អ្នកឃ្លាំមើលសង្គមដាក់ការសង្ស័យលើព្រះរាជក្រឹត្យដំឡើងឋានន្តរស័ក្តិថ្នាក់នាយឧត្តមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទដល់លោក ទៀ បាញ់ និងអ្នកស្រី ម៉ែន សំអន ថាជាការតែងតាំងខុសនីតិវិធីច្បាប់ ព្រោះគ្មានវត្តមានព្រះមហាក្សត្រនៅក្នុងប្រទេស។
លោក វ៉ន ចាន់ឡូត សរសេរលើគណនីហ្វេសប៊ុករបស់លោកកាលពីថ្ងៃទី១៦ ខែមីនា ឆ្នាំ២០២៥ នេះថា ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី បានយាងទៅពិនិត្យព្រះរាជសុខភាពនៅទីក្រុងប៉េកាំង ប្រទេសចិន តាំងពីថ្ងៃទី៣ ខែមីនា មកម៉្លេះ ហើយមកទល់ពេលនេះ ព្រះអង្គក៏មិនទាន់យាងត្រឡប់មកមាតុប្រទេសវិញដែរ។
លោក វ៉ន ចាន់ឡូត លើកឡើងថា បើព្រះមហាក្សត្រមិនទាន់យាងត្រឡប់មកប្រទេសកម្ពុជាវិញទេ តើព្រះអង្គអាចឡាយព្រះហស្តលេខាដោយរបៀបណាលើព្រះរាជក្រឹត្យដែលចុះថ្ងៃទី១៦ ខែមីនា នេះ ព្រោះគ្មានច្បាប់អនុញ្ញាតឱ្យប្រើព្រះនាម និងព្រះហត្ថលេខារបស់ព្រះអង្គពេលទ្រង់អវត្តមានផងនោះ។
អ្នកសិក្សាផ្នែកច្បាប់រូបនេះបញ្ជាក់ថា ក្នុងកាលៈទេសៈដែលអវត្តមានព្រះមហាក្សត្រ តាមច្បាប់គឺតម្រូវឱ្យប្រមុខរដ្ឋស្ដីទីទទួលភារកិច្ចជំនួស ប៉ុន្តែបើអវត្តមានព្រះមហាក្សត្រ ហើយនៅតែប្រើព្រះនាម និងព្រះហត្ថលេខារបស់ព្រះអង្គប្រថាប់លើលិខិតតែងតាំងផ្សេងៗទៀតនោះ គឺមានន័យថា លោក ហ៊ុន សែន ក្នុងនាមប្រមុខរដ្ឋស្ដីទីប្រមាថព្រះមហាក្សត្រយ៉ាងធ្ងន់ធ្ងរ ហើយការតែងតាំងខុសនីតិវិធីបែបនេះ ក៏ស្មើនឹងមិនឱ្យតម្លៃដល់អ្នកដែលត្រូវបានតែងតាំងនោះដែរ។
ការអះអាងនេះ ធ្វើឡើងបន្ទាប់ពីប្រធានព្រឹទ្ធសភា លោក ហ៊ុន សែន បានផ្សព្វផ្សាយនូវព្រះរាជក្រឹត្យចំនួនពីរដាច់ដោយឡែកពីគ្នា គឺព្រះរាជក្រឹត្យដំឡើងឋានន្តរស័ក្តិថ្នាក់នាយឧត្ដមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទជូនលោក ទៀ បាញ់ និងអ្នកស្រី ម៉ែន សំអន ក្នុងពេលដែលព្រះមហាក្សត្រអវត្តមានពីក្នុងប្រទេសនៅពេលនេះ។
លើព្រះរាជក្រឹត្យដំឡើងឋានន្តរស័ក្តិថ្នាក់នាយឧត្ដមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទនេះ មានព្រះហត្ថលេខា និងព្រះនាមរបស់ព្រះមហាក្សត្រ ស្របពេលដែលព្រះអង្គបានយាងចាកចេញពីមាតុប្រទេសតាំងពីដើមខែមីនា មកម្ល៉េះ ហើយរហូតមកទល់ពេលនេះ ក៏ព្រះអង្គមិនទាន់យាងត្រឡប់មកមាតុប្រទេសវិញដែរ។
មាត្រា៧ នៃរដ្ឋធម្មនុញ្ញចែងថា ព្រះមហាក្សត្រមិនអាចរំលោភបំពានបានឡើយ៕
© 2025, ឌឹ ខេមបូឌា ដេលី. All rights reserved.