៍បុគ្គលក្នុងគេហទំព័រ ម៉ាក្សីស-ឡេនីនិស្ត ក្លឹបអាន (Marxist-Leninist Reading Club) មេដឹកនាំនៃចលនា និងបក្សប្រជាជនបដិវត្តន៍ឡាវ តាំងពី ប៉ាថេតឡាវ ដល់ ឡាវហាក់សាត ភាគច្រើនមានដើមកំណើតជាជនជាតិយៀកណាម។ ឧទាហរណ៍ដូចជាមេបដិវត្តន៍ក្នុងក្របខ័ណ្ឌចលនាយៀកមិញ កៃសន ភូមិវិហាន ដែលមានឈ្មោះដើម ង្វៀង កៃសុង មានឪពុកឈ្មោះ ង្វៀង ទ្រីលួន និងម្តាយឈ្មោះ ដក។ កៃសន ភូមិវិហាន និងភរិយា ថងវិន ភូមិវិហាន មានកូនប្រុសម្នាក់ឈ្មោះ សៃសំផន ភូមិវិហាន ដែលជាប្រធានសភាប្រជាជន ឬសភាតំណាងរាស្ត្របច្ចុប្បន្ននេះ៕
© 2025, ឌឹ ខេមបូឌា ដេលី. All rights reserved.