នាយករដ្ឋមន្ត្រី ហ៊ុន ម៉ាណែត លើកឡើងថា កម្ពុជាមិនអាចប្រកួតប្រជែងសេដ្ឋកិច្ចជាមួយប្រទេសជិតខាង ឬប្រទេសដទៃបានទេ បើរដ្ឋមិនផ្តល់ការគាំទ្រដល់វិស័យឯកជនប្រកបដោយប្រសិទ្ធភាព។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ របស់ក្រសួងមុខងារសាធារណៈ នៅថ្ងៃទី២០ ខែមីនា ឆ្នាំ២០២៥ នេះ លោក ហ៊ុន ម៉ាណែត លើកឡើងថា គ្រាន់តែតម្លៃសេវារដ្ឋខ្ពស់ជាងប្រទេសដទៃ រួមទាំងមានភាពស្មុគស្មាញជាច្រើនទៀតនោះ គឺមានន័យថាប្រទេសកម្ពុជាមិនអាចប្រកួតប្រជែងសេដ្ឋកិច្ចជាមួយប្រទេសទាំងនោះរួចបាត់ទៅហើយ។
លោក ហ៊ុន ម៉ាណែត លើកឡើងបន្តថា រាជរដ្ឋាភិបាលកម្ពុជានឹងវះកាត់ តម្រឹម និងកែសម្រួលដើម្បីឲ្យមានប្រសិទ្ធភាពខ្ពស់ក្នុងការជួយវិស័យឯកជនលើការវិនិយោគឲ្យបានលឿន ស្ថិតក្នុងតម្លៃទាប នោះទើបកម្ពុជាអាចហៅអ្នកវិនិយោគឱ្យរកស៊ីនៅលើទឹកដីរបស់ខ្លួនបាន។
នាយករដ្ឋមន្ត្រីខ្មែររូបនេះបញ្ជាឱ្យមន្ត្រីតាមក្រសួងស្ថាប័ននានា រកវិធីកាត់បន្ថយការផ្តល់សេវាឱ្យកាន់តែមានប្រសិទ្ធភាព ជាពិសេសតម្លៃ បើមិនល្អជាងមុន តែមិនត្រូវឱ្យអាក្រក់ជាងមុននោះទេ។ ជាងនេះទៀត ក៏ត្រូវធ្វើការកែទម្រង់ជាប្រចាំដើម្បីឱ្យមានគណនេយ្យភាព និងការទទួលខុសត្រូវខ្ពស់ផងដែរ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២០ មីនា នេះថា កត្តាដែលធ្វើឱ្យធ្លាក់ចុះនូវការប្រកួតប្រជែងសេដ្ឋកិច្ចរបស់កម្ពុជាកន្លងមក គឺដោយសារលក្ខខណ្ឌនៃការផ្តល់សេវារបស់មន្ត្រីសាធារណៈគ្មានស្តង់ដាពិតប្រាកដ ហើយក្នុងនោះក៏ជាប់ពាក់ព័ន្ធនឹងអំពើពុករលួយធ្ងន់ធ្ងរដែរ។
លោក សេក សុជាតិ ជំរុញឱ្យរដ្ឋាភិបាលធ្វើកំណែទម្រង់ច្បាប់ពាណិជ្ជកម្មឱ្យតម្លាភាព គឺត្រូវបើកឱ្យមានការប្រកួតប្រជែងដោយស្មើភាព ព្រោះថាពិតមែនតែកម្ពុជាប្រកាន់គោលការណ៍ទីផ្សារសេរី ប៉ុន្តែគោលការណ៍នេះហាក់មិនត្រូវបានអនុវត្តឡើយ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ក្រៅពីកែសម្រួលការអនុវត្តច្បាប់ និងការអនុវត្តការងាររបស់មន្ត្រីថ្នាក់ក្រោម រួមទាំងការព្យាយាមលុបបំបាត់នូវអំពើពុករលួយគ្រប់ទម្រង់ និងគ្រប់រូបភាពនោះ រដ្ឋាភិបាលក៏ត្រូវកសាងហេដ្ឋារចនាសម្ព័ន្ធដើម្បីជួយសម្រួលដល់ការវិនិយោគនានាផងដែរ ដូចជា ការកសាងផ្លូវថ្នល់ ផ្លូវទឹក និងផ្លូវដែក ជាដើម ដើម្បីកាត់បន្ថយការចំណាយឱ្យអស់កាន់តែតិច ដែលនាំឱ្យទទួលផលចំណេញកាន់តែខ្ពស់។
ជុំវិញបញ្ហានេះ ក្រុមអ្នកសង្កេតការណ៍លើកឡើងថា កត្តាមួយចំនួនដែលធ្វើឱ្យកម្ពុជាមិនអាចប្រកួតប្រជែងសេដ្ឋកិច្ចជាមួយប្រទេសជិតខាងបាន ដូចជា ការបាត់បង់ប្រព័ន្ធអនុគ្រោះពន្ធ EBA ពីសហភាពអឺរ៉ុប និង GSP ពីសហរដ្ឋអាមេរិក អំពើពុករលួយ សមត្ថភាពជំនាញរបស់មន្ត្រីកម្ពុជា និងកម្សោយនៃការដឹកនាំរបស់នាយករដ្ឋមន្ត្រី ជាដើម ក្នុងនោះ កេរ្តិ៍ឈ្មោះស្អុយអសោចរបស់កម្ពុជាលើឆាកអន្តរជាតិ ក៏ជាឧបសគ្គដ៏ធំដែរ៕
© 2025, ឌឹ ខេមបូឌា ដេលី. All rights reserved.