 លើកឡើងថា ប្រសិនបើរដ្ឋាភិបាល និងក្រសួងការងារ មិនមានប្រព័ន្ធផ្តល់ជំនួយដែលល្អនៅនឹងកន្លែង នោះអាចនឹងធ្វើឲ្យកម្មករមួយចំនួនធំដែលរងគ្រោះដោយសារគ្រោះរញ្ជួយដីនៅប្រទេសថៃ អាចនឹងមិនទទួលបានជំនួយ។){kind=link}
ក្រុមបណ្ដាញការងារផ្នែកពលករ (Migrant Working Group) លើកឡើងថា ប្រសិនបើរដ្ឋាភិបាល និងក្រសួងការងារ មិនមានប្រព័ន្ធផ្តល់ជំនួយដែលល្អនៅនឹងកន្លែង នោះអាចនឹងធ្វើឲ្យកម្មករមួយចំនួនធំដែលរងគ្រោះដោយសារគ្រោះរញ្ជួយដីនៅប្រទេសថៃ អាចនឹងមិនទទួលបានជំនួយ។
ក្រុមបណ្ដាញការងារផ្នែកពលករ បានចេញរបាយការណ៍ជុំវិញការបាក់រលំអគារដោយសារគ្រោះរញ្ជួយដីក្នុងទីក្រុងបាងកក ប្រទេសថៃ កាលពីថ្ងៃទី១ មេសា នេះថា ក្រសួងការងារជារឿយៗផ្ដោតការទាក់ទងរបស់ខ្លួនតែជាមួយនិយោជកប៉ុណ្ណោះ ប៉ុន្តែតាំងពីមានហេតុការណ៍បាក់រលំអគារ រហូតមកដល់ពេលនេះ ក្រសួងការងារមិនទាន់មានទំនាក់ទំនងច្បាស់លាស់ជាមួយកម្មករនៅឡើយទេ។
ប្រភពដដែលអះអាងថា យោងតាមទិន្នន័យឆ្នាំ២០២៣ ដល់ឆ្នាំ២០២៥ ពលករចំណាកស្រុកធ្វើការសំណង់នៅក្នុងប្រទេសថៃ មានចំនួនសរុបជាង ៦សែននាក់ (៦៦៦១៣០នាក់) ក្នុងនោះមានពលករខ្មែរចំនួន ២៧% ផងដែរ។
ជុំវិញបញ្ហានេះ នាយកដ្ឋានរដ្ឋបាលការងារប្រទេសថៃ នៅថ្ងៃទី២ មេសា នេះ ចេញសេចក្ដីជូនដំណឹងដល់ពលកររងគ្រោះដោយសារគ្រោះរញ្ជួយដីក្នុងប្រទេសថៃ ថា ទាំងជនជាតិថៃ និងបរទេស អាចទទួលបានសំណងដូចគ្នា ក្នុងនោះជនរងគ្រោះដែលស្លាប់បាត់បង់ជីវិត នឹងទទួលបានការផ្ដល់សំណងជូនក្រុមគ្រួសាររហូតទៅដល់ ១០ឆ្នាំផងដែរ។
ពាក់ព័ន្ធនឹងគ្រោះរញ្ជួយដីនេះ ក្រសួងការងារ និងបណ្តុះបណ្តាលវិជ្ជាជីវៈរបស់កម្ពុជា បានចេញសេចក្តីប្រកាសព័ត៌មានកាលពីថ្ងៃទី៣១ មីនា ថា ពលករខ្មែរម្នាក់ឈ្មោះ មាស សាវ៉ាង ដែលមានទីលំនៅក្នុងស្រុកម៉ាឡៃ ខេត្តបន្ទាយមានជ័យ បានទទួលមរណភាព។
មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) សង្ស័យថានៅមានពលករខ្មែរជាច្រើននាក់បានបាត់ខ្លួនក្នុងហេតុការណ៍បាក់រលំអគារនេះ ខណៈពីរនាក់ប្តីប្រពន្ធដែលដឹងច្បាស់ថាបានបាត់ខ្លួនក្នុងហេតុការណ៍នេះ នៅមិនទាន់អាចរកឃើញនៅឡើយទេ។
របាយការណ៍អង្គការសង់ត្រាល់ បង្ហាញថា ពលករខ្មែរដែលធ្វើការក្នុងប្រទេសថៃ សព្វថ្ងៃនេះ មានចំនួនជាង ២លាននាក់ ក្នុងនោះ ពាក់កណ្តាល ឬស្មើនឹងប្រមាណជា ១លាននាក់ មិនមានឯកសារស្របច្បាប់ឡើយ។
សារព័ត៌មាន The Cambodia Daily មិនទាន់អាចទាក់ទងលោក ហេង សួរ រដ្ឋមន្ត្រីក្រសួងការងារ សុំព័ត៌មានបន្ថែមពីការបាត់ខ្លួនពលករខ្មែរក្នុងហេតុការណ៍បាក់រលំអគារនេះនៅឡើយទេ រហូតដល់ម៉ោងផ្សាយនេះ ដោយសារទូរសព្ទមិនចូល៕
© 2025, ឌឹ ខេមបូឌា ដេលី. All rights reserved.