អ្នកឃ្លាំមើលសង្គមអះអាងថា កូនៗរបស់លោក ហ៊ុន សែន ជាគ្រាប់ពេជ្រមែន ឬមិនមែន គឺវាអាស្រ័យទៅលើសមត្ថភាពផ្ទាល់របស់ម្ចាស់ខ្លួនប៉ុណ្ណោះដែលអាចបញ្ជាក់បាន។
ការអះអាងនេះ ធ្វើឡើងនៅបន្ទាប់ពីលោក ហ៊ុន សែន បានអួតជាសាធារណៈថា កូនៗរបស់គាត់សុទ្ធតែជាគ្រាប់ពេជ្រសម្រាប់ប្រទេសកម្ពុជា។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១៤ មីនា នេះថា ក្នុងនាមជាឪពុកដែលចង់លើកតម្កើងកូនខ្លួនឯងមិនមែនជារឿងខុសឆ្គងអ្វីនោះទេ ប៉ុន្តែមិនប្រាកដថាគាត់គឺជាគ្រាប់ពេជ្រសម្រាប់ប្រទេសកម្ពុជា ឬសម្រាប់ពលរដ្ឋខ្មែរនោះឡើយ។
លោក សេក សុជាតិ លើកឡើងថា ដើម្បីឱ្យកូនប្រុសរបស់គាត់ទាំង ៣នាក់ក្លាយជាគ្រាប់ពេជ្រសម្រាប់ពលរដ្ឋខ្មែរពិតប្រាកដ ទាល់តែគាត់អាចដឹកនាំប្រទេសទៅរកភាពរីកចម្រើន និងផ្តល់ផលប្រយោជន៍ជូនជាតិមាតុភូមិ នោះទើបក្លាយជាគ្រាប់ពេជ្រសម្រាប់ជាតិ ឬជាគ្រាប់ពេជ្រក្នុងចិត្តរបស់ពលរដ្ឋពិតប្រាកដ។
លោកបន្តថា ដើម្បីធ្វើកិច្ចការជាប្រយោជន៍ជាតិបាន ទាល់តែគាត់អាចបញ្ចប់វិបត្តិនយោបាយ ធានាឱ្យបាននូវប្រព័ន្ធយុត្តិធម៌សង្គម លុបបំបាត់អំពើពុករលួយ លុបបំបាត់អំពើឧក្រិដ្ឋកម្ម លុបបំបាត់នូវរបបដឹកនាំតាមរយៈខ្សែស្រឡាយបក្ខពួក និងធានាបាននូវការលើកស្ទួយលទ្ធិប្រជាធិបតេយ្យ រួមទាំងការធានាបាននូវការគោរពសិទ្ធិមនុស្សផងដែរ។
លោក សេក សុជាតិ បញ្ជាក់ថា បើកូនៗរបស់លោក ហ៊ុន សែន អាចដឹកនាំប្រទេសឱ្យដូចការចង់បានរបស់ពលរដ្ឋមែននោះ ទោះជាលោក ហ៊ុន សែន មិននិយាយក៏ពលរដ្ឋទទួលស្គាល់ថាជាគ្រាប់ពេជ្រដែរ។
កាលពីថ្ងៃទី១៣ មីនា មេដឹកនាំបក្សកាន់អំណាច លោក ហ៊ុន សែន បានសរសេរលើទំព័រហ្វេសប៊ុករបស់លោកថា ក្នុងរយៈពេលជាង ៤០ឆ្នាំនេះ លោកទទួលជោគជ័យយ៉ាងធំធេងក្នុងការបណ្តុះបណ្តាលកូនៗរបស់លោក រហូតក្លាយជាគ្រាប់ពេជ្រ ឬដាវដែលកំពុងសំលៀងដ៏មុត។
ក្រុមអ្នកសង្កេតការណ៍លើកឡើងថា តំណែងកូនៗរបស់លោក ហ៊ុន សែន ដែលកំពុងដឹកនាំប្រទេសកម្ពុជានៅពេលនេះ មិនមែនបានមកដោយសារសមត្ថភាពក្រោមការបោះឆ្នោតគាំទ្រពីពលរដ្ឋនោះទេ គឺបានមកដោយសារលោក ហ៊ុន សែន ជាអ្នកលើកបន្តុប ដូច្នេះពួកគេមិនសក្ដិសមជាគ្រាប់ពេជ្រសម្រាប់ពលរដ្ឋខ្មែរឡើយ ព្រោះពួកគេត្រឹមជាអ្នកប្លន់ឆន្ទៈពលរដ្ឋម្ចាស់ឆ្នោតតែប៉ុណ្ណោះ។
ជាក់ស្តែង គេកត់សម្គាល់ឃើញថា ចាប់តាំងពីលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីបន្តពីលោក ហ៊ុន សែន ដែលជាឪពុករយៈពេលជាង ១ឆ្នាំមកនេះ ការសម្រេចផែនការជាតិធំៗ គឺលោក ហ៊ុន សែន ជាអ្នកអារកាត់ពីលើលោក ហ៊ុន ម៉ាណែត ជានាយករដ្ឋមន្ត្រីស្ទើរតែគ្រប់កិច្ចការទាំងអស់៕
© 2025, ឌឹ ខេមបូឌា ដេលី. All rights reserved.