លោក ហ៊ុន ម៉ាណែត ឆ្លើយតបឌឺដងទៅក្រុមប្រឆាំងនៅក្រៅប្រទេសដែលតែងអំពាវនាវឲ្យពលរដ្ឋក្រោកឈរឡើងប្រឆាំងនឹងរដ្ឋាភិបាលរបស់លោក ដោយប្តូរមកវិញនូវការក្រោកឈរឡើងទៅបោះឆ្នោតនៅរៀងរាល់ ៥ឆ្នាំម្តង ដើម្បីផ្តល់លទ្ធភាពឲ្យលោកធ្វើការងារបន្តទៀត។
នៅក្នុងពិធីចែកសញ្ញាបត្រដល់និស្សិតវិទ្យាស្ថាន វ៉ាន់ដា ព្រឹកថ្ងៃទី១១ ខែមីនា ឆ្នាំ២០២៥ នេះ លោក ហ៊ុន ម៉ាណែត ជំរុញឲ្យពលរដ្ឋក្រោកឈរឡើងទៅបោះឆ្នោតនៅរៀងរាល់ ៥ឆ្នាំម្តង ខណៈមានពលរដ្ឋជាង ៨០% បានបោះឆ្នោតផ្តល់លទ្ធភាពឲ្យរដ្ឋាភិបាលរបស់លោកធ្វើការបន្ត។ លោកថា នៅក្នុងប្រទេសប្រជាធិបតេយ្យ គេទុកឱកាសឲ្យរដ្ឋាភិបាលធ្វើការ មិនមែនបបួលគ្នាទៅទម្លាក់រដ្ឋាភិបាលនៅក្រោយការបោះឆ្នោតបាន ១ឆ្នាំនោះទេ។
លោក ហ៊ុន ម៉ាណែត និយាយថា គ្មានរដ្ឋាភិបាលណានៅក្នុងពិភពលោកដែលមិនប្រឈមនឹងបញ្ហាទេ ហើយថាកៅអីរបស់លោក គឺជាកៅអីក្តៅ ជាកៅអីសម្រាប់ដោះស្រាយសំណូមពរ និងដោះស្រាយបញ្ហារបស់ពលរដ្ឋ។
អតីតប្រធានគណបក្សសង្គ្រោះជាតិ លោក សម រង្ស៊ី ថ្លែងក្នុងវីដេអូឃ្លីបមួយលើទំព័រហ្វេសប៊ុករបស់លោកថា កូនៗរបស់លោក ហ៊ុន សែន ដូចជាលោក ហ៊ុន ម៉ាណែត ដែលជានាយករដ្ឋមន្ត្រី លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងលោក ហ៊ុន ម៉ានិត ជាអគ្គមេបញ្ជាការកងទ័ពជើងគោក បានឡើងកាន់តំណែងតាមអំណាចឪពុក។
លោក សម រង្ស៊ី កាលពីឆ្នាំ២០១៨ ក្នុងពេលលោកស្ថិតនៅបរទេស បានបង្ហោះសារលើទំព័រហ្វេសប៊ុករបស់លោក អំពាវនាវឲ្យពលរដ្ឋកុំទៅបោះឆ្នោតនាចុងខែកក្កដា ឆ្នាំ២០១៨ ប្រសិនបើមិនមានវត្តមានគណបក្សប្រឆាំងចូលរួម។ លោកក៏បានអំពាវនាវដល់អ្នកសង្កេតការណ៍ទាំងជាតិ និងអន្តរជាតិ កុំទៅចូលរួមសង្កេតការណ៍ ដោយថាការបោះឆ្នោតនាពេលនោះជាការបោះឆ្នោតក្លែងក្លាយ៕
© 2025, ឌឹ ខេមបូឌា ដេលី. All rights reserved.